2 Koronito 2

1Ànɨ ma ɨga eꞌyo ma asíá kɨ́nɨ̀, lè màá kàdrì àva kʉ manɨ mujʉ àmɨ yɨ́ así suzà fèjʉ cataa ma awo vɨɨ yɨ̀ kʉ. 2Àrɨ̀yɨ̀kʉ ma tè àmɨ yɨ́ así suzà fèe, acete àrɨ ɨnɨ muu má yɨ́ àyɨ̀kò fè nɨ̀ yà? Ovʉʉ té ꞌba manɨ ɨnɨ yɨ́ càndɨ fèle vɨɨ ɨnɨ ɨ kʉ yà? 3Eꞌyo ndee fè ma sɨ̀ waragà ma awo àsìjʉ vɨɨ vɨ́nɨ azílé ma tè drúsí drì kàa àmɨ bʉ, ma ngaa así suzà isú ꞌba lèle ma yɨ́ àyɨ̀kò fèle vɨɨ ɨnɨ bʉ kʉ benì. Ma ꞌbà así kɨ́nɨ̀, ma tè ovʉʉ àyɨ̀kò yɨ̀, àmɨ ngaa pàbaa ovʉʉ drɨ́á àyɨ̀kò yɨ̀ ɨ̀ndɨ̀. 4Ma sɨ̀ eꞌyo ꞌdɨ̀vɨɨ àmɨ yɨ́ càndɨ be, así suzà be díká mulia musí be, ovʉʉ àmɨ así yɨ́ càndɨ fèjʉ kʉ te lèjʉ ɨ̀cejʉ àmɨ yɨ́ ma lè àmɨ ngòpɨ yà vɨɨ ɨ.

ꞌBarʉʉ eꞌyo ònzɨ ꞌole vɨɨ trʉ̀jʉ vɨɨ

5ꞌBa àloo tè ibúu àrípi yɨ́ asísuzà fèe, ꞌoo eꞌyo ꞌdɨ̀vɨɨ kíríá ma be kʉ te léti àloo yɨ̀ ꞌo pàbaa eꞌyo ndee àmɨ drɨ́á be. Ma ꞌyo vɨɨ lé àrɨ̀yɨ̀kʉ ma lèe eꞌyoa ꞌba ɨ̀rɨ drìa òkpo drʉ kʉ 6Drìrima òꞌbɨ nɨ eꞌyo nzejʉ ɨ̀rɨ rúá vɨɨ ca ɨ̀rɨ yɨ́ rá. 7Ɨ̀ndɨ̀a lè àmɨ trʉ́ ɨ̀rɨ ra díká àmɨ òmɨ́ ɨ̀rɨ así azílé ngaa así suzà isú nyanya drʉ kʉ benì. 8Ànɨ ma lè àmɨ trʉ́ ɨ̀rɨ ra díká àmɨ ɨ̀cé ɨ̀rɨ yɨ́ kɨ́nɨ̀ àmɨ lè ɨ̀rɨ àsúú rá. 9Asísílé manɨ àmɨ yɨ́ waragà vɨɨ sɨ̀jʉ vɨɨ ɨ̀rɨ ndrèjʉ àmɨ ɨco obetaa vɨɨ tia ta ra ya vɨɨ ɨ díká àmɨ ɨco eꞌyo ma awo vɨɨ butia òbɨ ra yà vɨɨ ɨ. 10Àmɨ tè ꞌba àloo trʉ̀ʉ eꞌyo ɨ̀rɨ nɨ ꞌole ònzɨ vɨɨ yɨ̀ ra, ma pàbaa ɨ̀rɨ trʉ̀ ra. Díká ma tè ɨ̀rɨ trʉ̀ʉ eꞌyo lèle ɨ̀ trʉ́ ɨ̀rɨ ànɨyɨ̀ ra vɨɨ ɨnɨ alɨa, dèènaa ma trʉ ɨ̀rɨ Kristo rú yɨ̀ àmɨ eꞌyo yɨ̀. 11Ma ꞌo eꞌyo ꞌdɨ̀vɨɨ azílé sɨ̀tanɨ̀ tè muu àma drì arúu kʉ benì. Àrɨ̀yɨ̀kʉ àma nì ɨ̀rɨ awo otʉtaa ònzɨ vɨɨ ɨnɨ ra.

Òrì nɨ Paulo nɨ ꞌojʉ kúti Troasi nɨ vɨɨ alɨa vɨɨ

12Acete manɨ mujʉ Eꞌyo ba Kristo awo vɨɨ òlʉ̀jʉ Troasia vɨɨ yɨ̀, isú dèè Opɨ zì má yɨ́ léti ꞌba. 13Te ma orɨndɨ rɨ ɨmbʉ ɨmbʉ òrì yɨ́ àrɨ̀yɨ̀kʉ manɨ awɨle Àrɨmàonyɨ Kristiani drʉ Tito nɨ isúlé nàa àle kʉ vɨɨ yɨ̀. Ànɨ ma kʉ ɨnɨ ra, díká ma kodrì mu Makidonia.

14Te àma fé àwàꞌdɨ̀fóò Orɨ yɨ́ ti ɨ̀cɨma ɨ̀rɨ awo àma be sawà drɨ́á yɨ̀ àcì àma ꞌyowa màbúsù lé eꞌyo Kristo awo vɨɨ òlʉ̀rɨa vɨɨ ndèle ra vɨɨ yɨ̀. Orɨ àyʉ àma fèjʉ eꞌyo Kristo awo vɨɨ ꞌbanɨ nìjʉ díká ɨ̀rɨ nɨ nɨ ɨrejʉ wàkàkà àjíngùrú lé kara drɨ́á alɨa. 15Àrɨ̀yɨ̀kʉ àma ꞌo àma Orɨ yɨ́ kɨ̀le àjíngùrú lé Kristo awo ꞌba Kristo nɨ pale ra vɨɨ ɨnɨ ɨ̀sɨlɨa díká ꞌba mule drìjàzà alɨa vɨɨ ɨnɨ ɨ̀sɨlɨa. 16ꞌBa drìjàzà alɨa vɨɨ ɨnɨ yɨ́ àjíngùrú vɨɨ ɨ ngu ònzɨ àfa dràzà lé te ꞌba ɨ̀rɨ nɨ pale ra vɨɨ ɨnɨ yɨ́, àjíngùrú vɨɨ ɨ ngu ònyɨ̀ be. Acete àrɨ ɨco eꞌyo ꞌdɨ̀vɨ́ɨvɨɨ ꞌo ra nɨ̀ yà? 17Àma ꞌoo àma ꞌba alóo vɨɨ ɨnɨ lé oꞌdúkó Orɨ awo vɨɨ òlʉ̀jʉ òròdrí isújʉ́ kòꞌbò àfa ozízà drìa vɨɨ lé kʉ. Ɨ̀ndɨ̀a Kristo mulia àmá eꞌyo ada vɨɨ nze ɨ Orɨ drìlia kòꞌbò ꞌba ɨngaꞌba Orɨ bʉ vɨɨ ɨnɨ lé.

Currently Selected:

2 Koronito 2: MADI-URL

Highlight

Copy