ລູກາ 14
14
ພຣະເຢຊູເຈົ້າປິ່ນປົວປີນຸ໋ຍເປຼີຍພະຍາດກຼາກປອ໋ກເນເຣ໋າະ
1ນືຕະໄງຊະບາໂຕ ຜູ້ນຳທິເອີນຟາຣີຊາຍປິດເຊີນພຣະເຢຊູເຈົ້າເຕິກຈ໋ອງປອຣ໌ເກິປີນຸ໋ຍອື່ນໂກຼ ທີ່ສະນາມທິຜູ້ນຳເອີນຟາຣີຊາຍ ແລະເອີນອາຈານສອນກົດບັນຍັດປິດຈຳຮາເລພຣະເຢຊູເຈົ້າຢ່າງໃກ້ຊິດເຜີຈະຣັບຜິດພຣະອົງ. 2ຂະນະນັ້ນ ໃມ໋ກາລໍມີຣາ ຜູ້ທີ່ໃມ໋ອາການຊຶງຕີບວມເຈິະທັຽງພຣະເຢຊູເຈົ້າ. 3ດັ່ງນັ້ນ ພຣະເຢຊູເຈົ້າຈຶ່ງເຕືອນເອີນຟາຣີຊາຍ ແລະເອີນຄູສອນກົດບັນຍັດວ່າ, “ກົດບັນຍັດທິສີນາ ອະນຸຍາດເນສີນາປຼືມເມ໋າະແດ່ເຮິຕະໄງຊະບາໂຕຈະປິ່ນປົວປີນຸ໋ຍ ຫຼື ຢີປິ່ນປົວ?”
4ແຕ່ຫາມາຍປະຕິເສດທີ່ບັດເພຼີບພຣະເຢຊູເຈົ້າ ແລະດັ່ງນັ້ນ ພຣະອົງຈຶ່ງແຕະຕ້ອງກາລໍທີ່ຊິອາສາ ພຣະອົງປິດປິ່ນປົວລາວ ແລະສົງລາວບີງເຈິະເຮິເມີງ. 5ແລ້ວພຣະເຢຊູເຈົ້າກໍເບົ໋າເກິຫາມາຍວ່າ, “ຖ້າກອນທິໄມ ຫຼືຈັກຕະເລີງມີປອມເກ໋ະນືນໍ້າສ້າງນືຕະໄງຊະບາໂຕໄມຈະຢີປາຕຶກລາວທັນທີ່ບໍ?”
6ແຕ່ຫາມາຍຢີສາມາດເພີຼບພຣະອົງປິດກ່ຽວເກິເລື່ອງແນັ.
ຄວາມຖ່ອມຕົວ ແລະການຕ້ອນຮັບແຂກ
7ເມື່ອພຣະເຢຊູເຈົ້າສັງເກດຕາຍວ່າແຂກບາງຄົນກຳລັງເລຼີກກຳບອ່ນທີ່ຈັດທົວະສຳລັບແຂກທີ່ໃມ໋ກຽດ ພຣະອົງຈຶ່ງເບົ໋າຄຳອຸປະມາເນຫາມາຍຕາເມິງວ່າ, 8“ເມື່ອໃມ໋ບາງຄົນເຊີນໄມເຕິກງານແຕ່ງດອງເຮິພິທີ່ແຕ່ງດອງ ມະເລີຼກກຳບ່ອນທີ່ໃມ໋ກຽດ. ເພາະວ່າປີນຸ໋ຍທີ່ໃມ໋ກຽດເປີງໄມອາດຈະປິດຮັບການເຊີນໂດຍເຈົ້າພາບ. 9ເມື່ອປີນຸ໋ຍເຢຍເຈິະພຶ໋ສະ ເຈົ້າພາບທີ່ປິດເຊີນທ່ານ ແລະ ເບົ໋າເກິໄມວ່າ, ‘ເນປີນຸ໋ຍແນັກຳໂກຼບ່ອນທີ່ໄມກຳເຮິແນັເຖີີດ.’ ດັ່ງນັ້ນ ໄມຈະໃມ໋ຄວາມກາມາກາເມີທິມັດໂຕດສະເນ໋ະ ໄມຈະຕ້ອງຕຶກ ແລະເຕິກກຳໂກຼເຮິບ່ອນທີ່ໃມ໋ກຽດກາເລດ. 10ເມື່ອໄມຕຼໍເຊີນເຕິກກຳເຮິບ່ອນທີ່ປີນຸ໋ຍທີ່ໃມ໋ກຽດຕໍ່າຕ້ອຍກຳ ເຜີວ່າເມື່ອຜູ້ທີ່ເຊີນໄມເຕິກ ໄອຈະເບົ໋າໄມວ່າ, ‘ຍາຍເອີຍ, ເຊີນເຕິກກຳເຮິບ່ອນທີ່ໃມ໋ກຽດທຳເປີງແນັ’ ແຂກປີນຸ໋ຍອື່ນໆໂຕດແອກຳລັງຮາເລໂກຼ. 11ໂຕດສະເນ໋ະຈົ່ງຈືເລື່ອງແນັ ຜູ້ທີ່ເຢີກຕົວເອງຕຶກ ຈະຕ້ອງຕໍຼຖອມຕົວເຕືອຍ ແລະຜູ້ທີ່ຖ່ອມຕົວເຕືອຍຈະປິດຮັບການເຢີກຕຶກ.”
