Lawana Nani 55
55
LAWANA 55 (54)
Rausauhkaia nina bliki ba pura sunra
Aiwani nani tâ bri ba wina, gitar sâtka nani brih aiwanaia, Debit smalkan.
1Gâdki, puri sunra na wals;
puri sunra na walras baku kapara.
2-3Yang ra wali bara pana ai aisas;
trabilki tila wina mamkabisna.
Waihli bîla baikra ba mita ai tatatbisa,
watawikira nani winanka ba mita sin.
Sari lâka ni wirha ai taiban sa;
praut pali taki yang ra aisisa.
4Kupi ba laima bilara lakwisa
prura sibrinka tara ba sin,
yang purira kauhan sa.
5Sibrin saura kum, yang ra ai diman sa,
¡baha sibrinka mita tatatwisna!
6Bara yang wisni:
“¡Butku baku pan tnaiwa bri katna kaka!
Pâlaina, bara sip kapri ris briaia.
7Pâli ban laihura waia kapri,
bara upla iwras tasbaya ra wih takaskaina.
8Kaini pat pali kahbaia kapri plapi wih;
pâsa karna krawi ba wina,
bara skwal saura ba wina sin.”
9Sauhki tiks Dawan, witin nani ra,
dîa aisi ba sip tânka briras dauks,
kan yang kaikisna ba saura lâka bara tar baiwan lâka baman bâra sa.
10Witin nani ba kakna ra bara tihmia ra tawan ba kir wataukisa.
Baha ra watawan lâka saura munaia lâka bâra sa;
witin nani tilara lâ kat wark nani daukras lâka baman sa.
11Tawankam yabalka nani ba;
saura lâka, kunin wal aibanhwan sa.
12Waihli kum bui kupi sauhkras sa,
baha yang sip katna kupi alki takaskaia;
misbara ai kaiki uplika ba sin maipara buras sa,
witin wina yang yukuwaia sip katna ba.
13Man sika yang upliki pali ba
man ba upliki kakaira sma ba,
14man wal Dawan tempelka ra asla taki kapri,
upliki pali baku aisaia;
man wal upla kwâra nani tilara wapi katna ba.
15¡Prura bui waihli nani ra alkbia!
¡Kau raya kaka raiti ra kauhbia,
watawi lâka nani ba, ai kupia ra sa bamna!
16Yang lika Gâd ra winamni;
bara Dawan ba swaki ai sâkbia.
17Yang titan ra, tutni ra bara tihmia ra sin
brukwi bara ini maimna lulki kamni,
bara witin bîli baikra ba walbia.
18Aiklabanka nani wina ai dakbi sâkbia;
bara rayaki ba swaki sâkbia
ban kra waihli nani ba ailal kabia kra.
19Gâd sika ban kaia ra king aimaki ba,
witin ba yang ra walbia ba ra,
witin mita mapara batakbia,
kan witin nani ai daukanka saura ba swiras sa,
baku sin Dawan sibrinka briras bamna.
20Ai uplika nani mapara ai mihta bukisa,
wan uplika lâka ra pramis daukan ba kat sin daukras.
21Ai aisinka nani ba butar lalalnika baku aisisa,
sakuna ai lukanka nani ba lika war bukisa.
Ai bîla aisinka ba batana baku swapni sa,
sakuna baku apia sa,
sim sord malika baku brisa.
22Trabil taki lukisma ba, Dawan ra swis;#Mt 6.25-34; 1 Pi 5.7.
bara witin minam pirwras kira mai bri kabia;
witin mai swika kauhma apia,
baha uplika ai bîla wali ba.
23Gâdki,
upla âikra nani bara kuninkira nani sin,
raya kabia apia;
ai rayaka ba bakriki man kabia;
man bui munrika raiti tihuka ra wabia,
sakuna yang lika kupi aiska man ra kasak lukisna.
Currently Selected:
Lawana Nani 55: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
