Lukka 20
20
Asaadu Yesu sika uwo ligo weezo
(Matthew 21:23-27; Mark 11:27-33)
1Yom wayyi, Yesu kaan ggi alim annas fih midani tee Yeekalu mee kelem noomon kabar ab kuweesi tee mamlaka. Naas kahin taanin mee malima tee sharia jaa noowo. 2Dukur yaa ummon asaadu uwo gali, “Kelem nee weeza yaatu yaa itaa ggi tummiya fih soo sokolinna dee kuul? Mee munu yaa wedi neetaa weeza?”
3Yesu ggibisha ummon ligo oggi kelem gali, “Anaa bi asaadu itakkum sokol wayyi wu itakkum endis ggibisha maswali wayyi dee? 4Batiza tee Yokana jaa taala nee Rabbana waala min annas?”
5Ummon abidu wonus fih badum tomon ligo ummon ggi kelem gali, “Kaan inna kelem gali taala nee Rabbana, uwo bi asaadu inna ley inna maa ggi amin uwo. 6Lakin kaan inna kelem gali batiza tee Yokana taala nee annas, akwaana teena Yudaaya bi dugu inna mee laagera kalam ummon arfu Yokana kaan Nebbi.”
7Yaa ummon ggibisha ligo ummon ggi kelem gali, “Ummon maa arfu munu yaa wedi nee Yokana weeza tee batiza annas.”
8Dukur Yesu ggibisha ummon ligo oggi kelem gali, “Anaa kaman maa bi kelem nee itakkum munu yaa wedi naana weezo tee soo sokolin dee kuul.”
Ijamajako tee annas ab kuruju
(Matthew 21:33-46; Mark 12:1-12)
9Dukur Yesu agilibu uwo nee annas uwo abidu kelem noomon ijamajako ligo ggi kelem gali, “#Kaan fih ragi ab endis shamba tee zabib opangisa nee annas ab ggi kuruju dukur uwo ruwa fih Bele tee boyyi uwo kalas naa mudda towwhil. 10Bakan wakati tim tee amrugu akil min shamba, uwo rasul wayyi min labbiya too nee annas ab ggi kuruju kee wedi noowo fih matunda tee zabib. Lakin annas ab ggi kuruju dugu uwo mee turujuwo bila wedi noowo sokol yoyote. 11Dukur uwo rasul labbi nee annas ab ggi kuruju, lakin dugu uwo kaman, hayyi uwo mee turujuwo billa wedi noowo sokol yoyote. 12Mara taani, uwo rasul labbi tee taa latta nee annas ab ggi kuruju. Lakin dugu uwo mee dabara mee turujuwo min shamba.
13Dukur siddu shamba dee kelem gali, Anaa kede soo sunu? Anaa bi rasul noomon nyereku tayi ab anaa aju zaidi. Sitan yaa ummon bi hishima kaan ummon ayinu noowo.
14Lakin wakati annas ab ggi kuruju ayinu uwo ligo oggi jaa, ummon abidu wonus fih badum tomon ligo ummon ggi kelem gali, Uwo yaa ruwa wariti kaan Babba too muttu. Taali kum kede inna katul uwo kalam warita kede kun teena. 15Yaa ummon turuju fih mee katul uwo. Sunu yaa itakkum ggi feker gali siddu shamba bi soo noomon? 16Fih gwaam Rabbana ruwa jaa keregi annas ab ggi kuruju kee uwo wedi shamba dee nee annas taani. Bakan annas asmma kalam ab Yesu kelem, ummon kelem gali, Kede wedede soo maa.”
17Yesu ayinu ummon uwo kelem noomon gali, “Sunu yaa maana tee katif ab jaa katif. Laagera ab annas ab ggi abinu alis jaa tee maana fih juwa.
18Killa wayyi ab ggi wagga fih laager uwo bi kasuru mee laager dee kaan wagga fih ajol, bijja kasuru uwo mara wayyi.”
19Min naa, kebir tee kahin mee malima tee sharia bakan kalas asmma kalama dee, ummon kaan aju robutu uwo kalam ummon faham ijamajako kaan ggi wonus fogo ummon, lakin ummon kaffu annas.
Lippa musoro
(Matthew 22:15-22; Mark 12:13-17)
20Yaa, ummon chunnga uwo kuweesi mee kutu fogo annas ab soo noomon gali ummon kuweesi ummon kaan aju alim, ummon soo jeedde kalam ummon kaan aju amsuku fih kalama ab uwo bi wonus fih wedi uwo nee annas tee guddrra mee weeza nee gavana tee Romu. 21Dukur rujala dee asaadu Yesu gali, “malima, inna arfu gali killa kalam ab itaa wonus mee alim takki addil uwo itaa sulu annas kuweesi mee alim sokol ab Rabbana aju.” 22Aseede kelem naana, “Seyi tee sharia wedi musoro nee Sultan kebir tee Kayisali waala maa?”
