Zaburi 64
64
Urubanza Imana icira abatoteza abandi#64.0 . . . abatoteza abandi: umuririmbyi wa zaburi abanza gutakambira Imana ngo imurinde abanzi be, akanarondora ubucabiranya bwabo (2–7). Hanyuma akatwereka ukuntu Imana ibaganza, naho ab’intungane bose ikabasenderezamo ibyishimo (8–11).
1Igenewe umuririmbisha. Ni zaburi iri mu zo bitirira Dawudi.
2Mana yanjye, umva amaganya yanjye,
urinde amagara yanjye umwanzi gica;
3umpishe kure y’abicanyi bangambanira,
kure y’abagizi ba nabi bahuje umugambi.
4Dore batyaje indimi zabo boshye inkota,
batamika imyambi yabo, ari yo magambo asesereza bavuga,
5kugira ngo barase rwihishwa umuntu w’indakemwa,
ngo bamurase bamutunguye nta cyo bishisha.
6Bahirimbanira kunguka inama mbi,
bagahimba amayeri yo guhisha imitego bamutega,
bavuga bati «Ni nde uzabimenya?»
7Buzuriza hamwe imigambi y’ubugizi bwa nabi,
bakigamba bavuga bati
«Ibyo dushaka kugeraho turabinogeje rwose;
burya mu nda ni kure, umutima w’umuntu ntugerwaho!»
8Ariko Imana yagize itya irabarasa,
umwambi irekuye ubagwa gitumo, urabakomeretsa!
9Ururimi rwabo ni rwo rubahindutse,
maze ubabonye wese akazunguza umutwe.
10Koko, umuntu wese byamukuye umutima,
yamamaza ibyo Imana yakoze,
kandi na we yumviraho.
11Intungane niyishimire Uhoraho,
imushakeho ubuhungiro,
abafite umutima uboneye bose babyishimire.
Currently Selected:
Zaburi 64: KBNT
Highlight
Share
Copy
Want to have your highlights saved across all your devices? Sign up or sign in
Kinyarwanda Bibiliya Ntagatifu, Verbum Bible © The Bible Society of Rwanda, Rép. Dém. du Congo, 2012.
