Zaburi 140
140
Gusaba Uhoraho ngo aturinde abanzi n’abanyarugomo#140.0 . . . abanzi b’abanyarugomo: kubera ko abagiranabi b’abanyarugomo bamuhagurukiye, umuririmbyi wa zaburi aringinga Imana ngo imutabare, kuko ari yo yonyine buhungiro abakene n’abababaye bakesha agakiza; naho abanzi be arabasabira ngo inabi bamushakiraga ibe ari bo igaruka.
1Igenewe umuririmbisha. Ni zaburi iri mu zo bitirira Dawudi.
2Uhoraho, nkiza umuntu w’umugiranabi,
undinde n’abanyarugomo,
3ba bandi bahora bazirikana kugira nabi,
buri munsi bagasembura intambara;
4bagatyaza ururimi rwabo nk’urw’inzoka,
bagahora bajunditse mu kanwa ubumara nk’ubw’impiri. (guceceka akanya gato)
5Uhoraho, ntutume ngwa mu maboko y’umugiranabi,
undinde n’abanyarugomo,
ba bandi bahora bazirikana icyangusha.
6Abirasi banteze umutego ngo bamfatiremo,
babohanyije imigozi barayishandika,
maze ku nzira nyuramo bahaca ibico. (guceceka akanya gato)
7Nuko mbwira Uhoraho, nti «Ni wowe Imana yanjye!
Uhoraho, tega amatwi, wumve ijwi ryanjye rigutakambira!»
8Nyagasani Mana yanjye, wowe mbaraga nkesha agakiza kose,
urarinde umutwe wanjye ku munsi w’intambara.
9Uhoraho, ntuzemerere umugiranabi icyo yifuza,
ntuzareke imigambi ye imushobokera,
naho ubundi yakwishyira hejuru. (guceceka akanya)
10Abantangatanze hose bamvuga nabi,
iyo nabi irakabahama!
11Barakanyagirwa n’amakara yaka,
barohwe mu muriro,
mu nyenga batazashobora kuvamo!
12Abanyakarimi kabi ntibakabeho mu gihugu;
umuntu w’umunyarugomo n’umugiranabi,
ibyago birakamujujubya ubudahwema.
13Nzi ko Uhoraho azarenganura abanyakababaro,
akazarengera abakene.
14Nuko intungane zizogeze izina ryawe,
abantu b’intagorama bature imbere yawe.
Currently Selected:
Zaburi 140: KBNT
Highlight
Share
Copy
Want to have your highlights saved across all your devices? Sign up or sign in
Kinyarwanda Bibiliya Ntagatifu, Verbum Bible © The Bible Society of Rwanda, Rép. Dém. du Congo, 2012.
