Matiu 6
6
Upla ra latwan kaiki kaia tânka ba, Jisas smalkisa
1“Aman kaiks, kasakkam lâka ba upla nani mawanra man nani daukpara mai kaikbia dukiara baman.#Mt 23.5. Baku daukma kaka, kasbrika purara ba mita prisant kumi sin maikbia apia.
2“Baha mita, upla umpira nani ra hilp yabisma ba ra, upla sut ra wini wipara, kuninkira nani prias watla nani ra bara tawan bilara aisi nani ba baku. Witin nani lika baku daukisa upla mita witin nani ba pain sa wibia wisi; sakuna yang kasak mai wisna, baha dauki ba wal pat ai prisantka brisa. 3Sakuna man upla umpira nani ra hilp kum yabisma kaka, yukuwan ra dauks, bara uplikam wal kau pain sma ba sin yarka upla kaikbiara. 4Man yukuwi pali dauks, bamna diara yukuwi daukisma ba kaiki ba, prisantkam maikbia.
Nahki wan pura sunaia ba Jisas smalkisa
(Lk 11.2-4)
5“Man nani puram sunma ba ra, kuninkira nani baku daukpara. Witin nani lihkisa prias watla nani ra bara tawan bîla unyukwika nani ra ai pura sunaia, upla nani mita kaikbia wisi.#Lk 18.10-14. Kasak pali man nani ra mai wisna, witin nani baku dauki ba mana pat ai prisantka brisa. 6Sakuna man puram sunma ba ra, rumkam bilara dimi, durkam praks bara puram suns, witinka bahara man wal sa. Baku, yukuwi daukisma ba kaiki, prisantkam maikbia.
7“Puram sunisma ba ra, bîla bahki nani kli kli aisapara, Gâd kakaira apia nani dauki ba baku, witin nani lukisa baku aisi kabia bara Gâd lika witin nani ra kau wali kabia. 8Bara witin nani dauki baku daukpara, kanra kau makabras kapram, pat witin kaikisa dîa man nani want sma ba. 9Baha mita, man nani naku puram suns:
‘Yawan Aisa kasbrika purara sma ba,
ninam ba holikira kulkan kabia.
10Man king aimakaia ba yarka balbia.
Man kupiam lâka tasba ra daukan kabia,
kasbrika purara dauki ba baku.
11Naiwa wan yua pata ba wankma.#S L 30.8-9.
12Wan saurka ban swi tiks,
yang nani maipara saura daukan kan
ban swih tikisna ba baku.
13Traika kaikan tilara ban wan swipara,
sakuna saura ba wina dakbi wan sâks.’
14“Man nani saura mai munan uplika nani ra ban swih tikisma kaka, kasbrika purara ba sin man nani ra ban mai swih tikbia. 15Sakuna upla wala nani pâtka ban swih tikras sma kaka, man nani saurkam nani sin sip swih tikbia apia.#Mk 11.25-26; Ecl 28.2-5.
Plun piras kaia tânka ba, Jisas smalkisa
16“Man nani plun piras sma ba ra, kuninkira nani ai mawan sari bri ba baku daukpara; kan witin nani baku daukisa plun piras ba upla nani kaikbia dukiara. Kasak pali mai wisna, baha wal pat ai prisantka brisa. 17Sakuna man, plun piras sma ba ra, tâmwa pain aubi bara mamwan sin siks, 18man plun piras sma ba upla mai kaikaia apia dukiara. Bamna witinka bahara man wal yakan ba mai kaikbia ba ra, witin prisantkam maikbia.
Kasbrika purara yuyaka nani bri kaia ba
(Lk 12.33-34)
19“Man nani naha tasba ra yuya nani suni bripara, kan yula nani mita sauhkisa, diara nani ba sut aisawisa,#Je 5.2-3. bara âimplikra nani implikaia dimisa. 20Sakuna, man nani diara brisma ba kasbrika purara suni bas; bahara lika yula nani mita sauhkras, diara nani ba sin aisawras, âimplikra nani sin sip dimi implikras. 21Kan ani pliska ra dukiam nani suni bri kama ba ra, kupiam sin bahara kabia.
Wan wîna tara lampka ba
(Lk 11.34-36)
22“Namkra nani ba lika wînam tara mapa ra lamp kum baku sa; baku bamna, namkra nani ba pain kaka, wînam aiska ba sin ingnika bri kabia; 23sakuna namkra nani ba saura kaka, wînam aiska ba tihmu ra kabia. Bamna ingnikam ba tihmu takbia kaka, ¡baha tihmuka ba nahki prais tihmu pali kabia!
Gâd bara lalah ba wal
(Lk 16.13)
24“Upla kumi sin dawan wâl dukia sip daukras, kan kumi ra misbara kaikbia, bara wala ra latwan kaikbia; kumi ra kasak kulkbia, wala ra bahki kulkbia. Man nani sip apia sma Gâd bara lalah wal dukia daukaia.
Gâd ai luhpia nani main kaikisa
(Lk 12.22-31)
25“Bamna yang bui man nani ra mai wisna: Uya trabil taki luki banhpara raya kaia ba dukiara, diara piaia bara diaia sma ba, kwala dimaia sma ba. ¿Rayakam ba plun purkara kau tara apia, bara wînam tara ba sin kwala wal kau tara sa apia? 26Daiwan tnawira nani purara pâli ba ra kaiks: witin nani plun mâ mangkras bara dâkras, pata mâ ba sin plun auhbaika watla ra sunras; sakuna man nani kasbrika purara ba mita plun dakakisa. ¿Man nani ba daiwan tnawira nani ba wal kau tara apia? 27¿Bamna ani uplika man nani tilam wina sip sa trabil taki luki ba mita kau awar kum raya kaia?
28“¿Bara man nani kwala dukiara dîa muni uya lukisma ki? Tangni nani twi ra pâwi ba ra kaiks, witin nani wark takras bara sin kwala sipi dimras. 29Sakuna man nani ra mai wisna: King Salaman pali sin ai prana wal,#1 Ki 10.4-7; 2 Kr 9.3-6. naha tangni nani baku kwala painkira âpu kan. 30Bamna inma naiwa twi ra ba bara yauhka pauta ra angki ba, Gâd baku skahkisa kaka, ¿man nani ra kau kwala pain mai dingkbia apia, kasak lukras uplika nani sma ba? 31Baha mita, man nani uya trabil taki luki, naku aisapara: ‘¿Yawan dîa pibia? ¿Yawan dîa dibia? ¿Yawan ani wina kwala dimbia?’ 32Gâd kakaira apia nani ba baha diara nani ba dukiara trabil taki lukisa, sakuna man nani kum kasbrika purara brisma, bara witin kaikisa man nani naha dukia nani sut âpu sma ba. 33Bahamna man nani, lukankam aiska ba Gâd King aimaki ba lâka ra dîa daukaia mai aisi ba ra luks, bara baha diara nani ba sin sut brima. 34Bamna yauhka yua ba dukiara trabil taki lukpara, kan yauhka ba piua bâra kabia trabil taki lukaia. Kan yua bani ba silp ai trabilka nani brisa.#Law 55.22; 1 Pi 5.7.
Currently Selected:
Matiu 6: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua