Lawana Nani 68
68
LAWANA 68 (67)
Israel pura luan lawana
Aiwani tâ bri wina. Debit lawana, aiwananka.
1Gâd wark daukaia buya ba ra,
ai waihla nani ba yakabrira takisa;
witin ra misbara kaiki nani ba, ai mawan wina sut plapisa.#Kul K 10.35.
2Kiasma baku pâsa ra pâli lap tiwisa,
blas pauta ra slilwi tiwi baku tiwisa.
Gâd mawanra watawi dadaukra sut tiwisa.
3Sakuna upla pain nani ba lilia takisa;
¡Dawan mawanra âuyapah, lilia srutwi pulisa!
4Man nani, Gâd ra aiwani banhs,
lawana aiwani banhwi bas witin ai nina ra;
mayuns kasbrika nani purara uli impaki ba.
¡Dawan ra lilia dauki banhwi bas!
Lilia dauki banhwi bas witin ai mawanra.
5Gâd ai tempelka holi ra iwi ba,
witin sika rau nani aisika ba,
bara sin piarka nani ra tâ babaikra ba;
6Gâd mita upla yakan, watauki nani ra
takaskaia watla yabisa,
silak ra mangkan uplika nani ba,
pri daukisa bara pâwaia sip sa;
sakuna mapara, babura nani ba,
tasba mâ âpu ba ra iwi kabia.
7Man Gâd, tawankam tâura watma,
baha upla iwras tasbaya bâk,
8bara tasba ba nikban,
lî sin kasbrika purara ba wina auhan,
Sainai ilka ba sin tatatban,
Gâd mamwanra;#Imp St 19.18.
Âu, Israel Gâdka mawanra.#Wih 5.4-5.
9Gâd, man bui yaram lî ailal auhan,
tasba lâwan karnika nani ba, kli
raya daukaia dukiara.
10Man uplikam nani ba bahara yaram ai playa bapan,
bahara, man Gâd, man kupiam pinhka mita,
upla umpira nani diara luha ba diara yabram.
11Dawan mita upla nani ra ai bîla kum blikan
bara mairin nani manis upla ra smalkan:
12“¡King nani ba ai aiklaklabra aikuki plapisa!”
Mairin nani ba, watla ba ra yui bri banhwisa,
dîa ai waihla mihta wina dakban kata ba dukia nani ba.
13Sakuna man nani lika takaski yukuwi kapram.
¡Butku tnawa nani silbar lalauban ba ra!
Ai taya nani ba lika gul ni lalauban ba.
14Karnika sut bri ba mita,
king nani sut yaban plapan
bara Salmón ilka ba, wahmuk pinhka baku ais kauhi kan.
15¡Nahki Basán ilka ba purara sa,
bahna kat ba purara pali sa!
16Man nani kau il purara sma ba,
¿dîa kan tuman lâka ra,
Dawan iwaia ilka ba ra kaikisma?
¡Dawan ba bahara iwi kabia ban kaia ra!
17Dawan ba, aiklabaia waginka nani milian nani brisa;
Sainai wina bahara uli balan ai tempelka ra.
18Gâd, man purara uli watma upla nani priski brih muni,
lal mana sakram upla nani wina;#Epe 4.8.
bara man mampara babura nani sut ba,
Dawan, man ra bawan.
19¡Dawan ba yamni pali kabia,
wan Gâdka bara wan Sasakra ba,
witin sika yu bani wan wirhika twilki ba!
20Wan Gâdka ba sika Gâd swaki wan saki ba,
bara prura wina sin dakbi wan saki ba.
21Gâd mita ai waihla nani sut lal dakbia
baha uplika ban luki saura dauki ba.
22Dawan aisin ba:
“Basán wina kli mai laki mai bri balamni;
yang kabu tihuka nani wina, kli mai bri balamni.
23Minam nani ba waihlam nani tâlia ra sikbi sâkma,
bara yulam nani ba, tâlia ba dih banhbia.”
24Gâd, yang Gâdki bara Kingki,
man wal aisaia watla ra upla ailal bâra sa,
yua tara dauki man ra mai kulkisa.
25Aiwawanra nani ba, tâura wapi aiwanisa,
miusik kakangbra nani ba lika ninara wapisa,
bara tiara lupia nani ba lilapas ra,
drum sirpi ba singbi banhwisa.
26Man nani sut, Dawan Gâd ra yamni wis;
¡yamni wis Israel aiska asla takankam ra!
27Benjamín sirpika ba, tâura witin auya
Juda wihtka ailal ba wal;
bara Zabulón, Neftalí wal sin.
28Gâdki, man karnikam ba mariks;
yang nani ra dîa daukram ba kli dauks.
29Jerusalem, man tempelkam purara ba wina,
king nani ai prisantka brih aula,
30Idsip ba lawi dauks, baha snati pliska daiwra yahpa ba,
bîp wainhka prautkira daknika ba
bara bîp lupia nani daknika ba,
lalahkira takaia wisi tawan nani ra mâyara kulki ba;
war lalihkra uplika nani ba ra yakabrira daukisa.
31Idsip wina kuntri lengstarka nani balbia
Etiopía uplika nani ba Gâd mapara ai mihta nani bukbia.
32Man nani, Gâd ra aiwans,
tasba kingka lâka nani ba sut
Dawan ra lawana nani aiwans.
33Kasbrika pura nani ra uli tauki ba,
ban kaia ra kasbrika purara ba,
Man nani wals ai bîla binka nahki taki ba,
ai bîla baikra karnika tara bri ba.
34Gâd karnika ba aitani kulkisna;
kingka lâka bri ba Israel purara,
ai karnika ba kasbrika sangni nani ba kat bâra sa.
35Gâd ba pranakira sa ai tintka watla holikira ra;
Israel Gâdkam ai karnika yabisa ai uplika nani ra.
¡Dawan ba yamni pali kabia!
Currently Selected:
Lawana Nani 68: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
