1 Tesalonika 2

Azí Paulo nɨ ngale Tesalonika vɨɨ

1Adrímà Kristiani lá, àmɨ nìra cataa ndráánɨ́ àma nɨ cajʉ àmɨ bʉ vɨɨ ovʉʉ òròdríkó drʉ kʉ. 2Kɨ̀le àmɨ nɨ nìle ra vɨɨ lé, ꞌba ibú àma ɨnzaa díká àma ɨꞌdaa àkú ìmgbélé Filipia, te àzàkozà Orɨ àma ꞌyowa vɨɨ awo vɨɨ yɨ̀, àma isú así òkpo eꞌyo ba ɨ̀rɨ awo vɨɨ òlʉ̀jʉ àmɨ yɨ́ rá, káꞌdí àgatà nɨ ovʉjʉ angɨrɨ ra kpé. 3Àrɨ̀yɨ̀kʉ eꞌyo àma nɨ jile àmɨ yɨ́ vɨɨ ovʉʉ ɨ̀nzò nɨ kʉ nòsɨ̀kʉ eꞌyo òndi drʉ nɨ kʉ àloo ovʉʉ àma lè àmɨ ole ole vɨ́nɨ kʉ. 4Ɨ̀ndɨ̀a ráaka àma rɨ eꞌyo ndee òlʉ ꞌba Orɨ nɨ òpèle ìgènizà drʉ eꞌyo ba nɨ awo vɨɨ òlʉ̀jʉ vɨɨ ɨnɨ drʉ. Ovʉʉ àma lè àyɨ̀kò fe ꞌbandépi yɨ́ ɨ vɨ́ɨvɨɨ kʉ, te Orɨ eꞌyo àma asíá vɨɨ amale ráká vɨɨ yɨ́. 5Àmɨ nìra àma awɨɨ àmɨ ɨ̀pòyɨ ɨ̀nzò drʉ kʉ àma nɨ eꞌyo òlʉ̀rɨa, díká àma awɨɨ àma así zi àmɨ yɨ́ cɨ vɨ́ɨvɨɨ kʉ. Sàdénì àma ꞌyowa vɨɨ Orɨ ɨ. 6Àma ꞌbàa así ndráánɨ́ ìnzìtaa isújʉ́ ꞌba àloo bʉ ɨ kʉ, káꞌdí àmɨ bʉ nòsɨ̀kʉ ꞌba alóo ɨnɨ bʉ kʉ.

Kɨ̀le kòndè Kristo awo vɨɨ ɨnɨ drʉ, sìtà àꞌbaa ra àma nɨ ndráánɨ́ ovʉjʉ àmɨ drìa térí drʉ àfa àma nɨ lèle vɨɨ ɨnɨ àꞌíjʉ àmɨ bʉ. 7Te àma rɨ ovʉ àmɨ ɨ̀sɨlɨa ìnzìtaa yɨ̀, kɨ̀le ayo nɨ asɨle anzɨ nyɨ́rɨ́ nɨ awo vɨɨ ɨnɨ yɨ̀ vɨɨ lé.#2:7 Eꞌyo sɨ̀zà alóo ꞌyó kɨ́nɨ̀ àma rɨ ovʉ kɨ̀le anzɨ nyɨ́rɨ́. 8Àma nɨ àmɨ lèle caaꞌdi vɨɨ yɨ̀, àma rɨ ovʉ àfʉ́ yɨ̀ tʉ̀, fèe ànɨyɨ̀ àma òlʉ̀ʉ kíríá eꞌyo ba Orɨ awo vɨɨ àmɨ yɨ́ ɨ kʉ, te àma òwɨ̀ àma ɨdrɨ àmɨ yɨ̀ pàbaa ɨ̀ndɨ̀, àrɨ̀yɨ̀kʉ àmɨ ca ace òròdrí drʉ àma yɨ́. 9Adrímà Kristiani lá, tàandí drʉ àmɨ ɨgá ngà eꞌyo àzí òkpo àma nɨ ngale díká drìcitaa àma nɨ cile vɨɨ ɨnɨ drìa. Àma rɨ àzí nga ìtú ɨnɨ iní be séndè isújʉ́, azílé àma ovʉ́ térí drʉ ꞌba àloo drìa kʉ, àma nɨ rɨrɨa eꞌyo ba Orɨ awo vɨɨ òlʉ̀rɨa benì.

