Liuk 10
10
Jizȯs ȯdȯn̄ mbed ete-loho ma iba uto
1Ken amakogbo, Ȯgwȯn̄-Etie Jizȯs ȯsȯ emek mbed ete-loho ma iba, adian imi iba-iba, ȯdȯn̄ esan̄a anye ekekuro edeghe etie enȯ in̄wi ki ima udun̄ ami Anyi akaduak idika. 2Anyi ȯdȯhȯ imi, «Awikiwak in̄wi eluȯn̄ȯ idigie edeghe etie. Imi elasi ukȯ uto mpȯ ami mpȯ ȯzȯn̄ ȯkȯ idibuȯ. Ukȯ opo, ani ima enne-uto enni uyo. Ene, ifi ibȯn̄ akam yak Ahta-Etie ami anni Ȯgwȯn̄-Etie ubuȯ-mpȯ ȯsȯdian ima enne-uto. 3Eka ulahami, ani etuei ki ifi ilasi si nyiyon̄ edȯn̄ ami ebak kotu ima epe ata-anwi. 4Ekube epe ȯkuk, ekunȯn̄ ube epe uka-ulid, ekube upuȯhȯ ipukuo, ikinȯn̄ ibiad ini ila ikȯ in̄wi kȯpȯdeghe. 5Ini akeneni akiluk uvȯk anwi, isan̄anye idiȯn̄ imami edun̄ ki uvȯk ani igȯ, «Yak Ahta-Etie ȯnȯ afidefid imami ebak ki uvȯk ami emem.» 6Aneki imami edun̄ ki uvȯk ani eluȯn̄ȯ idibȯhȯ emem ma odin̄idiȯn̄ isie Ahta-Etie, akam emem avi ma ȯdiȯn̄ imi; ani nama imi eluȯn̄ȯ, Ahta-Etie ediyak emem ma ȯdin̄idiȯn̄ avi inȯ imi-o. 7Yak ukuni abak ki uvȯk anyem mfin mpȯn̄ avi akabak ki onun̄ uvȯk-o. Bak ki mbie sin̄, lia-mpȯ nȯn̄ n̄wȯn̄ mpȯ aki ima anye uvȯk edi inȯ fi, siaki oyo-uto odo idibȯhȯ mpȯ-oyuto. 8Kini iluk udun̄ akeneni, aneki ima udun̄ ani edra adidi ifi, illia si imi enȯ fi. 9Ekȯk ima ȯlȯn̄ȯ ulȯn̄ȯ ami ebak ki udun̄ ani, elaha edȯhȯ imi, «Ukra anin̄ Ahta-Etie apine ifi ile.» 10Ani aneki iluk udun̄ nama in̄wi udun̄ ani edra adidi ifi, isan̄a iluk ima efak ami awikiwak in̄wi ekime idigie ifi inȯn̄ idȯhȯ in̄wi, 11Ntite udun̄ ifi ami akeyre inyin ki ekupe, inyin iken̄ ibono man ifi ifiak ki Ahta-Etie manȯ ifi ufen. Etam efiak ngo, ki ukra anin̄ Ahta-Etie apine ifi ile. 12Ani ndȯhȯ ifi ki mafȯ ma ndiȯk in̄wi ami ekedȯn̄ȯ ki Sȯdȯm ki uso ipe ekie in̄wi utȯ udun̄ ani.
Madiȯk ȯnȯ ima udun̄ ami nama ekabadezid
(Matiu 11:20-24)
13Madiok ȯnȯ ifi in̄wi udun̄ Korazin ma Bedsaida siaki emedȯhȯ ki nkinne ima utibe-mpȯ ami nkinne ki udun̄ ifi ki udun̄ ulid Taya ma Sidȯn, in̄wi ki udun̄ ani emekewra ekabadezid, emedȯhȯ ki ima utibe mpȯ ami n̄ne ki ifi ekenne ki udun̄ Taya ma Sidȯn, imi emekedȯn̄ȯ awiniwene ȯvȯn̄ etuak etio ki ntȯn̄ ebai mpȯfiȯk eban̄a ndiȯk mpȯ imi. 14Uso ami Ahta-Etie adibiere ipe unen inȯ afidefid in̄wi, Anyi manȯ in̄wi udun̄ Korazin ma Bedsaida ufen ekie in̄wi udun̄ Taya ma Sidȯn. 15Amani ifi in̄wi udun̄ Kapanum, ikikre ki Ahta-Etie mapono ifi kȯnyȯn̄. Ih, ih! Utuk ken, Anyi ma oto ifi ȯdȯn̄ ki udun̄ epo. 16Ene Anyi ȯdȯhȯ mbed Iseghe, «Anwi ami apan̄uton̄ ȯnȯ ukrikuȯ ifi, apan̄utȯn̄ ȯnȯ Mi, anwi aki azin ukrikuȯ ifi, azin Mi ngo. Anwi aki azin mi, azin Ahta-Etie ami ȯkȯdȯn̄ Mi.»
