2 Koronito 3

ꞌBa àzí ngale òyòsòzà oꞌdɨ yɨ̀ vɨɨ ɨnɨ

1Eꞌyo àma nɨ sɨ̀le vɨɨ ɨco ɨꞌda kɨ̀le àma lèe ɨꞌdoo àma ɨ̀nyàa díká lé, te ovʉʉ vɨ́nɨ kʉ. ꞌBa àlóo ɨ́ ací waragà be gíá ɨ̀cejʉ ànɨ ibú àzí nga kílílí rá. Te lèe àma ꞌó àma ꞌba alóo vɨɨ ɨnɨ lé acíjʉ́ gíá waragà be muria àmɨ bʉ nòsɨ̀kʉ àma nɨ acírɨ́a kristiani bʉ kʉ. 2Àmɨ ngʉlʉpɨ ꞌó ànɨ waragà àma ꞌyowa, ꞌbanɨ sɨ̀le àma àlʉàlʉ asíá, nìzà drʉ díká ꞌba drɨ́á nɨ́ làle nɨ̀ vɨɨ lé. 3Àmɨ ɨ̀cé àmɨ kɨ̀le àmɨ waragà ɨngale Kristo bʉ vɨɨ ɨ lé, létikoro àzí àma nɨ ngale Orɨ yɨ́ vɨɨ yɨ̀. Ovʉʉ Kristo sɨ̀ waragà vɨɨ kàlamʉ̀ sú yɨ̀ vɨ́nɨ kʉ te òkpo Orɨndɨ Orɨ awo ovʉle ɨdrɨ drʉ vɨɨ awo vɨɨ yɨ̀. Díká ovʉʉ sɨ̀le ɨrà rúá vɨ́nɨ kʉ te sɨ̀le asíá vɨɨ lé.

4Àma sɨ̀ eꞌyo ꞌdɨ̀vɨɨ ɨnɨ àrɨ̀yɨ̀kʉ àma nɨ ovʉle asíꞌbàzà be Orɨ drìa léti Kristo bʉ vɨɨ yɨ̀. 5Ovʉʉ kɨ́nɨ̀ àma ɨco eꞌyo ꞌo òkpo àma ꞌyowa yɨ̀ ra vɨ́ɨvɨɨ kʉ. Te òkpo àma ꞌyowa vɨɨ ɨnga Orɨ bʉ. 6Fè àma yɨ́ òkpo ovʉjʉ àzíꞌbá òyòsòzà oꞌdɨ vɨɨ ɨmbajʉ. Ovʉʉ waragà àzítáá òku Musa awo vɨɨ ɨmbajʉ vɨɨ ɨ kʉ te Orɨndɨ nɨ vɨɨ ɨmbajʉ ɨ. Àrɨ̀yɨ̀kʉ waragà àzítáá òku nɨ vɨɨ ɨ drìjàzà ji ɨ, te Orɨndɨ nɨ vɨɨ ɨ ɨdrɨ fe ɨ.

Òyòsòzà oꞌdɨ Orɨ awo vɨɨ

7Te ngà àzítáá Orɨ nɨ fèle àzí ngajʉ Musa gíá opale ɨrà rúá ndráánɨ́ dràjile vɨɨ tè caa dìzà angɨrɨ fèle ꞌba Isirali nɨ vɨɨ ɨnɨ yɨ́ Musa muleti ndrèjʉ kʉ vɨɨ be, 8acete mɨnɨ ɨgalea yɨ̀ àzítáá Orɨndɨ àwo àzí ngajʉ ɨdrɨ jii vɨɨ dìzàa ngaa mu ꞌdɨ̀vɨɨ nde ra kʉ yà? 9Àzítáá òku eꞌyo lile ꞌba drìa vɨɨ tè caa dìzà be, acete àzí eꞌyo kílílí jii vɨɨ dìzàa nɨ ngaa ovʉ ngòpɨ yà? 10Àrɨ̀yɨ̀kʉ dìzà ndráánɨ́ òkò vɨɨ òkpoa caa ace dìzà òyòsòzà oꞌdɨ vɨɨ awo vɨɨ tia kʉ. 11Ànɨ òyòsòzà òku vɨɨ dìzàa tè ovʉʉ angɨrɨ vɨ̀pɨ, acete òyòsòzà oꞌdɨ náni náni vɨɨ dìzà angɨrɨ ɨ̀gàtɨ ra.

12Tèvɨ́nɨ àma nɨ ovʉle asíꞌbàzà oꞌdɨ vɨɨ be vɨɨ yɨ̀, àma eꞌyo òlʉʉ òrì kokò drʉ ꞌdɨ̀ ɨ. 13Àma ovʉʉ Musa lé kʉ, nɨ drì aꞌbújʉ́ cɨ bòngo drì aꞌbújʉ́ vɨɨ yɨ̀ ꞌba Isirali nɨ vɨɨ ɨnɨ yɨ́ ògajʉ nɨ muleti ndrèjʉ sɨ̀ dìzà nɨ rɨrɨa àvɨ̀rɨa. 14Te ɨnɨ drìa òyò sòzà òku vɨɨ fɨɨ ngà kpere ꞌdò kʉ, ànɨyɨ̀ kpere àndrʉ̀, ɨ́ ànɨ drì aꞌbú bòngo drì aꞌbújʉ́ vɨɨ yɨ̀ cɨ ꞌbanɨ rɨrɨa òyòsòzà òku vɨɨ làrɨa. Te bòngo drì àꞌbújʉ́ vɨ́ɨ ꞌba wú vɨɨ dèe ꞌba àꞌɨ́ eꞌyo Kristo awo vɨɨ ɨ ka. 15Kpere káꞌdí àndrʉ̀ ꞌbanɨ àzítáá Musa awo vɨɨ làrɨa, ɨ́ ànɨ asísílé aꞌbú cɨ́ díká váá àzítáá ndee kʉ. 16Te ꞌbarʉʉ àloo tè Opɨ Yesu nɨ àꞌɨ̀ɨ ꞌba, ꞌba ngaa bòngo drì aꞌbújʉ́ vɨ́ɨ wùu ɨ̀rɨ drìa vɨɨ yɨ̀ ra. 17Ànɨ Opɨ nɨ Orɨndɨ nɨ, díká kara Orɨndɨ Opɨ awo vɨɨ nɨ ovʉjʉ vɨɨ alɨa drìwàlà cɨ. 18Acete àma drɨ́á ace drìa bòngo drì ombejʉ vɨɨ wùle ra vɨɨ ɨ́ ace dìzà Orɨ awo vɨɨ ndre ra díká va ra. Díká lè dìzà àlʉàlʉ Orɨndɨ Opɨ awo vɨɨ nɨ vɨɨ ɨ̀rɨ oja àma ɨ̀rɨ lé ònyɨ̀ drʉ angɨrɨ tʉ̀.

Currently Selected:

2 Koronito 3: MADI-URL

Highlight

Copy