Mota̱a̱ 7
7
A̱sula̱ a̱ lyungu ta̱ Musa na̱ Haruna uba̱ta̱ u mogono
1A̱vu A̱sulazuva a̱ usu Musa, <<Uwwa nda, n zuwa ta̱ voo o'wo gashi A̱sula̱ e ekere a Firi'awuna Mogono. Mawun ma̱ a̱na̱wun ma̱ wu gba Haruna u to o'woo wu vumava̱sula̱. 2Vu damma yi ili i na n damma nuwu suru, mawun ma̱ a̱na̱wun ma̱ wu Haruna gba u ta damma Firi'awuna u lyawa aza a Isra'ila o uta̱ e iɗa ya̱ yi. 3Agba n ta zuwaa yi aciyogbamu. Agba ko na̱ n da̱shi yuwan iroci ni ili ya asalama e iɗa ya Masar, 4woo poloo ɗu atsuvu shi. A̱vu mu ba̱ruwa̱ ukere u va̱ a aci a Masar. Reve nu ulinga wu ucira wu uge'etosu mu uta̱a̱ oɓolo a̱ a̱soja a̱ va̱, ama a̱ va̱ aza a Isra'ila e iɗa'a. 5Aza a Masar gba e te reve a na a̱mu ɗa A̱sulazuva a mantsa ma na mu ba̱ruwa̱i ukere u va̱ a aci a Masar reve mu uta̱a̱ ama a Isra'ila a̱tsuma̱ e le.>>
6Reve Musa na̱ Haruna a yuwan ili i na A̱sulazuva a damma nle a yuwan gan. 7Ana a yuwayin Firi'awuna adanshi'i, Musa da̱na̱ ta̱ na a'wan kupakunla̱. Haruna gba shi u da̱na̱ ta̱ na a'wan kupakunla̱ na aza a ta'atsu.
Aaɗanga a Haruna o o'wo ta̱ yo
8A̱vu A̱sulazuva a damma Musa na̱ Haruna, 9<<Musa na̱ Firi'awuna zuwa ɗu i yuwaan yi ulinga wa asalama, vu damma Haruna vari aaɗanga a̱ yi a̱ ma̱ka̱ka̱n ma̱ yi, aaɗanga'a u to o'wo yo.>>
10Reve a̱ 'ya̱wa̱ ya Firi'awuna cine A̱sulazuva a damma nle. A̱vu Haruna vari aaɗanga a̱ yi a̱ ma̱ka̱ka̱n ma Firi'awuna na azagbain a̱ yi, reve aaɗanga'a wo o'wo yo. 11A̱vu Firi'auna ɗe a̱za̱ o urevu no oboci na̱ a̱za̱ a̱ yindi a̱ yi, aza a na a yuwain ulinga wa asalama na̱ tsuboci tse ele cine Haruna yuwain. 12A̱vu suru nle a vari aɗanga ele e iɗa a̱vu o o'wo iyo. Reve aaɗanga a Haruna o soɗu aɗanga e le. 13Firi'awuna gba u buwa ta̱ na aciyogbamu, u poloo le atsuvu shi, cine A̱sulazuva a dammai.
Mɓula m mini n ka̱mba̱i mpasa
14Reve A̱sulazuva a damma Musa, <<Firi'awuna ta̱ na̱ aciyogbamu, a̱yi ɗa nda aa 'yuwusan a lyawa ama a̱ ka̱ra̱. 15Adama o ndolo vu ka̱ra̱ a̱ 'ya̱wa̱ ya Firi'awuna na̱ wasasa, a mantsa ma na u tsu uta̱ a̱ 'ya̱wa̱ o Uɗolu wa̱ Nilu. Vi isawan e ikyun yu uɗolu'u adama vu ga'an na̱ a̱yi. Vu 'ya̱wa̱ na aaɗanga a na a̱ ka̱mba̱i yo'o. 16Vu damma yi, <A̱sulazuva A̱sula̱ a Mmaci ma Ibrahim a̱ lyungu mu ta̱ ya̱'a̱ wu n damma wu: Vu lyawa ama a̱ va̱ a̱ ka̱ra̱, tsa̱ra̱ a̱ 'ya̱wa̱ a yuwaan mu a̱ga̱nda̱ a̱tsumona, a̱vu ɗa gba nda hali o n gogo vu uwwa shi. 17Apa ili i na A̱sulazuva a dammai: Tsunda tsa ɗa vee reve a̱mu ɗa A̱sulazuva: Ka̱lyuwa̱, n ta faba mini ma̱ Nilu na aaɗanga a nda a na a̱ ri o ukere u va̱, mini'i gba mo to o'wo mpasa. 18Mugula n na n ri pe o uɗolu'u a̱ ta̱ kuwa̱, waru uɗolu'u u ta shama, hali na aza a Masar aa gura sowo mini'i shi.> >>
19A̱vu A̱sulazuva a damma Musa, <<Vu damma Haruna, <Tara aaɗanga a̱ wu, a̱vu vu sapi yi a̱ tyo a̱ mini ma Masar suru o ɗolu no oko'o na aguga waru, daɓi mini suru a̱tsuma̱ a Masar u to o'wo mpasa, hali na̱ mini ma̱ nden, na̱ a̱ka̱bu, na ara'atsu.> >>
20Reve Musa na̱ Haruna a yuwan cine A̱sulazuva a damma nle tsoyi. Firi'awuna na azagbain a̱ yi lo a̱ a̱ka̱nla̱, a̱vu Haruna 'ya̱sa̱n aaɗanga a̱ yi zuva, a̱vu u faba mini'i. Reve mini mo Uɗolu wa̱ Nilu'u suru wo o'wo mpasa. 21Reve mugula n na n ri pe o uɗolu suru a̱ kuwa̱. Reve uɗolu'u wo o'wo ushamu uwuyanu, hali aza a Masar a̱ kuɗa̱ o sowo mini'i. Ne ɗa mpasa mo o'woi uba̱ta̱ suru a̱tsuma̱ e iɗa ya Masar.
22Reve ozo o tsuboci fo a yuwan cu'un vi ili i na Haruna yuwain. A̱vu mogono ma̱ da̱shi aciyogbamu. Reve u 'yuwan o poloo le atsuvu cine A̱sulazuva a dammai ɗe. 23Reve Firi'awuna gba vadala a̱ ka̱mba̱ o ukobu wa̱ yi, agba u dama ni ili i na i farai shi. 24A̱vu aza a Masar suru a̱ ka̱pa̱ muko'o e ikyun yu Uɗolu wa̱ Nilu tsa̱ra̱ a̱ tsura̱ mini mo oso, adama a na a gura sowoi mini mo uɗolu'u shi.
Mɓa̱la̱ mo opoɗo
25Ana'an ɗa ayin i cindere a na A̱sulazuva lungusa̱i mini ma̱ Nilu.
Currently Selected:
Mota̱a̱ 7: TSW
Highlight
Share
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
