Genèse 30

1Kè Rachel hè dè joko hèmo n’è ko nè bi̱me dè Jacob nè higo, n’è é sèl’è tè da k’è, n’a to hè Jacob, ègui̱: Mè ha bi̱me o ho‐m’, kèo̱nè ho‐m’ fi! 2Nè hou‐sèlè danga zan Jacob dè Rachel, ègui̱: Mi nè Nzapa diè, so‐m’ gono ouara koua éli mè ndi? 3N’a, ègui̱: Mè joko ouiko‐tome da mi Bilha nomo; mè nè, mè o̱ do a, h’a ko di ngo kou‐m’, sè ko‐m’ pa bi̱‐oui‐ouili o nèda k‐a. 4N’a ha Bilha, ouiko‐tome da k‐a hi, h’a; nè Jacob chi o̱ do a. 5Nè Bilha ba zan, n’è ko bi̱‐oui‐ouili pome dè Jacob. 6Nè Rachel to oui̱ne, ègui̱: Nzapa déè mo do‐m’ nè bolèn, nomo n’a zili guèlè‐m’, a ha bi̱‐oui‐ouili ho‐m’ pome hi. Nèda mo hi, nomo n’a iè nè yin’a nè Dan hi. 7Nè Bilha, ouiko‐tome da Rachel hi, chi da ba zan da, ko litou bi̱me da dè Jacob. 8Nè Rachel to oui̱ne, ègui̱: Mi biguito nè ngaïli dè da ko‐m’, mi holi a. N’a é yin’a nè Nephthali. 9Nè Léa joko nè kè ko bi̱me b’è hoa nè ndouti hi, n’è ha Zilpa, ouiko‐tome k’è hi, hè Jacob nè ko. 10Nè Zilpa, ouiko‐tome kè Léa hi, ko bi̱‐oui‐ouili pome dè Jacob. 11Nè Léa to oui̱ne, ègui̱: Loko démo bè è! N’a é yin’a nè Gad. 12Nè Zilpa, ouiko‐tome da Léa hi, ko mbé bi̱‐oui‐ouili da dè Jacob. 13Nè Léa to oui̱ne, ègui̱: Sèlè‐m’ dèssa ouinè! nèdaka ndo bi̱‐ouiko o tè to ho‐m’, ègui̱: Sèlè‐m’ dèssa ouo̱. N’a é yin’a nè Aser. 14Ruben hoa k’è nè ouichi kara blé o, n’a pa do‐ti o sènè fo o hi. A kara, a pi̱li nè hè Léa na ko‐a. Nè Rachel aka Léa, ègui̱: Mè ha do‐ti no‐o da bi̱‐oui‐ouili ko‐mè hi ho‐m’. 15N’a pikifiè h’a, ègui̱: Oui̱ne ba ouili‐m’ tè oui nè, ko mè kara nè do‐ti o éli bi̱‐oui‐ouili ko‐m’ hi bo ndi? Nè Rachel pikifiè, ègui̱: Sè nè gui̱! a o̱ do mè zè k‐è nè oui̱ne do‐ti no‐o da bi̱‐oui‐ouili ko‐mè hi go. 16Nè mbolo, nè Jacob pi̱li nè ouara fo mè hi, nè Léa ho zane yèlè ti a, p’a nèngo̱ne, n’è to oui̱ne h’a, ègui̱: Mè o̱ do‐m’ sossoè, nèdaka no‐m’ héè mè nè do‐ti kè bi̱‐oui‐ouili ko‐m’. N’a o̱ do a nè z’è hi. 17Nè Nzapa koda Léa, n’è ba zan, ko nè mo̱ro bi̱‐oui‐ouili dè Jacob. 18Nè Léa, ègui̱: Nzapa ha ngui̱nzè ko‐m’ ho‐m’, nèdaka no‐m’ ha ouiko‐tome ko‐m’ hè ouili‐m’. N’a é yin’a nè Issacar. 19Nè Léa ba zan da, ko nè dongpo bi̱‐oui‐ouili dè Jacob. 20Nè Léa, ègui̱: Nzapa ha dé matabissi pome ho‐m’; nè sènè mo h‐è, ouili‐m’ hè mono do‐m’, nèdaka no‐m’ kouo bi̱‐oui‐ouili do a dongpo. N’a é yin’a nè Zabulon. 21Kè olo i hi, n’a ko bi̱‐ouiko pome, n’a é yin’a nè Dina. 22Nè tè Nzapa ba da Rachel, n’a kodaka, a é a nè ouiko‐ko‐bi̱me. 23N’a ba zan, a ko bi̱‐oui‐ouili pome, n’a, ègui̱: Nzapa ba mo‐fôyô ko‐m’ dida. 24N’a é yin’a nè Joseph, n’a, ègui̱: Seigneur iè mbé bi̱‐oui‐ouili da pome sènè ho‐m’ ouo̱!