Mbed eteloho ma iba enyȯn̄ edi ma idra
17Ene mbed anin̄ Jizȯs eteloho ma iba egbȯ ekenne si Jizȯs ȯkȯdȯn̄ imi. Kini imi enyȯn̄ edi, azid akenie imi etieti enne imi edȯhȯ, «Ȯgwȯn̄-Etie, ile ima upaha-epo esu-uboho enȯ inyin kini inyin ikide ulu Avi ibine imi isuȯn̄ȯ kille in̄wi!» 18Ani Jizȯs ȯbrȯ imi, «Kini ami ima upaha-epo ekesuboho enȯ ifi, Ami nkinkid setan kini ekie anyi ubȯk sighi asieki ipe-ȯnyȯn̄ ȯduȯhȯ kisȯn̄ si emineminen̄. 19Isese! Ami n̄nȯ ifi ulu idi ideghe ebre ma ikpeyen kupe ilaha ikie afidefid ulu esughe, mpȯ sisin̄ edikime idinne ifi ibak. 20Ani ikidra siaki ima upaha-epo esu uboho enȯ ifi prepre, ani itam idra siaki Ahta-Etie ewed enyin ifi odio ki nwed uwem ki ȯnyȯn̄.
Jizȯs adra ki Sibirid
(Matiu 11:25-27)
21Ki ukem ini ani, Jizȯs ȯyȯhȯ ma uniezid ami asie Elille Sibirid, Anyi ȯdȯhȯ, «Etie, Avi anni Ȯgwȯn̄-Etie ami akra afidefid-mpȯ ki ȯnyȯn̄ ma ki isȯn̄. Ami ntro Fi siaki Avi abe ima mpȯ ami ȯgbȯ imami elasi nyiyon̄ ntihiyo. Ani Avi abe ima mpȯ ami alip ima ata-ifiȯk ma ima afiak nwed. Etie, Ami mfiak ki Avi enne sem, siaki anni idinne kutȯ adeghe ani annie fi azid. 22Etie Ami ayak afidefid-mpȯ ȯnȯ Mi. Etie Mi prepre anni anwi ami afiak Mi, oyo Iseghe. Ami oyo Iseghe prepre n̄nen̄enye mfiak Etie Mi. Ami ngo n̄nȯn̄ mmek in̄wi ami mbe Anyi mgbȯ. 23Ene Jizȯs eliek anye atan̄ nsen̄e ȯnȯ mbed Iseghe prepre ȯgȯ, «Ȯfȯfȯ ȯnȯ in̄wi ami ekid si anye ifi akid ami. 24Ani ndȯhȯ ifi ki awikiwak ima asiakuduak ma ima igwȯn̄ ami ekebak ki esie, ekelȯn̄utȯn̄ idikid si ifi ikid inȯn̄ igie si ifi igie ami. Ani imi ekekid enȯn̄ egie».