12ແລ້ວພຣະເຢຊູເຈົ້າກໍເບົ໋າເກິກາລໍທີ່ເຊີນພຣະອົງວ່າ, “ເມື່ອໄມຈັດງານລ້ຽງ ມະເຊີນແຂກຄົນອື່ນສະເພາະແຕ່ເມົ໋າ ຄອບຄົວ ເອ໋າະຢາຍ ແລະເພື່ອນບ້ານທີ່ຮັ່ງໃມ໋ສະເໝີຖ້າໄມປືຼມເປະແນັ ຫາມາຍອາດຈະເຊີນໄມເຕິກຮ່ວມງານທິຫາມາຍເອງ ແລະຫາມາຍຈະຕອບແທນໄມ. 13ແຕ່ ທຸກຄັ້ງທີ່ທ່ານໃມ໋ງານບຸນ ເຊີນປີນຸ໋ຍທີ່ຢີໃມ໋ປຣັກ ປີນຸ໋ຍພິການ, ຜູ້ທີ່ຢີສາມາດຕາເຕິກປິດ ແລະປີນຸ໋ຍມັດໂຊດ, 14ຖ້າໄມປືຼມເປະແນັພຣະເຈົ້າຈະອວຍພອນໄມ ເພາະຫາມາຍຢີໃມ໋ມາເມ໋າະຕອບແທນໄມ, ແຕ່ພຣະເຈົ້າຈະຕອບແທນໄມ ເມື່ອພຣະອົງຈະປຼືມເນປີນຸ໋ຍຊອບທຳ ຕຶກເກິດກາເຈດ.”
ຄຳອຸປະມາເລື່ອງງານລ້ຽງຕາເມ໋ະ
(ມທ 22:1-10)
15ປີນຸ໋ຍທີ່ຈ໋ອງປອຣ໌ເກິພຣະເຢຊູເຈົ້າປິດຊ໋ອງພຣະອົງເບົ໋າເປະແນັ ແລະມີຣາເຮິຫາມາຍເບົ໋າເກິພຮະເຢຊູວ່າ “ຜູ້ທີ່ຈະມູດຮ່ວມງານລ້ຽງນືອານາຈັກທິພຣະເຈົ້າກໍເປຼີຍພຣະພອນທີ່ເຈິະເກິດພຣະເຈົ້າ.”
16ພຣະເຢຊູເຈົ້າປິດເບົ໋າຕໍ່ລາວວ່າ, “ໃມ໋ກາລໍມີຣາກຳລັງຈັດງານລຽ້ງຕາເມ໋ະ ແລະປິດເຊີນປີນຸ໋ຍເປີຼຍຈຳນວນທຳເນມູດຮ່ວມ. 17ເມື່ອໂຕດສະເນ໋ະກຽມພ້ອມສຳລັບງານລ້ຽງສະ ລາວກໍສົງປີນຸ໋ຍຮັບໃຊ້ທິຕົນເຕິກທັຽງແຂກທີ່ປິດຮັບການເຊີນວ່າ, ‘ເຈິະເຮິງານລ້ຽງເພາະວ່າໂຕດສິ່ງໂຕດຢ່າງພ້ອມສະ.’ 18ແຕ່ຫາມາຍໂຕດແອເລີ່ມແກ້ຕົວ ຜູ້ທຳອິດເບົ໋າເກິປີນຸ໋ຍຮັບໃຊ້ວ່າ, ‘ຂໍໂຜດຍົກໂທດອຳຂ້ານ້ອຍ ຂ້ານ້ອຍເຈິະຢີປິດເພາະຂ້ານ້ອຍຣອດເກຼງທົວະ ແລະຂ້ານ້ອຍຈຳຕ້ອງເຕິກກວດຮາເລເກຼງ.’ 19ກາລໍເກີບມີຣາເບົ໋າວ່າ, ‘ຂ້ານ້ອຍເຈິະຢີປິດເພາະຂ້ານ້ອຍຣອດຈັກຕະເລີງທົວະເສີງຄູ່ ແລະຂ້ານ້ອຍກຳລັງຈະເຕິກລອງຮາເລຈັກຕະເລີງເຢຍ ຂ້ານ້ອຍຂໍໂທດນຳຫຼາຍໆ.’ 20ປີນຸ໋ຍອື່ນເກີບເບົົ໋າວ່າ, ‘ຂ້ານ້ອຍກຳລັງແຕ່ງງານ ເພາະສະນັ້ນຂ້ານ້ອຍຈຶ່ງເຕິກຢີປິດ.’
21ດັ່ງເຢຍ ປີນຸ໋ຍຮັບໃຊ້ ບີງເຈິະເຕິກບ່ອນງານລ້ຽງ ແລະເບົ໋ານາຍທິຕົນເຮິສິ່ງທີ່ຫາມາຍປິດເບົ໋າ, ແລະເຈົ້າຂອງສະນາມກໍກາເຈົ໋າເກິຫາມາຍ. ແລ້ວພຣະອົງກໍເບົ໋າວ່າ, ‘ຈົ່ງພ້າວເຍືອຍເຕິກຕາມໂຕຼງຕາເມ໋ະ ແລະໂຕຼງກາເລດທິເມືອງແນັເນໄວ ແລະເຊີນປີນຸ໋ຍທ໋ອກຍາກ, ປີນຸ໋ຍພິການ, ປີນຸ໋ຍມັດໂຊດ ແລະປີນຸ໋ຍຕາເຕິກຢີປິດ ເນມູດເຈິະເຮິທີ່ແນັ.’ 22ຫລັງຈາກປີນຸ໋ຍຮັບໃຊ້ປືຼມມ໋ອມ ປີນຸ໋ຍຮັບໃຊ້ກໍລາຍງານເກິນາຍທິຕົນລາວເບົ໋າວ່າ, ‘ທ່ານເອີຍ, ຂ້ານ້ອຍປິດລາເນປີນຸ໋ຍຕຼຸບສະເນ໋ະເຈິະຮ່ວມງານລ້ຽງທິໄມ. ແຕ່ນະໃມ໋ບ່ອນຫວ່າງຢູ່.’ 23ສະນັ້ນ ນາຍຈຶ່ງປິດເບົ໋າລາວວ່າ, ‘ຈົ່ງເຍືອຍເຕິກທີ່ນອກເມືອງ ແລະຊົນນະບົດ ເຜີໂຕຍຫາມາຍມູດເຈິະເຜີເນພີງສະນາມທິນາ.’ 24ນາເບົ໋າໄປໂຕດສະເນ໋ະວ່າ, ເຮິບັນດາປີນຸ໋ຍທີ່ຕຼໍເຊີນເຮິທຳອິດເຢຍ ຈະຢີໃມ໋ປີນຸ໋ຍອາເຕ ປິດຊິມຈານາເຮິງານລ້ຽງທິຂ້ານ້ອຍຕາມາຣາ.”
ຄຸນຄ່າທິການເປຼີຍສາວົກ
(ມທ 10:37-38)
25ມີຕະໄງ ເມື່ອພຣະເຢຊູເດີນໂຕຼງເຕິກນະຄອນເຢຣູຊາເລັມ ໃມ໋ປະຊາຊົນມຶມຶນທຳ ປິດເຕິກເກິພຣະເຢຊູເຈົ້າ ພຣະອົງປິດປາລັກເຈິະເບົ໋າເກິຫາມາຍວ່າ, 26“ຖ້າທ່ານຕ້ອງການເປຼີຍສາວົກທິນາ ໄມຄວນຮັກນາທຳເປີງທີ່ໄມຮັກບະແລະເບະທິໄມ, ກອນເຕຼຍ, ເມ໋າະເອ໋າະຢາຍ ແລະແມ່ນແຕ່ຊີວິດທິໄມເອງຖ້າບໍ່ດັ່ງນັ້ນໄມຢີສາມາດເປຼີຍສາວົກທິນາປິດ. 27ຖ້າກັອນຢີປິດກອຍລອງກາງແຂນທິຕົນຕາມນາເຈິະປີນຸ໋ຍເຢຍ ເປຼີຍສາວົກທິນາຢີປິດ.”
