1 Koronito 11

1Àmɨ òbɨ́ eꞌyo manɨ ꞌole vɨɨ butia ɨ, kɨ̀le manɨ eꞌyo Kristo awo vɨɨ butia òꞌbìle vɨ́nɨ.

Àzítáá Orɨ nɨ ìnzìjʉ vɨɨ

2Ma àmɨ ɨ̀pòyɨɨ àrɨ̀yɨ̀kʉ àmɨ nɨ ma eꞌyo ɨgale eꞌyo drɨ́á alɨa ra vɨɨ yɨ̀ díká àmɨ nɨ ɨmbataa manɨ fèle àmɨ yɨ́ vɨɨ ɨnɨ tà mbale kɨ̀le manɨ ɨnɨ kʉle àmɨ yɨ́ vɨɨ lé vɨɨ yɨ̀.

3Te ma lè àmɨ ní rá kɨ́nɨ̀ àgu drɨ́á drìle Kristo ɨ, díká zi drɨ́á drìle àgu nɨ díká Kristo drìle Orɨ ɨ. 4Ànɨ àgu drɨ́á Orɨ nɨ zile nòsɨ̀kʉ eꞌyo ondrílé dèè ꞌbé ànɨ drì cɨ vɨɨ rʉ́ʉ́ dèè naa Kristo nɨ kʉ. 5Díká izí àloo Orɨ nɨ zile nòsɨ̀kʉ eꞌyo ondrílé dèè ombe nɨ drì kʉ vɨɨ rʉʉ dèèna onyípi nɨ kʉ, ꞌonɨ kɨ̀le mɨ ꞌyo ꞌbà fá ɨ̀rɨ drìbí ra lé. 6Àrɨ̀yɨ̀kʉ izí àloo tè nɨ drì ombe kʉ, lè ɨ̀rɨ drìbí ɨ̀rɨ ovʉ fàzà drʉ, díká tè ovʉ drìnza drʉ izí yɨ́ ovʉjʉ drìbí be fàzà drʉ, lè ɨ̀rɨ ombe nɨ drìbí cɨ. 7Lè agú ɨ̀rɨ ombe nɨ drì kʉ, àrɨ̀yɨ̀kʉ ɨ̀rɨ nɨ ɨꞌdale kɨ̀le Orɨ lé díká ovʉle dìzà Orɨ awo nɨ vɨɨ yɨ̀, te izí ɨ̀rɨ dìzà agú awo nɨ. 8Àrɨ̀yɨ̀kʉ agú ngaa izí rúá kʉ te izí nga agú rúá, 9pàbaa Orɨ ꞌbàa agú izí yɨ́ kʉ, te ꞌbà izí agú yɨ́ drʉ. 10Eꞌyo ꞌdɨ̀vɨɨ yɨ̀, lè izí ɨ̀rɨ ombe nɨ drì cɨ ɨ̀cejʉ kɨ́nɨ̀ ɨ̀rɨ òkpo onyípi gíá díká malaika ɨnɨ nɨ eꞌyo ndee ndrèle ɨ̀ndɨ̀ vɨɨ yɨ̀.

11Ɨdrɨ àma ꞌyowa Opɨ buti bɨ̀jʉ vɨɨ alɨa, izí ovʉʉ nɨ ngʉlʉpɨ yɨ̀ aꞌdúle agú kó drʉ kʉ, pàbaa agú ovʉʉ nɨ ngʉlʉpɨ yɨ̀ aꞌdúle izí kó drʉ kʉ. 12Àrɨ̀yɨ̀kʉ izí pʉ̀ ɨngajʉ agú rúá, pàbaa izí òsi agú nɨ̀. Te àfa drɨ́á ɨnga Orɨ bʉ. 13Mɨ ama eꞌyo ndee mɨ yɨ̀ cenɨ̀cenɨ̀. Ɨrɨ kílílí izí nɨ Orɨ nɨ zijʉ drì ombe ko drʉ yà? 14Eꞌyo dɨ̀vɨɨ yɨ̀, àmɨ ɨcoo ngíá ama ɨ̀rɨ ònzɨ agú nɨ nɨ drìbí kʉjʉ ɨ̀zʉʉ drʉ vɨɨ kʉ yà? 15Díká izí drìbí nɨ ovʉjʉ ɨ̀zʉʉ drʉ vɨɨ ovʉʉ ɨ̀rɨ yɨ́ àyɨ̀kò drʉ àloo ònyɨ̀ drʉ kʉ yà? Àrɨ̀yɨ̀kʉ Orɨ fè ɨ̀rɨ yɨ́ drìbí ɨ̀zʉʉ vɨɨ bòngo drì aꞌbújʉ́ vɨɨ drʉ. 16Te ꞌbarʉʉ àloo tè lèe àgatà gaa eꞌyo ꞌdɨ̀vɨɨ drìa, eꞌyo àloo àma nɨ ɨcole ꞌolea yʉ díká aꞌbɨ àloo kànísà mgbimgbi ꞌyowa Orɨ nɨ ìnzìjʉ ɨcole eꞌyo ndee àzàa kolea yʉ.