25Nè Rachel kouo nè Joseph hi, nè Jacob aka Laban, ègui̱: Mè é ho‐m’ chi di olo‐m’, sènè nou bo‐m’ mè. 26Mè ha o ko no‐m’ o ho‐m’, do bi̱ no‐m’ o, no‐m’ déè tome b’a ho mè hi, ho‐m’ chi; nèdaka no mè i̱ngi tome no‐m’ déè ho mè hi. 27Nè Laban pikifiè h’a, ègui̱: Mè joko‐m’ dé li mè ouinè! Mi i̱ngi bo diouinè nè Seigneur déè nè démo do‐m’ nèda mè hi; 28mè bi̱ ngui̱nzè tome ko‐mè, ho‐m’ ha ho mè. 29Nè Jacob pikifiè h’a, ègui̱: Mè i̱ngi hèmo no‐m’ déè nè tome ho mè higo, dè mo bèi nè ma nèda guili‐daïli ko‐mè do‐m’ hi; 30nèdaka ndo ouo̱‐o guèda‐iè siti bo‐m’ nè, so ouo̱ doko danga jou ma gana i̱nggati, sè nè Seigneur hè iè démo jou mè nè olo nou‐pè nè amo no‐m’ ma nè mè hi. Sè kinè, mi dè tome ko toa bo‐m’ bo hègo gui̱ndi? Nè Laban pikifiè h’a, ègui: 31So‐m’ tè ha nè gui̱ ho mè gui̱ndi? Nè Jacob pikifiè, ègui̱: Mè tè ha mo ho‐m’ nè. O̱nemo mè koa da oui̱ne d‐è no‐m’ to ho mè hi, no mi kara daïli ko‐mè o guènè hèkè nè, guènè yongo ndobo, no mi pama ouo̱‐o. 32Mi hèkè sossoè nè bo̱ o daïli ko‐mè o; oui̱ne é ndo ba doko bi̱‐badoua bèino‐o nè to ouo̱‐o o̱ gossonlon‐gossonlon do ngonyon‐ngonyan o hi, do ba doko toutou bi̱‐badoua o hi, do ino‐o bo̱ guili‐doua o nè to ouo̱‐o o̱ ngonyon‐ngonyon do gossonlon‐gossonlan o. Kè nè ngui̱nzè bo‐m’. 33Nè bolon‐mo ko‐m’ hè pikifiè olo nou‐m’ bébinè, no mè tè tè nè guènè ngui̱nzè ko‐m’ hi; ndo ba doko ino‐o nè bè to ouo̱‐o o̱ gossonlon‐gossonlon dè ngonyon‐ngonyan bo̱bo̱ guili‐doua o, do toutou ino‐o nè bo̱bo̱ badoua o, bènè hi, no mè joko hè jou‐mo go. 34Nè Laban pikifiè, ègui̱: Sè hègo hi bo ouo̱! hèmo no mè toa nè higo. 35Nè po‐ouichi hi, n’a é dame‐tè ouili‐doua o do ino‐o nè to ouo̱‐o o̱ ngonyon‐ngonyon hi di ouara badi, do ba doko ko‐doua o nè o̱ gossonlon‐gossonlon do ngonyon‐ngonyan o hi, do ba doko ino‐o nè bili bou to lo‐o hi, do ba doko toutou ino‐o bo̱bo̱ o badoua o hi. N’a to ouo̱‐o, a a éli bi̱‐oui‐ouili ko‐a o. 36N’a é yèlè bo̱ k’a dè Jacob oui̱ne nèno di sènè ouichi tara sè; nè Jacob to koli daïli da Laban o nè guènè yongo jo. 37Nè Jacob kara bi̱‐baka tolo‐ti o tara, yin’a o nè peuplier dè amandier dè platane; n’a bili dam’a té a o nè bou. 38Kè ol’a hi, n’a nèkè ti o n’a gono dame té a o hi nè li ma, oloyara no̱ li badoua o nè tè nè guènè no̱ li o hi, ndo ouo̱ tè nè guènè no̱ nè li hi ndo̱ ouo̱ ba zan. 39Ko badoua o hè ma di sènè dame ti nè hi, ndo ouo̱ ba zan, ko ouo̱ ko bi̱me o nè dame té a di tè o, do gossonlon‐gossonlan o, do ngonyon‐ngonyan o. 40Nè Jacob kèkosan bi̱‐badoua o, a to o dame tè ino‐o di‐jou‐ma, do ba doko toutan o bo̱ do daïli o da Laban hi. N’a to o guili‐daïli bo‐a di ouara badi, n’a to kè Laban di ouara badi. 41Nè ouichi nè oli ndo ba doko ngangga badoua o ba nè zan hi, nè Jacob nèkè nè dame tè ti o hi di bali o badoua o hi, a déè hègo hi sè ko ouo̱ ba zan nè sènè ti o hi. 42Ko badoua o hè oa nè yéa, n’a bè nèkè dame‐tè ti o hi ti ouo̱‐o; ndo yéa ino‐o hi nè kè Laban, ndo ngangga o nè kè Jacob. 43Nè oual’è hi dè oui‐dèmè danga jou ma gana i̱nggati; k’a kara daïli ouinè, do ouiko‐tome o, do oui‐tome o, do chameau o, do tolofou o.

Currently Selected:

Genèse 30: GBANU

Highlight

Copy