Luk 19
19
Chisọs Asoobo Mme Sakiọs Awọ Ataksi
1Alo akekpun̄, Chisọs mme mme-mped Isio ekesịm idun̄ Yeriko nnien mmọ ekesasan̄a lo ekpun̄ 2An̄we amo akọọde Sakiọs akedun̄ lo. An̄ye ake ade ala iwuo anọ mme-aben̄ ataksi nnien an̄ye aken̄yie in̄yie. 3Ke adan̄a ini Chisọs asesan̄ade akpun̄ ke idun̄ alo, Sakiọs akefed adikwịd utọ an̄we se Chisọs ade, ade an̄ye ikikana ikwịd Chisọs kolo an̄ye akede ikpre an̄we nnien otu an̄we amo ekepoghode Chisọs ke ide ekekwak. 4Anam, Sakiọs aketeen̄e akpun̄ iso anọ otu an̄we ma akuliene itio fik man an̄ye amekeme adikwịd Chisọs kolo Chisọs akpekpere adiluk ayed alo.
5Kini Chisọs adighe adiusịm esak itio se Sakiọs akedro, An̄ye apeene an̄yie ke an̄yọn̄ achie Sakiọs ma awo an̄ye, “Sakiọs, suugho di usọb-usọb, kolo ana Ami nde ichen-an̄we afo mfịn.” 6Anam, Sakiọs asọsọb asuugho ke itio alo adi, nnien ke inemekịd, an̄ye alara Chisọs ada kaa ufọk isio.
7Ade afịd mpen se ikisan̄a alo ekekwịd amo, mmọ etun̄o adikuun ikọ mme Chisọs, ete “Alaǝha adide ichen-an̄we ke ufọk nne anam idiọk.”
8Akekaa koo, Sakiọs alaha ala ke iso kpukpro an̄we nnien awo Abọn̄ Chisọs, “Mbọk kob iche, Ami nnie nnọ mme-uweene upaǝk in̄yie ami, nnien mpen se nkeda ido utọtọ n̄wọ ataksi se ikpon, nnie nnọ usọọnọ ke itie inaan̄.”
9Nnien Chisọs awo an̄ye, “Mfịn amo, Abasi an̄yaǝn̄a fi mme ufọk afo asiene ke ufen idiọkmkpọ afo, kolo afo n̄ko ade an̄we ubon nne Ebraham. 10Kolo Ami, Ochio An̄we nkedi arimbod adifed mpen se ichoomo nnan̄ nn̄yaǝn̄a mmọ nsun̄o ke ufen idiọkmkpọ nne mmọ.”
Chisọs Anam Ukwadmkpọ Kaban̄a Adidem Chi Lo Mme Nnitọ Ufọk Isio Luob
(Mat 25:14-30)
11Otu an̄we ekese ekpan̄utọn̄ ekob kpukpro se Chisọs aketan̄. An̄ye akaiso anan̄ anam ukwadmkpọ anọ mmọ kolo mmọ eke ekpekpere adisịm idun̄ Yeruselem nnien mme-an̄we ekekere ewo ke ukara Abasi anie ntun̄o inichi kini Chisọs alukde idun̄. 12Chisọs awo mmọ, “Akwuọ-an̄yie an̄we chi lo akekaa an̄yan idịd man aka uwọ unen ato akwuaha adidem adide adidem ke nkan-nkwuk nne mmọ, man an̄ye uwọ unen udi, an̄ye amedi adiukara. 13Kiso an̄ye alaǝha, an̄ye anọ nnitọ ufọk isio luob uchio ate edi ebịne imo. An̄ye anọ mmọ an̄we chi chi, aye a-ghold chi chi. Akem an̄ye awo mmọ, ‘ida aye amo inam mmupeghe inọ mi tutu nn̄yọn̄ ndi#19:13 Mina akede emọnọ aye amo adodo aye utom aporo usen chi amo ekekpeghe an̄we se inam utom ke usen ichie-chi.’
14“Ade mpen nkan-nkwuk nne mmọ ekesua an̄ye, anam, mmọ edọn̄ mme-isun̄utom ekọọnọ an̄ye ke adam man ekudọǝhọ akwuaha adidem ewo, ‘Achi ifede an̄we amo ade adidem achi.’
15“Ade akwuaha adidem akedod an̄we alo nte adidem nnien an̄ye atuno an̄yọn̄ adi. Akem an̄ye akwuod nnitọ ufọk isio luob alo amo an̄ye akenọǝhọ aye man adiọn̄ọ ilaha aye se mmọ en̄yie nte udod ke mmupeghe alo.
