လုကာ 17

အခန်း (၁၇)

ကိုယ်တော်ယေရူက သတိအီဟေကရက်

1မှနောက်အာ ကိုယ်တော်ယေရူနာ အမာကတပည့်တော်ရက်အင် "လူးရက်နာ ဘုရားရှင်ငင် အနာခံမနီး တစ်ခြားလူးရက်အင် ဖြားယောင်းသွေးဆောင်ဟေကားနာ အမှန်တကယ်ဖြစ်လင်ကား။ ညီးငါ့ဒင့်ယေ ဟူးဝါပါဆာယင် အပြစ်ဒုစရိုက်ကျူးလွန်မနီး ဖြားယောင်းသွေးဆောင်ဟေကား လူးရက်နာ တဗျင်းဆင်းရဲဒုက္ခထုန်လင်ကား။ 2အိမ်မှလူးနာ အပြစ်ကင်းစင်ဟေကား လူးဟူးဝါယင် အပြစ်ဒုစရိုက်ကျူးလွန်ငန်မနီး ဖြားယောင်းသွေးဆောင်ကတောင်မာဒင့် အနိမ်ဟေကားတာလုံငင် အကာတုတ်အာကြိတ်ကို့ ပင်လယ်ထဲယာ မလောက်စာဟင်းပိုကနာ အမာဟင်းပိုကား အပြစ်ဒဏ်တောင်မာ ပိုကိုမီလင်ကားဖြစ်ဟေ။ 3မှအကြောင့် လူးရက်အင် အပြစ်ဒုစရိုက်ကျူးလွန်ငန်မနီး ဖြားယောင်းသွေးဆောင်ဟေကား အလိစ်တိ(လ်)မနီး သတိပီးယင့်ဂီး။ ငင် ယုံကြည်ကလူးဟူးဝါနာ အပြစ်ဒုစရိုက် ကျူးလွန်တိ(လ်)နဲ့က(လ်) ဆုံးမကို့အီယင့်ဂီး။ အိမ်မှလူးနာ အမာကအပြစ်ရက်အင် နောင်တလှုနဲ့က(လ်) ခွင့်လွတ်ကို့အီယင့်။ 4ငင် ယုံကြည်သူဟူးဝါနာ နင်ငင် ယက်တာတည်းယာ အဟက်ဟက် အပြစ်လိစ်တိ(လ်)ကို့ အမာကအပြစ်လိစ်တိ(လ်)ဒက်ကား အကြိမ်းတိုင်းအတွက် နင်ထနဲ့ဗန်(ဖ်)ကို့ ခွင့်လွတ်အီကဇိစ် တောင်းပန်နဲ့က(လ်) နင်နာ အမင် ခွင့်လွတ်အီပိုကားဖြစ်ဟေ။

