Ufaru 24

A̱ ta̱wa̱yi Ishiyaku na̱ ka

1Gogo tsunda Ibrahim kutsa ta̱ a̱bunda̱ lon, waru u da̱na̱ ta̱ na a'wan a̱bunda̱. Waru A̱sulazuva a zuwaa yi ta̱ aba'un a̱tsuma̱ e ili i na u yuwain suru. 2Reve u damma aagbashi a na la'a jimai pe a̱tsuma̱ o u'wa wa̱ yi, za na a̱ ka̱lyuwusa̱ yi ili i na u da̱na̱i ne ele suru, <<Zuwa ekere a̱ wu a mpakata ma aagutsu a̱ va̱. 3N ciga ta̱ vu yuwan akucunu a̱tsuma̱ ala a̱ A̱sulazuva, A̱sula̱ a na a yuwain zuva ni iɗa, a na vaa taraa mawun ma̱ va̱ ka a̱tsuma̱ a ama a Ka'ana, e iɗa i na n ri na̱ nden shi. 4Amma vu ta̱ ka̱mba̱ a̱ wa̱ta̱ u tsu a̱tsuma̱ e edenge a̱ va̱ vu taraa Ishiyaku mawun ma̱ va̱ ka.>>

5Reve aagbashi'i we ece, <<Nu usheli gba u damma waa lyawa iɗa i le reve u kuru mu a̱ ta̱wa̱ e iɗa i nda gba shi? N tara mawun ma̱ wu'u a̱ ka̱mba̱ e iɗa i ɗu uba̱ta̱ u na vu uta̱i'i?>> 6Reve Ibrahim usu, <<O'o, vu yuwan a̱nka̱li vu zuwa yi u ka̱mba̱ ɗe wan. 7A̱sulazuva, A̱sula̱ a zuva a na o rono numu aɗanga diga o u'wa wa dada va̱, ne e iɗa i na a matsan numu, u yuwaan mu ta̱ nzuwulai a na u ta ca ugundo u va̱ iɗa i nda. U ta̱ lyungu malingata ma̱ A̱sula̱ elime a̱ wu, tsa̱ra̱ vu tsura̱a̱ ulobo u va̱ ka na waa zuwa. 8Amma na̱ ka'a u usu u kuru wu shi, vi ivuwan ta̱ adama a akucunu a nda. She vu yuwan uro vu tara mawun ma̱ va̱ a̱ ka̱mba̱ ɗe wan.>> 9Ɗaɗa aagbashi'i u zuwai ukere wa̱ yi a mpakata ma agutsu a Ibrahim, zagbain va̱ yi, reve u yuwan akucunu u ta yuwan ili i na Ibrahim damma niyi u yuwan.

10Reve aagbashi'i u tara arakumi kupa a zagbain va̱ yi reve waru u tara ne'e sa'ani icu'un icu'un reve u ka̱ra̱, ɗaɗa u guza̱i ure a̱ tyo Mesopotamiya a̱ tyo a̱ a̱ba̱jini a̱ lyuci va Naho. 11Reve u zuwa arakumi'i o von ɗe o ugyuru u lyuci gbain, zuzu no oko'o nu ulivu, a mantsa ma na a̱ma̱ci a̱ tsu 'ya̱wa̱ morono ma̱ mini nu ulivu.

12A̱vu u yuwan avasa, <<A̱sulazuva, A̱sula̱ a zagbain va̱ Ibrahim, kamba mu n lyuwa aci ana'an, reve waru vu roco zagbain va̱ Ibrahim isa'ani. 13Ka̱lyuwa̱ apa mu nda mishin o una̱ wo ooko'o a na esheli a ama a̱ a̱ba̱jini a̱ lyuci a̱ tsu ta̱wa̱ o rono mini. 14Lyawa usheli u na maa damma, <M pati wu ta̱, cipa̱to meden ma̱ mini ma̱ wu adama n sowo,> za na suru a damma, <Sowo, waru n ta ca arakumi a̱ wu fo o sowo,> lyawa wo o'wo a̱yi ɗa vu ɗangwayi aagbashi a̱ wu Ishiyaku wo o'wo ka va̱ yi. Ne ɗa mee reve vu roco ta̱ zagbain va̱ isa'ani.>>

15Kafu u ɓa̱ru una̱ wa̱ yi, reve we ene Rikatu za na a matsayin Betuwe ulobo wa Milka, ka va Naho mawun ma̱ a̱na̱wun ma Ibrahim, wu uta̱ na̱ meden ma̱ mini ma̱ yi a̱ nlyungu. 16Usheli u sa'ani u ɗa lon, usheli u na koto u revei vali ɗa shi. U ta̱wa̱ ta̱ o ooko'o u shiton meden ma̱ yi, reve u ka̱ra̱ a̱ ka̱mba̱.

