Luk 3
3
Yọọn Ọduọk-Mmuŋ Ebeŋe Mman Owom Idem Ikud Yisọs
1Ekede ke ọyọk isua efud k'idak ukara Rum, ọbọọŋ Tibadus. Pontus Paided ekede Ọbọọŋ ke ikpehe ukara Yudia, Kidaha ọbọọŋ Erọd ekedede Ọbọọŋ ke ikpehe ukara Kadidii, enyinika ise Fidip ekede Ọbọọŋ ke obio Iturea Ikpehe ukara Trakonitus, Disanias anyaŋ ekede Ọbọọŋ ke ikpehe ukara Abidiin 2K'ini Annas ma Kefas ekedede akua Oku, etop oto Abasi esim Yọọn Ọduọk-mmuŋ, eyen Sakaraya, emi ekeduŋde ke Nnauded. 3Ke ntoro Yọọn ọduk ke Mfifien nkan-nkuk inyaŋ Yọdan, anyaŋ otooŋo ọkwọrọ ọnọ mman owom ete, «Ikabade-ekid mman Abasi efen k'idiọk mkpọ mfo, inyaŋ idibọ uduọk mmuŋ. 4Yọọn anam ikọ brọfed Isaiya ekewedde ọwọrọ osu ete,
«owom emititiŋ ikọ ke ọkpọsọŋ uyo ke Nnauded, ibe,
idiọŋ usuŋ inọ edidi Ọbọọŋ,
ineŋede usuŋ ise inum.
5Inam mfifien ntitiŋede edeeŋi,
mfifien nkua ma mkpraŋ okpukpo akabade una-isọŋ,
ineŋede mme nkwaŋa usuŋ inum, inam mme ekpuk-ekpuk usuŋ edeeŋi.
6Ndien mfifien owom emikukud anyaŋa owom Abasi ọnọde edi»
Yọọn Ọkwọrọ Ikọ Ọnọ Mman Owom
7Ke ntoro, k'ini otu owom ekewọrọde edi uduọk mmuŋ ke ubọk Yọọn, enye ete mmọ, «Mfo mman ebiaŋi mfo idiọi nte uduk-ikọd! Nde enye abiaŋi mfo ke mfo ikeme ibọhọ ufen Abasi emidide» 8Man otodo mfo ibọhọ ikpe, anaa mfo iduwem ke usuŋ ọwuride ke mfo inyine ata nkabade ekid ikpọŋ idiọk mkpọ mfo inyaŋ akabade ikene Abasi. Ikidọhọ ke otu idem mfo, ibe, «Abasi ibuhi imia nnyin ufen sia nnyin ide ntitọŋ Ebraham, ami ndọhọ mfo ke Abasi ekeme inam mme itiad iken akabare ede ntitọŋ Ebraham ada itie mfo. 9Abasi ebeŋeidem ibiom ikpe mmaana nnehede mmia mfifien mman se ikabakede ekid ufen. Anaa nte mmọ anam nti mkpọ emi ọwuride ke mmọ ikabade ekid. Ekpede idehe ntoro, Abasi emibibiad mmọ anyaŋ otop mmọ esin ke ikaŋ.»
10Usuk owom ebib Yọọn ete, «Nso ke Abasi ebe nnyin inam?»
11Yọọn ọbọọrọ mmọ ete, «Yak owom eken enyinede mfọdidem ibaa eben keen ọnọ owom eken inyineke. Owom eken enyinede ndia yak enye ọnọ owom eken inyineke.»
12Mman ubọ taksi edisọ iduọk mmuŋ, mmọ edibib Yọọn ete, «Ekpeb mkpọ, ebe nnyin inam so?»
13Enye ete mmọ, «ikibọ taksi ikan se ukara ebede mfo ibọ.»
14Mman ekọŋ ebib eme ete, «Nso ke nnyin iminam?»
Enye ete mmọ, «Ikibọ owom ọkuk ke nkan-ubọk, ikiyaŋ isu-nsu idian owom, ede iyuhọ ke se ukara ekpede mfo.»
15Mman owom ama enyine idorenyin ke anyaŋa owom osuŋ edi, ekese mmọ otooŋo ekere ke ekid mmọ ete, Yọọn esin-ede anyaŋa owom odo ekemidide, mme idehe enye? 16Yọọn ọdiọŋọ ekikere mmọ, ndien enye ete mmọ mfifien «Ami nda mmuŋ nnum mfo uduọk-mmuŋ, ede emi nken okponde akan min osuŋ edi, emi ami ndodke itad uduk ikpaukod ise nte eyen-ufọk ise. Enye eminum mfo uduọk mmuŋ ke Edisana Sibidib ma ikaŋ. 17Krais ebeŋeidem ibahade mman akabadede ekid nsio ma mman se ikabakede ekid. Nte owom ekeŋde mbio osio ke edeesi. Enye okoono idem edeesi onum ke iseh ise, ede ọfọp mbio nse ke ikaŋ ibuhi ininime.» 18Ke ukem usuŋ iken, Yọọn ama atiŋ eti-mbuk nken ọnọ mman owom, anyaŋ ọnọ mmọ item ma nsio-nsio ukpeb mkpọ abaŋa nkabade ekid.
19Ke usuk idaha, Yọọn ama asua ọnọ ọbọọŋ Erọd ke ntak enye ekedọde ọbọọŋ aŋwan Erọdias ŋwan eyen-ete ese, Yọọn amana asua ọnọ ọbọọŋ Erọd abaaŋa mme idiọk mkpọ ewen enye ekenamde. 20Ekem ọbọọŋ Erọd anam ndiọk nkan mkpọ ke enye ndisin Yọọn ke mkpọkọbi.
Yọọn Ọduọk Yisọs Mmuŋ
Mt. 3:13-17; Mk. 1:9-11; Yn 1:29-34
21Mbemiso ọbọọŋ Erọd ekesin Yọọn ke ufọk mkpọkọbi, Yọon eke ọduọk Yisọs mmuŋ ma mman ekedide ekene eme. Ke nte Yisọs asuŋ ọbọŋde akam, Abasi ọkubọde ikpa onyuŋ. 22Edisana Sibidib ọsuhọde edidoro eme k'idem nte ibiom, «Abasi atiŋ ikọ ke ikpa onyuŋ ete, ofo ede eyen ima mi emi nnemde ekid ma ofo.»
Mbuk Ubon Yisọs Krais.
Yen. 5:1-32; 11:10-26; Rud 4:18-22; 1 Kọ. 1:1-4,24-27,34; 2:1-15; Mt. 1:2-16
23Yisọs eketooŋo utom ukwọrọ ikọ aŋwa-aŋwa ke idaha enye ekedede isua edip-ma-nduob. Mfifien owom ekediọŋọ Yisọs nte eyen Yosef.
Yosef ekede eyen Hedi. 24Hedi ekede eyen mata,
Mata ekede eyen Divai, Divai ekede eyen Melchi,
Melchi ekede eyen Yanai, Yanai ekede eyen Yosef. 25Yosef ekede eyen Matatias,
Matatias ekede eyen Emọs, Emọs ekede eyen Nahum,
Nahum ekede eyen Esdi, Esdi ekede eyen Nakkai,
26Nakkai ekede eyen Maad, Maad ekede eyen Matatias,
Matatias ekede eyen Semen, Semen ekede eyen Yosef,
Yosef ekede eyen Yoda, 27Yoda ekede eyen Yọanan,
Yọanan ekede eyen Resa, Resa ekede eyen Serubabel,
Serubabel ekede eyen Siedtie, Siedtie ekede eyen Neri,
28Neri ekede eyen Melchi, Melchi ekede eyen Eddi,
Eddi ekede eyen Kosam, Kosam ekede eyen Edmadam,
Edmadam ekede eyen Er, 29Er ekede eyen Yosua,
Yosua ekede eyen Ediesa, Ediesa ekede eyen Yorim,
Yorim ekede eyen Mattat, Mattat ekede eyen Divai,
30Divai ekede eyen Simiọn, Simiọn ekede eyen Yuda,
Yuda ekede eyen Yosef, Yosef ekede eyen Yọnam,
Yọnam ekede eyen Ediakim, 31Ediakim ekede eyen Medea,
Medea ekede eyen Menna, Menna ekede eyen Matata,
Matata ekede eyen Natan, Natan ekede eyen Defed,
32Defed ekede eyen Yessi, Yessi ekede eyen Obed,
Obed ekede eyen Boas, Boas ekede eyen Sadmọn,
Sadmọn ekede eyen Nasọn, 33Nasọn ekede eyen Amminadab,
Amminadab ekede eyen Admin, Admin ekede eyen Arni,
Arni ekede eyen Hesrọn, Hesrọn ekede eyen Peres,
Peres ekede eyen Yuda, 34Yuda ekede eyen Yekọb,
Yekọb ekede eyen Aisik, Aisik ekede eyen Ebraham,
Ebraham ekede eyen Tera, Tera ekede eyen Nahọ,
35Nahọ ekede eyen Seruk, Seruk ekede eyen Reu,
Reu ekede eyen pedek, Pedek ekede eyen Eber,
Eber ekede eyen Seda, 36Seda ekede eyen Kenan,
Kenan ekede eyen Arfasad, Arfasad ekede eyen Shem,
Shem ekede eyen Nnua, Nnua ekede eyen Dameck,
37Damek ekede eyen Metuseda, Metuseda ekede eyen Enọk,
Enọk ekede eyen Yared, Yared ekede eyen Mahalaleel,
Mahalaleel ekede eyen Kenan, 38Kenan ekede eyen Enọs,
Enọs ekede eyen Sed, Sed ekede eyen Adam,
Adam ekede eyen Abasi.
Currently Selected:
Luk 3: ITM
Highlight
Share
Copy
Want to have your highlights saved across all your devices? Sign up or sign in
Itu Mbon Uzo Bible by Beyond Translation is licensed under Creative Commons Attribution-ShareAlike 4.0 License.