16“Akpa ochio-ufọk akedi aduwo an̄ye, ‘Adidem, nkenam aye a-ghold luob ndod ke aye a-ghold chi se akenọ mi’
17“Adidem alo awo an̄ye, ‘afo anam afọn tutu, afo ade eti ochio-ufọk! Sia afo anamde akpanikọ ke itọ-itọ mkpọ, ami nnọ fi unen adikara ke idun̄ luob.’
18“Achọhọ ochio-ufọk ipa adi aduwo an̄ye ate, ‘Adidem, nkenam aye a-ghold ition ndod ke aye a-ghold chi se akenọ mi.’
19“Adidem alo awọọnọ awo, ‘Nnọ fi unen adikara idun̄ ition.’
20“Akem, achọhọ ochio-ufọk ita akwuọ adi adiuwo, ‘Adidem, chie aye a-ghold afo mo. Nkekwan̄ an̄ye ke ufoodinua nlịb nnịm mmaǝk ukuchob. 21Afo ade ikafia an̄we, anam, nkekob ndịk mban̄a fi. Afo aben̄ mme-mkpọ amo miidọghọ akene afo ato mpen afee, afo anan̄ atie nte atọ in̄wan̄ amo adọghọ ke in̄wan̄ se an̄ye miikitọəhọ.’
22“Adidem alo awọọnọ awo, ‘Afo idiọk ochio-ufọk! N̄wo nda ikọ inua afo mbiere ikpe nnọ fi. Afo ke ide afo awo ke ami nde ikafia an̄we, nnan̄ mben̄ mme-mkpọ amo miidọghọ akene ami nto mpen afee. Nnien ami nnan̄ ntie nte atọ in̄wan̄ amo adọghọ ke in̄wan̄ se miikitọǝhọ. 23Ude afo anin̄e anịm ntolo, amakana asepen aye ami akunịm ke ufọk unịm aye, man kini ami nn̄yọn̄de ndi, mmewọ aye ami mme udod.’
24“Nnien adidem alo awo nnitọ ufọk se ikila ikpere, ‘Iwọ an̄ye aye a-ghold alo ikaaba inọ ochio-ufọk se in̄yie aye a-ghold luob.’
25“Ade nnitọ-ufọk isio ewo an̄ye ‘Adidem! An̄we alo an̄yie n̄yie aye a-ghold luob!’
26“Adidem alo awọọnọ awo, ‘Ami nnam n̄yi idiọn̄ọ ke Abasi akudian udian unọ mpen se inam akpanikọ ke se mmọ en̄yie, ade mpen amo miinama akpanikọ, kpa ide itọitọ se mmọ en̄yie n̄yie, Abasi akuwọ mmọ. 27Ade kaban̄a mpen usua ami amo miikifede mi nkara mmọ nte adidem, da mmọ di mo nan̄ kwood mmọ ke ataa iso an̄yie ami.’ ”
Chisọs Aluk Idun̄ a-Yeruselem Nte Adidem
(Mat 21:1-11; Mak 11:1-11; Yọn 12:12-19)
28Kini Chisọs atan̄a afịd mme-ikọ amo ama, An̄ye akaiso ke isan̄ isio mme mme-mped adiliene nkaa idun̄ a-Yeruselem. 29Nte mmọ esan̄ade ekpere mme-idun̄ in̄wan̄ a-Betfech mme Betani amo akelaǝha ke mpọǝk abod mme-Ọlif, Chisọs apọen̄ mme-mped Isio ipa adọn̄ utom. 30Kiso adọn̄ mmọ, An̄ye awo, “Ikaa ikuluk idun̄ in̄wan̄ se ila ke nsakiso an̄yi. Kini an̄yi isịmde lo, an̄yi ikukwịd ochio enan̄ ukaisan̄ amo akanam an̄we ntechi ilieneke an̄ye ikwad nte achịde. Ikpọk an̄ye nnien ida an̄ye isọk Mi. 31Udeake an̄we abịbde n̄yi awo, ‘Nsinam an̄yi ikpọk ochio enan̄ ukaisan̄ alo? Iwọọnọ an̄ye iwo; Abọn̄ afed adida an̄ye nnam mkpọ!’ ”
32Anam, mme-mped se Chisọs akesiene adọn̄ elaǝha ekaa idun̄ in̄wan̄ alo. Mmọ ekenan̄ ekwịd kpukpro mkpọ lo kpa nte Chisọs akewoǝho mmọ. 33Ke adan̄a ini mme-mped ese ekpọkde ochio enan̄ ukaisan̄ alo, mpen se in̄yie ebịb mmọ ewo, “Ntak an̄yi ikpọkhọ ochio enan̄ ukaisan̄ alo?”