17Reve aagbashi'i u suma u cina yi reve u damma, <<Yuwan ankuri ne'e mu mini me meden ma̱ wu wa'a n sowo.>>

18Reve u damma, <<Zagbain va̱, sowo.>> Reve u tsunga̱la̱to meden babu usa̱n reve u ɓa̱na̱a̱ yi u sowo. 19Ana u kotoi oso, reve u damma, <<N to ronoo arakumi a̱ wu fo mini ma na o sowo hali u rawa le suru.>> 20Reve u zuɗushi mini'i o ukungulu u na inan yo sowuso mini. A̱vu u sumisa a̱ ka̱mba̱ o ooko'o u kenishe mini mo ro. Tsundolo tsa ɗa u yuwain hali u ca arakumi a aagbashi'i suru mini. 21Reve aagbashi'i u zuwaa yi esu, wi isawan kpaku, tsa̱ra̱ u reve u ga'an ta̱ na̱ mmalu n na u yuwain ko waru A̱sulazuva a zuwa ta̱ u lyuwa aci a mmalu ma̱ yi.

22Ana arakumi'i o kotoi oso a̱ mini, reve aagbashi'i u tara makawani ma zinariya u ta rawa ume wa akapi e shekel reve u zuwaa yi a̱ vunu. Reve waru u tara nshingi me ekere n zinariya n re, a ta rawa ume u shekel kupa u zuwaa yi e ekere. 23Reve u damma, <<Yuwan ankuri damma mu ko usheli wa zane u ɗa vu ri. A̱ ta̱ tsura̱ aasula a yasa o u'wa wa dada va̱ wu?>>

24Reve u usu yi, <<A̱mu, usheli we Betuwe u ɗa ulobo u na Milka matsayin Naho.>> 25Reve u dammisa, <<Tsu ta̱ na̱ anlya ni ilyalya ya̱ a̱bunda̱ yi iliyamunga, waru tsu ta̱ na aasula a na yaa cu'wan.>>

26Reve vuma'a u ka̱ɗa̱to u yuwaan A̱sulazuva a̱ga̱nda̱. 27Reve u damma, <<Ica a̱ tyo e ekere a̱ A̱sulazuva, A̱sula̱ a zagbain va̱ Ibrahim, za na kuɗa̱i o shiton akucunu ko u roco isa'ani ya̱ yi a̱ tyo ya̱'a̱ yi shi. U rono mu ta̱ aɗanga a̱ tyo a mmaci mu zagbain va̱.>>

28Reve usheli'i u suma a̱ tyo uba̱ta̱ u nan mma va̱ yi, reve u damma le ili i na i farai suru. 29Rikatu ta̱ na̱ zakpara na a̱ tsu ɗe Laban. Ɗaɗa Laban sumai o uta̱ a alanga a̱ tyo uba̱ta̱ u na aagbashi a Ibrahim a̱ ri o ooko'o. 30Ana we enei makawani ma̱ vunu oɓolo na̱ mashingi ma na ma̱ da̱na̱i u o towu e ekere a zawa'a va̱ yi Rikatu, waru wu uwwa ta̱ ili i na Rikatu dammai ili i na vuma'a u damma niyi, ɗaɗa u 'ya̱wa̱i uba̱ta̱'a̱, reve u cina yi mishin na arakumi'i zuzu no ooko'o'o. 31Reve Laban damma, <<Uwa, a̱vu vuma na A̱sulazuva a zuwayi aba'un. Nye i zuwai vu ri mishin ɗe a alanga? N ta̱ na aasula a na n foɓoi adama a̱ wu, waru arakumi a̱ wu fo a̱ ta̱ tsura̱ uba̱ta̱.>>

32Reve vuma'a u uwa a̱tsuma̱ o u'wa, reve Laban cipa̱to itana i na arakumi a̱ tanuyi reve u ca le anlya ni ilyalya. Reve u ta̱wa̱a̱ vuma'a oɓolo na ama a na a̱ ri oɓolo na̱ a̱yi mini tsa̱ra̱ a̱ sa'a ana e le. 33Ana a̱ ta̱wa̱yi ni ilyalya, reve vuma'a u damma, <<Maa lyuwa ilyalya i ndolo shi she na̱ n damma ili i na i ta̱wa̱to numu.>> Reve Laban damma yi, <<Damma ili i na vu cigai vu damma.>>

