Zakariya 5
5
Ibonekerwa rya gatandatu: igitabo kiguruka#5.1 igitabo kiguruka: Imana yiyemeje kwirukana mu murwa wayo mutagatifu, abajura bose n’abanyabinyoma (5.3); amazina yabo azandikwa muri icyo gitabo, kimwe n’umuvumo uzabahama.
1Ngo nongere kubura amaso ndabonekerwa: mbona umuzinge w’igitabo kiguruka. 2Umumalayika arambaza ati «Urabona iki?» Ndamusubiza nti «Ndabona umuzinge w’igitabo kiguruka, ufite uburebure bw’imikono makumyabiri, n’imikono icumi y’ubugari.» 3Nuko arambwira ati «Uwo ni umuvumo usatira igihugu cyose. Bityo, nk’uko byanditswe kuri rumwe mu mpande z’uwo muzinge, uwitwa umujura wese azatsembwa mu gihugu, kimwe n’urahira ibinyoma wese nk’uko byanditse ku rundi ruhande. 4Narawohereye, uwo ni Uhoraho, Umugaba w’ingabo, ubivuze, kugira ngo usakize inzu y’umujura n’iy’urahira ibinyoma, uhatsimbarare maze uyitwike yose, ibiti n’amabuye bikongoke.»
Ibonekerwa rya karindwi: umugore mu cyibo#5.4 umugore mu cyibo: uwo mugore ushushanya icyitwa ubugome cyose muri Yuda, azoherwa kure, maze igihugu gisukurwe.
5Umumalayika twavuganaga aregera maze arambwira ati «Ngaho ubura amaso maze urebe kiriya kije.» 6Ndabaza nti «Kiriya se cyo gisobanura iki?» Aransubiza ati «Kiriya kije ni icyibo.» Yungamo ati «Biriya ni ibyaha by’abo mu gihugu cyose.»
7Nuko umutemeri w’icyuma ureguka: mbona umugore wicaye muri cya cyibo. 8Arambwira ati «Uyu ni we bugome.» Hanyuma amutsindagira mu cyibo maze asubizaho umutemeri uremereye w’icyuma.
9Ngo nongere kubura amaso ndabonekerwa: mbona abandi bagore babiri basohoka, umuyaga uhuha mu mababa yabo yasaga n’aya nyirabarazana; baterura icyo cyibo bakerereza mu kirere hagati y’isi n’ijuru. 10Ubwo mbaza umumalayika twavuganaga, nti «Kiriya cyibo bakijyanye he?» 11Arambwira ati «Bakijyanye mu gihugu cya Shineyari, ngo bakihubakire ingoro. Iyo ngoro nimara kuzura, bazagitereka aho bazaba bagiteguriye, ubutazahava ukundi.»
Currently Selected:
Zakariya 5: KBNT
Highlight
Share
Compare
Copy
Want to have your highlights saved across all your devices? Sign up or sign in
Kinyarwanda Bibiliya Ntagatifu, Verbum Bible © The Bible Society of Rwanda, Rép. Dém. du Congo, 2012.
