Ufaru 15
15
Akucunu a̱ A̱sula̱ na̱ Aburam
1Ana ili i ndolo i kotoi, a̱vu adanshi a̱ A̱sulazuva a̱ ta̱wa̱ uba̱ta̱ wa Aburam a alavu alavu ana, <<Aburam, she vu uwwa wovon wan, a̱mu ɗa a̱a̱ra̱ga̱ a̱ wu, atsupu a̱ wu a̱ ta̱ da̱na̱ a̱bunda̱.>>
2A̱vu Aburam damma, <<A̱sulazuva zagbain, nye i ɗa vaa ca mu? A̱mu ɗa nda n ri na̱ mawun shi. Eliyaza va Dimaska ɗa aa tara agadu a̱ va̱. 3A̱vu ɗa nda koto vu ca mu limatan shi, aagbashi o u'wa a̱ va̱ a ɗa oo o'wo magaji ma̱ va̱.>>
4A̱vu adanshi a̱ A̱sulazuva a̱ ta̱wisa̱ ya̱'a̱ yi ana, <<Aagbashi o ndolo Eliyaza a̱yi ɗa woo o'wo za va agadu a̱ wu shi, a̱yi mawun ma na vaa matsan, a̱yi ɗa woo o'wo za na oo o'wo ni ili ya̱ wu.>> 5Reve A̱sulazuva o uta̱to yi a alanga, a̱vu u damma, <<'Ya̱sa̱n aaci a̱ wu zuva, kece italyo'o i na i ri ɗe zuva. Na̱ vaa gura kece le, ne ɗa limatan va̱ wu voo o'wo.>>
6U ca ta̱ A̱sulazuva okolo a̱ yi, a̱vu A̱sulazuva a tara yi za va̱ a̱ɓula̱. 7Reve u damma yi, <<A̱mu ɗa A̱sulazuva, za na uta̱a̱ nuwu diga Ur va aza a Kaldiya, adama n ca wu iɗa i nda wo o'wo agadu a̱ wu.>> 8Amma a̱vu u damma, <<A̱sulazuva Zagbain, cine tsa ɗa mee reve u to o'wo agadu a̱ va̱?>> 9Reve u damma yi, <<Ta̱wa̱a̱ mu na̱ ma̱na̱wu ma nan ma a'wan a ta'atsu, na̱ a̱na̱wun e megbele ma a'wan a ta'atsu na̱ a̱a̱giri'i a a'wan a ta'atsu, na̱ muɗa na̱ mawun ma̱ ma̱rukuku.>> 10Reve u ta̱wa̱a̱ ne ele suru a̱vu wu kara le ure re, a̱vu u gere le akari suru zuzu na̱ za va̱ yi; amma wu kara nnunu'u ure shi. 11Reve ana nnunu n na n tsu ka̱ɗa̱ inama n telei e inama'a, a̱vu Aburam loso le. 12Urana a̱ ma̱riya̱a̱, reve nlavu n reme Aburam lon, reve irumbu i na i ka̱ra̱la̱i i wovon yi pala yi. 13Reve A̱sulazuva a damma Aburam, <<Vu reve na amayun, a na ugundo wa̱ wu u ta yuwan limocin n e iɗa i na za le ɗa shi, waru o to o'wo agbashi ɗe, reve gba a ca le a̱tsuma̱lima̱ hali a'wan ukpakuna̱shi (400.) 14Agba n to foro iɗa i na a yuwayin tsugbashi'i, reve na̱ a̱ca̱pa̱ o uta̱ nu utsuru u gbain. 15Amma a̱vu aciya̱wu, vu ta̱ tyo uba̱ta̱ wu nkaya ma̱ wu na asuvu nden; a̱ ta̱ ciɗo wu cina vu kutsa lon. 16Reve a̱ ka̱mba̱ pa a mantsa ma̱ na̱shi; adama a na koto iwuya ya aza a Amoriya i shiwan ne'en shi.>> 17Ana urana u riya̱i reve uba̱ta̱ u yuwan irumbu, reve upondo wa akina a̱ mikyon na akata a akina o utula̱i e memere me ili i na a karalai'i. 18O urana u ndolo A̱sulazuva a yuwan ta̱ akucunu na̱ Aburam, adansa, <<E ekere a̱ muwun mu ugundo ma̱ wu n ɗa maa casu iɗa i nda, diga o Uɗolu wa Masar a̱ tyo o Uɗolu u gbain wa̱ Yufireti. 19Ni iɗa ya aza a Kena, na aza a Keni, na aza a Kadamoniya, 20na aza a Hitiya, na aza a Feriziya, na aza a Refaya, 21na aza a Amoriya, na aza a Ka'ana, na aza a Girigashiya, waru na aza a Jebusiya.>>
Currently Selected:
Ufaru 15: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