23Lakin Yesu faham rujala ab kaan ggi jarrib uwo. Yaa, uwo kelem noomon gali. 24“Weeri naana ssente tee feza. Kelem naana picha mee asmma ab fogo dee tee munu?” Ummon ggibisha uwo gali, “dee tee Sultan kebir tee Kayisali.” 25Yaa uwo kelem noomon gali, “Wedi nee kebir tee Kayisali sokol ab too mee wedi nee Rabbana sokolin ab too.” 26Rujala ab kaan rasul kee amsuku uwo, gelib ummon amsuku uwo gidaam annas. Ummon shannga nammna ab uwo ggibisha uwo askutu.
Gum mee jooju
(Matthew 22:23-33; Mark 12:18-27)
27Dukur annas taanin min sadukaayo ummon ab maa ggi amin mee gum min metinin, jaa nee Yesu mee asaadu uwo gali. 28“Malim, sharia tee Musa ggi kelem gali, Kaan ragi ab mee jooju muttu ligo uwo wedede maa yaala aku too endis tee jooju mariya too dee. Kalam uwo kede rabba yaala tee aku too. 29Kaan fih naa akwaana saba fih beyy wayyi, akwaana kebir jooju mariya uwo muttu ligo uwo maa weledu yaala. 30Dukur, aku tee tinen jooju mariya tee aku too ab muttu lakin uwo kaman muttu ligo uwo maa weledu moo wo nyereku. 31Dukur mee aku tee talata sulu uwo kaman lakin sokol wayyi yaa soo noowo. Fih mwisho akwaana saba dee kuul jooju mariya dee ummon kuul muttu ligo ummon maa endis yaala mowo. 32Fih mwisho mariya dee kaman jaa muttu. 33Yaa fih jeedde, wakati Rabbana tooru annas min muttu, munu yaa uwo bi sulu ragi too? Kalam rujala saba dee kuul jooju mariya dee.”
34Dukur Yesu ggibisha ummon ligo uwo ggi kelem gali, “Fih duniya weede, tee killa yom rujala mee nuswaana jooju badum. 35Lakin ummon annas ab keregi kaan gum min muttu ummon ruwa fih samayi bi jooju ummon maa mee ummon bi jooju maa. 36Ummon bijja muttu maa mara taani. Ummon bi kun jee Malaika wu ummon bi kun yaala tee Rabbana, kalam ummon yaala ab gum min metinin. 37Fih zidu fih naade, itakkum awaja fih feker gali metinin bijja gum maa aarja fih mara taani. Lakin katif fih kitabu tee Musa gali, Rabbana wonus mowo fih gaba ab ggi haraku ligo oggi kelem gali, Anaa yaa siddi tee Ibrayim, Isaak mee Yakob. 38Yaa, maana gali Rabbana maa Rabbana tee annas ab muttu lakin uwo Rabbana tee annas ab hayyi. Kalam ummon kuul ab hayyi ummon hayyi mee ummon.” 39Dukur malim taanin tee sharia, ggibisha ligo oggi kelem gali, “Malima, itaa ggibisha kuweesi.” 40Badda dolde, ummon kuul kaan kaffu asaadu Yesu maswali yoyote.
Kristo Nyereku tee munu
(Matthew 22:41-46; Mark 12:35-37)
41Dukur, Yesu asaadu annas tee bakan dee gali, “Ley Kristo ggi naadi uwo nyereku tee Daudi? 42Kalam Daudi kaman katif fogo Kristo fih kitabu tee zabuli gali Rabbana kelem gali, Siddu tayi ab geni fih idda tayi tee yom inna.
43Ladi anaa bijja kutu aduuya takki bambara tee kura takki.”
44Fih ijamajako weede, Daudi bi naadi uwo siddu too. Dukur Kristo ggi kun keefin nyereku too.
Chunnga itakkum min malim tee sharia
(Matthew 23:1-7; Mark 12:38-40)
45Ligo annas kuul kaan ggi asmma, Yesu wonus mee Swahaba too. 46Chunnga itakkum matta kum kun jaa malima tee sharia. Kalam ummon aju zaidi lebisi gumasa ab towwhil mee ummon aju zaidi selem annas fih Sinagoga mee aju zaidi geni fih sinagoga mee fih bakan tee hishima fih jooju. 47Ummon ggi kabas nuswaana ab rujala tomon jaa muttu kalam kee ummon sereku utajiri tomon, ligo ummon kaan ggi womba, ummon torisha womba kalam kede annas feker gali ummon annas ab addil lakin kalam dolde, Rabbana bi azibb ummon zaidi.
Currently Selected:
Lukka 20: KCN
Highlight
Copy
Compare
Share
Want to have your highlights saved across all your devices? Sign up or sign in
Nubi Bible by Beyond Translation is licensed under Creative Commons Attribution-ShareAlike 4.0 License.