ယုံကြည်ခြင်းအိမ် တာဝန်ဝတ္တရား

5မှနောက်အာ သာဝကရက်နာ ကိုယ်တော်ယေရူယင် " ဘုရားရှင်က အပေါ်ဝါပီးဟေကား ယုံကြည်ခြင်းငင် ပိုကို့ခိုင်မာမနီး ငါရက်အင် ကူညီယန်နက်နိမ့်"ငါ့ကို လျှောက်တင်လင်ကဟေ။ 6အိမ်မှကရပ် ကိုယ်တော်ယေရူနာ "နနိန်ရက်နာ တဗျင်းပြိစ်ဟေကား မုန်ညင်းအတူ(ဖ်)ဒက်ဆာ ဘုရားရှင်ကပေါ်ဝါ ယုံကြည်မူငါနဲ့က(လ်)ဒင့် ပိုးစာဖင်းပြောင်ငင် အကြိုက်ရက်အာဘင်းအပေါက်ကို့ ပင်လယ်ယာ ဖော်လင်ပါစေငါ့ကို အမိန့်အီနက်နဲ့တင့်င(လ်) အိမ်မှအဖင်းနာ နနိန်ရက်ကအမိန့်အင်နာခံကို့ ပင်လယ်ယာအကြိတ်ကလင်ကို့ အဖင်းဖော်တုန်းလင်ကားဖြစ်ဟေ။ 7နနိန်ရက်ကအထဲယာက လူးဟူးဝါကနာ လယ်လိစ်တုန်းကား အငှားဆာ အရိနဲ့ သိုးရက်အင် ကျောင်းတုန်းဟေကား အငှားဆာဟူးဝါငါ့ဟေဆိုပါစို့။ အိမ်မှအငှားဆာနာ အလိစ်လိစ်ကျီးကို့ လယ်ဒါဘင်းပြန့်ငန်ကရပ် နနိန်ရက်နာ အမင် "ဗန်(ဖ်) မှနားတုန်းကို့ ဆူးဝါပါဆာဆင်"ငါ့ကို နနိန်ရက်ငါ့လင်ကလဲ။ 8မဒေလေငါ့ကအစား နနိန်ရက်နာ အငှားဆာယင် "နင်နာ ငါဆာအူကဇိစ်အတွက် အစားသောက်ရက် ပြင်ဆင်ငင့်။ ကျီးနဲ့က(လ်) သန့်ရှင်းဟေကား ပါဇူကမူရက်အင် တူကို့ ငါ ဆာကို့ကျီးဇာရောက်မှ ငင် ကျွေးမွေးပြုစုငင့်။ ငါဆာကျီးနဲ့က(လ်) နင်ဆာလှုနန်း"ငါ့ကိုမယ် ငါ့လင်ကားဖြစ်ဟေ။ 9အငှားဆာနာ အမာကတာဝန်ဝတ္တရား အတိုင်း လိစ်အီးဟေကား နနိန်ရက်နာ အထူးတလည် အမင် ကျေးဇူးတင်လင်ကလဲ။ 10အိမ်မဒေလေဟုန်း နနိန်ရက်အ(လ်) ဘုရားရှင် ဖန်းဟေကားအလိစ်ရက်အင် လိစ်ကို့ကျီးဟေကရပ် "ငါရက်နာ အငှားဆာရက်မယ်ဖြစ်ကို့ ကျေးဇူးတင်ဟေကား ဟင်းထိုက်ဟေကားလူးရက် အရိပါ(လ်)။ ငါရက်နာ ငါရက်ကတာဝန်ရက်အင် ကျီးဇာရောက်မှ လိစ်တက်ဟေကမယ်ဖြစ်ဟေငါ့ကို ငင့်ဂီး"ငါ့ကို ငါ့လင်ကဟေ။

