Lukka 15
15
Ijamajako tee kooru ab woduru
(Matthew 18:10-14)
1Ini yaa annas tee lim musoro mee annas ab endis zambi ummon kuul lim bakaan ab Yesu fogo kee ummon asmma uwo.
2Lakin nas Farasin mee annas tee tafsir sharia ummon kelem gali, “Yesu ggi geni mee annas ab ggi soh zambi dukur uwo ggi akul mee ummon kaman.”
3Dukur yaa Yesu kelem noomon ijamajako ligo ggi kelem gali. 4“Kaan wayyi fih itakkum endis koru miya dukur kaan wayyi woduru fih bakaan ab pengele ladi uwo bi ligo koru dee? 5Kaan uwo ligo koru dee uwo bi furaayi dukur uwo bi arfa koru dee fih kitifa too ladi fih beyy. 6Kaan uwo lasulu moo fih beyy, uwo bi naadi jirana mee sabiyana too ligo uwo ggi kelem, Anaa ligo koru tayi ab kaan woduru. 7Dukur Yesu kelem noomon marritan gali, fih samayi kun raha milaan zaidi nee ajol wayyi dee ab kaan ggi soh zambi dukur uwo seebu zambi too shinda annas tisa utisiyen ab maa aju seebu zambi too.”
Ijamajako tee ssente ab jaa woduru.
8Yesu kelem noomon ijamajako marritan gali, “Mariya yatu endis ssente ashara dukur wayyi kaan woduru uwo maa bi waala taa dukur uwo bi akunus killa nsonda tee juwa dee kuul ladi uwo bi ligo ssente dee? 9Dukur kaan uwo ligo ssente dee uwo bi naadi sabiyana too mee jirana too gali taali kum, Furaayi kum bakaan wayyi mee anaa kalam anaa ligo ssente tayi dee ab kaan woduru. 10Yesu dukur kelem marri taani gali, Fih nammna wayyi dee anaa ggi kelem nee itakkum, kaan ajol wayyi ab kaan ggi soh zambi seebu zambi too, mee Malaika tee Rabbana kaman bi furaayi kalam too.”
Ijamajako tee nyereku yowele ab woduru
11Dukur Yesu kelem noomon ijamajako taani ligo ggi kelem gali, “kaan fih naa ragi ab endis yowele tinen. 12Yom wayyi yowele too ab sakar dee kelem nee Babba too gali weede nee anaa kiyaas tayi fogo sokolinna takki. Yaa Babba too weede uwo kiyaas too.
13Badda yom siya futu, nyereku ab sakar dee lim killa sokol too uwo ruwa mee ssente fih Bele tee boyyi dukur uwo ferere killa sokol too mee kalas hayyi too kuul fih soh raha. 14Wakati uwo karab sokolinna too kuul, jiyan tee guddrra wagga fih Bele dee bakaan ab uwo fogo dukur uwo jaa sikin uwo siyam mee num jiyan. 15Yaa, uwo ruwa kee uwo geni mee ragi wayyi tee Bele dee dukur uwo asaadu noowo kazi. Dukur ragi dee rasul uwo kee ruwa chunnga goduru. 16Yowele dee jiyan zaidi ladi uwo kaan aju akul akil ab uwo kaan ggi wedi nee goduru lakin maa fih ajol ab wedi noowo sokol tee akul.
17Lakin badda saa siya, uwo feker minjuwa gelbba too dukur uwo kelem gali, fih beyy teena kaan fih naa labbiya tee Babba tayi ummon kaan ggi akul kuweesi lakin anaa giruwa muttu mee jiyan!” 18Anaa bi ruwa nee Babba tayi kee anaa kelem noowo gali, “Babba tayi, anaa karab nee Rabbana fih samayi mee gidaam itaa. 19Maa ggi faa naadi anaa nyereku takki, lakin ayinu nee anaa huruma kede anaa kun wayyi min labbiyan takki.” 20“Dukur uwo ruwa fih nee Babba too, mee wakati ligo uwo lissa fih boyyi mee beyy, Babba too ayinu uwo mee singa zaidi mee moyo enna milaan uwo wagga fih dusu too mee chum uwo. 21Yaa nyereku dee kelem nee Babba too gali, Anaa karab nee Rabbana mee fih gidaam itaa dukur maa faa naadi anaa nyereku takki ladi siya.
22Lakin Babba too amrisha labbiya too gali, Soh kun gwaam jibu kum noowo gumas kuweesi fih juwa kee itakkum lebisi uwo dukur itakkum kutu katim fih idda too mee gezma ab kuweesi fih kura too. 23Ruwa kum kee itakkum dabba bagara ab kebir mee rakabu akil tee jooju mee furaayi nee nyereku tayi ab aarja fih beyy. 24Kalam nyereku tayi dee kaan muttu lakin aseede uwo hayyi uwo anaa ligo uwo, mee jooju abidu.
25Fih wakati dee, nyereku ab kebir dee kaan fih-fih shamba wakati uwo kaan ggi aarja fih beyy, ligo uwo geeri mee juwa, uwo asmma sauti tee annas ligo ggi kun mee alabu. 26Yaa uwo naadi wayyi min labbiyan tomon dee uwo asaadu uwo ley annas dole furaayi zaidi? 27Yaa labbi dee ggibisha uwo gali, Aku takki yaa aarja fih beyy mee Babba takki dabba noowo bagara ab kebir, kalam uwo aarja ligo uwo kuweesi.
28Lakin uwo zalan zaidi ladi uwo maa jaa geeri mee beyy tomon. Dukur Babba too jaa naangu uwo kee odakal fih juwa. 29Lakin mee zalan milaan, uwo ggibisha Babba too gali, Saana dole kuul anaa soh neetaa wu mafih yom ladi wayyi ab anaa zalanisha itaa lakin maa wedi nee anaa galamaya ladi ab sakar kee anaa furaayi mee sabiyana tayi. 30Lakin wakati nyereku takki wedede aarja killa sokol ab itaa wedi noowo uwo karab mee malayin ley itaa tala noowo bagara ab kebir?
31Yaa Babba too ggibisha uwo gali, Ayinu nyereku tayi. Itaa ggi geni mee anaa killa yom mee killa sokol ab anaa endis kuul takki. 32Saade seme neenaa soh jooju mee furaayi kalam aku takki ab kaan muttu saade uwo hayyi uwo kaan woduru lakin saade uwo beenu.”
Currently Selected:
Lukka 15: KCN
Highlight
Copy
Compare
Share
Want to have your highlights saved across all your devices? Sign up or sign in
Nubi Bible by Beyond Translation is licensed under Creative Commons Attribution-ShareAlike 4.0 License.
