Alajiya 8
8
1Zane ɗa ri tsa vuma na ri nu ugbozu?
Zane ɗa fo gura revei ucuɗuwu wi ili na̱ a̱bunda̱?
Ugbozu u tsu zuwa ta̱ urewesu u vuma u da̱na̱ a madala,
u tsu zuwa ta̱ fo urewesu
u na u ri ulukutu u yuwan ma̱za̱nga̱.
Vu yuwaan Mogono tsutoni
2Vu yuwan tsutoni nu udammu u mogono, adama a akucunu a na vu tarai a̱ ma̱ka̱ka̱n ma̱ A̱sula̱. 3She vu da̱na̱ e meje'en ma na va lyawa uba̱ta̱ u mogono wan. Waru she jima uba̱ta̱ u meleshe wan, adama a na mogono ma ta gura yuwan ili i na u cigai suru. 4Ana wo o'woi adanshi o mogono a̱ ta̱ nu ucira lon, za ne ɗa aa gura damma yi, <<Nye vaa yuwusan?>> 5Za na suru yuwain tsutoni nu u dammu u mogono, wa̱a̱ da̱na̱ ee meleshe shi, amma okolo a za vu ugbozu, ta̱ reve cine wa yuwan ili, a mantsa ma na wuntsayi a yuwain. 6Adama a na ili suru, i tsu da̱na̱ ta̱ na̱ mantsa ma̱ yi, nu ure wa̱ yi,
ko na wo o'woi a̱tsuma̱lima̱ a vaɗilima̱, a̱ a̱bunda̱ a ɗa u ri lon.
7Amayun, babu za na revei ili i na yaa fara,
adama a na za ne ɗa a damma yi, ili i na i ri lo elime?
8Babu za na ri nu ucira e ekere a̱ wivuwun wa̱ yi,
babu waru za na ri nu ucira, adama o urana u na wa̱ kuwa̱.
Ununa u ri, babu za na ri nu ucira u na waa lyawa uvon,
babu za vi iwuya na a la'a, o ure wi iwuya ya̱ yi.
9Me ene ta̱ ili i ndolo suru, a mantsa ma na n da̱na̱i a majiyan, me ili i na maa yuwan pe a̱tsuma̱ o uvaɗi u nda. Me ene ta̱ nanza na ri nu ucira a aci ozo o ro, amma reve ucira'a u ka̱mba̱ u palaa yi.
Re va̱ A̱sula̱ a̱ ta̱ usa̱n u mereve
10A̱vu waru me ene, a̱ ciɗosu a̱za̱ e iwuya, a za na a tsu uwusa na̱ o utusa̱i, a̱tsuma̱ o uba̱ta̱ wa akiza, a tsu yuwaan le ta̱ ica, a̱tsuma̱ e iɗa i na a yuwain iwuya i ndolo. Ili ya̱ ndolo fo ili ya̱ pere i ɗa.
11Adama a na a̱ tsa̱ a̱ jika̱ a na a paɗa ugana uba̱ta̱ wa aza a na aa yuwusan iwuya shi, u zuwa ta̱ okolo ama a̱ da̱na̱ tapu ni iwuya, na̱ majiyan ma na aa yuwan iwuya. 12Ko na wo o'woi za vi iwuya tsu yuwan ta̱ iwuya a̱ tyo ukpaku, a̱vu waru u jima a̱tsuma̱ o uvaɗi, na̱ ne suru n reve ta̱ n na̱ vuma ri na̱ wovon wa̱ A̱sula̱, waru a casu yi tsugbain, ili suru i ta wala yi mejege. 13Amma n reve ta̱ a za a na aa yuwusan iwuya a̱a̱ da̱na̱ na asuvu nden shi, a̱ ta̱ tsu ululu, a jima a̱tsuma̱ o uvaɗi shi, adama a na a̱ ri na̱ wovon wa̱ A̱sula̱ shi.
14Ka̱lyuwa̱, ili ya̱ pere i na yaa farasa a̱tsuma̱ o uvaɗi. Ili i na i tsu cina a̱za̱ a̱ a̱ɓula̱, she damma ele a̱za̱ e iwuya a ɗa, ili i na waru i tsu cina a̱za̱ e iwuya, she damma ele ama a̱ɓula̱ a ɗa. N damma ta̱ fo ili ya̱ ndolo ili ye pere i ɗa. 15Adama o ndolo, n damma ta̱ u tu ulobonu vuma uwwa uyo'o u wuma wa̱ yi, adama a na babu ili i ro a̱tsuma̱ a wuma wu uvaɗi u nda, na la'ai vuma lyuwa a̱vu u sowo, waru wu uwwa uyo'o u wuma wa̱ yi. A̱yi ndolo fo u ta kamba yi suru a̱tsuma̱ o ulinga wa̱ yi, a wuma wa̱ yi na A̱sula̱ a ca niyi a̱tsuma̱ o uvaɗi u nda.
16N yuwan ta̱ majiyan ma na ma̱ da̱na̱ za vu ugbozu, waru n gura reve ili i na yaa farasa a̱tsuma̱ o uvaɗi u nda, waru n ca esu a̱ va̱ nlavu shi urana na ayin. 17A̱vu me ene suru ulinga u na A̱sula̱ a yuwain, a̱vu n gura reve babu vuma na gura revei, ili i na yaa farasa a̱tsuma̱ aa wuma wu uvaɗi u nda. Na̱ a̱bunda̱ o ukadu wi izami ya̱ yi biti, waa gura tsura̱ ili i ro shi. Ko na̱ shi u tara aciya̱yi za vu ugbozu ɗa, za na ri nu urevu, na̱ ne suru waa gura tsura̱ ili i ro shi.
Currently Selected:
Alajiya 8: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
