ລູກາ 19
19
ພຣະເຢຊູເຈົ້າເກິຊັກຂ່າຍ
1ຫລັງຈາກນັ້ນ, ພຣະເຢຊູເຈົ້າ ແລະເມົ໋າສາວົກທິພຣະອົງປິດມູດເຕິກເຮິເມືອງເຢຣີໂກ ແລະຜ່ານຕົວເມືອງເຕິກ. 2ໃມ໋ກາລໍມີຣາທີເນາະວ່າ ຊັກຂ່າຍ ທີ່ອາໄສໂກຼເຮິເມືອງ ລາວເກີດຫົວໜ້າປີນຸ໋ຍເກັບພາສີ ແລະລາວເປີຼຍປີນຸ໋ຍຮັ່ງມີ. 3ຊັກຂ່າຍໂງນຈະຕາຍວ່າພຣະເຢຊູເຈົ້າເປີຼຍປີນຸ໋ຍເປະເຕ ແຕ່ລາວຢີສາມາດຕາຍພຣະອົງປິດ ເພາະວ່າລາວເປີຼຍປີນຸ໋ຍຕິຕຽບ ແລະປະຊາຊົນກຸ່ມຕາເມ໋ະອ້ອມຮອບພຣະເຢຊູເຈົ້າ. 4ດັ່ງນັ້ນ ຊັກຂ່າຍຈຶ່ງທີຢາລັດມັດປະຊາຊົນກຸ່ມຕາເມ໋ະ ແລະປາລັກຕຶກປຶງເຕີມຕຣົງເທດເຜີວ່າລາວສາມາດຮາເລຕາຍພຣະເຢຊູເຈົ້າປິດ ເພາະພຣະອົງກຳລັງຕາເຕີກຜ່ານໂຕຼງເຢຍ. 5ເມື່ອພຣະເຢຊູເຈົ້າເຈິະພຶ໋ເຕີມຕຣົງເທດບ່ອນທີ່ຊັກຂ່າຍໂກຼເຢຍ ພຣະອົງກໍຊີມ໋ອງຮາເລຊັກຂ່າຍ ແລະເບົ໋າເກິລາວວ່າ, “ຊັກຂ່າຍເອີຍ ຮີບເຕືອຍເກິດເຕີມຕຣົງເທດເຢຍໄວໆ ເພາະວ່ານາຕ້ອງການທີ່ຈະເຕິກພັກໂກຼທີ່ສະນາມທິໄມຕັ້ງໄກ.”
6ດັ່ງນັ້ນຊັກຂ່າຍຈຶ່ງຟ້າວເຕືອຍເກິດເຕີມຕຣົງເຢຍຢ່າງວອງໄວ ແລະລາວປິດຕ້ອນຮັບພຣະເຢຊູເຈົ້າມູດຮານືສະນາມທິລາວຢ່າງໃມ໋ຄວາມສຸກ. 7ເມື່ອປະຊາຊົນໂກຼທີ່ເຢຍປິດຕາຍພຮະເຢຊູເຈົ້າເຕິກເຮິສະນາມທິຊັກຂາຍ, ຫາມາຍປິດເລີ່ມຕຳນິຕິຕຽນແລະເບົ໋າວ່າ, “ເປະເຕພຣະອົງປິດເຕິກພັກຮານືສະນາມທິປີນຸ໋ຍບາບ.”
8ແລ້ວຊັກຂ່າຍກໍຕຶກເຊິງແລະປິດເບົ໋າເກິພຣະເຢຊູເຈົ້າວ່າ, “ພຣະອົງເຈົ້າເອີຍຮາເລແມ! ບັດແນັ ຂ້ານ້ອຍຂໍມອບຊັບສິນທີ່ຂ້ານ້ອຍໃມ໋ເຄິງໜຶ່ງອຳແກ່ປີນຸ໋ຍທ໋ອກຍາກ ແລະຖ້າຂ້ານ້ອຍປິດສໍ້ໂກງປີນຸ໋ຍເຕ ຂ້ານ້ອຍຂໍຊົງຄືນອຳລາວປອນເທົ່າອຳທຳເປີງທີ່ຂ້ານ້ອຍປິດຈ໋ອກເກິດຫາມາຍ.”