အမန်ဗြောင်ရောဂါဆေဆယ်ဦးယင် ကိုယ်တော်ယေရူ ကုအီဟေကား

11အတတ်တင့် ကိုယ်တော်ယေရူနာ အမာကတပည့်တော်ရက်အိမ်မက်တာ ဂျေရုဆလင်မြို့ဝါ ကြွလင်ဟေကရပ် ရှမာရိပြည်အိမ် ဂါလိလဲပြည်ကြားက နယ်စပ်ဒေသယင် ဖြတ်ကို့လင်လင်ကဟေ။ 12ကိုယ်တော်အိမ် အမာကတပည့်တော်ရက်နာ ထိန်ထိန်နာနားထုန်ဟေကရပ် အမန်ပြောင်ရောဂါဖြစ်တုန်းဟေကား လူဆယ်ယောက်နာ ကိုယ်တော်ကအနားဆာ ဗန်(ဖ်)ကက်ကယေ့ အမာရက်နာ လင်းစံဗြောင်ဆာနား စက်တုန်းလင်ကဟေ။ 13မှနောက်အာ အမာရက်နာ ချက်ဂို "ကိုယ်တော်ယေရှု၊ ငါ့ရက်အင် သနားအီယန်နက်နိမ့်။ ငါရက်အင် ကုအီယန်နက်နိမ့်"ငါ့ကို ကိုယ်တောင်ဝင် လျှောက်တင်လင်ကဟေ။ 14ကိုယ်တော်ယေရူနာ အမာရက်အင်ပိုကိုကျီးကရပ် "နနိန်ရက်နာ ဂျေရုဆလင်မြို့ဝါက ပုရောဟိတ်ရက်ကမားလင်ဂီး။ နနိန်ရက်က ခန္ဓာကိုယ်ဝါက ရောဂါပျောက်ကလင်ကား စစ်ဆေးယာဂီး"ငါ့ကို ငါ့လင်ကဟေ။ အမာရက်အ(လ်) ပုရောဟိတ်ရက်ကမား လင်တုန်းစမ်းမယ် အမာရက်ကား အနာရောဂါရက် ပျောက်ကလင်ကဟေ။ 15အမှာကရက်ထဲယာက ဟူးဝါနာ အမန်ရောဂါပျောက်ကင်းကလင်ကား ချေးဟေကခါ ဟော်ကို့ ဘုရားရှင်ဂါ ဂုဏ်ကျေးဇူးယင် ဝမ်းမြောက်ဝမ်းသာအိမ် ချီးမွမ်းကို ကိုယ်တော်ကမား ပြန့်ကိုဗန်(ဖ်)လင်ကဟေ။ 16မှနောက်အာ အမှာနာ ကိုယ်တော်ယေရှုဂါအတားရင်းငင် ဒူးထောက်ဦးညွတ်ဂို့ ရိုရိုသေသေအိမ် ကိုယ်တော်ဝင် ကျေးဇူးတင်ကား တူး(ဖ်)ပြိစ်လင်ကဟေ။ အိမ်မားလူးနာ ရှမာရိ#17:16 ရှမာရိ ရှမာရိလူမျိူးငါ့ဟေကနာ ဂျေရုဆလင်မြို့မြောက်ဘက်အာငါ့ဟေက ရှမာရိဒေသယာက လူးရက်ဖြစ်ဟေ။ပြည်ကဖြစ်ကို့ ဂျူးလူမျိုးအရိပါ(လ်)။ 17အိမ်မအခါ ကိုယ်တော်ယေရူနာ "ငါနာ အမန်ပြောင်ရောဂါဖြစ်တုန်းကား ဆယ်ယောက်လုံးငင် ကုအီဒက်ဟေ။ မှလူမျိူးခြားလွဲကို့ ကျန်ကကိုးယောက်နာ ဘုရားရှင်က ဂုဏ်ကျေးဇူးဝင် ချီးမွမ်းကဇိစ်အတွက် အဇာရိကို့ အဗန်(ဖ်)ကယား"ငါ့ကို ငါ့လင်ကဟေ။ 18မှဂျူးလူမျိုးအရိကား လူမျိူးခြားရှမာရိတန်ခြားဟူးဝါလွဲကို့ ကျန်ဟေကား ကိုးယောက်နာ ဘုရားရှင်က ဂုဏ်ကျေးဇူးယင် ချီးမွမ်းကဇိစ် အဗန်(ဖ်)ကတောင်း ငါ စိတ်ပျက်တိ(လ်)ဟေ။ 19မှနောက်အာ ကိုယ်တော်ယေရူနာ အိမ်မှလူးဝင် "ရိကို့ လင်ဒက်။ နင်နာ ငင် ယုံကြည်ဟေကတောင်း နင်ကရောဂါနာ ပျောက်ကန်းနန်းဖြစ်ဟေ"ငါ့ကို ငါ့လင်ကဟေ။

