Lawana Nani 119
119
LAWANA 119 (118)
Dawan lâka nani ba mayunisa#Law 19.7-14.
- 1 -
1Lilia pali sa,
baha nani ai yabalka ra tâski âpu impaki nani ba;
bara Dawan smalkanka nani nina bliki ba.
2Lilia pali sa,
baha nani ai lâka bîla nani yamni bri ba,
bara ai kupia aiska witin ra pliki ba,
3baha nani saura daukras ba;
witin nani Dawan yabalka ra wapisa.#Law 1.1-2.
4Man adarkam wankisma, lâmka nani smalki wankram ba,
yang nani baha nani ban pali bri dauki kaia.
5¡Aitani lukaina, yang yabalki nani ra bapi bûi kaia,
man lâmka nani ban bri, bîlam wali dauki kaia!
6Bâra mika swiri daukan kabia apia,
yang bui man lâmka bîla nani kat daukisna ba ra,
7kupi wapni lâka ni mamyunamni,
man lâ kasak lâka kat,
lâ daukisma ba lan takamna ba ra.
8¡Man lâmka nani ba aiska daukaia want sna!
¡Man ban aiska ai lulki swipara!
- 2 -
9¿Nahki wahma kum sip kabia,
ai rayaka ba tâski âpu briaia?
¡Man bîlam dîa wi ba kat dauki ba mita!
10Yang kupi aiska ni mai plikri;
aikrika lâmka bîla nani ba wina tnaya ra tawamnara.
11Man bîlam aisinka nani ba kupi ra mangki briri,
yang bui man mampara saura daukaia apia ba mata.
12¡Man sika yamni pali sma ba, Dawan!
¡Man lâmka nani ba ai smalks!
13Yang bui upla nani ra wimni,
man bîlam ni aisi daukram lâka nani dahra ba.
14Yang lilia katna man lâ nani mangkram ba yabalka ra,
yuya manis briaia, lilia lâka purkara.
15Man lâmka nani luki kaikamna ba ra,
man yabalkam nani ra lukanki ba mangki brimna.
16Man lâmka nani ba wal lilia takamna,
bara man bîlam ba âiya lap tiwbia apia.
- 3 -
17¡Man nampakan ra rayaka yas!
¡Bara man bîlam wali dauki kamni!
18Naikra nani ba ilingks,
bara yang diara nani ba kaikamni,
man smalkankam aihkakira nani ba.
19Yang na tringsar kum sni naha tasba ra;
man lâmka bîla nani ba,
yang wina yukukpara.#Law 39.12; 1 Pi 2.11.
20Man lâ aisi daukram nani ba,
tânka kaikaia brin ai dauki ba mita,
kupi ba kriwan, taibi ai munisa awar bani ra.
21Trabil babukra nani ra,
watawi dadaukra nani ra lawi daukisma.
Man lâmka bîla nani briras tnaya ra tawi nani ba.
22Yang ra laihtubi, bahki sin ai kulki uplika ba wina, laihura sâks,
kan yang bui man lâmka bîla nani ba alki briri bamna.
23Upla karnakira nani mita
saura ai munaia maipara bubia kra,
naha man nampakan na lika,
man lâmka nani dukiara ai kupia wal aisi kabia.
24Yang lika man lâmka bîla nani wal lilia sna;
baha nani sika yang ra lâ mairiki ba.
- 4 -
25Yang pat pruaia man sni;
raya kaia ba aik,
man bîlam pramiska nani ba kat.
26Yang rayaki yabalka ba mamwanra mangkri,
bara man pana yang ra aisaram.
¡Man lâmka nani ba ai smalks!
27Diara tânka briaia ba ai smalks, man lâmka
bîla nani ba nina blikaia,
baku mika warkkam aihkakira nani dukiara kupi wal aisamni.
28Wîni latwanka ba mita,
naikra laya taki ba wal ban katwisni,
ban bapi buisna man pramiskam ba kat.
