Ufaru 14
14
Aburam wawa ta̱ Lutu
1A mantsa mo ndolo, ngono n na̱shi n shi ta̱ lo: Amurafe mogono ma Shina, na̱ Ariyo mogono ma Elesa, na̱ Kedalayoma mogono ma Elam, na̱ Tida mogono ma̱ Goyim. 2Reve ngono'o a yuwan uvon na̱ ngono n ton: Bera mogono mo Sodom na̱ Bisha mogono ma̱ Gomora, na̱ Shina mogono ma Aduma, na̱ Shemeba mogono ma̱ Zeboyim, na̱ mogono ma Bela lyuci na waru a̱ tsu ɗe Zowa. 3Ele nda suru o ɓolo ta̱ a̱soja o uɓaa wa Sidim (a̱yi ɗa Mala ma Akpaɗi). 4A yuwaan ta̱ Kedaloma tsugbashi a'wan kupa ne ejere, amma a aa'wan a kupa na aza a ta'atsu reve a̱ 'ya̱sa̱n aci. 5Reve a aa'wan a kupa na̱ a̱za̱ a̱ na̱shi Kedaloma oɓolo na̱ ngono n na n ri oɓolo na̱ a̱yi a̱ ta̱wa̱ a lyuwa aza a Refaya a Ashetero Kane, aza a Zuzim waru a Ham, aza a Emim waru a Shave-kiriyatem, 6aza a Horiya o upasu wa agaɗi wa Seyi hali a̱ tyo El Paran o ukosu wa̱ a̱tsumona; 7reve a vadala a̱ ka̱mba̱ ya En Mishifat (a̱yi ɗa Kadesh), reve a lyuwa iɗa ya aza a Amaleka suru, oɓolo na aza a Amoriya fo aza a na a̱ shi nden a Hazazon Tama. 8Reve mogono mo Sodom, na̱ mogono ma Gomora, na̱ mogono ma Adah, na̱ mogono ma Zeboyim, na̱ mogono ma Bela (a̱yi ɗa Zowa) o uta̱, reve a uwa uvon 9na̱ Kedaloma mogono ma Elam, na̱ Tidal mogono ma Goyim, na̱ Amurafe mogono ma Shina, na̱ Ariyo mogono ma Elasa o Uɓaa wa Sidim. Ngono n na̱shi o uvon no ozo o ton. 10Uka̱ri wa̱ Sidim u shi ta̱ tapu na̱ a̱ka̱ri; reve ana ngono mo Sodom na̱ Gomora n sumai, ozo o ro a̱ riya̱ ta̱ pe, a̱vu ozo o ro a suma a̱ tyo e iɗa ya agaɗi.
11Reve n'yuwatan m pura̱ itana yo Sodom na̱ Gomora, ni ilyalya i le suru, reve a̱ ka̱ra̱. 12A̱vu e reme Lutu maci va Aburam, za na ri nden o Sodom, ni itana ya̱ yi. 13Reve vuma ta̱ na la'ai ta̱wa̱ u damma Aburam za va Ibraniya za na shi nden upasu wu ɗanga vo Oku va Mamure za va Amoriya, mawun ma̱ a̱na̱wun ma Eshiko na̱ Ana; ele nda a̱ shi ta̱ a muwwulai na̱ Aburam.
14Ana Aburam uwwai a na e reme ta̱ maci va̱ yi Lutu o uvon, reve u foɓo aza a na a gurai uvon ama ukpakuta'atsu na̱ kupa na̱ kunla̱ (318) suru suru aza a na a matsain o u'wa wa̱ yi. Reve o toni ngono n na̱shi a̱ tyo Dan. 15Na ayin u ne'eshen ta̱ a̱za̱ o uvon a̱ yi cine aa yuwan uvon ne ele, reve a̱ ga̱la̱ le, a̱vu a saɓa le a̱ tyo Hoba, upasu wu ugana wa Dimaska. 16Reve u ka̱mba̱to itana i na a̱ shi a̱ pura̱i a̱ ka̱ra̱ suru. A̱vu waru u ka̱mba̱to maci va̱ yi Lutu ni ili i na u ri ne ele suru, oɓolo na akapi a ama ali na̱ a̱ma̱ci.
Malkisada zuwaa ta̱ Aburam aba'un
17Ana Aburam lyuwai Kedalayoma na̱ ngono n na n ri oɓolo na̱ a̱yi nu uvon, a̱vu u ka̱mba̱. Reve mogono mo Sodom mo uta̱ adama u ga'aton yi o Uɓaa wa Shawe (a na, Uɓaa u Mogono). 18Reve Malkisada mogono ma Salem#14:18 Salem aala o ro a̱ yi a ɗa Urishelima. ma̱ ta̱wa̱a̱ na̱ masayan ma̱ ina̱bi no opopofu. Waru u ta yuwusan ulinga u tsuganu u Mogono ma̱ A̱sula̱. 19A̱vu u zuwaa Aburam aba'un, u damma, <<Lyawa Mogono ma̱ A̱sula̱ za na yuwain zuva ni iɗa, u zuwaa wu aba'un. 20Lyawa ica i tyo e ekere o Mogono ma̱ A̱sula̱, za na zuwai n'yuwatan ma̱ wu e ekere a̱ wu.>> A̱vu Aburam ca yi za ta̱ a̱tsuma̱ a kupa suru. 21Reve mogono mo Sodom ma damma Aburam, <<Ca mu ama, amma vu tara itana adama a aciya̱wu.>> 22Reve gba Aburam damma mogono mo Sodom'm, <<N kucina ta̱ ɗe na̱ A̱sulazuva, Mogono ma̱ A̱sula̱, za na yuwain zuva ni iɗa, 23na maa tara a̱punda̱ ko alaci a atan ko ili i ro i na i ri za va̱ wu shi, adama ta̱wa̱ vu damma, <N zuwa ta̱ Aburam o'wo za vu utsuru> wan. 24Maa tara ili i ro shi she de ili i na olobo a lyuwai, na akunda a ama a na a̱ 'ya̱wa̱i oɓolo na̱ a̱mu, Ana, na̱ Eshkol, na̱ Mamure. Lyawa ele a tara akunda e le.>>
Currently Selected:
Ufaru 14: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