9ແລ້ວພຣະເຢຊູເຈົ້າປິດເບົ໋າເກິຊັກຂ່າຍວ່າ, “ຕັງໄກ ພຣະເຈົ້າຈະຊ່ວຍໄມ ແລະຄອບຄົວທິໄມເນພົ້ນ, ເພາະວ່າໄມເປີຼຍເຊີສາຍທິອັບຣາຮາມມີສະເນີ. 10ເພາະວ່າ, ນາເປຼີຍກອນມະນຸດປິດເຈິະເຜີທັຽງປີນຸ໋ຍທີ່ຫຼົງຮາຢັກເຕິກສະ ແລະເຜີຊ່ວຍຫາມາຍເນພົ້ນເກິດການລົງໂທດເກິດບາບກຳທິຫາມາຍ.”
ຄຳອຸປະມາເລື່ອງປຣັກຫຼຽນ
(ມທ 25:14-30)
11ເຮິຂະນະທີ່ປະຊາຊົນກຳລັງຕາເມິງຖ້ອຍຄຳທີ່ພຣະເຢຊູເຈົ້າເບົ໋າ ພຣະອົງເບົ໋າເປຼີຍຄຳອຸປະມາຕືມອີກເລື່ອງໂມຍສູ່ຫາມາຍຕາເມິງ ເພາະວ່າ ຫາມາຍໂກຼຕາຕຽບເກິນະຄອນເຢຣູຊາເລັມ ສະນັ້ນປະຊາຊົນກໍຄິດເອງວ່າ ອານາຈັກທິພຣະເຈົ້າເລີ່ມຕົ້ນຕຶກ ເມື່ອພຣະເຢຊູເຈົ້າເຈິະພຶ໋ນືເມືອງແນັ. 12ດັ່ງນັ້ນ “ໃມ໋ກາລໍມີຣາເຈິະຈາກຄອບຄົວທີ່ສຳຄັນທຳປິດກະກຽມທີ່ຈະເຕິກປະເທດອື່ນທີ່ໂກຼສະງາຍ. ລາວບັດເຕິກທີເຢຍ ເຜີຈະຮັບການແຕ່ງຕັ້ງເນເກີດຜູ້ປົກຄອງເໜືອຂົງເຂດທິລາວ ແລ້ວລາວຈຶ່ງບີງເຈິະປົກຄອງ. 13ກ່ອນທີ່ລາວປິດຈາກເຕິກ ລາວປິດກາເລົ່າປີນຸ໋ຍຮັບໃຊ້ມາເຈັດຣາເຈິະທັຽງລາວ. ລາວປິດອຳປຣັກຫຼຽນຄຳແກ່ຫາມາຍແຕ່ລະປີນຸ໋ຍ. ແລະລາວເບົ໋າຫາມາຍວ່າ, ‘ຈົ່ງລົງທຶນດ້ວຍປຣັກແນັເຮິບາງທຸລະກິດສຳລັບເອືອຈົນກວ່າເອືອບີງເຈິະເຮິເມີງ.’ 14ແຕ່ປະຊາຊົນນືເມີງເມືອງທິເຫີຢີຕານອກເຫີ, ດັ່ງນັ້ນຫາມາຍປິດສົ່ງບັນດາຜູ້ສົ່ງຂ່າວເຕິກທັຽງລາວຕາມປືດເພີຈະເບົາເກິຈັກກະພັດວ່າ, ‘ສີນາຢີຕ້ອງການກາລໍປິນຸ໋ຍແນັທີ່ຈະເກີດຜູ້ປົກຄອງທິສີນາ.’
