Lawana Nani 69
69
LAWANA 69 (68)
Pât saura ra winanka
Aiwani nani tâ bri ba wina, “Tangni nani” tiunka. Debit lawana.
1Swaki ai sâks, Gâdki,
kan yang pat katwi pruaia baman sna.
2Luklukia tihu ra dimi auna, bara mini
pan taibi, tâi baikaia sin sip apia sni;
baku sin lî tihuka ba kat iwi wari,
bara lî aubrika ba bui ai raski ai brih auya.#Jon 2.6.
3Yang pat kâirma prawan winan baman,
bara kâirma ba latwan sa;
¡baha mita naikra nani ba sin
swapan sa Gâd ra bîla kaikan man!
4Pâtkas kapri misbara ai kaiki nani ba,
tâiwa mina ba wal kau ailal sa,#Law 35.19; Jn 15.25.
waihli nani ba ailal pali takan,
dîa tâwan rau ai sauhkaia âpu,
sakuna taibi ai munisa,
yang implikras katna ba kli yabaia.
5Gâdki, man kaikisma yang nahki tanis kapri ba;
bamna yang lika man ra saurki ba sip yukukras sna.
6Dawan, Gâd karnika sut brisma ba,
¡baha nani man ra kasak luki nani ba, yang pâtki tâka
swira paskan kabia apia!
Israel Gâdka,
baha nani man ra brin dauki mai pliki ba,
swira paskan kabia apia.
7Yang na, man tamka upla bui saura ai wisa;
bamna yang maiwan ba swira lâka ni banhwan sa;
8yang na tringsar baku, bara upla ai kakaira apia sa,
muihki pali nani ba mita sin.#Job 19.13.
9Man wamtla tâwan lawanka ba mita,
ai angki âpu ai daukisa;#Jn 2.17.
saura munaia ba purira kauhan sa,
baha nani man ra saura mai wi nani ba.#Ro 15.3.
10Inisna, plun wahwisna ba ra,
witin nani laiwaska kikisa;
11sari kwalka siksa dimisna ba ra,
upla sut laiwaska kikisa.
12Upla sut yang nini aisisa,
bara bîla tatakra nani ba sin
lawana nani paski aikisa.
13Sakuna yang, Dawan, man ra winisna.
Gâdki, ¡nanara hilp ai muns!
¡Latwan lâka tara brisma ba,
pana yang ra aisas!
Man hilpkam ban brisna ba mita swaki ai sâks.
14Ai swirka drapapa ra dimi wamnara,
swaki ai sâks baha nani misbara ai kaiki ba wina,
bara baha laya tihuka ba wina sin.
15¡Ai swirka lî aubrika ba bui ai aki brih wabiara!
Swirka lî warbrika tihu ba mita ai tikbiara,
ailangki bara ninira prak prawbia.
16Dawan, man bui yang ra ai aisas;
man sika yamni sma,
bara latwan lâka sut brisma,
man lamtwanka tara ba mita
yang ra tawi ai kaiks;
17¡bara nampakan na, bahki ai lulki swipara!
Isti pali yang ra ai aisas;
kan yang pât ra sna.
18Laimara bal, bara swaki ai sâks;
¡waihli nani mihta wina, dakbi ai sâks!
19Man sika, baha nani saura ai wi kata kaikram,
swira lâka bara kulkanka âpu ba sut pâtka wauhri;
man sut kaikisma, ya ba yang waihli nani ba
20Saura ai win ba mita,
kupi ba sut sauhkan sa;
lukanki ba swapni sakan
bara karniki sin âpu takan.
Bamna yang bahki man plikri upla kum,
latwan ai kaiki maisi nihkbia dukiara.
21Pati ra puisin mangkan,
bara diran ai daukan binigar ni aikan diaia.#Mt 27.34,48; Mk 15.23,36; Lk 23.36; Jn 19.28-29.
22¡Ai tibilka bara latwan lâka pata ba,
witin nani mapara mina prukaika kabia!
23¡Man bui witin nani diara kaikras daukma
bara yarka ai kuhma nani ba tatatwi kabia!#Ro 11.9-10.
24¡Lawankam ba, witin nani purara sunbia
bara man lawankam ba wina, swak takbia apia!
25Witin nani kiampka ba,
yabrika upla iwras tasbaya daukamni,
bara upla kumi baha tintka watla ra iwbia apia.#Ap St 1.20.
26Kan witin nani sika, man bui rausauhkram
bara sari brisa, baku sin man bui yaram
insauhkan ba, latwanka ba lawaska kiki banhwisa.
27Saura ba mana pana saura yas;
¡baku pâtka swih tikan lâka ba bribia apia!
28¡Raya kaia wauhkataya ba wina diki sâks!#Imp St 32.32; Par M 3.5; 13.8; 17.8.
Bara kasakkira nani nina aikuki ulbi mangkpara.
29Sakuna yang lika siknis bara sari sna,
Dawanki ai buks, bara swaki ai sâks.
30Yang lawana aiwani, Dawan nina ba mayunamna,
tingki lâka wal witin ra mayunamni.
31Bara Dawan naha na kanra yamni kulkbia, bîp
wainhka kum sakripais dauki yabamna ba wal,
apia kaka bîp wainhka lupia kum ai aringka
bara ai asmala nani bri ba kira.
32Sari bri nani naha kaiki,
witin nani lilia takbia,
bara Dawan ra pliki nani ba,
ai kupia, ai spiritka nani ba purara bukan kabia;
33kan Dawan sika upla umpira nani ra walisa;
bara ai uplika nani silak watla ra saura kulkras sa.
34¡Kasbrika purara, tasba bara kabu ra,
rayaka bri dukia nani sut ba,
Dawan ra mayuns!
35-36Bamna Dawan Saion ba swaki sâkbia
bara Juda tawanka nani ba kli paskbia.
Bara witin nani bahara kli iwbia, bara ai dukia bribia.
Bâra mika kiamkam ba, ai tasbaya ba bribia,
baku sin ani uplika nani man ra latwan
mai kaiki nani ba bahara ai watla brih iwbia.
Currently Selected:
Lawana Nani 69: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
