Alajiya 9
9
Ukosu wu za suru ukwa̱ u ɗa
1Amayun, n jima ta̱ aa yuwusan majiyan me ili i nda lon, a̱tsuma̱ okolo a̱ va̱, a̱vu fo m petelyuwe ili i nda, me ene cine a̱za̱ a̱ a̱ɓula̱, na̱ a̱za̱ o ugbozu, na̱ linga le suru, a̱ ta̱ o ukere wa̱ A̱sula̱. Hali fo ni icigi i le, ni ima̱ i le. Babu za na revei ili i na yaa cina le nda elime. 2Babu ili i na i tawai ko'o, ili i ta̱ i ɗa suru yaa cina za. E ekere a za̱ va̱ a̱ɓula̱ na̱ za vi iwuya, na̱ za vi sa'ani na̱ za babu isa'ani, na̱ za cece na̱ za vi idaba, na̱ za na a casu kucci, na̱ za na tsu ca kucci shi.
Za va̱ a̱ɓula̱,
la'a za vu unusu shi.
Za na tsu tara akucunu,
la'a za na tsu 'yuwan a tara akucunu shi.
3A̱yi nda a̱ yi ɗa iwuya i na yaa farasa a̱tsuma̱ o uvaɗi u nda, ukosu wu za suru ili i ta̱ i ɗa. Na̱ ne suru okolo a vaɗilima̱, tapu ɗa u ri ni iwuya, waru a̱ ta̱ nu ulungusu okolo e le, a mantsa ma na a̱ ri wuma. A̱ tyo o ukosu waru, reve a̱ kuwa̱. 4Amma za na ri a̱tsuma̱ a za a wuma biti, u tu nu uzuwu wo okolo a̱ tyo elime, adama a na u la'a ta̱ na̱ musa̱n ma na ma̱ ri wuma, na̱ a̱kwa̱kwa̱ a kamu!
5Adama a na aza a na a̱ ri wuma
e reve ta̱ na a̱ ta̱ kuwa̱,
amma a za na a̱ kuwa̱i ɗe e reve ili i ro shi.
A̱ ri na atsupu o ro waru shi,
waru a̱ da̱shi cuwan ne le shi.
6Icigi i le, ni i ima̱ i le, na̱ tsushu'un tsa̱ le
a̱ kuwa̱ ta̱ oɓolo ne le.
A̱ da̱shi waru yuwan ili i na a yuwusan,
a̱tsuma̱ a wuma wu uvaɗi u nda shi.
Wuma u ta̱ mokoɗi
7Ka̱ra̱, vu yuwan mmalu ma̱ wu, vu uwwa uyo'o wi ilyalya ya̱ wu, vu sowo masayan ma ina̱bi ma̱ wu na̱ ma̱za̱nga̱. Adama a na ili ya̱ ndolo a̱ yi ɗa ifoɓi i na A̱sula̱ a yuwaan nuwu. 8Mantsa suru oto itana i u ri, she vu lyawa aci a̱ wu a kasa na̱ mani'i wan. 9Vu uwwa uyo'o u wuma wa̱ wu na̱ ka na vu ucigai, a̱tsuma̱ rana ve pere na A̱sula̱ a ca nuwu a̱tsuma̱ a wuma wu uvaɗi u nda suru, adama a na mawwa mo uyo'o u nda, a̱ yi ɗa goon iliyinkapa ya̱ wu yu ulinga u na vu yuwain a̱tsuma̱ o uvaɗi u nda. 10Ili i na suru vu tsura̱i naa va yuwan, vu yuwain nu ucira wa̱ wu suru, adama a na babu ulinga, ko majiyan, ko urevu, ko ugbozu uba̱ta̱ wu nden ma̱ a̱kwa̱kwa̱ uba̱ta̱ u na va̱a̱ 'ya̱wa̱.
11Me ene ta̱ ili i ro a̱tsuma̱ a wuma wu uvaɗi u nda, ashe,
mantsa suru ɗa za na gurai ilaɗi lon,
tsu lyuwa ala'anlai shi,
mantsa suru ɗa za na ri nu ucira
tsu lyuwa uvon shi,
mantsa suru ɗa za vu ugbozu
tsu tsura̱ ilyalya shi,
mantsa suru ɗa za na ri nu urevu
tsu oɓoloto utsuru shi,
mantsa suru ɗa za na gurai
a̱ yi ɗa u tsu tsura̱ icigi shi.
Amma mantsa nu ulyuwu we elime
i tsu cina ta̱ koyan a̱tsuma̱ e le.
12Adama a na vuma tsu reve mantsa ma̱ yi shi.
Tsa magula ma na a tsu reme
a̱tsuma̱ e igolo,
ko tsu nnunu n na a tsu reme
a̱tsuma̱ a maza,
ne ɗa fo a̱ tsu reme vaɗilima̱ babu urevu
a mantsa ma addama.
Ugbozu u la'a ta̱ tsulo
13N gura ta̱ ene ili i na moo rito adama o ugbozu a̱tsuma̱ a wuma wu uvaɗi u nda, e ekere a̱ va̱ ili i gbain i ɗa. 14A yuwan ta̱ lyuci ke'en ro, ama na a̱ ri pe ke'en ɗa a̱ ri. A̱vu mogono ma gbain mo ro ma̱a̱ ta̱wa̱a̱ yi nu uvon, a̱vu waru u ka̱nda̱ruwa̱ lyuci'i, a̱vu u suwa ili i na a kumba o ukari adama o uvon. 15A̱tsuma̱ a̱ lyuci'i a yuwan ta̱ za vu ulambu ro na da̱na̱i nu ugbozu, za na adama o ugbozu wa̱ yi u wawai lyuci'i. Na̱ ne suru babu za na cuwain na̱ za vu ulambu u ndolo'o. 16A̱vu n damma, <<Ugbozu u la'a ta̱ ucira ulinga.>> Amma o goro ta̱ ugbozu wu za vu ulambu u ndolo, a̱ da̱shi a cuwan na adanshi a̱ yi waru shi.
17U ta la'a na a uwwa adanshi e ben a za vu ugbozu,
a na a uwwa yisali yi za tsugbain e memere mo olo.
18U la'a ta̱ a̱ tsura̱ ugbozu
a na a̱ tsura̱ itana yu uvon,
amma za vu unusu tsu lungusa̱ ta̱
ili yu ulobonu ya̱ a̱bunda̱.
Currently Selected:
Alajiya 9: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