34Mme-mped alo ewọọnọ ewo, “Abọn̄ afed adida an̄ye nnam mkpọ.”
35Anam, mme-mped alo ekeda ochio enan̄ ukaisan̄ alo esọk Chisọs. Mmọ eda mme-ewịra nne mmọ ebịd ke adam enan̄ ukaisan̄ alo nnien mmọ en̄wam Chisọs aliene atie. 36Nte Chisọs asekwadde enan̄ alo akaa ke idun̄ Yeruselem, mme-an̄we eke ekaiso ebịd mme-ewịra nne mmọ ke akponoayed adikpono An̄ye.
37Nte Chisọs mme otu an̄we esịmde itie chi lo ke akponayed amo atogho ke abod mme-Ọlif asuugho, afịd otu mme-mped etun̄o adipoen̄ ukpo ilara ntoro Abasi ke ntak afịd mme-utịbemkpọ se mmọ ekekwịd nte Chisọs anam.
38“Afọn mme an̄ye amo adighe nte Adidem ke adudu Abasi. Emem amakab atie ke otu achi mme Abasi nnien ubọn̄ amakab an̄yie Abasi amo atiede ke hefịn!”
39Usuk mme-Farisii se ikisịne ke otu an̄we alo ewo Chisọs, “Andikpeb, kpan mme-mped Afo chak etre aditan̄ mme-ikọ amo.”
40Chisọs awọọnọ mmọ, “Ami ntan̄ akpanikọ nnọ n̄yi ke ude ipon amo etrede adipọen̄ ukpo ntoro, mme-itia en̄i ntun̄o adipọen̄ ukpo ntoro.”
Chisọs Atua Aban̄a Mpen a-Yeruselem
41Kini Chisọs adighe adukpere idun̄ a-Yeruselem anan̄ akwịd an̄ye, An̄ye atun̄o aditua mban̄a idun̄ alo mme mpen isio. 42An̄ye awo, “O, mpen a-Yeruselem upaha amede ke an̄yi ikidiọn̄ọ ide usen mfịn, mme-mkpọ se ikeme adida emem nsọk n̄yi! Ade an̄yi ịkana idiọn̄ọ. 43Kolo mme-ini mfịna ekusịm n̄yi. Ke ini alo, mme-usua an̄yi ekupọb ibibene ukaana n̄yi, enan̄ ekad an̄yi esịn. Nnien mmọ ekutịme mme an̄yi ke afịd nkan̄. 44Mmọ ekuwuud idun̄ an̄yi enịm ke isọn̄ nnien emian̄ afịd mpen an̄yi ekwood epoono ke isọn̄. Nnien mmọ imaha utre adiwuud kpukpro ufọk mme ibibene tutu itia idro ke an̄yọn̄ itia. Afịd amo awutịbe sia an̄yi miikidiọn̄ọke ini se Abasi akedi adin̄yaǝn̄a n̄yi.”
Chisọs Abịne Mme-An̄yam Mkpọ Ke Akwere Tempịl Asuun̄o
(Mat 21:12-17; Mak 11:15-19; Yọn 2:12-25)
45Akem Chisọs aluk akwere tempịl ke Yeruselem. Nnien An̄ye atun̄o adibịne mme-an̄yam mkpọ udua lo nsuun̄o. 46Chisọs awo mmọ, “Ekekwed ke nkwed Abasi ewo, ‘Ufọk Abasi an̄ye adide itie upọn̄ akam’ ade an̄yi ikaaba an̄ye inịm itie ulịbe mpen nwoo”
47Alo akekpun̄, Chisọs atie akpeb mme-an̄we mkpọ ke akwere tempịl kpukpro usen. Ade mme-ikpọ oku mme mme-akpeb iped nne Mosis mme mme-ada ayed ke otu mpen Yu eketie efed ayed adikwod An̄ye. 48Ayịd ade ke mmọ ikikwịde ayed dan̄a emesan̄a enam An̄ye mkpọ, kolo afịd an̄we eketie ekpan̄utọn̄ eti-eti adikob se An̄ye akpeb.
Currently Selected:
Luk 19: IBN
Highlight
Copy
Compare
Share
Want to have your highlights saved across all your devices? Sign up or sign in
Ibino (Ibono) Bible by Beyond Translation is licensed under Creative Commons Attribution-ShareAlike 4.0 License.