15ຕໍ່ມາ ກະສັດປິດແຕ່ງຕັ້ງອຳລາວເກີດກະສັດ ແລະລາວບີງເຈິະເຮິເມີງ. ແລ້ວລາວປິດກາເລົາຈ໋ອກປີນຸ໋ຍຮັບໃຊ້ມາເຈັດຣາເຈິະຜູ້ທີ່ລາວປິດຈ໋ອກປຣັກອຳຫາມາຍ. ລາວຕ້ອງການໂງນຈືວ່າຫາມາຍປິດທັຽງກຳໄລອຳລາວປິດທຳຕາມາ. 16ປີນຸ໋ຍຮັບໃຊ້ຜູ້ທຳອິດປິດເຈິະລາຍງານວ່າ, ‘ພຣະອົງເຈົ້າເອີຍ ຂ້ານ້ອຍປິດທັຽງປຣັກເພີ່ມເກີບມາເຈັດຫຼຽນຄຳດ້ວຍປຣັກໂມຍຫຼຽນຄຳທີ່ທ່ານປິດຈ໋ອກອຳຂ້ານ້ອຍ.’ 17ກະສັດປິດເບົ໋າເກິປີນຸ໋ຍຮັບໃຊ້ທິລາວວ່າ, ‘ມຶນເຣາະ ໄມເປີຼຍປີນຸ໋ຍຮັບໃຊ້ທີີ່ເຣາະ. ໄມສັດຊື່ເຮິການປຼືມສິ່ງກາເລດທີ່ເອືອປິດມອບອຳໄມ, ເອືອຈະມອບອຳນາດເນໄມປົກຄອງມາເຈັດເມືອງ.’ 18ຜູ້ທີ່ປຣຽຣ໌ເຈິະລາຍງານວ່າ, ‘ພຣະອົງເຈົ້າເອີຍ ດ້ວຍປຣັກໂມຍຫລຽນຄຳທີ່ທ່ານປິດຈ໋ອກອຳຂ້ານ້ອຍ, ຂ້ານ້ອຍທັຽງເພີ່ມປິດເຊີງຫລຽນຄຳ.’ 19ກະສັດເບົ໋າເກິປີນຸ໋ຍຮັບໃຊ້ວ່າ, ‘ເອືອຈະອຳໄມຮັບຜິດຊອບເຊີງເມືອງ.’
20ແລ້ວຜູ້ທີ່ແປປິດເຈິະແລະລາຍງານເກິລາວວ່າ, ‘ກະສັດເອີຍ ແນັເດປຣັກຫລຽນຄຳທິທ່ານໂກຼທີ່ແນັເດ ຂ້ານ້ອຍປິດເກັບຮັກສາທົວະໂກຼຮານືຟາໄບ. 21ຂ້ານ້ອຍປິດປຼືມສິ່ງແນັເພາະຂ້ານ້ອຍໂທຼງທ່ານເພາະທ່ານເປີຼຍປີນຸ໋ຍເຄັງຄັດ, ທ່ານຮັບຈ໋ອກປຣັກທີ່ທ່ານຢີປິດທັຽງ ແລະທ່ານເກັບກ່ຽວພືດຜົນທີ່ທ່ານຢີປິດຕຳ.’ 22ກະສັດເພີຼບລາວວ່າ, ‘ໄມປີນຸ໋ຍຮັບໃຊ້ທີ່ຊົ່ວຊ້າເອີຍ ນາຈະລົງພິພາກສາໄມດ້ວຍຄຳເບົ໋າທິໄມເອງ ໄມເອງປິດເບົ໋າວ່ານາເກີດປີນຸ໋ຍເຄັງຄັດ, ແລະເຊີວ່າເອືອຮັບຈ໋ອກປຣັກທີ່ເອືອຢີປິດທັຽງ ແລະນາປິດເກັບກ່ຽວພືດຜົນທິປີນຸ໋ຍອື່ນ. 23ຖ້າດັ່ງນັ້ນ ເປະເຕໄມຈຶ່ງຢີເກັບຮັກສາປຣັກທິນາທົວະເຮິທະນາຄານ? ເມື່ອນາບີງເຈິະ ນາຈະປິດຮັບປຣັກທິເອືອຄືນພ້ອມດ້ວຍດອກເບ້ຍ.’
24ແລ້ວກະສັດປິດເບົ໋າເກິປະຊາຊົນທີ່ກຳລັງເຊິງໂກຼຕາຕຽບວ່າ, ‘ຈົ່ງຈ໋ອກປຣັກຫຼຽນຄຳແນັເຍືອຍເກິດລາວ ແລະມອບປຣັກຫລຽນນັ້ນອຳເກິປີນຸ໋ຍຮັບໃຊ້ທີ່ໃມ໋ປຣັກຫລຽນມາເຈັດຫລຽນເຢຍ.’ 25ແຕ່ປີນຸ໋ຍຮັບໃຊ້ເບົ໋າເກິລາວວ່າ, ‘ພຣະອົງເຈົ້າເອີຍ ປີນຸ໋ຍຮັບໃຊ້ແນັໃມ໋ປຣັກມາເຈັດຫລຽນຄຳແລ້ວເດ’ 26ກະສັດເພຼີບວ່າ ນາເບົ໋າໄປໂຕດສະເນ໋ະວ່າ, ‘ປີນຸ໋ຍທີ່ສາມາດໄວ້ວາງໃຈປິດນະບັດປິດຮັບທຳເພີມອີກ. ແຕ່ສຳລັບປີນຸ໋ຍທີ່ຢີສັດຊື່, ເຖິງແມ່ນວ່າຫາມາຍໃມ໋ພຽງແຕ່ທິດຊ໋ອກ, ພຣະເຈົ້າຈະຈ໋ອກເຕິກເກິດຫາມາຍ. 27ແຕ່ສຳລັບເມົ໋າສັດຕູທິເອືອ ຜູ້ທີ່ຢີຕ້ອງການເນເອືອເກີດຜູ້ປົກຄອງທິຫາມາຍເປະກະສັດ ຈົ່ງໂຕຍຈ໋ອກຫາມາຍເຈິະທີ່ແນັ ແລະກາເຈດຫາມາຍທິມັດເອືອ.’”
ພຣະເຢຊູເຈົ້າສະເດັດມູດນະຄອນເຢຣູຊາເລັມຢ່າງມີໄຊ
(ມທ 21:1-11; ມຣກ 11:1-11; ຢຮ 12:12-19)
28ຫລັງຈາກທີ່ພຣະເຢຊູເຈົ້າເບົ໋າຄຳເຫຼົ່າແນັໂຕດສະ ພຣະອົງປິດເດີ່ນທາງເຕິກນະຄອນເຢຣູຊາເລັມ, ຕາເຕິກນອຣ໌ມັດເມົ໋າສາວົກທິພຣະອົງ. 29ເມື່ອພຣະອົງເຈິະຕາຕຽບເມີງເບັດຟາເຄ ແລະເມີງເບັດທານີ, ທີ່ໂກຼປຽງກວຣ໌ໄປລຕາປວນເທດ, ພຣະເຢຊູເຈົ້າກໍສົງສາວົກປຣຽຣ໌ຣາເຕິກນອຣ໌ມັດພຣະອົງ ແລະເບົ໋າລາວວ່າ 30ກ່ອນເຕິິກ, ພຣະອົງປິດເຕງວ່າ, “ຈົ່ງມູດເຕິກເຮິເມີງທີ່ໂກຼຕິນເງີຣ໌ໄປ ເມື່ອໄປເຈິະພຶ໋ທີ່ເຢຍ, ໄປຈະຕາຍປອມລໍຕຼໍຕອມທົວະໂກຼທີ່ເຢຍ. ຢີໃມ໋ກອນເຄີຍກຳລໍແນັເລີຍ. ຈົ່ງແລ໋ະລໍເຍືອຍ ແລະໂຕຍຈ໋ອກລໍເຈິະທັຽງນາໂກຼທີ່ແນັ. 31ຖ້າໃມ໋ປີນຸ໋ຍເຕືອນໄປວ່າ, ‘ເປະເຕໄປຈຶ່ງແລ໋ະລໍເຢຍເຍືອຍ?’ ຈົ່ງເບົ໋າລາວວ່າ, ‘ອົງພຣະຜູ້ເປັນເຈົ້າຕ້ອງການໃຊ້ໄອ.’”
32ເມົ໋າສາວົກຈຶ່ງເຕິກເມີງເຢຍ ແລະຫາມາຍປິດຕາຍວ່າໂຕດສີ່ງ ເກີດເປຼີຍມາດຕາມທີ່ພຣະເຢຊູປິດເບົ໋າຫາມາຍ. 33ຂະນະທີ່ເມົ໋າສາວົກກຳລັງແລ໋ະລໍເຮິແອ, “ກາລາລໍມີຣາຈຶ່ງເຕືອນເມົ໋າສາວົກວ່າເປະເຕໄປຈຶ່ງແລ໋ະລໍເຍືອຍ?”
34ເອີນສາວົກເພີຼບວ່າ, “ອົງພຣະຜູ້ເປັນເຈົ້າຕ້ອງການໃຊ້ໄອ.” 35ແລະເອີນສາວົກປິດໂຕຍຈ໋ອກລໍເນີກເຕິກທັຽງພຣະເຢຊູເຈົ້າ. ແລະເມົ໋າເຫີຈ໋ອກອາວເກິດນອກເປຼິກປຶງຕາໂນຼລໍ. ແລ້ວເອີນສາວົກປິດເຊີນພຣະເຢຊູຕຶກກຳປຶງຕາໂນຼລໍ. 36ເມື່ອພຣະເຢຊູເຈົ້າປິດກຳລໍເຢຍສະ, ປະຊາຊົນປິດຈ໋ອກອາວເກິດນອກທິຕົນເຈິະເປຼິກຕາມໂຕຼງເຜີຖວາຍກຽດແດ່ພຣະອົງ.
37ເມື່ອພຣະເຢຊູເຈົ້າປິດເຈິະຕາມໂຕຼງເຢຍ, ພຣະອົງປິດເຈິະພຶ໋ໂຕຼງເຕືອຍເກິດກວຣ໌ໄປລຕາປວນເທດ. ເອີນສາວົກໂຕດສະເນ໋ະທິພຣະອົງປິດເລີ່ມໂຮ ແລະຮ້ອງສັນລະເສີນພຣະເຈົ້າດ້ວຍຄວາມຊົມຊື່ນຍິນດີ ເພາະການອັດສະຈັນໂຕດແອທີ່ຫາມາຍຕາຍພຣະເຢຊູເຈົ້າປຼືມຫາມາຍເບົ໋າວ່າ, 38“ຂໍເນ ກະສັດ ຜູ້ທີ່ສະເດັດເຈິະເຮິພຣະນາມທິອົງພຣະຜູ້ເປັນເຈົ້າ ຈົ່ງຊົງພຣະຈະເລີນ ສັນຕິສຸກຈົ່ງໃມ໋ເຮິສະຫວັນ ແລະພຣະຣັດສະໝີຈົ່ງໃມ໋ເຮິທີ່ສູງສຸດ.”
39ໃມ໋ເມົ໋າຟາຣີຊາຍບາງປີນຸ໋ຍນືປະຊາຊົນກຸ່ມຕາເມ໋ະ ປິດເບົາເກິພຣະເຢຊູເຈົ້າວ່າ, “ອາຈານເອີຍ ຈົ່ງເຕງເນເອີນສາວົກທິທ່ານຍຳເບົ໋າແດ່.”
40ພຣະເຢຊູປິດເພີຼບຫາມາຍວ່າ, “ນາເບົ໋າໄປໂຕດສະເນ໋ະວ່າ ຖ້າປີນຸ໋ຍເຫຼົ່າແນັງຽບ ຕາມໍມຶມຶນທຳກໍຈະຮ້ອງສັນລະເສີນ.”