29Kunin lâka yabalka ba, yang wina laihura sâks;
bara man smalkankam yamni ba hilpki kabia.
30Kasakka tânka yabalka ba bâk saki briri,
bara brin ai daukisa lâ nani aisi daukram lâka ba sin.
31Dawan, man lâmka nani mangkram ba kat alki bri kapri
swira lâka ni aibanhpara.
32Yang pat pali man lâmka bîla nani ba aiska daukamna,
kan man bui yang kupi ba lilia lâka ni banhkisma bamna.
- 5 -
33Dawan, man lâmka nani mangkram yabalka ba ai smalks,
bara yang baha nina bliki kamni ban tnata kat.
34Diara tânka briaia ba aik,
bara man lâmka ba alki bri kamni,
¡bara kupi aiska ni daukamni!
35Man lâmka nani yabalka bâk ai brih was
kan baha yang liliaki sa bamna.
36Kupi ba yas tiwbia bîlam aisinka nani ra,
brinka karna lâka ra lika, apia.
37Naikra nani ba laks gâd bahki kaikaia ba wina
¡raya kaia ba aik, man yabalkam ra wapaia!
38Tâ baiks naha man nampakan ra
baha pramiska nani daukisma ba,
ya man ra mai kulki nani ra.
39Yang ra saura ai munaia luki sibrin ai dauki ba,
wina dakbi ai sâks,
kan man lâ nani aisi daukram ba yamni sa bamna.
40Kaiks,
man wan smalkram lâka nani, brin pali ai daukan;
raya kaia ba aik, kan man kasakkira sma.
- 6 -
41Man ai smalks,
Dawan, man lamtwanka lâka ba,
bara swaki sakan lâka ba sin;
man pramis takatma ba baku.
42Baku sip kabia swiri dadaukra nani ra pana aisaia,
kan yang, man bîlam kat luki tniwisna.
43Bara kasakka tânka ba bîli wina dakbi sâkpara,
kan yang bîli kaikanka ba, lâ nani aisi daukisma bâra sa bamna.
44Smalkankam nani ba alki daukaia brin ai daukisa,
¡piua bani ban kaia ra ban kabia!
45Baku pri lâka ra iwaia sip kamna,
kan man lâmka nani kat nina blikri bamna.
46Bara man lâmka bîla nani ba,
king nani mawanra aisamni
bara yang swiri brimna apia.
47Kan man lâmka bîla nani ba, latwan kaikisni
bara baha wal lilia ai sakisa.
48Man lâmka bîla nani ra latwan kaikisni,
brin sin ai daukisa,
bara man lâmka nani ra sin uya lukisni.
- 7 -
49Bîlam man nampakan ra wiram ba luki bas;
bahara man, yang bîla kaikaia ai mangkram.
50Naha sika, yang maisi nihkra, sari katna ba yua ra;
baha man pramiskam nani ba rayaka aikisa.
51Trabil babukra manis takaskras mini batakisa
sakuna yang lika, man lâmka ba wina tnaya ra tawamna apia.
52Lâ nani blasi pali wina aisi daukram ba,
Dawan, yang kupi ra brisna,
baha ba yang ra maisi nihkra aikisa.
53Watawi dadaukra nani,
mahka man smalkankam lulki swi ba,
baha kupi sauhkanka tara aikisa.
54Man lâmka nani ba, yang laiwana nani kan
naha tasba ra yang tringsar taukisna.
55Dawan, yang tihmia ra man ra kupi kraukisni;
yang lika man smalkankam ba praptis munan ai daukisa.
56Naha sika yang daukaia sna ba:
man lâmka nani bîla wali daukaia.
- 8 -
57Man Dawan, man baman mai brisni;
yang pramis munri,
man bîlam nani ban bri dauki kaia.
58Yang kupi aiska ni man ra mamkabri,
yamni ai muns, man pramiskam ba kat.
59Yang daukisna ba dukiara kupi ra luki kaikri
bara yang kli man lâmka bîla nani walaia daukri.