34Reve u damma, <<A̱mu aagbashi a Ibrahim a ɗa. 35Waru A̱sulazuva a zuwaa ta̱ zagbain va̱ aba'un lon, u ta̱ nu utsuru lon, a̱yi a̱ba̱jini a vuma a ɗa. Waru u ca yi ta̱ oɓolo e inan ni ikyon ya̱ a̱bunda̱ lon, na̱ azurufa na̱ zinariya. U ca yi ta̱ waru agbashi a ali na̱ a̱ma̱ci, oɓolo na arakumi na̱ nloli. 36Saratu ka vu zagbain va̱ matsaan yi ta̱ ulobo na̱ tsukutsa tsa̱ yi, reve u ca yi ili i na u ri ne ele suru e ekere a̱ yi. 37Zagbain va̱ zuwa mu ta̱ n yuwan akucunu a na n ta yuwan cine u damma numu n yuwan suru. U damma, <She vu taraa ulobo u va̱ ka a̱tsuma̱ e esheli a ama a Ka'ana a̱tsuma̱ e iɗa i na n ri nden wan, 38amma vu 'ya̱wa̱ o u'wa nan dada va̱ na̱ mmaci n va̱, vu taraa ɗe ulobo u va̱ ka.> >>

39Reve n damma zagbain va̱, <<Nu usheli'i u 'yuwan a̱ kuru mu gba?>>

40<<Reve u damma mu, <A̱sulazuva a na maa yuwusaan ntoniloi kuci u ta̱ lyungu malingata ma̱ yi elime a̱ wu reve u ca wu ulyuwu wa aci. Vu ta̱ tsura̱a̱ ulobo u va̱ ka uba̱ta̱ wu mmaci n va̱, diga o u'wa u nan dada va̱. 41Tsundolo tsa ɗa vaa yuwan a̱vu vu uta̱ a akucunu a na vu yuwain. Amma a mantsa ma na vu ka̱mba̱i diga uba̱ta̱ we edenge a̱ va̱, ko na a ca wu a̱yi shi, vu to uta̱ a akucunu a na vu yuwaan numu.>

42<<Ana n ta̱wa̱i o una̱ wo ooko'o ana'an, reve n jiyan o okolo a̱ va̱, <A̱sulazuva, A̱sula̱ a zagbain va̱ Ibrahim, ni icigi ya̱ wu i ɗa, yuwan ankuri vu zuwa n ga'aan na̱ mmalu n va̱. 43Apa mu mishin o una̱ wo ooko'o a nda, lyawa usheli u na wa̱a̱ uta̱ mekene ma̱ mini, za na na̱ n damma, <<Yuwan ankuri ne'e mu mini me meden ma̱ wu wa'a n sowo,>> 44nu u usu mu, <<Sowo waru n te kenee arakumi a̱ wu fo,>> lyawa yi wo o'wo a̱yi ɗa za na A̱sulazuva a ɗangwai wo o'wo ka vu ulobo wu zagbain va̱.>

45<<Kafu n koto majiyan a̱tsuma̱ o okolo a̱ va̱, ɗaɗa me enei Rikatu utanuwu na̱ meden ma̱ yi a̱ nlyungu, reve u ka̱ra̱ a̱ tyo o ooko'o u kene mini. Ɗaɗa n damma niyi, <Yuwan ankuri ne'e mu n sowo.>

46<<A̱vu u cipa̱toshi meden e ilyungu ya̱ yi, reve u damma, <Sowo, reve waru n ca arakumi a̱ wu fo mini ma na oo sowo.> Reve n sowo reve waru u ca arakumi a̱ va̱ fo mini o sowo.

47<<Reve me ece yi, <A̱vu gba usheli wa̱ zane ɗa vu ri?> Reve u usu mu, <A̱mu usheli we Betuwe u ɗa, ulobo wa Naho, za na Milka matsain.> Reve n oto yi makawani a̱ vunu, na̱ nshingi e ekere a̱ yi. 48Reve n ka̱ɗa̱to aaci a̱ va̱ a̱ tyo e iɗa n yuwaan A̱sulazuva a̱ga̱nda̱, a̱vu waru n yuwaan A̱sulazuva, A̱sula̱ a zagbain va̱ Ibrahim ica. A̱yi ɗa za na rono numu aɗanga o ure u sa'ani tsa̱ra̱ n tsura̱a̱ ulobo wa̱ yi ka ɗe a mmaci ma̱ yi. 49Gogo tsunda, na̱ yoo roco zagbain va̱ isa'ani na amayun, i damma mu, waru na̱ ne ɗa shi i damma mu, adama n reve ili i na maa yuwan, tsa̱ra̱ n vadala ko usa'ani ko ugula̱.>> 50A̱vu Laban na̱ Betuwe a̱ usu, <<Adanshi a nda uba̱ta̱ wa̱ A̱sulazuva a ɗa wu uta̱i, tsu ri ni ili i na tsaa damma shi. 51Apa Rikatu elime a̱ wu, tara yi a̱ ka̱ra̱. Lyawa yi wo o'wo ka vu ulobo wu zagbain va̱ wu, cine A̱sulazuva o foɓoi.>>