ພຣະເຢຊູເຈົ້າຊົງເຍີມເຖິງນະຄອນເຢຣູຊາເລັມ
41ເມື່ອພຣະເຢຊູເຈົ້າມູດຕາຕຽບນະຄອນເຢຣູຊາເລັມ ແລະປິດຕາຍນະຄອນແນັ, ພຣະອົງກໍເຍືອມເພາະສະເລິະປະຊາຊົນທິນະຄອນແນັ. 42ພຣະອົງປິດເບົ໋າວ່າ, “ປະຊາຊົນທິນະຄອນເຢຣູຊາເລັມເອີຍ, ຖ້າວ່າປະຊາຊົນທິໄມປິດຈືວ່າຕັງໄກແມ່ນກັອນທີ່ຈະໂຕຍຈ໋ອກສັນຕິສຸກເຈິະອຳຫາມາຍ. ແຕ່ບັດແນັ ໄອປິດຖັວກທົວະເກິດໄປ. 43ດ້ວຍວ່າ, ໃມ໋ເວລາໂມຍຄວາມຍາກລຳບາກຈະເຈິະຕໍ່ສູ້ໄປ, ສັດຕູທິໄມຈະອ້ອມຮອບໄປ ແລະປຼືມກຳແພງອ້ອມຮອບໄປ. ແລະຫາມາຍຈະກົດດັນໄມທົວະໂຕດດ້ານ. 44ຫາມາຍຈະທຳລາຍໄມ ແລະປະຊາຊົນຕຼຸບສະເນ໋ະທີ່ໂກຼຮານືກຳແພງທິໄມ ເນເຕືອຍພຽງຮານືປະເຕ໋ຍ. ຫາມາຍຈະຢີເປຼຕາມໍທົວະຮານືໄມ ເພາະວ່າໄມຢີຈືເວລາທີ່ພຣະເຈົ້າປິດເຈິະຊ່ວຍໄມເນພົ້ນ.”
ພຣະເຢຊູເຈົ້າຊົງຊຳລະພຣະວິຫານ
(ມທ 21:12-17; ມຣກ 11:15-19; ຢຮ 2:13-22)
45ແລ້ວພຣະເຢຊູເຈົ້າປິດມູດເຕີກເຮິເດີ່ນພຣະວິຫານ ແລະພຣະອົງເລີ່ມໂຕ໋ະປະຕູປີນຸ໋ຍທີ່ກຳລັງຕັດສັດຊະນິດຕ່າງໆສຳລັບການຖວາຍເນຕູເກິດພຣະວິຫານ 46ພຣະເຢຊູເບົ໋າເກິຫາມາຍວ່າ, “ໃມ໋ຄຳຂຽນທົວະເຮິພຣະຄຳພີວ່າ, ‘ພຣະວິຫານທິນາເກີດສະຖານທີທີ່ປະຊາຊົນພາວັນນາອະທິຖານທັຽງນາ.’ ແຕ່ໄປໂຕດສະເນ໋ະປິດປືຼມເນພຣະວິຫານກາຍເປີຼຍຖໍ້າທິໂຈນ.”
47ແລ້ວພຣະເຢຊູເຈົ້າກໍສັ່ງສອນປະຊາຊົນໂຕດໆຕະໄງໂກຼເຮິເດີ່ນພຣະວິຫານ, ແຕ່ເອີນຫົວໜ້າປະໂຣຫິດ, ແລະເອີນຄູສອນກົດບັນຍັດ ແລະບັນດາຜູ້ນຳທິຊາວຢິວ, ກຳລັງທັຽງວິທີ່ຈະກາເຈດພຣະອົງ, 48ແຕ່ຫາມາຍຢີສາມາດທັຽງວິທີທີ່ຈະປຼືມປິດ, ເພາະວ່າປະຊາຊົນໂຕດສະເນ໋ະກຳລັງຕາເມິງພຣະອົງດ້ວຍຄວາມສົນໃຈ ແລະຕັ້ງໃຈຕາເມິງຄຳສັ່ງສອນທິພຣະອົງ.
Currently Selected:
ລູກາ 19: LVI
Highlight
Copy
Compare
Share
Want to have your highlights saved across all your devices? Sign up or sign in
La vy Bible by Beyond Translation is licensed under Creative Commons Attribution-ShareAlike 4.0 License.