28“ເພາະວ່າ, ເຮິໄປໃມ໋ປີນຸ໋ຍອາເຕເມື່ອຈະສ້າງຕຶກຊີຣົງ. ທຳອິດລາວຈະກຳ ແລະໃຊ້ເວລາຄິດໄລ່ລະອຽດວ່າຈະໃມ໋ລາຄ່າຕາມາ. ເຜີເນລາວຕັດສິ້ນໃຈປິດວ່າລາວໃມ໋ປຣັກພຽງພໍເຮິການກໍ່ສ້າງຫຼືບໍ່. 29ຖ້າທ່ານຢີຄິດໄລທ່ານອາດຈະປຼືມມ໋ອມພຽງແຕ່ພື້ນຖານແຕ່ຈະຢີສືບຕໍ່ກໍສ້າງໂຕດແອເພາະວ່າຢີໃມ໋ປຣັກສະປີນຸ໋ຍຕຼຸບສະເນ໋ະທີ່ຕາຍໄອກໍ່ສ້າງກໍຈະສະອາລາວ, 30ຫາມາຍຈະເບົ໋າວ່າ ‘ປີນຸ໋ຍແນັປິດເລີ່ມສ້າງຕຶກຊີຣົງ ແຕ່ສ້າງອຳສຳເລັດຢີປິດ.’”
31“ສົມມຸດວ່າກະສັດອົງໂມຍເຍືອຍສູ້ຮົບລາວໃມ໋ທະຫານມາເຈັດພັນຣາທີ່ຈະຕໍ່ສູ້ເກິກະສັດອົງອື່ນ ທີໃມ໋ທະຫານຊາວໝືນຣາ ລາວຈະກຳນອຣ໌ແລະ ຕັດສິ້ນໃຈວ່າລາວເຂັ້ມແຂງພໍທີ່ຈະເອົາຊະນະກະສັດອົງອື່ນປິດຮາເລ໋າະ. 32ຖ້າລາວຢີສາມາດສູ້ຮົບປິດເຮິຂະນະໂກຼສາງ່າຍ ເຫີກໍຈະສົງປີນຸ໋ຍເຕິກພະກະສັດຜູ້ເຢຍເຜີເຕືອນເງື່ອນໄຂທິການສະຫງົບເສິກ. 33ໄປກໍມີສະເນີ ໄປຈະເປຼີຍສາວົກທິນາຢີປິດ ຖ້າຢີສະຫລະຊັບສົມບັດໂຕດສິ່ງທີ່ຕົນໃມ໋ໂກຼ.”
ເລື່ອງປຼວະໂຕດຣົດເຄັມ
(ມທ 5:13; ມຣກ 9:50)
34ຈາກນັ້ນພຣະເຢຊູເຈົ້າເບົ໋າວ່າ “ປຼວະເປຼີຍຂອງເຣາະ. ແຕ່ຖ້າປຼວະຢີໃມ໋ລົດຊາດເຄັມສະ, ກໍຢີສາມາດປຼືມເນປຼວະໃມ໋ລົດຊາດເຄັມປິດເກີບ. 35ຈະໃຊ້ໄອເປຼີຍຝຸ່ນເຜີເສີ່ມສ້າງປະເຕ໋ຍກໍຢີປິດ, ສະນັ້ນປະຊາຊົນຈຶ່ງຕັກ ເທົ່ານັ້ນ ກັອນທີ່ປິດຊ໋ອງສິ່ງທີ່ນາເບົ໋າ ຄວນພະຍາຍາມເຂົ້າໃຈໄອ.”
Currently Selected:
ລູກາ 14: LVI
Highlight
Copy
Compare
Share
Want to have your highlights saved across all your devices? Sign up or sign in
La vy Bible by Beyond Translation is licensed under Creative Commons Attribution-ShareAlike 4.0 License.
