Lukasi 4

MAMEKAMI MA YEZU

(Mt. 4:1-11; Mk. 1:12-13)

1Wauta Yezu bodzii batisimo o ebale Ya Yaladene, atondaka na ngwiya ya elimo esantu, mpe nsima elimo santu ya mokambaka kino'esobe. 2O ntei ya mikolo ntuku inei, Yesu abaka o esobe mpe elimo ya dzabulu ya kamomekaka, atukaka ntingo o mikolo minina, akodzaka ata iyoma iyoko te. Kasi waila mikolo ntuku inei, Yesu aoki nampino nsala. 3Nsima dzabulu alobaka na Yesu 'te olobeiki solo mwana wa Nyaamolo, inya mitindo na libanga libo, lidzonga toma ta bodzei mpo yao. 4Kasi Yezu amoololedzaka 'te: Ndzabulu! Yakomama 'te: moto akobika bè natoma ta bodzei te. 5Dzabulu akoi Yesu mpe akèi nande o ntei ya likolo dza ngomba mpe amoteidza mboka iyèye ya mokili. 6Dzabulu alobi na Yesu: naekabela bokondzi mpe waba na lokumu o likolo dzaba mboka ibo iyèye. Mpamba te, mokili mubo molo'o maboko manga mpe natei 'te namoinya bè o moto'okadzi nga. 7Kasi weniki okpei na mbongo mpe o nkumisa, bokondzi mpe ngwiya ibo iyèye yakoma yao. 8Yezu alobi nande: Dzabulu, yakomama o minkanda 'te: wa nkumisa bè nkolo Nyaamolo wao mpe wa salela bè yo. 9Nsima dzabulu akowaka Yesu akèi nande o Yelusaleme; amo'akèi o likolo dza ndako ya tempelo mpe alobi nande 'te: obeiki solo mwana wa Nyaamolo, o mibwaka o nsina wabo. 10Mpamba te, yakomama o minkanda mya Nyaamolo 'te: Nyaamolo atoma Ba andzelu bande mpo yao, mpo baebatela. 11Baandzelu, Baetota o maboko maba 'te we nakoundza libanga o'ekolo te." 12Yezu aololedzaka satana 'te: makomi ma Nyaamolo malobi 'te!: Okokiko bomeki Nkolo Nyaamolo wao te. 13Wailidzaka dzabulu bomeki Yesu na ndenge iyèye o ntei ya masumu, amolemeke na kimia.

Yezu bamotei o Nazarete

(Mt. 4:12-17; Mk. 1:14-15)

14Yezu aolodzaka o'etuka ya galileya na ngwiya ya Elimo nsatu. Nsango epalangani o ntei ya mboka enena iyèye. 15Aba akabateidza o bandako ya bayuda ya losambo nde bato babèebe bamokumisaka waike.

(Mt. 13:53-58; Mk. 6:1-6)

16Yesu akèeke o Nazarete, o mboka eyakolaka yo. O mokolo mwa boemi, aingelaka o ndako ya bayuda ya losambo dza wameseneke yo akaingela mbala na mbala. Mpe atelemeke 'te atanga monkanda. 17Bamoinyaka buku bwa mosakoli Isaya abodzibodzi mpe aèni ntei eyakomama 'te: 18Elimo ya nkolo Nyaamolo elo'o ntei yanga, mpamba te, amponi mpo 'te nasakola nsango ndamu o babola. Antomi 'te naebisa bato ba bakangamaka 'te banyangowa mpe Nalobela bato ba lolanda 'te bakoma bakaène liyu, mpamba te, nanyangola bato bababa o ntei ya monyoko. 19Antomi mpo 'te nalobela bato 'te: ebo! Elo mbula eyaènidza Nyaamolo boboto mpe ngolu yande o bato. 20Mpe nsima Yesu adzingi buna buku, mpe aboolodza o maboko ma mokèngedzi wa ndako-ndzambe mpe adzadzi. Bato babèebe o ntei ya losambo baikadzi bakamoeka. 21Nsima Yesu abandi bobalimboledzi maloba ma matangaka yo mpe alobi 'te: makambo maoki bino nga nakatanga, makokisami lelo. 22Bato babèebe bababa o maana, balobaka walamu mpo yande mpe bakamwaka na maloba ma boboto mpe mangolu ma matokooko o monoko mwande. Mpe babandi bomituni 'te, ebo! Eko mwana wa Yozefu bototo?" 23Yesu alobi naba 'te: naebi 'te bwaloba nanga lisolo libo, monganga, o mibikisa! Ekewa 'te elimbola 'te: oto'alela makamwisi o mboka yao menyi wabo, dza waokaka biyo 'te walaka o mboka Kapalanauma. 24Yezu alobi naba liyu 'te: ya solo mosakoli bakomondima o mboka yande te. 25Nalobi na bino solo; bokanisa 'te: O ntango ya mosakoli Eliya, malobo makoba makano liyu te, mbula iyato na ndambo mpe nsala enene yabaaka o ekolo mobimba, mpe balibato bababa bodzenge baba baike o ntei ya Isalaele. 26Kasi Nyaamolo akotomaka mosakoli Eliya 'te akè akasalisa moko wa balibato bodzenge o mboka Isalaele te, kasi amotomaka 'te akè bè o mwalimoto moko bodzenge owaba akadzala o mboka'eyu na nkombo sarepeta o'engumba ya Sidona.

27O ntango koto ya mosakoli Elisa, bato ba maba baba koto baike o Isalaele; kasi moko waba akobikaka na bwale bwa maba te, kasi ya bikaka bè Namana owaba moto wa ekolo ya Sulia kasi akoba moyuda te. 28Bato bèebe bababa o ndako ya bayuda ya losambo, waoka ba maloba mabo, baoki bobe mpe basiliki wakudzi; 29Mpe batelemeke, bamobendi na bokudzi iluka na mboka yaba mpe babai nande o nsonge ya ngomba yaba yoko, eyaba upe na mboka mpo 'te bamobwaka o nsina; mpe bamoboma. 30Kasi Yesu awelengèni bè o ntei ya bato mpe atokoi akèi yande.

Yezu apandzaka molimo mobe mpe abikisaka bato ba male

(Mk. 1:21-28)

31Yesu alandaka o Kapalanauma mboka yoko ya'etuka ya galileya, mpe ateyaka bato o mokolo mwa boemi, o ndako-ndzambe. 32Baba bakakamowa na mateya mande waike mpo maloba mande maba na bokondzi. 33Moto moko abaaka na milimo mibe mpenza o ndako ya bayuda ya losambo; mpe abeki na mongongo mokudzi 'te.

34Aa! Yezu moto wa Nazarete! Biyo nao todziyani'ena likambo baa? Oyei mpo otoboma bè'esesei? Naebi 'te olo mosantu owauta na Nyaamolo. 35Yezu abekedzi molimo mobe na maloba 'te: kanga monoko mwao! Mpe tokoo o moto'obo! Nsima molimo mobe mobwaki ona moto o nsobi o miyo ma bato bèebe mpe motokoi o ntei ya ndzoto yande, kasi mwakomwaalaka bobe boko te. 36Bato bèebe bakamwaka mpe bakamituna 'te; ebo'ele'é maloba ma ndenge baa? Mpamba te, akapandza milimo mibe na bokondzi mpe na ngwiya, mikimotosa mpe mikitokoo!" 37Nampino, nsango ya Yesu ya palanganaka oba mboka iyèye ya ekolo mobimba.

(Mt. 8:14-17; Mk. 1:29-34)

38Yesu atokooko o ndako ya mayangani ya bayuda mpe akaingelaka o ndako ya Simona. Bokilo bwa simona bwa mwalimoto abaka na bwale bokudzi. Nampino batunaka Yesu 'te amobikisa. 39Yesu akèke o mpembeni yande, mpe alobi na bokondzi 'te; bwale boumowa; bwale boumoi mpe abiki. Atelemi mbala yawi mpe abandi bobalambedzi toma ta bodzei. 40Wakoma malembe, bato bababa na bato bababa male ndenge na ndenge, bayaka naba o Yesu; abaakilidzaka maboko moko na moko, asambedzi naba mpe babiki. 41Milimo mibe mpe maba mikitokoo o ndzoto ya bato mpe mikibeka wakudzi 'te: "Olo klisto masiya mwana wa Nyaamolo!" Kasi Yesu apekisaka milimo mpe akangi minoko myaba 'te ba nakoloba te, mpamba te, milimo myaebaka 'te alo klisto. 42Wakoma Nakutu, Yesu atokooko mpe akèi o esobe bè yo mpendza na'eika, mpe bato baba bakamowa, wakamodziya ba, bamobondedzi 'te adzala naba eika yawi, yo nakobalème liyu te. 43Yesu alobi naba 'te: "eengedzi 'te nakasakola nsango ndamu ya bokondzi bwa Nyaamolo o mboka impoko mpamba te, elo mokano mwa Nyaamolo mo mwa ntomaka nande." 44Yango'enena, Yesu akobaka mosala mwa boteidza o mangomba ma losambo la bayuda o engumba mobimba ya Yudea.

Currently Selected:

Lukasi 4: LIZ

Highlight

Copy