Ɨnya òndroti Opɨ awo vɨɨ

17Ànɨ eꞌyo manɨ kole ɨ̀cele àmɨ yɨ́ ꞌdɨ̀vɨɨ ɨnɨ yɨ̀ ma ovʉʉ àyɨ̀kò yɨ̀ àmɨ yɨ́ kʉ, àrɨ̀yɨ̀kʉ drìfuzà àmɨ ꞌyowa Orɨ nɨ ìnzìjʉ vɨɨ ɨ eꞌyo ònzɨ ji ɨ̀gàtɨ eꞌyo ònyɨ̀ be ra. 18Òkò vɨɨ alɨa, ma ɨrɨ àmɨ tè drìfuu túàlʉ Kristiani drʉ, àmɨ àmɨ ɨ̀sɨle co mgbimgbi, díká eꞌyo ndee ꞌdɨ̀vɨɨ ma ɨco àti ɨ̀rɨ ada vɨɨ ra. 19Tàándí drʉ sìtà ra àmɨ nɨ àmɨ ɨ̀sɨle cojʉ azílé fèjʉ nìjʉ ꞌba Orɨ nɨ òpèle àmɨ ɨ̀sɨlɨa vɨɨ ɨnɨ àrɨ ɨnɨ ɨ yà vɨɨ benì. 20Àmɨ tè drìfuu túàlʉ tà nyaa, léti àmɨ nɨ tà ndee nyajʉ vɨɨ ovʉʉ léti Opɨ awo vɨɨ ɨ kʉ, 21àrɨ̀yɨ̀kʉ àmɨ àlóo ɨ́ lʉ́ tà ndee ɨꞌdo nya mbèlèmbele arípí nɨ tè ko drʉ díká ɨ́ drì ko mu ɨ. ꞌBa alóo ɨ awɨ àbírí yɨ̀ vɨɨ dèè ꞌba alóó ɨ́ ànɨ mbu ònzɨ. 22Àmɨ ꞌyowa àkú tà nyajʉ díká àfa mbujʉ yʉ yà? Nòsɨ̀kʉ àmɨ lè càndɨ fe díká drìnza fe Kristiani àfa ko vɨɨ ɨnɨ yɨ́ yà? Àmɨ nɨ ɨgalea yɨ̀ lè màá ꞌyo acete àmɨ yɨ́ àrɨ eꞌyo nɨ yà? Màá ovʉ àyɨ̀kò yɨ̀ eꞌyo àmɨ nɨ ꞌole vɨɨ yɨ̀ yà? Yʉ, ma ɨcoo ovʉ àyɨ̀kò yɨ̀ kʉ.

