Luke 24
24
Edised Ma Ndidok K'enyoñ Christ
1Ke akpa usen urua, Ke tuhi-tuhi usen ubọk, Iban oro ebak eka udi, Ekama ufuọñ-mkpo ma arin mmo eketimde. 2Ke mmo esimde do, Mmo ekud ete ke ema ekpad itiad esi k'udi. 3Ntra, Mmo ema ekeduk udi, Mmo ikwe okpu Oboñ Jesus. 4Nte mmo esuk eyikde itie okpu Jesus ekpedude, Kpak idahado, Mmo ekud owu iba emi esinede nsem-nsem ọfọñidem eda mmo ke nkañ! 5Ntra, Ndik anam mm'iban oro, Mmo etuk isi k'isọñ. Edi mbin oro edọhọ mmo ete, “nsinam mmufo iyemde odu uwem k'otu mme akpaña mkpa?” 6“Jesus iduhọ mi, Abasi anam-e esed! Iti kpukpru se e-katiñde ono mmufo, Kini e-suk odude ma mmufo ke esiin Galilee.” 7“E-te, Mmo iyada min, Eyin Owu, Isin k'ubọk mm'idiọk owu. Mmo iyewid nin ke cross, Ndin ke ọyọhọ usen ita, Nyefiak nsed.” 8Iban oro eti se Jesus akatiñde ono mmo. 9Kini mmo etude udi enyoñ edi, Mmo etiñ kpukpru mkpo emi eno mme mbed dupekied ma mbin eken. 10Iban emi ekedi: Mary Magdalene, Joanna, Ma Mary eka James, Iban mfen ema edu ekesañade ma mmo, Eketiñ iko emi eno mme mbed. 11Edi mmo ikinimke iban oro ke akpaniko, Koro eketie ke utọñ mmo nte ikpu-ikpu nneme. 12Edi Peter obumere efehe aka udi, Ke e-ma ekesim, E-nyuñọde esid udi, Ndin ikwe ukpọk mkpo kied ke mibọhọke afia ediye ọfọñidem nte anade, Ndin efiak onyoñ, Ọnyuñ eyik s'itibede.
Usuñ Akade Emmaus
13Kpak k'usen oro, Mbed Jesus iba esaña eka ebi inwoñ emi ekerede Emmaus, Emi eyimde ọkpọñ ebi Jerusalem ke mkpo nte itiad itiaba. 14Mmo esuk eneme ma kied eken ebaña kpukpru mme mkpo emi etibede ono Jesus. 15Nte mmo esuk etiñde enyuñ eneme mme mkpo emi ma kied eken, Jesus k'idem nsie adisaña ma mmo. 16Edi Abasi iyakke mmo ọdiọñọ-e. 17Jesus ebup mmo ete, “nse ke mmufo ineme ke isañ mmufo?” Ndin mmo etuak eda ma mfuhọ k'isi mmo. 18Kied ke otu mmo emi ekerede Cleopas, Ebup Jesus ete, “nte ofo kpọd edi esen owu ke ebi Jerusalem emi midiọñọke s'ikitibede do k'usen ifañ emi ebede?” 19E-bup mmo ete, “nse ke itin ibaña?” Mmo eboro-e ete, Abaña s'itibede ino Jesus eyin Nazareth, “E-kedi prophet Abasi emi enyenede odudu ke iko ma ke edinam k'isi Abasi ma owu.” 20“Edi mme ikpo oku ma mboñ nnyin eyak-e eno ukara mbin Rome ete ewid-e, Ndin ewid-e ke cross.” 21“Edi nnyin ikinyene idiri-anyin ite ke e-di emi ifakde nyin ndito Israel. Ndin idighe mmem-mmem idahami, Koro mfin anam usen ita nte mkpo emi eketibe.” 22“Ke ndidian do, Ndusuk iban nnyin enam idem akpa nyin. Mmo ebak k'usen ubọk emi eka udi okpu nsie akanade.” 23“Edi okpu Jesus ikọduhọ do, Ndin mmo enyoñ edisian nnyin ete ke mmimo imekud mme Angel ke nkukud, Mme Angel enyuñ edọhọ ete ke e-ma esed!” 24“Ke oro ebede, Usuk iden k'otu nnyin ema eka udi ekekud nte ke ana ukpọk nte iban oro eketiñde.” 25E-dọhọ mmo ete, “mmufo isime didie! ọsọñ mmufo idem eti-eti ndinim kpukpru se mme prophet ekewedde ke ñwed Abasi abaña Christ.” 26“Akpana mmufo idiọñọ ite ke edi nnen-nnen Christ ndibo mme ufen emi, Nnyuñ mkpa mbemisi E-duk k'uboñ nsie?” 27Ndin e-tad ono mmo kpukpru se mme prophet ekewedde ke ibed Abasi ebaña-e. Toñode ke Moses esim mme prophet eken.
