Jems 2

Upla kum wala wal kau tara kulkpara

1Muihki nani, man nani wan Dawan Jisas Kraist pranakira ra kasak lukisma ba, uplikam kum bara wala wal purkara kau tara kulkpara. 2Ban kra man nani asla taki banhwisma ba ra, waitna kum gul mihtadingka brih, kwala sin pain pali dimi balbia, bara wala kum kwala sukra dimi aula kaka, 3bara kwala painkira dimi ba ra kau kulkanka yabi muni wima: “Man naha pliska pain na ra bal iws.” Sakuna waitna umpira ba ra lika: “Man bahara wih bûi bas, apia kaka naha tasba na ra iws” baku daukisma ba ra, 4pat man nani mampara aihka kulkan lâka brisma, bara lukanka saura brih upla lâka aisi daukisma.

5Muihki laitwankira nani, naha na aman pali wals: Gâd mita naha tasba ra kau umpira nani ba bâk sakan sa, kasak lukan lâka mapa ra yuyakira kabia dukiara. Bara witin ra latwan kaiki nani ra, king lâka yaia pramis munan ba, yabia sa. 6Sakuna man nani lika umpira nani ra swira daukisma; ban sakuna, lalahkira nani ba sika man nani ra taibi mai bri ba, ¿bara wihta nani mawanra raski mai brih wi ba? 7Witin nani sika Kraist mapara saura aisi ba, baha nina painkira mita sika man nani ra kristian mai mâki ba.

8Ulbanka lâ kau tara ba naha sika: “Uplikam ra latwan kaiks, man wînam baku”, bara man nani baha ba kulkisma kaka, uya pain daukisma.#Lib 19.18. 9Kuna man nani upla mawan pîska ba kaiki, aihka kulkisma kaka, saurka lâka daukisma; bara Gâd lâka mapara man nani pâtkira sma. 10Ya lâ aiska ba wina kumi ra sim kulkras kaka, witin lâ bîla ba sut krikisa. 11Baha Gâdka “marit lâka sauhkpara”#Imp St 20.14; Kli S 5.18. aisin ba, “upla ikpara”#Imp St 20.13; Kli S 5.17. sin win. Bamna ya marit lâka sauhkras, sakuna upla ikisa kaka, pât lâ bîla lulkan sa. 12Man nani aisaia sma, bara sin upla kum lâ ba mita lâ ra brih wan ba baku kaia sma, pri lâka maikbia. 13Kan ya ya ai uplika ra umpira kaikras kaka, witin ra sin umpira kaikras kira ai lâka daukan kabia; sakuna ani uplika umpira kaikan lâka bri kan kaka, lâ daukbia yua ra witin mita pura lubia.

Daukanka ni pura luisa, aisinka ba wal apia

14Muihki nani, upla kum wibia kasak lukan lâka brisa, sakuna wark yamni daukras kaka, ¿witin mapara dîa hilpka bâra kabia ki? ¿Kasak lukan lâka ba mita sip sa ki witin ra swaki sakaia? 15Ban kra wibia upla kum, apia kaka wan lakra mairin kum plun âpu, bara kwala sin âpu, 16bara man nani tilam wina kum mita naku wibia: “Dawan wal was; puram praks, bara pis dîa sât piaia want sma ba”, sakuna ai wîna want ba dukia yabras kaka, ¿pain kabia ki? 17Kasak lukan lâka sin baku sa; upla kum mita ai daukanka ni marikras kaka, kasakka lukan lâka yakan lika pruan sa.

18Sakuna ban kra upla kum mita wala ra naku wibia: “Man kasak lukan lâka brisma, bara yang lika yamni daukisna.” Bamna man kasak lukankam ba diara yamni daukras kira ai mariks, bara yang mita daukanki yamni ni kasak lukanki ba mamrikamna. 19Man kasak lukisma Gâd kumi baman bâra sa, bara baha ba aitani daukisma; sakuna lasa nani ba sin kasak lukisa, bara sibri tatatwisa. 20Sakuna, man upla sinskas kapara, bara kasak lukan lâka bri ba, daukanka yamni ba wal sa, kasak lukanka marikras kaka, baha ba diara kum pruan sa. 21Gâd bui Ebraham ra kasakkira kulkan, wan damika bui ai luhpia Aisak sakripais dauki yan bamna.#Bla St 22.1-14. 22¿Kaikras sma ki? Ebraham kasak lukanka ba ai daukanka wal kumi asla daukan sa; witin ai kasak lukanka lâka bara ai daukanka nani mita kasak pali marikan. 23Baku sika Ulbanka dîa aisi ba aimakan: “Ebraham lika Gâd ra kasak lukan, bara baha mita Gâd bui witin ra kasakkira kulkan.”#Bla St 15.6; 1 Mac 2.52. Bamna Ebraham nina ba “Gâd uplika” mâkan.#2 Kr 20.7; Ais 41.8; Dnt 3.35.

24Man nani kaikisma, Gâd mita upla kasak lukisa wi ba, bahara witin aitani kulkras, sakuna wark yamni dauki ba ra lika. 25Rug mairin Rahab ra sin baku takan. Gâd mita witin ra kasakkira baku kulkan, witin daukanka ba tâka mita, kan sturi brin uplika nani ba ai watla ra yukuki brin, ningkara yabal walak sakan wan.#Jas 2.1-21. 26Wan wîna tara ba spirit âpu kaka, pruan sa; bara kasak lukan lâka daukanka yamni ba maikras kaka, baha sin pruan sa.

Currently Selected:

Jems 2: MSKTU

Highlight

Copy

Compare