Josuwa 11
11
Josuwa lyuwa ta̱ tsugono tsu upasu wu ugana nu uvon
1Ana Jabin mogono ma Hazo ma uwwai alabari e ili i na i farai, a̱vu u lyungu ni ikaka a̱ tyo ya̱ Yoba mogono ma Madon na̱ mogono ma Shimron na̱ mogono ma Akishafa waru, 2na̱ ngono mu upasu wu ugana wi iɗa ya agaɗi, na̱ a̱za̱ o Uka̱ri wa Araba o uyagi u Mala ma̱ Ga̱lili na̱ a̱za̱ e iɗa i mugaɗi na̱ ngono ma Nafot Do na̱ a̱livu. 3U lyunguwa̱ ta̱ waru aza a Ka'ana asana na̱ a̱livu na aza a Amoriya na aza a Hitiya na aza a Periziya na aza a Jebusiya e iɗa ya agaɗi, na aza a Hiviya za̱la̱ Masasan ma Hamon e iɗa ya Mizfa. 4Reve o uta̱ na̱ a̱soja e le suru, oɓolo a̱ a̱bunda̱, a̱bunda̱ she vu damma wuyun wu nge'en m mala, ni ido ya̱ a̱bunda̱ lon ni ikeke yi ido. 5Ngono n nda'a suru m ɓolo ta̱ a̱soja e le reve a̱ ta̱wa̱ a̱ va̱la̱ uba̱ta̱ u ta̱ e ikyun i Mini ma Merom, adama a yuwan uvon na̱ Isra'ila.
6Reve A̱sulazuva a damma Josuwa, <<She vu uwwa wovon u le wan, adama a na nfa'an mantsa ma nda, n ta ca le e ekere a aza a Isra'ila wupaɗu. Yi gasa agutsu e ido i le a̱vu i kula̱to ikeke yi ido i le.>>
7Ɗaɗa Josuwa na ali o uvon a̱ yi suru a̱ riya̱a̱ nle nu uvon babu urevu e ikyun i Mini ma Merom'm. 8Reve A̱sulazuva a ca le e ekere a Isra'ila. A̱vu a lyuwa le nu uvon, a̱vu a saɓa le hali a̱ tyo Sidon Gbain na̱ waru Misrefot Mayim, hali waru a̱ tyo o Uka̱ri wa Mizfa na asana. Reve o una le hali ko vuma ta̱ le la'a shi. 9Josuwa yuwan ta̱ ne ele cine A̱sulazuva a damma niyi. U kutsuma̱to ta̱ ido i le a̱vu u kula̱to ikeke yi ido i le.
10A̱vu Josuwa vadala u lyuwa lyuci va Hazo, a̱vu wu una mogono ma̱ yi na̱ matsun me pe'eni a mantsa'a a̱yi ɗa u shi zagbain tsugono vu ba̱ta̱ ndolo suru. 11A̱vu o una aza a na a̱ da̱na̱i pe suru na̱ matsun me pe'eni. O kototo le ta̱ suru suru, a lyawa ko vuma ta̱ na ri e ivuwusan shi. A̱vu u kula̱to lyuci va Hazo.
12Reve Josuwa lyuwa ilyuci yi ngono i ndolo na̱ ngono n le suru, wu una le ta̱ na̱ matsun me pe'eni, u kototo le suru suru, cine Musa aagbashi a̱ A̱sulazuva a zuwa niyi. 13Agba aza a Isra'ila a̱ kula̱to ilyuci i na a suwai a aganga o okongo shi, she Hazo goon za na Josuwa kula̱toi. 14Reve aza a Isra'ila a̱ pura̱ itana suru ni iliyamunga yi ilyuci i ndolo. Amma o una ta̱ ama suru na̱ matsun me pe'eni hali she no o kototo nle suru suru, a lyawa ko vuma ta̱ na ri e ivuwusan shi. 15Cine A̱sulazuva a dammai Musa aagbashi a̱ yi, ne ɗa Musa zuwai Josuwa yuwan, ne ɗa gba Josuwa yuwain. Ko ili i ta̱ u kuɗa̱ a yuwan shi a̱tsuma̱ e ili i na A̱sulazuva a dammai Musa.
16Ne ɗa Josuwa lyuwai iɗa i ndolo suru: iɗa ya agaɗi nu upasu we Nege suru, ni iɗa ya̱ Goshen suru ni iɗa i mugaɗi nu Uka̱ri wa Araba ni iɗa ya agaɗi ya Isra'ila oɓolo na̱ mugaɗi ma̱ yi, 17diga a Masasan ma Halak za na gawain a̱ tyo upasu wa̱ Seyi, waru hali a rawa Ba'al Gadu o Uka̱ri wa̱ Lebanon e ikyun i Masasan ma Hamon. A̱vu u reme ngono n le suru reve wu una le. 18Josuwa jima ta̱ o uvon na̱ ngono n ndolo suru. 19Ko lyuci ta̱ yuwan nzuwulai mu nden ma alafiya na aza a Isra'ila shi she aza a Hiviya goon, aza a na a̱ ri nden Gibiyon. Akapi e ilyuci i na i buwai suru aza a Isra'ila a lyuwa le ta̱ nu uvon. 20#11:20 Ka̱lyuwa̱: U.Wl 7:16 Ulinga wa̱ A̱sulazuva a ɗa na aciya̱yi u zuwa nle aciyogbamu, tsa̱ra̱ a̱ ta̱wa̱ a yuwan uvon na aza a Isra'ila, adama u kototo le suru suru babu roco iliyali, amma a kirima le ta̱, cine A̱sulazuva a zuwai Musa yuwan.
21A mantsa mo ndolo reve Josuwa 'ya̱wa̱ a̱vu u kototo aza a Anaku e iɗa ya agaɗi: diga Heburon na̱ Debi na̱ Ana ne e iɗa ya agaɗi ya Yahuda suru ne e iɗa ya agaɗi a Isra'ila suru. Josuwa kototo le ta̱ suru suru ni ilyuci i le. 22Ko vuma ta̱ a̱tsuma̱ a aza a Anaku pasa shi a̱tsuma̱ e iɗa ya aza a Isra'ila. She a̱tsuma̱ a Gaza na̱ Gat na̱ a̱tsuma̱ a Ashido goon ozo o ro a pasai.
23Ne ɗa Josuwa lyuwai iɗa'a suru nu uvon cine A̱sulazuva a dammai Musa. Reve u ca aza a Isra'ila iɗa'a yo o'wo agadu e le gundo gundo. Reve gba iɗa'a yi ivuwan nu uvon.
©️2025 Language Development and Translation Initiative (LDTI)