Abakuk 2
2
Dawan ai warkka dauki ba Abakuk ra param marikan
1Dawan dîa yang ra ai aisabia ba walaia dukiara
bîla kaiki kamna,
sim aihwawakra aihwaki kaiki ba baku;
yang rangbi aisisna ba dukiara,
witin pana dîa ai wibia ba walaia.#Law 5.3; 130.5-6.
2Bara Dawan pana naha tânka nani ai win:
“Yang dîa mamrikamna ba
walpa tanhta nani ra ulbi bris,
ulbanka ba tara param kabia bara
upla plapi auya ba sin ban aisi kaikbia.
3Naha tânka param mariki kaia piua
aimakaia ba kau sa,
sakuna piua ba aimakras kaia lika apia,
piua pali bal aimakaia sa.
Bamna man baha piua aimakuya ba
bîla kaiki bas,#Hib 10.37; 2 Pi 3.8-10.
ban kra kau takaski kabia sakuna.
4Naha smalkanka bîla ulbi bris:
Upla watawikira nani ba ai prautka lâka ra iwisa;
sakuna kasakkira nani ba lika
Gâd ra kasak luki ba mita raya kabia.”#Ro 1.17; Gal 3.11; Hib 10.38.
Upla tataibra nani rayaka ba
5Upla prautkira aimayunra nani ba, sâp taki iwras,
ai karnika alki briaia lâka ba pliki wataukisa,
bri bara kau briaia sin lukisa;
ban sakuna, baha karnika alki bri ba wina, witin silp pât ra dimisa.
Raiti baku ai bîla kwâki banhwisa,
raiti baku sip biara banhras.
Baha mita witin nani nisan nani sut ba pura luaia pliki wataukisa.
6Sakuna nisan wala nani ra pura lui taiban ba,
witin nani pana lawaska kikbia, baha ra lawana ulbi aiwani:
“¡Man sarkam pali ai daukisa,
upla wala dukia kukanka nani dakbi bri yuyakira takisma ba!
¿Ahkia kat man baha uplika nani ra
ban taibi muni dukia nani mihta wina
dakbi brih kau ban traska dimi kaisma ki?”
7Man damra walras kama piua ra,
traska dimram uplika nani ba pat balan kabia,
rau mai sasauhkra nani ba raki buki brih bal,
dukiam nani ba sut mihtam dakbi,
diara luha mai swibia.
8Nisan nani ba asla taki mampara bubia,
bara taibi mai muni dukiam nani ba sut impliki bribia,
man mita munram ba baku pana sin mai munbia.
Upla ikram, lâ nani krikram,
kuntri nani mapara buram,
tawan tara nani slingbram,
upla nani sin diara daukram ba,
baha sut mana mai munka aibapma.
9¡Man nani sarkam pali ai daukisa,
wamtla ra implikan dukia nani wal banhki dauki brisma ba,
baha dukia nani ba ni yukuwaikam brih
pât nani aula ba wina swak takaia lukisma!
10Baha daukram ba tâka mita,
swiram mai daukaia ba wamtla bilara bri balram,
mai sauhki mai tikaia lâka ba man daukram,
nisan nani sauhki tikram ba mita.
11Wamtla kutbanka walpaya nani,
utla playka nani ba sut sin
mampara sturi aisabia.
12¡Man nani sarkam pali ai daukisa,
upla ikram tâlia ba purara
watawika lâka ba ni tawankam tara nani paskisma ba!#Miq 3.10.
13Dawan ai karnika sut bri ba mita,
wark karna takram nani ba sut bahki ra lakan kabia,
warkkam nani daukram ba, pauta ami ba mita angki sauhki tikan kabia.
14Bâra mika Dawan prana tânka kaikaia sinska lâka ba
tasba aiska ra banhwan kabia,
kabu ra lî aibanhwan ba baku.#Ais 11.9.
15¡Man nani sarkam pali ai daukisa,
uplikam nani ra diara dauki dakakisma ba;
bla saura takbia dukiara,
wain wal abalki dakakram baha dih,
bla taki ba,
baku dauki munrika susu takbia
bara ai wîna ba kaikaia dukiara!
16Baha daukram ba tâka mita,
yamni mai kulkan kan lâka ba
swiram mai daukaia lâka ra tawbia,
bamna Dawan ai kupia baiwanka kapka ba maikka dima;
bara mamrikbia man kupiam ra Dawan lâka âpu sma ba,
pramna maikan kan ba mai kulkanka âpu lâka ra tawbia.#Law 75.8; Jir 25.15-29; Isi 23.32-34.
17Líbano ilka ra saura munram saurka ba,
kli man mampara tawi balbia;
bara man sirang tara iwma ai daiwra nani ikram tâwan.
Upla nani sin ikram,
lâ krikanka nani daukram kuntri bara
tawan nani mapara;
baha tâka mita naha pâtka nani man puramra balbia.
18¿Lilka nani upla ai mihta ni alki paski ba
dîa mapara hilp sa ki?
¿Lilka bahki kum kunin ra baman
wan brih wi ba dîa hilp takaia sip sa?
Lilka nani ba sip sturi aisaras sa,
¿bara lilka papaskra ba,
nahki baha lilka ra luki tniwi kabia ki?
19Man nani sarkam pali ai daukisa,
dus ni lilka kum paskan ba ra wisma:
“¡Rawi bus!”
Walpa kum sip aisaras ba ra sin wisma:
“¡Mahka bus!”
¿Bara lilka nani ba sip kabia ki
pana diara kum wan aisaia?
¡Apia, kan ai rayaka pali ba âpu sa mita,
ban sakuna gul bara silbar ni lalauban kabia kra!
20Sakuna Dawan pali ba
ai tempelka watla sunukira ra iwisa.
¡Bamna tasba aiska ba, witin ai mawanra sâp kabia!#Law 11.4; Sof 1.7; Sak 2.13.
Currently Selected:
Abakuk 2: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua