Genèse 27

1Kè Isaac bèlè sa, kè li è goutoutoubou sa, oui dè mo k’a joko nè mo nè. N’a samo hè Ésaü ka‐bi̱ n’a hi, a to h’a, ègui̱: Bi̱‐oui‐ouili ko‐m’! N’a ko, ègui̱: Mi nomo! Nè Isaac to oui̱ne h’a, ègui̱: 2Mè joko, mi bèlè sa, so‐m’ tè i̱ngi ouichi fiè‐m’ nè. 3Sè kinè, mi koa mè kara bolo‐bane ko‐mè o dè kounou ko‐mè, mè nèno di do̱ko jo mè, mè fa sadi̱ pi̱li nè ho‐m’. 4Mè gui nè kame ho‐m’ hèmo no‐m’ koa nè higo, mè ba tèno ho‐m’ yongo, sè kè dana‐m’ é démo jou mè i̱nggati sè ko‐m’ fi. 5Nè Rebecca zili da oui̱ne d‐è nè Isaac to hè bi̱‐oui‐ouili k’è Ésaü hi. Nè Ésaü nèno di do̱ko jo mè guènè fa sadi̱, hè gbè ba pi̱li nè. 6Kè ol’a hi, nè Rebecca toda k‐a hè bi̱‐oui‐ouili k’è Jacob; ègui̱: Mè joko, mi zili kè sème ko‐mè to oui̱ne hè Ésaü jo‐oui ko‐mè hi, ègui̱: 7A nèno, a gbè sadi̱, a pi̱li nè, a gui nè kame h’è yongo; sè k’è é démo jou a nè bali Seigneur i̱nggati sè k’è fi ouo̱. 8Sè kinè, bi̱‐oui‐ouili ko‐m’, mè zili da oui̱ne nou‐m’, nèdaka nè no‐m’ ho‐m’ aka mè. 9Mè nèno, mè kara ma dé bi̱‐doua o bo̱ guili è o hi litou, mè pi̱li nè ho‐m’; ho‐m’ gui nè dé kame hè sème ko‐mè, hèmo n’a koa nè higo; 10ho mè ba nèno hè sème ko‐mè yongo, sè k’a é démo jou mè i̱nggati sè k’a fi. 11Nè Jacob pikifiè hè na k’è, ègui̱: Mè joko, Ésaü, jo‐oui ko‐m’ hi, nè oui‐ba‐boum, no‐m’ bo‐m’ boum tè bo‐m’ bènè. 12O i̱ngi nè nè sème ko‐m’ hè holo to‐m’, ko‐m’ tè raka nè bali a hè oui‐ndèlè go, ko‐m’ fouo nè namo pi jou‐m’, kè démo bènè. Nè na ko‐a pikifiè h’a, ègui̱: 13Nè namo hi hè jiki lô nè jou‐m’ è, bi̱‐oui‐ouili ko‐m’! Mè zili nè oui̱ne nou‐m’ pome‐iè, mè nèno, mè kara ouo̱ pi̱li nè. 14Nè Jacob kara ouo̱‐o pi̱li nè hè na k’è, nè na ko‐a dè nè dé kame hèmo nè