Ufaru 23
23
Ukwa̱ na̱ a̱ciɗa̱ a Saratu
1Saratu yuwan ta̱ a'wan ukpaku nu ushin na̱ a̱za̱ e cindere (127) a wuma wa̱ yi. 2Reve u kuwa̱ a̱ lyuci va Kiriyat Arba (a na Heburon) e iɗa ya Ka'ana. Reve Ibrahim yuwan nden ma̱ a̱tsumola̱ngu a̱vu waru u shon adama a̱ yi.
3Ibrahim lyawa ta̱ lipu vu ka va̱ yi lo reve u 'ya̱wa̱ u yuwan adanshi na ama a Hitiya. 4Reve u damma, <<A̱mu mocin ɗa e memere ma̱ ɗu. Winaa numu nu uba̱ta̱ u na maa yuwan a̱ciɗa̱, tsa̱ra̱ n ciɗo lipu vu ka va̱.>>
5Reve aza a Hitiya a̱ usu Ibrahim, 6<<Uwwa tsu zagbain tsu, a̱vu vuma gbain ɗa vu ri a̱tsuma̱ a̱ tsu. Vu ciɗo lipu vu ka va̱ wu a̱tsuma̱ a aason a na a la'ai ulobonu a̱tsuma̱ o uba̱ta̱ u na a̱ ciɗosu ama. A̱tsuma̱ a̱ tsu babu za na a putsa wu a̱ ciɗo ka va̱ wu.>>
7Reve Ibrahim 'yon reve u ka̱ɗa̱towa̱ aza a Hitiya, ama e iɗa'a. 8Reve u damma le, <<Ni i usu n ciɗo ka va̱, she yu uwwa mu, i patiya mu Efuro va Hitiya mawun ma Zoha, 9adama u ne'e mu a̱ba̱nu a Makafela, za na ri niyi ɗe a̱ tyo o ukosu wa atsusa a̱ yi. Lyawai u wina uba̱ta̱'a̱ a̱ ma̱ka̱ka̱n ma̱ ɗu ni ikebe i na wu ntsayi wo o'wo uba̱ta̱ wa̱ a̱ciɗa̱.>>
10A mantsa'a Efuro za va Hitiya da̱na̱ ta̱ nden a̱tsuma̱ a aza a Hitiya o una̱ntsu u lyuci u na a ga'asusan. Reve u usu Ibrahim a atsuvu a aza a Hitiya suru a na a̱ ri lo, u damma, 11<<Ne ɗa shi, zagbain va̱, vu zuwaa mu atsuvu. N ca wu ta̱ atsusa na̱ a̱ba̱nu a na a̱ ri pe, a̱ ma̱ka̱ka̱n ma ama a̱ va̱. Vu ciɗo pe lipu vu ka va̱ wu.>>
12Reve Ibrahim ka̱ɗa̱towisa̱ a̱ tyo e iɗa a̱ ma̱ka̱ka̱n ma aza a Hitiya. 13Reve u damma Efuro a̱ ma̱ka̱ka̱n ma ama e iɗa'a, <<Na̱ vu usu, vu zuwaa mu atsuvu a̱ wu. N ta tsupa ikebe ya atsusa'a. Vu ushi ikebeꞌe e ekere a̱ va̱ adama n ciɗo ka va̱ ɗe.>>
14Reve Efuro usu Ibrahim, 15<<Zagbain va̱, zuwaa mu atsuvu, adama e iɗa i wa'a i na i rawai shekel azurufa ukpaku una̱shi (400), ili i ne i ɗa yaa zuwa u ɓolo tsu adanshi a̱vu na̱ a̱mu? Ciɗo a̱a̱kwa̱kwa̱ a̱ wu.>>
16Ibrahim usu ta̱ ili i na Efuro dammai. Reve u kunzuwa̱ Efuro azurufa na u dammai a atsuvu a aza a Hitiya. Reve u kunzu shekel azurufa ukpaku una̱shi (400) na̱ makundatsu ma na aza awina a yuwusayin ulinga na̱ a̱yi a mantsa'a.
17Ne ɗa atsusa a Efuro a na a̱ ri a̱tsuma̱ a Makafela za na ri na asana a Mamure, atsusa'a na̱ a̱ba̱nu a na a̱ ri pe oɓolo na̱ ɗanga na ri pe suru hali a rawa o utyo wa̱ yi, 18a ca ta̱ Ibrahim wo o'wo agadu a̱ yi a̱ ma̱ka̱ka̱n ma aza a Hitiya, e esu a aza a na aa uwusa nu una̱ntsu u lyuci'i suru. 19Ana a̱yi ndolo kotoi reve Ibrahim ciɗo lipu vu ka va̱ yi pe a atsusa a Makafela zuzu na̱ Mamure (a na Heburon) e iɗa ya Ka'ana. 20Atsusa'a na̱ a̱a̱bunu'u wo o'wo ta̱ za va Ibrahim diga ya aza a Hitiya wo o'wo yi uba̱ta̱ wa̱ a̱ciɗa̱.
Currently Selected:
Ufaru 23: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