ဘုရားရှင်ဂါသာသနာတော်

20ယက်တာကရပ် ဖာရိရှဲအချို့ယေ့ ကိုယ်တော်ယေရူယင် "ဘုရားရှင်ဂါသာသနာတော်နာ အဆီချိန်ငါ ဗန်(ဖ်)ကယား"ငါ့ကို ကတာကအကြောင့် ကိုယ်တော်ယေရှုနာ "ဘုရားရှင်ဂါသာသနာတော်နာ ဗန်(ဖ်)တုန်းနန်းဖြစ်ကယေ့ နနိန်ရက်က အမိတ်အိမ်ပိုလင်ကားအရိပါ(လ်)။ 21ယူဝင်ဂီး၊ ဘုရားရှင်ကသာသနာတော်နာ မှအရပ်အာငါ့ကိုလည်းကောင်း အိမ်မှအရပ်အာငါ့ဟေငါကိုလည်းကောင်း" လူးရက်နာ ငါ့လင်ကားအရိပါ(လ်)။ အဇာရိကို့အငါနဲ့ ဘုရားရှင်ကသာသနာတော်နာ နနိန်ရက်ကကြားယာ ငါတုန်းနန်းကတောင်း ဖြစ်ဟေ"ငါ့ကို ပြန်ကို့ဖြေလင်ကဟေ။ 22မှနောက်အာ ကိုယ်တော်ယေရူနာ အမာကတပည့်တော်ရက်အင် "နနိန်ရက်နာ ငါ့လူ့သားတော် အုပ်ချုပ်ဟေကား ရယက်ယက်တာ ပိုကက်ကယေ့ အိမ်မှအူဇာနာ ဖြစ်လင်လှုကားအရိပါ(လ်)။ 23နနိန်ရက်အင် လူးရက်နာ "ယူဝင့်ဂီး၊ မေရှိယနာ မှအရပ်အာငါ့ဟေ။ အရိနဲ့ မေရှိယနာ အိမ်မှာနားကအရပ်အာငါ့ဟေငါ့ကို ငါ့လင်ကားဖြစ်ကယေ့ အပြင်းငါပြုကို့ အဆုံးထမ်း နနိန်ရက်တုန်းဟေကား အရပ်အာမယ် တုန်းငင့်ဂီး။ 24အဇာရိကို့အငါ့နဲ့က(လ်) ငါလူ့သားတော် ကြွဗန်ဟေကရပ် ကောင်းဂါလက်ဆူးဝါလုံးငင် လင်းဇိစ်ဟေကား လျှစ်ပျက်ကဒေလေ လူတိုင်းနာ ပိုလှုကားနည်းလမ်းအိမ် ကြွဗန်(ဖ်)ကတောင်းဖြစ်ဟေ။ 25ညီးင့ဒင့်ယေ့ အိမ်မအချိန်အထုန်မီ ငါလူ့သားတော်နာ မလားကင်းမ ဒုက္ခဝေဒနာယင် ခံစားပိုကို အတတ်ကခေတ်အာက လူးရက်က ငြင်းပယ်ဟေကဟင်းလင်ပိုကား။ 26နောဧလက်ထက်အာ#17:26 ဘုရားရှင်နာ အိန်းလွမ်းမိုးကို့ ကမ္ဘာမြေယင် ဖျက်ဆီးဟေကရပ် နောဧအိမ် အမာကမိသားစုယင် ကယ်တင်ဒက်ဟေ။ (ကမ္ဘာဉီးကျမ်း ၁၉း၁-၂၉ယင့် ယူဝင့်) ဖြစ်ပျက်ဒက်ကား အိန်းလွှမ်းမိုးဟေကအိမ် အကြုံမီ လူးရက်ကတုန်းဒက်ကဒေလေ ငါလူ့သားတော် ပြန့်ကြွဗန်(ဖ်)ကား အချိန်အထုန်မိင(လ်) လူးရက်နာ မလားကအတိုင်း ပြုမူကို့တုန်းလင်ကားဖြစ်ဟေ။ 27အိမ်မှအချိန်ငါ လူးရက်နာ အမာရက်ကထုံးစံအတိုင်း စားလိုက်၊ သောက်လိုက်၊ လက်ထပ်ထိမ်းမြားလိုက်အိမ်၊ မောင်နှင့်လိစ်အီးကို့ တုန်းလင်ကဟေ။ နောဧနာ အမာပြုပီးဟေကား သင်္ဘောအတာဟုန်းငါ အဆင်မိအချိန်ထိ အမာရက်နာ အိမ်မှအတိုင်း ဆက်လက်ကို့တုန်းလင်ကဟေ။ မှနောက်အာ ရုတ်တရက် အိန်းပြောင်ငန်ကို့ အိမ်မှလူးစုတ်ရက်နာ အိန်းမြုပ်ကို့ ဆိန်းလင်ကဟေ။ 28အိမ်မှအတိုင်း လောတလက်ထက်အာယေ#17:28 သောဒံဒမြို့အိမ် ဂေါမောရမြို့ရက်အင် ဘုရားရှင်ဖျက်ဆီးဟေကရပ် လောတအိမ် အမာကမိသားစုယင် ကယ်တင်ဒက်ဟေ။ (ကမ္ဘာဦးကျမ်း ၁၉း၁-၂၉) သောဒုံမြို့သားရက်နာ အယင်ဟိုက်ကအတိုင်း စားလိုက်သောက်လိုက်၊ စီးပွားရေးလိစ်ကို့ ၊ ဥယျာဉ်ခြံရက်အာ အဖင်းစုတ်ကို့ ၊ ကိန်းရက်ပြုကို့ တုန်းဒက်ကဒေလေ ငါပြန့်ကို့ကြွဗန်(ဖ်)ကအချိန်ငါယေ လူးရက်နာ အိမ်မဒေလေ တုန်းလင်ကားဖြစ်ဟေ။ 29ညီးငါ့ဒင့်ယေ လောတနာ သောဒုံမြို့ဝါဘင်း ပြုကလင်ကားရယက်အာမယ်ဒင့် ဘုရားရှင်နာ ကောင်းဂါလက်အာဘင်း ဗန်ဟြိုရ်တုန်းက တလုံးရက်အိမ် ဗန်(ဖ်)ဟြင်းရ်ဗဲ့(ဖ်)ဇိစ်ကို အိမ်မြို့ဝါကလူးစုတ်ရက်အင် ဆိန်းဇိစ်လင်ကဟေ။ 30အိမ်မှအတိုင်း ငါလူ့သားတော် ပြန်ကြွဗန်(ဖ်)ကအချိန်ငါယေ နနိန်ရက်မျှော်လင့်ကိုအပီကား အူဇာရက်နာ ရုတ်တရက်တင့် ဖြစ်ပျက်လင်ကား။ 31အိမ်မရယက်အာ ကိန်းဆဟာနိမ့်ဖုံးငါ ငါဟေကလူးရက်နာ ဆူးဝါပါဆာလာကဇိစ် ကိန်းတာဟုန်းငါ အဆင်ယေ့။ လယ်ပြင်ငါ ငါဟေကလူးရက်အ(လ်) ဆူးဝါပါဆာလာကဇိစ် ကိန်းငါအပြန့်ငန်ယေ့။ 32လောတကအအိတာနာ#17:32 သောဒံဒမြို့ဝါဘင်း သေပြေးရှင်ပြေးကပ်လင်ကယေ့ လောတကအအိတာနာ သောဒုံမြို့ဝင် သံယောဇဉ်အဖြတ်လှုကို့ ဘုရားရှင်ကအပြစ်အီဟေကား ဟင်းလင်ပိုကဟေ။ (ကမ္ဘာဦးကျမ်း၁၉း၁၂-၂၉) ဘုရားရှင်က တူးဝင်အတေးကတောင်း အဆမှီးဖြစ်ပျက်တက်ဟေကား သတိလူငင်ဂီး။ 33အဇာရိကို့အငါနဲ့ မှလောကယာ အပါနားဂါအဆက်အင် ကယ်တင်ကက်ကား အရိကက်ကားလူးရိယင့် နိစ္စထာဝရအဆက်အင် လှူလင်ကားအရိကယေ့ ငါကအတွက်ကြောင့် အပါနာကအဆက်အင်ဒင့် စွန့်လွတ်ကက်နဲ့ နိစ္စထာဝရအဆက်အင် လှုလင်ကားဖြစ်ဟေ။ 34နနိန်ရက်အင် ငါငန်းကား ငါပြန်ကို့ကြွဗန်(ဖ်)ကရပ် အိပ်ဟြာင့်ဆူးဝါတည်းယာ အိပ်တုန်းဟေကား လူးနိန့်ဟူးထဲယာက ဘုရားရှင်နာ ဟူးဝါယင် အော်လားလင်ငန်ကားဖြစ်ကို့ အယောက်ကဟူးဝါက(လ်) ပီဒက်ယန်ကနာ အမှန်တကယ်ဖြစ်ဟေ။ 35တစ်နေရာတည်းယာ အင်ကြိတ်တုန်းက တာဆာလောက် နိန်ဟူးထဲယာက ဟူးဝါယင် ဘုရားရှင်နာ အော်လားလင်ငန်ကားဖြစ်ကို အယောက်ကဟူးဝါက(လ်) ကျန်ဒက်ယန်ကဖြစ်ဟေ။ 36တစ်နေရာတည်းယာ လယ်လိစ်တုန်းကား လူးနိန့်ဟူးထဲယာက ဟူးဝါယင် ဘုရားရှင်နာ အော်လားလင်ငန်ကားဖြစ်ကို့ အယောက်ကဟူးဝါက(လ်) ပီဒက်ယန်ကားဖြစ်ဟေ"ငါ့ကို ငါ့ဆနပ်ကို့ 37တပည့်တော်ရက်နာ ကိုယ်တော်ဝင် "ကိုယ်တော်၊ မှအူဇာရက်နာ အဆီအရပ်အာ ဖြစ်ပျက်အန်ကယား"ငါ့ကို ကတာဟေကရပ် ကိုယ်တော်နာ " လင်းတရက် စုတုန်းဟေကား ယူကို့ ဆိန်းဟေကားလူးရက်အင် အဆီအရပ်အာပီဟေယားငါ့ဟေကင့် လူတိုင်းချေးကဒေလေ မှအူဇာရက်ဖြစ်ပျက်အန်ကား နေရာယေ့ လူတိုင်းနာ ချေးလင်ကားဖြစ်ဟေ"ငါ့ကို ပြန်ကို့ဖြေလင်ကဟေ။

Currently Selected:

လုကာ 17: CKH

Highlight

Copy