sème ko‐a koa nè higo. 15Didi nè Rebecca kara dé toulou da Ésaü, ka‐bi̱‐oui‐ouili k’è, n’a pa o ko toa hi, a a tè bi̱‐oui‐ouili ko‐a Jacob nè nè bi̱‐da hi. 16N’a gou ndara bi̱‐doua él’a dè guèl’a, nè boum sènè bènè hi. 17N’a ba kame dè mapa n’a dafa hi, a é éli Jacob, bi̱‐oui‐ouili ko‐a hi. 18N’a ma di ka tè sème ko‐a nè, a samo, ègui̱: Sème ko‐m! Nè Isaac ko, ègui̱: Mi nomo! So mè ndo ndi, bi̱‐oui‐ouili ko‐m’? 19Nè Jacob pikifiè he sème k’è, ègui̱: Mi nè Ésaü ka‐bi̱‐oui‐ouili ko‐mè hi; nomo no‐m’ dafa mo hèmo no mè toa nè ho‐m’ higo. Mè kilingo̱ne, mè doungounou dingo̱ne, mè yongo sadi̱ ko‐m’, sè kè dana mè é démo jou‐m’. 20Nè Jacob to oui̱ne hè bi̱‐oui‐ouili k’è, ègui̱: Sè nè gui̱! bi̱‐oui‐ouili ko‐m’, mè pa di iè ndi! Nè Jacob pikifiè, ègui̱: Nè mo nè Seigneur, Nzapa ko‐mè, iè tèno ti‐m’ hi. 21Nè Isaac to hè Jacob, ègui̱: Mè mbo di ka to‐m’ nè, ho‐m’ holo to mè, bi̱‐oui‐ouili ko‐m’, ka bè no mè oa nè bi̱‐oui‐ouili ko‐m’ Ésaü, ko mè o̱ n’a nè. 22Nè Jacob yoko di ka tè Isaac, sème k’è nè, k’a holo té a, n’a to oui̱ne, ègui̱: Guèlè nè guèlè Jacob, nè éli nè éli Ésaü. 23N’a tè i̱ngi ti a nè, nèdaka nè ba boum hè ngo èl’a, hè ngo éli Ésaü, jo‐oui ko‐a hi go; n’a é démo jou a. 24N’a ak’a, ègui̱: No mè bi̱‐oui‐ouili ko‐m’ Ésaü ndi? Nè Jacob kodaka, ègui̱: No‐m’ ouo̱. 25Nè Isaac to oui̱ne, ègui̱: So mè ba kame, ho‐m’ yongo sadi̱ kè bi̱‐oui‐ouili ko‐m’, sè kè dana‐m’ é démo jou mè. Nè Jacob ba h’a, n’a yongo; n’a ba vin bo h’a, a no̱. 26Nè Isaac, sème ko‐a hi, to oui̱ne h’a, ègui̱: Mè mbo di ka to‐m’ nè, mè oufou zèlè‐m’, bi̱‐oui‐ouili ko‐m’. Nè Jacob mbo di ka té a, n’è oufou zèl’a. 27Nè Isaac oulou pèlè toulou no té a o hi; n’è é démo jou a, ègui̱:

