1 Tesalonika 3
3
1Ànɨ àma nɨ òꞌbìjʉ eꞌyo ndee tia tajʉ kpé ꞌbá, àma ɨga ɨ̀rɨ ꞌyéè àma ɨ̀sɨle alóo vɨɨ ɨnɨ awɨjʉ àkú ìmgbélé Ateni nɨ vɨɨ alɨa. 2Ànɨ àma pè adrìmà Kristiani drʉ Timitayo àzí ngale àma be túàlʉ Orɨ yɨ́ eꞌyo ba Kristo awo vɨɨ ɨrejʉ vɨɨ tia, òkpo fèjʉ àmɨ yɨ́, díká àmɨ ɨ̀kajʉ àꞌɨ̀taa àmɨ ꞌyowa vɨɨ alɨa, 3azílé àmɨ ɨ̀sɨle àloo ɨrɨ isú òrì obetaa ꞌdɨ̀vɨɨ ɨnɨ yɨ̀ kʉ benì. Àmɨ nìra kílílí drʉ kɨ́nɨ̀ ɨnzamatara nɨ ngaa ovʉʉ cɨ àrɨ̀yɨ̀kʉ ꞌdɨ̀vɨɨ ɨ̀rɨ òtìtìa Orɨ awo àma yɨ́ vɨɨ ɨ. 4Adanɨa àma nɨ ibúríá ovʉrɨa àmɨ be, àma rɨ ji ꞌyo pàyɨ̀ àmɨ yɨ́ kɨ́nɨ̀, ꞌba ngaa àma ɨnzaa ra. Díká eꞌyo ndee oja nɨ ꞌo kòꞌbò àmɨ nɨ nìle ꞌba vɨɨ lé. 5Manɨ òꞌbìle eꞌyo ndee tia tale kpé vɨɨ yɨ̀, ma pè ànɨ Timitayo ti mujʉ eꞌyo ònìjʉ àꞌɨ̀taa àmɨ ꞌyowa vɨɨ drìa ꞌdɨ̀ ɨ. Ma ca òrì yɨ̀ àrɨ̀yɨ̀kʉ ma rɨ ɨga kɨ́nɨ̀, sɨ̀tanɨ̀ ɨco mu àmɨ obe ra, díká àzí àma nɨ ngale vɨɨ ɨco ca ace òròdríkó drʉ.
Oꞌdúkó ònyɨ̀be Timoteo nɨ jile vɨɨ
6Te Timitayo kàdrì ace ngajʉ àmɨ bʉ àle vɨɨ yɨ̀ àma bʉ yìle ꞌba, díká ji àma yɨ́ oꞌdúkó ònyɨ̀be àꞌɨ̀taa àmɨ ꞌyowa vɨɨ drìa àloo lètaa àmɨ ꞌyowa vɨɨ be ra. ꞌYo àma yɨ́ kɨ́nɨ̀, àmɨ́ ngà kírí rɨ eꞌyo ònyɨ̀be ɨga àma drìa àsúú díká àmɨ àva yɨ̀ lèjʉ drì fujʉ àma be kɨ̀le àma nɨ lèle pàbaa drì fule àmɨ be vɨɨ lé. 7Ànɨyɨ̀ adrímà Kristiani lá, càndɨ díká ɨnzamatara àma nɨ isúlé vɨɨ ɨnɨ alɨa, àma isú ɨ̀kataa àmɨ yɨ̀ àrɨ̀yɨ̀kʉ àmɨ nɨ ovʉle àꞌɨ̀taa be vɨɨ yɨ̀. 8Ànɨ àma àndrʉ̀ ovʉʉ àyɨ̀kò yɨ̀ ɨdrɨ àma ꞌyowa vɨɨ alɨa, àmɨ nɨ ka sòle kirikiri eꞌyo Opɨ awo vɨɨ alɨa vɨɨ yɨ̀. 9Àma ɨco àwàꞌdɨ̀fóò fe ngòpɨ Orɨ yɨ́ àmɨ eꞌyo yɨ̀ àma nɨ ɨ̀rɨ zirɨa ɨ̀rɨ nɨ àyɨ̀kò fèle àma yɨ́ àmɨ yɨ̀ vɨɨ yɨ̀ yà? 10Àma Orɨ nɨ zi así drɨ́á yɨ̀ iní ɨnɨ ìtú be, azílé ɨ̀rɨ fè àma ndré àmɨ díká benì, pàbaa àma kó àmɨ àzà àmɨ nɨ ɨcojʉ ka sòjʉ kirikiri àꞌɨ̀taa àmɨ ꞌyowa vɨɨ alɨa benì.
11Ànɨ àma zii kɨ́nɨ̀, Orɨ Ata àma ꞌyowa vɨɨ ɨ díká Opɨ àma ꞌyowa Yesu Kristo ɨnɨ ɨdé àma yɨ́ léti cajʉ àmɨ bʉ díká benì. 12Opɨ ɨ̀rɨ òtu lètaa àmɨ asíá vɨɨ àmɨ nɨ àmɨ lèjʉ àmɨ ɨ̀sɨlɨa cenɨ̀cenɨ̀ díká àmɨ nɨ ꞌba drɨ́á lèjʉ ɨ̀ndɨ̀, kɨ̀le àma nɨ ibúlé àmɨ lèle vɨɨ lé. 13Ɨ̀rɨ fè àmɨ yɨ́ así tezà azílé àmɨ ovʉ ɨ̀zatà ko drʉ díká Àlátárá drʉ Orɨ Ata àma ꞌyowa vɨɨ drìlia oꞌdú Opɨ Yesu nɨ mujʉ cajʉ ꞌba nɨ awo Àlátárá vɨɨ ɨbe vɨɨ yɨ̀. Amena.
Currently Selected:
1 Tesalonika 3: MADI-URL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved
