ລູກາ 23
23
ພຣະເຢຊູເຈົ້າຕຼໍນຳຕົວເຕິກໂກຼທິມັດປີລາດ
(ມທ 27:1-2,11-14; ມຣກ 15:1-5; ຢຮ 18:28-38)
1ຈາກນັ້ນຜູ້ນຳທັງປວງທິປີນຸ໋ຍຢິວກໍຕຶກເຊິງຈຽງພຣະເຢຊູເຕິກທັຽງຜູ້ປົກຄອງປີລາດ. 2ບ່ອນທີ່ຫາມາຍເລີ່ມສ້າງເບົ໋າພຣະເຢຊູເຈົ້າທິມັດປີລາດ. ຫາມາຍເບົ໋າວ່າ, “ສີນາປິດຣັບກາລໍປີນຸ໋ຍແນັ ປິດຫລອກລວງປະຊາຊົນທິສີນາ. ໂດຍເບົ໋າຫາມາຍວ່າຢີເນເສຍພາສີອຳຈັກກະພັດ ແລະອ້າງວ່າເຫີເອງເປຼີຍກະສັດ ພຣະຄຣິດ.”
3ດັ່ງນັ້ນ ປີລາດຈຶ່ງເຕືອນພຣະເຢຊູເຈົ້າວ່າ, “ໄມເປີຼຍກະສັດທິຊາວຢິວມາດຮາເລ໋າະ?”
ພຣະເຢຊູເພີຼບປີລາດວ່າ, “ມາດ. ຕາມທີ່ໄມເບົ໋າຫັນແຫຼະ.”
4ແລ້ວປີລາດກໍເບົ໋າເກິເອີນຫົວໜ້າປະໂຣຫິດ ແລະປະຊາຊົນເຮິທີ່ເຢຍວ່າ, “ນາພະຕາຍວ່າກາລໍປີນຸ໋ຍແນັຢີໃມ໋ຄວາມຜິດອາເຕເລີຍ.”
5ແຕ່ຫາມາຍນະເບົ໋າຢືນຢັນຕໍ່ໄປວ່າ, “ພຣະອົງປິດສຸກຍູ້ປີນຸ໋ຍເນກະບົດຕໍ່ລັດຖະບານໂຣມໂທຼແຂງທິຢູດາຍໂດຍຄຳສັ່ງສອນທິພຣະອົງ. ແລະພຣະອົງເລີ່ມສັ່ງສອນເປະແນັເຮິແຂງຄາລີເລ ແລະຈາກນັ້ນພຣະອົງກໍເຕິກທີ່ນະຄອນເຢຣູຊາເລັມມີສະເນີ.”
ປີລາດສົ່ງພຣະເຢຊູເຕິກທັຽງຜູ້ປົກຄອງກະສັດເຮໂຣດ
6ເມື່ອປີລາດປິດຊ໋ອງດັ່ງນັ້ນ ລາວຈຶ່ງເຕືອນຫາມາຍວ່າ, “ກາລໍປີນຸ໋ຍແນັເປີຼຍຊາວຄາລີເລບໍ?” 7ເມື່ອປີລາດຈືວ່າ ພຣະເຢຊູເຈົ້າເຈິະເກິດແຂງຄາລີເລ, ເຂດທີ່ເຮໂຣດປົກຄອງ ເຫີຈຶ່ງສົ່ງພຣະເຢຊູເຕີກທັຽງເຮໂຣດ. ເຮິເວລານັ້ນ ເຮໂຣດກໍໂກຼນືນະຄອນເຢຣູຊາເລັມ. 8ເຮໂຣດດີໃຈຫຼາຍ ທີ່ຕາຍພຣະເຢຊູເຈົ້າ. ເພາະເຫີປິດຊ໋ອງເລື່ອງພຣະເຢຊູ ແລະຫວັງໂງນຈະຕາຍພຣະອົງປືຼມການອັດສະຈັນບາງຢ່າງ. 9ດັ່ງນັ້ນ ເຮໂຣດຈຶ່ງເຕືອນພຣະເຢຊູເຈົ້າທຳຂໍ້ ແຕ່ພຣະເຢຊູຢີປິດເພຼີບເຫີ. 10ເອີຫົວໜ້າປະໂຣຫິດ ແລະເອີນຄູສອນກົດບັນຍັດ ກໍເຊິງໂກຼທີ່ເຢຍແລະສ້າງເບົ໋າພຣະເຢຊູຢ່າງໜັກແໜ້ນ. 11ຝ່າຍເຮໂຣດພ້ອມດ້ວຍທະຫານທິລາວດູຖູກພຣະເຢຊູ ແລະສະອາເຢາະເຢີ້ຍພຣະອົງ. ແລ້ວເຮໂຣດກໍເຕງເນຫາມາຍສົບອາວທິກະສັດ ເຜີປຼືມເປະວ່າລາວເປຼີຍກະສັດ ເບົ໋າເອີນທະຫານທິລາວເນຈຽງລາວບີງເຕິກທັຽງຜູ້ປົກຄອງປີລາດ. 12ເຮິຕະໄງເຢຍເອງ ເຮໂຣດເກິປີລາດປິດກາຍເປຼີຍເມົ໋າກາເລີງ ແຕກອນຕຼຸບປຣຽຣ໌ເຄີຍເປີຼຍສັດຕູຕໍ່ກັນ.
ພຣະເຢຊູເຈົ້າຕັດສິນປະຫານຊີວິດ
(ມທ 27:15-26; ມຣກ 15:6-15; ຢຮ 18:39-19:16)
13ແລ້ວປີລາດກໍກາເລົາເອີນຫົວໜ້າປະໂຣຫິດ ບັນດາຜູ້ປົກຄອງຜູ້ນຳທິຊາວຢິວ ແລະປະຊາຊົນເຕິກປະຊົມ 14ຈາກນັ້ນພຣະອົງປິດເບົາເກິຫາມາຍວ່າ, “ໄມປິດໂຕຍຈ໋ອກກາລໍປີນຸ໋ຍແນັເຈິະທັງຂ້າພະເຈົ້າ, ແລະໄມອ້າງວ່າພຣະອົງປິດປຼືມເນປະຊາຊົນຕໍຕ້ານລັດຖະບານໂຣມ. ບັດແນັຂ້າພະເຈົ້າປິດຕັດສິນເລື່ອງແນັທິມັດໄປໂຕດສະເນ໋ະສະ, ແລະຂ້າພະເຈົ້າຕາຍວ່າກາລໍປີນຸ໋ຍແນັຢີໃມ໋ຄວາມຜິດເຮິການປຼືມຜິດໃດໆ. 15ເຮໂຣດນະປິດຕາຍຫາມາຍຢີໃມ໋ຄວາມຜິດ. ດັ່ງນັ້ນ, ເຮໂຣດປິດສົ່ງລາວບີງເຈິະເຕິກທັຽງສີນາ. ຕາຍປິດຢ່າງຈະແຈ້ງວ່າພຣະເຢຊູຢີປິດປຼືມສິ່ງອາເຕທີ່ຂ້າພະເຈົ້າຄວນຕັດສິນເນລາວເກດ. 16ດັ່ງນັ້ນ ນາຈະເບົ໋າທະຫານ ປາຣຽນລາວ, ແລະຫຼັງຈາກນັັ້ນນາຈະເປຼເນລາວເປຼີຍອິດສະລະ.” 17ປີລາດເບົ໋າເປະແນັ ເພາະເປຼີຍຮີດຄອງປະເພນີທີ່ປີລາດຕ້ອງເປຼນັກໂທດຊາວຢິວມີຣາອຳຫາມາຍເຮິໄລຍະທີ່ຊາວຢິວສະຫຼອງປັດສະຄາ.
18ແຕ່ປະຊາຊົນໂຕດແອອາໂຣະຕຶກວ່າ, “ຈ໋ອກໄອເຍືອຍເຕິກ ແລະກາເຈດລາວ ຈົ່ງເປຼບາຣາບາເນສີນາ.” 19ບາຣາບາຜູ້ແນັຕໍຼຄົກ ເພາະບາຣາບາປິດກໍ່ຄວາມວຸ້ນວາຍເກິປີນຸ໋ຍອື່ນເຮິນະຄອນເຢຣູຊາເລັມ ແລະ ຍ້ອນບາຣາບາປິດກາເຈດມີຣາ.
20ປີລາດຈືວ່າພຣະເຢຊູເຈົ້າຢີໃມ໋ຄວາມຜິດ ແລະຕ້ອງການເປຼພຣະອົງ ດັ່ງນັ້ນປີລາດຈຶ່ງເບົ໋າເກິປະຊາຊົນເກີບ. 21ແຕ່ຫາມາຍອາໂຣະເພຼີບຄືນວ່າ, “ຕອກພຣະອົງດ້ວຍຕະປູປຶງລອງກາງແຂນ ຕອກພຣະອົງເຮິລອງກາງແຂນ.”
22ເປຼີຍເທື່ອທີ່ແປ ທີ່ປີລາດປິດເບົ໋າວ່າ, “ເປະເຕ ກາລໍປີນຸ໋ຍແນັປິດປຼືມຜິດອາເຕ ຂ້າພະເຈົ້າປິດພະຕາຍວ່າພຣະອົງຢີໃມ໋ຄວາມຜິດ ສຳລັບການລົງໂທດປະຫານຊີວິດ. ສະນັ້ນ ນາຈຶ່ງຈະເບົ໋າທະຫານເນຂ້ຽນຕີລາວ ແລ້ວກໍເປຼລາວ.”
23ແຕ່ປະຊາຊົນນະອາໂຣະຕຶກຢ່າງເຣງວ່າພຣະເຢຊູຈະຕ້ອງຕຼໍຕອກດ້ວຍຕະປູທີ່ລອງກາງແຂນ ເຜີກາເຈດ ເຮິທີ່ສຸດຫາມາຍປິດຮັບໄຊຊະນະ. 24ດັ່ງນັ້ນ ປີລາດຈຶ່ງຕັດສິນໃຈປຼືມສິ່ງທີ່ຫາມາຍຕ້ອງການ ແລະເຕງເນກາເຈດພຣະເຢຊູ. 25ເຫີເຕງເນທະຫານທິເຫີເປຼບາຣາບາລາວມູດຄົກ ເພາະບາຣາບາປິດສ້າງຄວາມວຸ້ນວາຍ ແລະປິດກາເຈດມີຣາ ກາລໍປີນຸ໋ຍແນັທີ່ປະຊາຊົນເບົ໋າເນປີລາດເປຼເຮິເທດສະການປັດສະຄາ. ແລ້ວປີລາດກໍຈອ໋ກພຣະເຢຊູເຈົ້າມອບເນເມົ໋າທະຫານເຜີກະເຈດພຣະອົງຕາມທີ່ຫາມາຍຕ້ອງການ.
ພຣະເຢຊູເຈົ້າຕຼໍຕອກທີ່ລອງກາງແຂນ
(ມທ 27:32-44; ມຣກ 15:21-32; ຢຮ 19:17-27)
26ເຮິຂະນະທີ່ທະຫານທິປີລາດປິດໂຕຍພຣະເຢຊູເຕິກ ຫາມາຍປິດຣັບກາລໍທີເນາະວ່າຊີໂມນໄທກິເຣເນລາວກຳລັງເຈິະຈາກຊົນນະບົດ. ຮານືນະຄອນເຢຣູຊາເລັມ ເມົ໋າທະຫານປິດຈ໋ອກລອງກາງແຂນທິພຣະເຢຊູໃສ່ຊີໂມນ ແລະບັງຄັບເນກອຼຍລອງກາແຂນ ແລະຕາເຕິກຕາມປຼືດພຣະເຢຊູເຈົ້າ ເຕິກບ່ອນທີ່ຫາມາຍຈະຕອກພຣະອົງທີ່ລອງກາງແຂນ.
27ປະຊາຊົນຈຳນວນທຳປິດຕາເຕິກເກິພຣະເຢຊູ. ນອກນັ້ນ ນະໃມ໋ຕາເຣບາງຄົນໂກຼເຮິປະຊາຊົນ. ຫາມາຍໂສກເສົ້າ ແລະເຍືອມສຳລັບພຣະອົງ. 28ດັ່ງນັ້ນພຣະເຢຊູເຈົ້າປິດປາລັກເຕິກທັຽງຕາເຣ ແລະເບົ໋າວ່າ, “ຕາເຣຊາວນະຄອນເຢຣູຊາເລັມເອີຍ, ມະເຍືອມອຳນາເລີຍ ແທນທີ່ຈະເຍືອມຍ້ອນສິ່ງທີ່ຮ້າຍແຮງທີ່ຈະເກີດຂຶ້ນເກິໄປເອງ, ແລະກອນທິໄປ. 29ເອືອໂງນເນໃມ໋ຈືວ່າເຮິໄວໆແນັຈະໃມ໋ເວລາທີ່ປີນຸ໋ຍເບົ໋າວ່າ ‘ເມະຕາເຣທີ່ຢີສາມາດໃມ໋ກອນ ຫຼືຜູ້ທີ່ຢີເຄີຍເກີດກອນກາເລດ ແລະຕາເຣທີ່ຍີເຄີຍຈຽມກອນ ແມ່ນໂຊກດີແທ້ນໍ.’ 30ເຮິເວລານັ້ນ ປະຊາຊົນກໍຈະເບົ໋າເກິກວຣ໌, ‘ຈົ່ງໂຄ໋ະເຕືອຍເຈິະຕົບສີນາ’ ແລະເບົ໋າເກິຕວດກວຣ໌ຕຼຸບສະເນ໋ະວ່າ ‘ຈົ່ງທຽບກັນປ໋ອງສີນາທົວະເທີ້ນ.’ 31ດ້ວຍວ່າ, ເພາະເຕີມລອງທີ່ໃມ໋ຊີວິດໂກຼລົງໂທດເປະແນັ ເຕີມລອງຮາຣອຍຈະເກີດເມ໋າະຕຶກ?”
32ກາລໍເກີບປຣຽຣ໌ຣາປິດຕູໍໂຕຍເຕິກເກິພຣະເຢຊູເຜີຕຼໍປະຫານຊີວິດ. ກາລໍເຫຼົ່າແນັເກີດຜູ້ລະເມີດກົດໝາຍ. 33ເມື່ອເຈິະພຶ໋ບ່ອນທີ່ໃມ໋ທີເນາະວ່າ, “ກະໂຫລກໂຕຼຍ” ເຮິບ່ອນເຢຍ ຫາມາຍປິດຕອກພຣະເຢຊູທົວະປຶງລອງກາງແຂນເຜີກາເຈດ ພ້ອມເກິຜູ້ລະເມີດກົດໝາຍປຣຽຣ໌. ມີຣາໂກຼທົວະທີ່ຕິນສາມາທິລາວ, ແລະອີກມີຣາໂກຼຕິນເກຼວທິລາວ. 34ຫຼັງຈາກນັ້ນ, ພຣະເຢຊູເຈົ້າພາວັນນາອະທິຖານວ່າ, “ພຣະບິດາເອີຍ ໂຜດອະໄພອຳຫາມາຍ ເພາະວ່າຫາມາຍຢີຈືວ່າ ຫາມາຍກຳລັງປຼືມເມ໋າະ.”
ແລ້ວເອີນທະຫານກໍປານາກເຄື່ອງສົບທິພຣະອົງ ໂດຍໃຊ້ສະຫລາກ. 35ຂະນະປະຊາຊົນທຳຣາເຊິງຮາເລ. ແລະເອີນຜູ້ນຳຊາວຢິວເຢາະເຢີ້ຍພຣະເຢຊູວ່າ, ລາວປິດຊ່ວຍປີນຸ໋ຍອື່ນ “ຖ້າລາວເປີຼຍພຣະຄຣິດ ຜູ້ທີ່ພຣະເຈົ້າປິດເລຼີກ ລາວຄວນຈະຊ່ວຍຊີວິດລາວເນລອດ.”
36ເອີນທະຫານກໍປິດເຢາະເຢີ້ຍພຣະເຢຊູມີສະເນີ ຫາມາຍມູດເຈິະຕາຕຽບພຣະອົງ ແລະຈ໋ອກທຽກອະງຸ່ນສົມ ອຳພຣະອົງເຍດ 37ແລະ ເບົ໋າວ່າ, “ຖ້າໄມເປີຼຍກະສັດທິຊາວຢິວມາດ ຈົ່ງຊ່ວຍຕົວໄມເອງແມ໋.” 38ຖ້ອຍຄໍາເຫຼົ່າແນັປິດຕຼໍຂຽນທົວະປຶງລອງກາງແຂນໂກຼປຶງໂຕຍທິພຣະເຢຊູວ່າ “ແນັມາດກະສັດທິຊາດຢິວ.”
39ຝ່າຍມີຣາເຮິຜູ້ຮ້າຍທີ່ຄຶງທົວະປິດເບົ໋າໝຶນປະໝາດຕໍ່ພຣະອົງວ່າ, “ໄມເກີດພຣະຄຣິດຢີເກີນບໍ? ຈົ່ງຊ່ວຍຕົນເອງແລະຊ່ວຍສີນາເນລອດພົ້ນເຖີດ.”
40ແຕ່ນັກໂທດມີຣາທີ່ຕຼໍຄຶງທີ່ເຢຍປິດຫ້າມໂທດປີນຸ໋ຍແນັວ່າ, “ໄມຄວນຢໍາເກງພຣະເຈົ້າ? ໄມຈະເກດໂກຼປຶງລອງກາງແຂນຕາຣຼໍເກິພຣະອົງ. 41ແຕ່ການລົງໂທດທີ່ນາປິດຮັບເຢຍເປຼີຍເຕິກຕາມການຊົ່ວທິການປະພຶດທິນາ ແຕ່ປີນຸ໋ຍແນັບໍລິສຸດມາດໆ.” 42ຫຼັງຈາກນັ້ນກາລໍປີນຸ໋ຍເຢຍປິດເບົ໋າເກິພຣະເຢຊູເຈົ້າວ່າ, “ພຣະເຢຊູເຈົ້າເອີຍ ເມື່ອທ່ານໂກຼເຮິອານາຈັກທິທ່ານ ໂຜດລະນຶກເຖິງຂ້ານ້ອຍດ້ວຍເຖີດ.”
43ພຣະເຢຊູເຈົ້າຊົງເພີຼບລາວວ່າ, “ນາສັນຍາເກິໃມວ່າ ຕັງໄກໄມຈະໂກຼທີ່ສຸກຂະເສີມເກິນາ.”
ພຣະເຢຊູປິດສິ້ນພຣະຊົນ
(ມທ 27:45-56; ມຣກ 15:33-41; ຢຮ 19:28-30)
44ພໍປະມານສິບສອງໂມງ, ກໍເກີດຄວາມຮາງົມໂທຼປະເທດ ຈົນພຶ໋ເວລາບ່າຍແປໂມງ, 45ເພາະວ່າມັດຕາໄງຢຸດ ສ່ອງສະອາງແລະຜ້າກັງທີ່ກັງທົວະນືພຣະວິຫານ ກໍສາສາກເຍືອຍເປຼີຍປຣຽຣ໌ຕ່ອນ. 46ພຣະເຢຊູເຈົ້າອາໂຣະຢ່າງເຣງວ່າ, “ພຣະບິດາເຈົ້າເອີຍ ຂ້ານ້ອຍຂໍມອບຊີວິດທິເອືອເກິພຣະອົງ” ຫຼັ່ງຈາກທີ່ລາວເບົ໋າເປະແນັ ລາວກໍປິດເສຍຊີວິດ. 47ນາຍທະຫານໂຣມັນທີ່ຄຶງພຣະເຢຊູເຊິ່ງໂກຼທີ່ເຢຍ ລາວຕາຍສິ່ງທີ່ເກີດຕຶກແລະສັນລະເສີນພຣະເຈົ້າແລະເບົ໋າວ່າ, “ປີນຸ໋ຍແນັບໍລິສຸດມາດໆ.”
48ເມື່ອປະຊາຊົນທີ່ປິດປາໂຊມກາເລິງເຜີຕາຍເຫດການເຫຼົ່ານັ້ນ. ທີ່ເກີດຕຶກ ກໍບີງເຈິະເຮິສະນາມທິຕົນ, ແລະຕາບເກຼີກເຜີສະແດງເນຕາຍວ່າຮູ້ສຶກໂສກເສົ້າ. 49ໂຕດສະເນ໋ະທີ່ຈືວ່າພຣະເຢຊູເຈົ້າເປີຼຍການສ່ວນຕົວ ຕະຫລອດທັງເອີນເມະຕາເຣທີ່ປິດຕິດຕາມພຣະອົງເຈິະຕິນແຂງຄາລີເລ ຕ່າງກໍເຊິງໂກຼຫ່າງສາງາຍເຜີຮາເລເຫດການໂຕດແອທີ່ເກີດຕຶກ.
ໂຢເຊັບຈອ໋ກໂຣງທິພຣະເຢຊູເຕິກເຮິອຸບໂມງ
(ມທ 27:57-61; ມຣກ 15:42-47; ຢຮ 19:38-42)
50ເຮິເວລາເຢຍໃມ໋ມີຣາ ທີເນາະໂຢເຊັບ. ໂຢເຊັບເກີດຜູ້ນຳມີຣາທິຊາວຢິວ ແລະໂຢເຊັບເປຼີຍປີນຸ໋ຍເຣາະແລະເປຼີຍປີນຸ໋ຍຊອບທໍາ. 51ໂຢເຊັບຢີເຫັນດີເກິການຕັດສິນໃຈແລະການກະທໍາຜູ້ນຳປີນຸ໋ຍອື່ນຕໍ່ຕ້ານພຣະເຢຊູ. ໂຢເຊັບເຈິະເກິດເມີງອາຣີມາທາຍເມີງໂມຍທິຊາວຢິວນືແຂງຢູດາຍ. ເຫີປິດຄອຍຈຳຣາຊອານາຈັກທິພຣະເຈົ້າ. 52ໂຢເຊັບປິດເຕິກທັຽງຜູ້ປົກຄອງປີລາດ ແລະຂໍເນລາວອະນຸຍາດຈ໋ອກຈັກເຈນທິພຣະເຢຊູເຈົ້າແລະຈ໋ອກໂຣງທິພຣະເຢຊູເຕິກຕົບແລະປີລາດປິດຕົກລົງເຫັນດີ. 53ແລ້ວໂຢເຊັບທັຽງຜູ້ຊ່ວຍເຫຼື່ອເຜີຈ໋ອກໂຣງທິພຣະເຢຊູເຕືອຍເກິດລອງກາງແຂນ ເຫີໃຊ້ພາໄບກາຊຼອບ ແລະໂຕຍເຕິກທົວະເຮິອຸບມຸງແຫ່ງໂມຍ ທີ່ເຈາະທົວະຮານືຕາມໍ ແລະອຸບມຸງແນັນະຢີເຄີຍທົວະໂຣງກັອນໆເລີຍ. 54ຕະໄງເຢຍ ເປຼີຍຕະໄງທີ່ກະກຽມ (ວັນສຸກ) ແລະຕາຕຽບສາບັດພຶ໋ ຕະໄງຊະບາໂຕເລີ່ມຕົນສະ.
55ສ່ວນເອີນຕາເຣທີ່ຕິດຕາມພຣະເຢຊູເກິດແຂງຄາລີເລ ກໍເຕິກເກິ ໂຢເຊັບ ເອີນນາງປິດຕາຍອຸບມຸງ ແລະປິດຕາຍໂຣງທິພຣະອົງວາງທົວະໂກຼເຮິທີ່ເຢຍ. 56ຫຼັງຈາກນັ້ນຕາເຣບີງເຈິະເຮິິສະນາມ ແລະກະກຽມເຄື່ອງຫອມ ແລະນໍ້າຫອມ.
ເຮິຕະໄງຊະບາໂຕ ເອີນນາງຕ້ອງພັກຜ່ອນຕາມກົດບັນຍັດ.
Currently Selected:
ລູກາ 23: LVI
Highlight
Copy
Compare
Share
Want to have your highlights saved across all your devices? Sign up or sign in
La vy Bible by Beyond Translation is licensed under Creative Commons Attribution-ShareAlike 4.0 License.