Joko, pèlè tè bi̱‐oui‐ouili ko‐m’,

Hèmo nè pèlè fo nè Seigneur iè démo jou a o̱ nè higo.

28Mi koa Nzapa ha bé li‐zane ho mè,

Dè no̱ nou,

Dè blé dè vin ouinè, ouinè:

29Mi koa ouili o dè oui‐tome ko‐mè,

Dè nouli̱ o aba jougoulou nou ti mè:

Mè dè ouane ko yan mè o,

Ndo bi̱‐oui‐ouili kè na ko‐mè o hè aba jougoulou nou ti mè:

Danmo hè pa i nè tè dan mè hi,

Nè démo hè pa i nè tè é démo jou mè hi.

30Kè Isaac iè démo jou Jacob sa, nè Jacob ouèngguè t’è tè sème k’è Isaac guènè chia pat’a tè yèlè nè, kè jo‐oui ko‐a Ésaü nè pi̱li nè ouara fa sadi̱ mè hi. 31N’a gui yongo‐mo bo, a ba tèno hè sème ko‐a; n’a to oui̱ne hè sème ko‐a, ègui̱: Sème kilingo̱ne, yongo sadi̱ kè bi̱‐oui‐ouili k’è diè, sè kè dan’a é démo jou‐m’! 32Nè Isaac, sème ko‐a hi, aka mo, ègui̱: Nè ndo ndi? N’a pikifiè, ègui̱: No‐m’ ka‐bi̱‐oui‐ouili ko‐mè, Ésaü. 33Nè Isaac banga té a chi guènè naka, a aka mo, ègui̱: Nè ndo nomo nè fa sadi̱ ba tèno ho‐m’ diè hi o ndi? So‐m’ yongo sa nè oli i̱nggati sè ko mè ma, mi é nè démo jou a. Démo hè p’a bo. 34Kè Ésaü hè dè zili oui̱ne d‐è nè sème k’è toa hi, n’a zada guènè hélikoa dingo̱ne nè olo himi sèlè, a to hè sème ko‐a, ègui̱: Mè é démo jou‐m’ bo, sème ko‐m’! 35Nè Isaac to oui̱ne, ègui̱: Yan mè téèno nè olo yobo‐mo, a kara démo ko‐mè sa. 36Nè Ésaü to oui̱ne, ègui̱: Nèdaka ndo ouo̱ sa yin’a nè Jacob hi ouo̱, nomo n’a yobo no‐m’ ouara litou hi ndi? Nomo n’a ba ka‐bi̱me éli‐m’ koum, k’a chi da, k’a ba démo ko‐m’ dida. N’a ak’a, ègui̱: Ma koli démo oui̱ne é jou‐m’ bènè ndi? 37Nè Isaac pikifiè hè Ésaü, ègui̱: Mè joko, mi i’a nè ouane ko‐mè, mi ha o ba doko y’an o nè oui‐tome ko‐a, dè blé dè vin: sè nè gui̱ ho‐m’ tè dè ho mè gui̱ndi bi̱‐oui‐ouili ko‐m’? 38Nè Ésaü aka sème k’è, ègui̱: Ma tè koli démo pome bènè ndi sème? Mè é démo jou‐m’ bo, sème ko‐m’! Nè Ésaü ba guèl’è dingo̱ne chi guènè hélikoa. 39Nè Isaac, sème ko‐a hi, pikifiè, ègui̱: Mè joko!

Oloyara o̱nou mè hè o̱ nè dé no̱ nou

Kè bé li‐zane mè tè ara di ngo a.

40Mè passa nèda pa ko‐mè,

No mè tè dè nè tome hè yan mè hi;

Nè oui̱ne bada li̱ nè ola nè bassa hè aï,

No mè bini sanga‐mo ko‐a guèlè mè dida.

41Nè Ésaü é sèn’a kosan‐g‐è dè Jacob, nèda démo nè sème ko‐a iè jou a hi; nè Ésaü to nè ko sèl’è, ègui̱: É hè po‐ouichi dè ngamo sème k’è ma koum sè k’è gbè Jacob, y’aïn hi ouo̱. 42Ndo ouo̱ toda oui̱ne d‐è nè Ésaü, ka‐bi̱‐oui‐ouili, toa hi hè Rebecca. N’a samo hè Jacob, nè nè bi̱‐da hi, a to h’a, ègui̱: Mè joko, Ésaü, jo‐oui ko‐mè, koa gono‐kodo nè gbè mè. 43Sè kinè, bi̱‐oui‐ouili ko‐m’, mè zili oui̱ne ko‐m’! Mè kilingo̱ne, mè you dida Laban, jo‐oui ko‐m’, Charan mè; 44mè o̱nou dida k‐a hi hè daka yèlè, iyaaa hè ouo̱ hou‐sèlè kè jo‐oui ko‐mè hi bosso sè, 45hè hou‐sèlè sa zan‐g‐a dida do mè sè, kè ti jou a hè bida mo no mè déè do a hi bèda sè. Sè ko‐m’ pi tome ho mè pi̱li. So‐m’ tè dè tan hègo d’ènè‐o litou nè oli sè nè you tè’nè‐o to‐m’ nè ouichi pome‐iè hi gui̱ndi?

46Nè Rebecca to oui̱ne hè Isaac, ègui̱: Mi ko monotouni, nèda o bi̱‐ouiko kè Heth o, go. O̱nemo Jacob hè ba ko, hè ino‐o go, bo̱bo̱ bi̱‐ouiko kè Heth, bi̱‐ouiko sènè nou h‐è, no‐m’ tè dè tan hègo gui̱ dè monotouni‐m’ gui̱ndi?

Currently Selected:

Genèse 27: GBANU

Highlight

Copy