52Ana aagbashi a Ibrahim a uwwai ili i na a dammai, reve u ka̱ɗa̱to aci a̱ tyo e iɗa u yuwaan A̱sulazuva a̱ga̱nda̱. 53Reve wu uta̱ ni iliyinlu ni ili ya atsuvu i sa'ani i azurufa na̱ zinariya, ni itana yu u otosu ɗaɗa u cayi Rikatu. Ne ɗa waru u cayi mma va̱ yi oɓolo na̱ zakpara va̱ yi itana i sa'ani yi ikebe ya̱ a̱bunda̱ lon. 54Reve aagbashi a Ibrahim na aza a na a̱ ri oɓolo a lyuwa o sowo, reve a asa uba̱ta̱'a̱. Ana a̱ 'yoyin nu usana, reve u damma, <<Lyawa numu n ka̱ra̱, n ka̱mba̱ uba̱ta̱ wu zagbain va̱.>>

55Reve zakpara vu usheli'i na̱ mma va̱ yi a damma, <<Lyawaa tsu usheli'i wa asanu ko rana kupa, reve u ta̱wa̱ u ka̱ra̱.>>

56Amma u damma le, <<She i zuwa mu n jima pa wan, adama a na A̱sulazuva a zuwa ta̱ n ga'an na̱ mmalu n va̱. Lyawa numu n ka̱ra̱ adama n 'ya̱wa̱ n cina zagbain va̱.>>

57Ɗaɗa a dammai, <<Lyawa tsu ɗe usheli'i tsu uwwa ili i na waa damma.>> 58Reve e ɗe Rikatu, ɗaɗa e ece niyi, <<Vu ta̱ kuru vuma nda a̱ ka̱ra̱?>> Reve u usu, <<Ee, n ta̱ kuru yi.>>

59Ɗaɗa gba a lyawai zawa'a le Rikatu ka̱ra̱i oɓolo na̱ mma vi iwe'e va̱ yi, na aagbashi a Ibrahim oɓolo na ama a̱ yi. 60Reve a zuwaa Rikatu aba'un, a damma, <<Zawa'a tsu, lyawa vo o'wo mma vu kpaku kupa va̱ a̱bunda̱, lyawa limatan va̱ wu reme ilyuci ya arala e le.>>

61Reve Rikatu ne esheli a aasula a̱ yi a̱ 'yon, reve a kumba a arakumi, reve o toni vuma'a. Ne tsundolo tsa ɗa aagbashi o ndolo a tarai Rikatu a̱ ka̱ra̱.

62A mantsa mo ndolo cina Ishiyaku ka̱mba̱ ɗe diga Be'e Lahai Roi, adama a na u shi ta̱ na̱ nden Nege. 63Ana urana u cigai mokotoo, reve Ishiyaku uta̱ ɗe o ugyuru tsa̱ra̱ u yuwan majiyan, ɗaɗa u 'ya̱sa̱in aci a̱ yi, reve we ene arakumi a̱ ta̱wa̱. 64Ana Rikatu 'ya̱sa̱in aci a̱ yi, reve we ene Ishiyaku, reve u cipa̱ a aarakumi'i. 65Reve we ece aagbashi'i, <<Vuma ne ɗa gba ndeɗe za na ri a mmalu a atsusa adama u ta̱wa̱ u ga'aton tsu?>> Reve aagbashi u usu yi, <<Zagbain va̱ ɗa.>> Reve u tara a̱diko reve wu pala urewesu wa̱ yi.

66Reve aagbashi'i u damma Ishiyaku ili i na u yuwain suru. 67Reve Ishiyaku tara yi a̱ tyo o oogodo a mma va̱ yi Saratu. Ɗaɗa u tarai Rikatu reve wo o'wo ka va̱ yi, ɗaɗa gba u ciga niyi a̱bunda̱ lon, ne ɗa ko na mma va̱ yi kuwa̱i u da̱na̱ ta̱ na asuvu nden.

Currently Selected:

Ufaru 24: TSW

Highlight

Compare

Copy