Ebetȯ nsen̄e anin̄ edeghe anwi Sameria
(Matiu 22:34-40; Mak 12:28-34)
25Uso sin̄, sighi Jizȯs epiek in̄wi mpȯ, epiek ibed sin̄ adibid Anyi mbid idikid si Anyi adibrȯ. Ene anyi abid, «Ȯgwȯn̄-Etie, nsi ki ndinne man Ahta-Etie ȯnȯ mi nsinsi uwem?» 26Jizȯs ȯbrȯ anyi, «Nsi kewed ki ibed anin̄ Moses eban̄a mpȯ anyen? Avi sakabade imi deghe? 27Epiek ibed ȯbrȯ, «Ibed ȯdȯhȯ, Anasi avi emme Ahta-Etie avi ki afidefid azid avi, ma afidefid upȯn̄ avi, ma afidefid ukime avi, ma afidefid akikre. Alaha, emme ndun̄-mbra avi sighi avi emme ilevi.» 28Jizȯs ȯgȯ, Avi ȯnȯ n̄nenen ibrȯ. Aneki avi anim ima mbed ami, Ahta-Etie manȯ fi nsinsi uwem.» 29Ani anyi ȯluȯn̄ȯ idinne si imi ifiak mpȯ ibia. Ene anyi abid Jizȯs, «Onon̄o anwi seni ndun̄-mbra amii? 30Jizȯs ede mbuk ami ȯbrȯ anyi, «Uso sin̄, anwi sin̄ akesie kudun̄ Jeruzelem etehe aka udun̄ Jeriko, ede ȯduȯhȯ ȯluk ubȯk ima amuke. Evȯn̄ȯ anyi ȯvȯn̄ elaha efai afidefid mpodoho sakabak ma anyi, elaha emgbai anyi tutu apine mpe, eyak enim elaha eyak. 31Sighi anyi ana ken, ȯgu ima Juu asan̄a ukem ȯpȯdeghe ani idika isan̄. Anyi akid anwi ani ekede unan ani sighi anaa ken, ani anyi ȯtuȯhȯ asan̄a ogbo ayak anyi. 32Ȯsȯ ene, anwi ami akesie ubon Livait asan̄a adi ukem mbie ani adikid anyi sighi anaa. Ani anyi ȯtuȯhȯ asan̄a ndek ukȯ ogbo. 33Ki apatre anwi Sameria sin̄ ami akaka isan̄ adisim mbie ami anwi ani akanaa. Ani kini akid anyi, anye mbom aban̄a anyi. 34Anyi asan̄a apine anwen, ede mmi ȯkwȯk anyi unan alaha ede ada olif ȯdȯn̄ anyi ki anye unan, ede ubiak ȯvȯn̄ ȯgbȯ anyi unan. Abe anyi oduo kȯnyȯn̄ enan̄ iseghe akanim ki mbie usȯbȯ edese mpȯ aban̄a anyi. 35Ki ndan̄zie uso, anyi ȯnȯ ase-mpȯ-iban̄a uvȯk usȯbȯ ani nsip ȯkuk silva iba, ȯdȯhȯ anyi, «Mbȯk nȯ ede unan ami usȯbȯ, aneki ȯkuk usȯbȯ avi awak ekie ami, aneki nsȯndi ma ndian n̄nȯ fi.» 36Ene Jizȯs abid epiek ibed, «Ki ifiȯk avi, kotu in̄wi iteh ani, onon̄o si avi ekre akenni ndun̄-mbra anwi ani ima amuke eke emgbai ani? 37Epiek ibed ȯbrȯ, «Anyi ami akenye mbȯm aban̄a anyi.» Jizȯs ȯdȯhȯ anyi, «Avi nyȯn̄, ka n̄ne sighi anyi ekenne ani.»
Jizȯs akase Mata ma Meri
38Sighi Jizȯs ma mbed Iseghe esan̄a eka kȯpȯdeghe idika udun̄ Jeruzelem, imi ekeluk udun̄ sin̄. Anwinwa sin̄ ami ekre Mata ede imi ȯluk uvok iseghe si isie-in̄wi. 39Mata akenye uyo-ayekie anwinwa ami ekre Meri. Meri akatio adiana ukuo anin̄ Jizȯs ede apan̄uton̄ ȯnȯ upiekmpȯ Iseghe. 40Ani akafana Mata kille aban̄a afidefid uto idinne ullia anyi unȯsin̄. Anyi akabine Jizȯs akadȯhȯ Anyi, «Ȯgwȯn̄-Etie, ayekie mi ayak uto ȯnȯ mi n̄ne mpe ami unȯsin̄, mbȯk dȯhȯ anyi ȯkȯn̄ adinwam mi. 41Ani Jizȯs ȯbrȯ anyi, «Mata, Mata, avi ayak awikiwak mpȯ afana fi akikre ofio. 42Ani mpȯ sin̄ prepre anni ata epe mpȯ, Meri emek ata edeghe udime ȯnȯ iliseghe ami nama anwi edikȯd ibȯhȯ anyi.»
Currently Selected:
Liuk 10: EBG
Highlight
Share
Compare
Copy
Want to have your highlights saved across all your devices? Sign up or sign in
Ebughu Bible by Beyond Translation is licensed under Creative Commons Attribution-ShareAlike 4.0 License.