Anyin Atara Mme Mbed
28Nte mmo esañade ekpere ebi inwoñ emi mmo ekade, Jesus anam nte e-yem ndika isi. 29Edi mmo esaña ebeñe-e ete, “Mbọk dañ ma nnyin, Koro ekpere mbubreyi, Ndin eyi idikim.” Ndin Jesus ọduk ufọk akadañ ma mmo. 30Kini mmo etiede k'itie udia, E-men uyi ono Abasi ekọm, E-buñ ọnyuñ ono mmo. 31Ndin Abasi atad mmo anyin ndidiọñọ-e, Kpak idahado, E-sip mmo k'anyin. 32Mmo ebup kied eken ete, “ndi esid nnyin ikọyọhọke ma idaresid kini e-kọsuk enemede ma nnyin ọnyuñ anamde iko Abasi anwaña nnyin?” 33Mmo edaha ini kied efiak enyoño ebi Jerusalem. Do ke mmo ekekud mme mbed dupekied ma mbin mfen emi odude ma mmo nte ebohode. 34Mmo enyuñ edọhọ, “k'akpaniko! Oboñ emesed ọnyuñ awud Simon idem.” 35Ndin mme mbed iba emi etude Emmaus edi, Etiñ s'ikitibede ino mmo ma nte mmo ekesañade ediọñọ Jesus kini ebuñde uyi.
Jesus Awud Mme Mbed Nsie Idem
36Nte mmo esuk etiñde ebaña mkpo emi, Jesus k'idem nsie ọbiọñọde k'ufuọd mmo ọnyuñ ọdọhọ mmo ete, “yak emem Abasi odu ma mmufo.” 37Ndik ma mkpaidem anam mmo, Mmo ekere ke mmimo ikud ekpu. 38E-dọhọ mmo ete, “nsinam mmufo ifehede ndik? Ndi enyene ntak ndimekied mmufo inyene eyikhe k'esid mmufo?” 39“Sesie ubọk Inh ma ukid nni. Edi Ami k'idem mmi! Tuk Inñ nyuñ sie, Ekpu inyeneke ọbuk ma okpo, Nte ikudde, Mmenyene.” 40Ke Jesus ama akatiñ emi, E-wud mmo ubọk ma ukid Nsie. 41Ndin nte mmo mikenimke otu idara ma mkpaidem, E-bup ete, “ndi mmufo imenyene mkpo ndimekied mi ndidia?” 42Ndin mmo emen ibi nsad iyak kied eno-e. 43Ndin e-men ata k'isi mmo.
Etad Iko Abasi
44Ndin Jesus ọdọhọ mmo ete, “K'ini nkọsuk ndude ma mmufo mbemisi ndikpa, Mma ntiñ nno mmufo nte kpukpru iko emi ekewedde ebaña min ana nte etibe ke akpaniko, Ma mme iko emi odude ke ibed Moses ma mme prophet, Ma mme psalm.” 45Ndin e-tad esid mmo mbak iko Abasi anwaña mmo. 46Jesus ọdọhọ mmo ete, “emi edi se ekewedde ke nwed Abasi ete ke Christ enyene ndibo ufen nnyuñ mkpa, Ndin k'ọyọhọ usen ita iyesed ke mkpa.” 47“Enyuñ ewed ke nwed Abasi sukhọ ete ke mmomi ebuọdde idem ma Christ, Iyeka ikọkwọrọ ino mm'owu ete enwọñọde ekpọñ idiọk, Enyuñ ekiene Abasi mbak efen eno mmo k'idiọk mkpo mmo. Toñode ke ebi Jerusalem tutu esim kpukpru idid ke arimbud.” 48“Mmufo idi mme ntiense ino mme mkpo emi.” 49“Ndin ami k'idem mmi nyedọñ adisana spirit ekiene mmufo, Emi Nte mmi ekenwoñode. Edi itie ke ebi Jerusalem tutu adisana spirit edino mmufo odudu otude enyoñ.”
Edimen Ndok
50Ndin Jesus ada mmo ọwọrọ ọkpọñ ebi Jerusalem asaña ekpere Bethany, E-mene ubọk ke ikpa enyoñ ọnyuñ ọdiọñ mmo. 51Nte E-suk ọdiọñde mmo, E-kpọñ mmo. Ndin emen-E edok ke enyoñ. 52Ndin mme mbed nsie etuak ibud eno-e enyuñ efiak enyoñ ebi Jerusalem ma Akwa idara. 53Ndin mmo eka isi edu k'itie ufọp uwa eture Abasi.
Currently Selected:
Luke 24: ITW
Highlight
Copy
Compare
Share
Want to have your highlights saved across all your devices? Sign up or sign in
Ito Bible by Beyond Translation is licensed under Creative Commons Attribution-ShareAlike 4.0 License.