60Yang aihni munri, takaskras kira,
man lâmka bîla nani ba bri daukaia.
61Upla watawikira nani,
mini alkaika kutbi kir daukan,
ban sakuna, man smalkankam nani âiya tiwras kan.
62Tihmia bakriki ra,
yang mahka bûi tingki mai wi kapri
man lâmka nani kasak ba dukiara.
63Baha nani sut, man ra mai kulki nani ba wal aikuki uplika sni,
baha nani wal sin man smalkankam lâka nani ban bri dauki ba.
64Dawan, tasba na lamtwanka lâka ni banhwan sa;
¡man lâmka nani ba ai smalks!#Law 33.5.
- 9 -
65Dawan, man nampakan ra yamni munram sa,
man pramiskam ba kat.
66Ai smalks lâ yamni ba dadaukra kaia,
bara diara tânka sin briaia,
kan man lâmka nani ba ra kasak lukisni.
67Kau mâyara bawras kapri bara tanis lâka manis daukri,
sakuna nanara, yang bîlam wali daukisni.
68Man ba yamni sma, yamni sin daukisma;
man lâmka nani ba ai smalks.
69Trabil babukra nani,
yang maipara kunin luki paskan;
sakuna yang lika lâmka nani aiska alki daukamna.
70Witin nani ai sinska ba sriman,
sakuna yang lika lâmka smalkanka ba wal lilia takisna.
71Mâyara bawaia lâka ba, yang ra yamni takan,
baku sika yang, man lâmka nani lan takri.
72Yang maipara kau tara sa, man smalkankam ba,
kau pain sa, gul bara silbar mâ tausin ailal briaia ba wal.
- 10 -
73Mihtam ni ai daukram bara sin ai paskram;
sins lâka aik,
bara man lâmka bîla nani lan takamni.
74Man ra mai kulki uplika nani,
ai kaiki lilia kabia,
kau man bîlam ba kat kainira bîla kaikanka briri bamna.
75Dawan, yang kaikisni,
baha lâ nani man aisi daukram ba kasakka lâka sa,
bara kasak sa, yang sari brisna ba ra.
76¡Man lamtwanka lâka ba,
yang maisi nihkra kabia,
man baha pramiska yang ra aikram ba kat!
77Man lamtwanka ba
ai mariks bara tasba ra iwi kaia,
yang lilia daira walisna man smalkankam nani ba wal.
78Trabil babukra nani ba swira takan kabia,
witin nani pâtkas, saura ai munisa,
yang lika man lâmka nani ba kupi wal aisi kamni.
79Yang wal asla takbia man ra mai kulki nani ba,
bara man lâmka bîla kaiki nani ba sin.
80Kupi ba yarka kasak kabia,
man lâmka nani ra,
baha mita swiri daukan kabia apia.
- 11 -
81Brin ai daukisa,
kupi ba bîla kaikisa swaki ai sâkbia;
¡bîla kaikanka sut ba,
man bîlam ra swiri!
82Man bîlam ba dukiara,
naikra nani ba sip apia takisa,
bara wisni:
“¿Ahkia balma maisa nihkra aikaia?”
83Yang na upla almuk umpira,
upla sut ai âuya ai tikan,
sakuna yang lika,
man lâmka nani âiya tikras.
84¿Nahki yua nani bîlam kaikaia kamna,
baha nani rau ai sauhki uplika nani ba,
ahkia lâka daukma ki?
85Upla trabil babukra nani,
man smalkankam nina blikras ba,
yang luaiki ra
unta salhkan mini alkbia dukiara.
86¡Hilp ai muns,
kan yang na rau ai sauhkan sa pâtkas pali!
¡Man lâmka bîla nani sut ba,
kasak tânka baman sa!
87Kau wiria kan tasba na wina âpu ai daukaia,
sakuna yang na, man lâmka nani ba swiras.