23Àrɨ̀yɨ̀kʉ eꞌyo manɨ òlʉ̀le àmɨ yɨ́ ꞌdɨ̀vɨɨ ɨ̀rɨ eꞌyo manɨ isúlé ngajʉ Orɨ bʉ vɨɨ ɨ. Iní ꞌbanɨ Opɨ Yesu oꞌdɨ nyajʉ vɨɨ yɨ̀, ꞌdu mʉ̀gatɨ̀, 24díká fè àwàꞌdɨ̀fóò drìa ꞌbadèè, àŋò alɨa ꞌbadèè kɨ́nɨ̀, “ꞌDɨ̀vɨɨ rúá ma awo vɨɨ ɨ, manɨ fèle àmɨ eꞌyo yɨ̀ vɨɨ ɨ, àmɨ ꞌdú díká àmɨ nyáá ɨ̀rɨ eꞌyo ma àwo vɨɨ rɨjʉ ɨgajʉ.” 25Trótrò ꞌdɨ̀vɨɨ lé, ɨ̀nya òndroti vɨɨ butia ꞌdu kópò ꞌbadèè kɨ́nɨ̀, “Kópò ꞌdɨ̀vɨɨ ɨ̀rɨ òyò sòzà oꞌdɨ Orɨ nɨ sòle àmɨ yɨ́ àrɨ ma awo vɨɨ yɨ̀ vɨɨ ɨ, àmɨ ꞌó eꞌyo ꞌdɨ̀vɨɨ, àmɨ nɨ mburia rɨjʉ eꞌyo ma awo vɨɨ ɨgajʉ.” 26Àrɨ̀yɨ̀kʉ sawà drɨ́á àmɨ nɨ mʉ̀gatɨ̀ ꞌdɨ̀vɨɨ nyarɨa díká àfa mburia kópò ꞌdɨ̀vɨɨ yɨ̀, àmɨ dèè naa dràtaa Opɨ awo vɨɨ eꞌyoa ikúu kpere ɨ̀rɨ nɨ ngarɨa drì kàrɨa.

27Ànɨyɨ̀, ꞌba àloo mʉ̀gatɨ̀ ꞌdɨ̀vɨɨ nyale nòsɨ̀kʉ àrɨ Opɨ nɨ dràjʉ àma eꞌyo yɨ̀ vɨɨ mbule léti ònzɨ yɨ̀ vɨɨ ꞌo ɨ̀zatà Opɨ rúá yɨ̀ àloo àrɨ ɨ̀rɨ awo vɨɨ yɨ̀. 28Ànɨ lè ꞌbarʉʉ ɨ̀rɨ andrí nɨ así ráká dèè ngà nyaa mʉ̀gatɨ̀ díká mbuu àfa kópò ndee alɨa vɨɨ kʉ. 29Àrɨ̀yɨ̀kʉ ꞌbarʉʉ tè mʉ̀gatɨ̀ nyaa díká àfa kópò ndee alɨa vɨɨ mbuu ìnzìtaa kodrʉ àloo nìtaa rúá Opɨ awo vɨɨ drìa vɨɨ koa drʉ, dèènaa nya díká mbu eꞌyo lizà Orɨ awo vɨɨ nɨ drìa cenɨ̀cenɨ̀. 30Eꞌyo ꞌdɨ̀vɨɨ yɨ̀ àmɨ òꞌbɨ́a ɨnɨ òkpo ko drʉ díká àzo drʉ, àloo drì jàzà alɨa. 31Te àma tè té àma eꞌyo ama cenɨ̀cenɨ̀, àma ɨcoo té nga ca eꞌyo lizà Orɨ awo vɨɨ drìlia kʉ. 32Opɨ tè àma drìa eꞌyo lii nɨ, dèè naa àma ɨmbataa isúu ànɨ àma ògajʉ àma nɨ àbàzà nyawú drìa vɨɨ alɨa fɨjʉ kʉ benì.

33Ànɨ acete, adrímà Kristiani drʉ vɨɨ ɨnɨ lá, àmɨ tè drìfuu túàlʉ tà nyajʉ, àmɨ té àmɨ cɨ. 34Àbírí tè ꞌba àloo kii, lè ɨ̀rɨ nya tà ngajʉ àkúá, azílé àmɨ tè drìfuu kara àlʉa ɨ̀rɨ ji eꞌyo lizà àmɨ drìa kʉ benì.

Díká ma tè ngaa caa àmɨ ꞌbʉ ꞌba, ma ngaa àmɨ yɨ́ drìcezà alóo ɨnɨ fèe díká.

Currently Selected:

1 Koronito 11: MADI-URL

Highlight

Copy