10Àmɨ àma ꞌyowa sàdénì nɨ, díká Orɨ nɨ pàbaa àma ꞌyowa sàdénì drʉ ɨ̀ndɨ̀, ɨ̀cejʉ àma alatará drʉ, eꞌyo ada be, àloo eꞌyo kodrʉ àma nɨ ovʉrɨa àmɨ ɨ̀sɨlɨa Kristiani drʉ ngòpɨ yà vɨɨ. 11Àrɨ̀yɨ̀kʉ àmɨ nìra àma rɨ eꞌyo ꞌo àmɨ be kɨ̀le ata nɨ eꞌyo ꞌole anzɨ nɨ awo vɨɨ ɨbe vɨɨ lé. 12Àma rɨ àmɨ ɨ̀ka, àmɨ así òmɨ díká àma rɨ àmɨ àꞌí ovʉjʉ ɨdrɨ Orɨ nɨ ɨcojʉ àmɨ ꞌdujʉ ꞌba òròdrí be drʉ vɨɨ alɨa, àrɨ̀yɨ̀kʉ omve àmɨ kárí nɨ awo vɨɨ alɨa àloo rúkuzà nɨ awo vɨɨ alɨa.

13Àma pàbaa àwàꞌdɨ̀fóò fèe Orɨ yɨ́ àsúú àrɨ̀yɨ̀kʉ àmɨ nɨ eꞌyo ɨ̀rɨ awo vɨɨ ɨrɨjʉ ngajʉ àma bʉ vɨɨ yɨ̀ díká àꞌɨ̀jʉ ꞌba, àmɨ àtìi ɨ̀rɨ kɨ̀le eꞌyo ɨngale ꞌba ada bʉ vɨ́ɨvɨɨ drʉ kʉ, te àmɨ ꞌdu ɨ̀rɨ eꞌyo ada ngale Orɨ bʉ díká àzí ngale àmɨ ɨdrɨ be ꞌba àꞌɨ̀le ra vɨɨ ɨnɨ drʉ. Te tàandí drʉ ɨ̀rɨ eꞌyo ada Orɨ awo vɨɨ ɨ. 14Àrɨ̀yɨ̀kʉ adrímà Kristiani drʉ vɨɨ ɨnɨ lá, àmɨ ꞌdu eꞌyo àmʉti Kristiani mgbimgbi Orɨ awo àngʉ̀ Yudea nɨ vɨɨ alɨa vɨɨ ꞌyowa vɨɨ ɨnɨ ɨ. Ànɨyɨ̀ àmɨ isú ɨnzamatara súrúánzɨ àmɨ ꞌyowa vɨɨ ɨnɨ bʉ kòꞌbò ɨnzamatara Kristiani àlóo vɨɨ ɨnɨ nɨ ndráánɨ́ isúlé ꞌba Yahudi nɨ, 15Opɨ Yesu ɨnɨ òkile ꞌba eꞌyo ondrílé vɨɨ ɨnɨ be díká àma drole ra vɨɨ ɨnɨ bʉ vɨɨ lé. Féé àyɨ̀kò Orɨ yɨ́ kʉ díká ɨnɨ ꞌba drɨ́á be àdrà drʉ, 16ɨnɨ nɨ rɨrɨa àma atrírɨ́á Eꞌyo ba òlʉ̀rɨa ꞌba júrú drʉ vɨɨ ɨnɨ yɨ́ ànɨ pajʉ. Ànɨ léti ꞌdɨ̀vɨɨ yɨ̀, ɨ́ rɨ ɨ̀zatà ꞌyowa vɨɨ ɨnɨ ɨ̀mèꞌdɨ àsúú. Àsìjʉ àdrà Orɨ awo vɨɨ ca ace ɨnɨ drìa ra.

Paulo nɨ lèjʉ drìkàjʉ ꞌba Tesalonikaa vɨɨ ɨnɨ bʉ díká vɨ́ɨ

17Te adrímà Kristiani lá, káꞌdí àma nɨ àma awajʉ àmɨ be sawà were vɨɨ alɨa rúá yɨ̀ ra kpé, àma así awɨ àmɨ drìa, àmɨ àva nɨ àma kile tʉ̀ vɨɨ yɨ̀, ànɨ àma òꞌbì así káyɨ̀ yɨ̀ lèjʉ àmɨ ndrèjʉ díká. 18Àrɨ̀yɨ̀kʉ àma lè drì ka àmɨ bʉ así drɨ́á yɨ̀. Tè ovʉʉ ma ɨ Paulo ɨ, ma òꞌbì lèjʉ drì kajʉ àmɨ bʉ díká, te Sitani òga àma yɨ́ sɨ̀. 19Àrɨ̀yɨ̀kʉ asíꞌbàzà, nòsɨ̀kʉ àyɨ̀kò àloo okú àma nɨ mujʉ àfʉ́ ꞌojʉ oꞌdú Opɨ Yesu nɨ ngajʉ cajʉ vɨɨ yɨ̀ vɨɨ àrɨ nɨ yà? Àdrɨ̀ɨ àmɨ ɨ kʉ yà? 20Adaada drʉ, àmɨ ònyɨ̀ àloo àyɨ̀kò àma ꞌyowa vɨɨ ɨ.

Currently Selected:

1 Tesalonika 2: MADI-URL

Highlight

Copy