88Rayaka aik, man lamtwanka lâka tânka ba kat,
bara man aisaram lâka nani ba aiska daukamni.
- 12 -
89Dawan, man bîlam ba ban kaia ra sa
man bîlam ba kasbrika purara ba, kat bapan sa.#Ais 40.8.
90Man kasakkam lâka ba,
ban kaia ra bâra kabia,
man tasba ba bapi swiram,
ban bâra buisa.
91Man lâ nani aisi daukram ba kat, ban bâra sa kitwi tawras;
diara sut ba man warkkam sa bamna.
92Man smalkankam ba lilia ai sakras kata kaka,
sairka ba bui âpu ai daukaia kan.
93Man lâmka bîla nani âiya tikamna apia,
kan baha nani mita rayaka aikram bamna.
94¡Swaki ai sâks, kan yang lika man dukiam sni,
yang lika man lâmka nani nina blikri bamna!
95Upla watawikira nani âpu ai tikaia wisi,
aihwaki ai kaiki kan,
sakuna yang lika, man lâmka bîla nani tânka wali dauki kamni.
96Yang kaikri diara nani sut ba âpu takan piua brisa,
sakuna man lâmka bîla nani ba lika, sip âpu takras ban bâra sa.
- 13 -
97¡Nahki man smalkankam ra latwan kaikisni!
Bahara yang yu aiska lukisna.
98Man lâmka bîla nani, yang lâika sa ban kaia ra;
waihli nani wal kanra sinskira ai daukisa;
99yang ai smalki uplika nani wal kanra tânka brisna,
kan man lâmka nani dukiara kupi wal uya aisisni.
100Almuk nani wal, yang kanra diara tânka brisna,
kan man smalkankam lâka nani bîla wali daukisna bamna.
101Saura yabalka bani wina, yang mini nani alki takaskri,
man bîlam wali daukaia ba mata.
102Man lâmka aisi daukram ba wina tnaya ra tawras,
kan man bui sika ai smalkisma bamna.
103Man pramiskam nani ba yang dairkaya ra damni pali sa,
bîli ra nasma baku sa.#Law 19.10.
104Man lâmka bîla nani ba wina,
yang diara tânka brisni;
baha mita misbara kaikisni, kunin watawi lâka nani ba.
- 14 -
105Man bîlam ba, yang mini nani lampka kum sa,
bara ingni kum sa yabalki ra.#S L 6.23.
106Yang swer kumi takri,
baha ba yang daukaia sni;
¡lâmka kasak ba, yang ban bri daukamni!
107Dawan, yang uba sari ai daukisa;
¡raya ai sâks man pramiskam nani aisaram ba kat!
108Dawan, prisant nani yang bîli wina maikisna ba bris,
bara man lâmka nani aisi daukram ba ai smalks.
109Pruaia pâtka ra ban sni,
sakuna yang lika,
man smalkankam ba âiya tikamna apia.
110Upla watawikira nani, yang mini alkaika daukan,
sakuna man ai smalkram lâka nani wina,
yang aimawahkamna apia.
111Yang prapatiki ban kaia ra ba lika man lâmka,
kan man bîlam nani ba bui lilia ai daukisa.
112Yang kupi wal luki daukri lâmka nani ba kulki daukaia,
ban kaia ra, tnata kat.
- 15 -
113Ai mawan wâl bri uplika nani ba,
yang saura misbara kaikisni;
sakuna man smalkankam lika latwan kaikisni.
114Man ba, yang yukuwaiki bara kaini kahbaika sma;
man bîlam ba kat, yang kainira bîla kaikisni.
115Watawi dadaukra nani, yang wina tnaya ra taws,
bara yang lika Gâdki lâka bîla nani alki brimni.
116Karnikam aik, man pramiskam wiram ba kat,
bara yang raya kamni,
¡bara aikrika yang kainira lukisna ba dukiara swiri takamna apia!
117Hilp ai muns bara swaki ai sakan kabia,
bara man lâmka bîla nani ba
aiska daukamni yu bani ra.
118Baha nani sut, man lâmka nani wina aimawahki ba,
man saura kaikisma,
kan witin nani luki ba lika sins lâka âpu sa.
119Upla watawi dadaukra nani ba lika,
man mampa ra dipasta baku sa;
bahamna yang bui man lâmka bîla nani ra latwan kaikisni.
120Wîni aiska ba tatatwisa, man mamwanra;
lâka aisi daukram adarka ba mamyunisni.
- 16 -
121Yang lâ wapni kasak ba daukri,
waihli nani mihta ra ai swirka ai taibi kabiara.
122Nampakan ba yamni kabia dukiara, tâura aimaks;
trabil babukra nani yarka saura ai munbiara.
123Man bal, swaki ai sakaia bîlam kaikan man sa,
naikra nani sut swapan sa
pri ai sâkma bîla kaiki,
man pramiskam daukram ba kat.
124Man kupiam latwanka lâka ba kat,
nampakan ra dauks,
¡man lâmka nani ba ai smalks!
125Yang na, man nampakan.
Diara tânka nani briaia ai smalks,
kan man lâmka bîla nani kaikaia sna bamna.
126Dawan, pat piua aimakan sa diara kum daukaia,
kan witin nani man lâmka ba wali daukras bamna.
127Ba mita, yang lika man lâmka bîla nani ba latwan kaikisni
gul pain aihwa ba purkara.
128Baha mita tâi briram man lâmka nani bâk,
bara misbara kaikisni kunin daukanka nani ba.
- 17 -
129Man lâmka bîla nani ba diara aihkakira nani sa;
ba mita yang bîla wali daukisni.
130Man bîlam nani smalkanka ba ingni wankisa;
ai dahra pain walras nani ra yabisa diara tânka briaia.
131Yang brinka tara wal bîli na kwâkisna,
kan man lâmka nani, kupi ra brin ai dauki bamna.
132Yang ra tawi ai kaiks,
bara kupiam yamnika ba aik,
man ra latwan mai kaiki uplika nani ra daukisma ba baku.
133Man bîlam ni wapanki nani ba wapni mangks,
swirka watawika lâka purira aimakbiara.
134Pri ai sâks upla mapara babura nani ba wina,
kan yang lika man lâmka bîla nani ba wali daukaia brin ai daukisa.
135Man namkra ni yamni kaiks man nampakan ra,
bara man lâmka nani ba ai smalks.
136Naikra laya ba, tingni laya nani baku plapisa,
upla nani man lâmka ban brin daukras bamna.
- 18 -
137Dawan, man ba kasakkira sma;
bara lâ aisi daukisma ba sut kasakkira sa.
138Man lâmka bîla nani sut wankram ba
kasak sa bara rait pali sa.
139Man bîlam nani tâwan
lawan baman âpu ai daukuya,
kan yang waihli nani ba
man bîlam nani ba ai âuya tikan bamna.
140Man bîlam aisinka pramiska ba kasak sa,
baha mita nampakan baha latwan kaikisa.
141Yang na sirpi sna,
bara bahki sin ai kulkan sa;
ban sakuna man smalkram lâka nani ba
yang âiya tiwras.
142Man kasakkam lâka ba ban kaia ra kasak sa,
bara man smalkankam ba sin kasak sa.
143Trabil saura, pât tara sin ai alkan;
sakuna man lâmka bîla nani ba lilia ai sakan.
144Man lâmka bîla nani kasakkira sa ban kaia ra;
¡diara tânka alkaia aik,
bara baha wal yang raya kamni!
- 19 -
145Dawan, kupi aiska ni mai winisni,
¡pana yang ra ai aisas, man lâmka nani alki daukaia brin ai daukisa!
146Man ra winisni; hilp ai muns
bara man lâmka bîla nani ban bri kulki kamni.
147Kau yang lalma kahbi kan buri,
man ra hilp makabaia;
man pramiskam ra yang bîla kaikisni.
148Kau tihmia iwras ba ra naikra ba aihwakisa,
man pramiskam bîla nani ba luki kaia.
149Bîli baikra na wals,
Dawan, man lamtwanka lâka bara
kasakkam lâka ba ni raya ai sâks.
150Nini blablikra saurakira nani ba laimara sa,
sakuna smalkankam nani wina lika laihura sa.
151Man, Dawan, laimara sma,
bara man lâmka bîla nani sut kasak tânka sa.
152Mani ailal luan ba wina,
lâmka nani ba kakaira sni,
man bui baha bapram ban kaia ra.
- 20 -
153Pâtki wahwanka ba kaiks bara pri ai sâks,
kan man smalkankam lâka ba,
yang âiya tiwras sa bamna.
154Pâtka na dukiara tâiwan aisi atki ai sâks;
¡raya ai sâks, man pramiskam nani daukram ba mita!
155Man hilpkam ba watawi dadaukra
nani wina laihura sa,
kan witin nani man lâmka nani ba plikras bamna.
156Dawan, man lamtwanka ba tara pali sa;
raya ai sâks, man kasakkam lâka ba kat.
157Saura ai muni uplika nani,
waihli nani ba sin ailal sa;
sakuna yang lika, man lâmka bîla nani wina tnaya ra tawras.
158Sip bapi buras sna, waihla mihta ra mamangkra
nani ba mapara,
baha nani man lâmka bîla nani wali daukras.
159Dawan, kaiks nahki man lâmka nani ra latwan kaikisni;
raya ai sâks, lamtwanka lâka ba mita.
160Kasakka lâka ba sika man lâmka kupia ba;
bara lâ kasakkira aisi daukram bani ba,
ban kaia ra ban kabia.
- 21 -
161Upla karnakira nani nini blikisa,
pâtkas rau ai sauhkisa
kuna kupi ba man bîlam nani ra sibrin pali lukisa.
162Yang lika lilia daira walisna
pramiskam nani ba wal,
upla kum diara kukan tara kum sakan ba baku.
163Kunin ba waihli kulkisni,
sip kupi alki takaskras;
kuna smalkankam ba lika latwanka kaikisni.
164Awar bani mamyunisni
lâ kasak man aisi daukram ba dukiara.
165Baha nani smalkankam ra latwan kaiki ba
kupia kumi lilia brisa;
bara ai mina batakaia âpu sa.
166Dawan, bîlam kaikisni swaki ai sâkma,
kan man lâmka bîla nani ba mahka daukri.
167Yang lâmka bîla nani ba alki daukisni
bara yang kupi aiska latwan mai kaikisni.
168Man lâmka nani bara dîa aisaram bîla nani ba alki briri;
¡man bui yang wataukanki bani ba kaikisma!
- 22 -
169Yang winanki ba, Dawan, mamwan kat auya;
diara tânka kaikaia lâka aik
pramis ai munram ba baku.
170Puri sunra ba man mamwanra wabia;
man pramiskam ba kat pri ai sâks.
171Mayunan lâka ba bîli wina takbia,
man bui lâmka nani ai smalkram bamna.
172Yang twisi man pramiskam aisinka dukiara aiwanbia;
kan man lâmka bîla nani sut ba, kasakka lâka sa bamna.
173Man mihtam ba mahka hilp ai munbia,
man wan smalkram lâka nani bâk sakri bamna.
174Dawan, ¡swaki ai sâkma brinki sa,
yang yamni lilia daira walisna!
175Mamyunaia dukiara,
raya iwi kaia ba brinki sa;
man kasakkam lâka ba hilp ai munisa.
176Yang na aimawahkri sa,
sîp kum baku;#Ais 53.6; Jir 50.6; Isi 34.11-16.
¡bal ai pliki ai sâks,
man lâmka bîla nani yang âiya tiwras bamna!
Currently Selected:
Lawana Nani 119: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
