Luk 2

Emana Ma Ini Uyen Yisọs

1Ke mme usen ikoro, ọbọọŋ Akọstus ọnọ ewuhọ ete yak mfifien owom ke efri ikpehe ukara Rum edisin enyiŋ ke ŋwed usin enyiŋ. 2Emi ekede akpa ini ukara Rum ekewedde mfifien owom enyiŋ esin ke ŋwed. Emi eketibe k'ini Kọirinus ekedade ukara ke ikpehe ukara Sidia. 3Ke ntoro, mfifien owom onyuŋ obio mmọ eketode akaa isin enyiŋ mmọ ke ŋwed.

4Yosef ede eyen ubon ọbọọŋ Defed, enye ma Mmedi oto obio Nasaded ke ikpehe ukara Kadidii akaa obio Betrehem ke ikpehe ukara Yudia. Sia Betrehem ekede obio emana ọbọọŋ Defed. 5Yosef ekekaa isin enyiŋ do ma Mmedi ŋwan enye ekekọbide ubọk ke ndọ, emi ekesaŋade ma idibi#2:5 Ke odu mman Yuu, ikọbi owom ubọk ke ndọ ana nte ata ndọ. Ekeme isuana ọkpọŋ ke mmọ idiana ke ndọ.. 6K'ini Yosef ma Mmedi odudedo, ini uman ise ekem. 7Enye aman akpa eyen ese deen, awaŋ eme ke ọfọŋ onum ke mkpọ usin ndia enaŋ sia ubed nnaa ikiduhe se mmọ etiede.

Mme Ekpeme Edọŋ Okop Abaaŋa Emana Yisọs

8Ke itroyo ikoro, mme ekpeme edọŋ ekesuŋ ekpeme edọŋ mmọ ke inwaŋ ekperede obio Betrehem. 9Idaha ikoro, Isuŋ-utom Abasi ọwọrọ ọnọ mmọ, uwana ubọọŋ Abasi ayama ọnọ mmọ, ndik enehede ọmum mmọ. 10Ede Isuŋ-utom Abasi ete mmọ, ikibaak ndik, sia mmeyine eti-mbuk ndinọ mfo, emi eminamde mfifien owom ke ererimbod inemekid. 11«Mfen nken anyaŋa owom amana ke obio emana ọbọọŋ Defed. Enye ede emi emiyaŋade nnyin, ma Ọbọọŋ. 12Emi emide idiọŋọ emi mfo imikamade idiọŋọ eme, mfo imikukud eyen nte mmọ awaŋde eme ke ọfọŋ esin ke mkpọ ndia enaŋ.»

13Idaha-idaha ikoro uwak-uwak Isuŋ-utom Abasi efen oto onyuŋ edibuana ma akpa isuŋ-utom Abasi ido otoro Abasi, ete,

14«Ubọọŋ enyine Abasi ke ebukpo ubọọŋ Ise,

mme owom emi Abasi ọdiọŋde ọbọ emem k'isọŋ.»

15K'ini mme Isuŋ-utom Abasi adahade ọdọọk onyuŋ, mme ekpeme edọŋ ido ete ke otu idem mmọ, «Yak ikaa obio Betrehem ikiche eyen eken, emi Abasi anamde nnyin idiọŋọ.»

16Ke ntoro, mmọ efehe akaa obio ikoro. Mmọ okud Mmedi ma Yosef, ma nsek eyen ido emi anaade ke mkpọ usin ndia enaŋ. 17Ke nte mme ekpeme edọŋ ido okudde nsek eyen ido, mmọ atiŋ ọnọ mfifien owom etop emi mme Isuŋ-utom Abasi ekedọhọde mmọ abaaŋa eyen eken. 18Idem akpa mfifien owom se okopde se mme ekpeme edọŋ eken atiŋde abaaŋa eyen eken. 19Ede Mmedi onum efri mkpọ nken etibede ke ekid ese, anyaŋ akaiso ekere abaaŋa mmọ. 20Nte mme ekpeme edọŋ ido onyuŋde akaa inwaŋ edọŋ mmọ. Mmọ otoro Abasi abaaŋa se mmọ okopde anyaŋ okudde, sia eketibede ukem-ukem nte mme Isuŋ-utom Abasi ekedọhọ mmọ.

Mme Eta Yisọs Ayak Eme Ọnọ Abasi Ke Itie-uwa.

21K'ini eyen eken esimde usen itieta, mmọ onum eme mbubi nte ibed Abasi edede, mme eta ese esio eme enyiŋ Yisọs. Nte isuŋ-utom Abasi ekedọhọde, totooŋo idaha enye ekesinede ke nsa nne nse.

22Ke usen ekemde mmọ ndinam yak Mmedi asana#2:22 Nte afufa eke eyen, mmọ ekeda Mmedi owom eken isanake, ke ntoro, uwa amaadu enye ndinọ ke itie-uwa k'usen aba ebeide tooŋo enye ikiman eyen ndinam idem ise asana man otodo enye afiak ekene ukpono Abasi ma mman ewen (Liviticọs 12:1-8)., nte ibed Muses atiŋde, Mmedi nne-nse ma Yosef eta-ese eben eme akaa obio Yedusedem ndiben Yisọs nnọ Abasi. 23Mmọ ekenam man mmọ onum se mmọ ima iwewed ke ibed Abasi ete, «Mfifien akpa eyen deen emide edisana eyen inọ Abasi, 24Mmọ amana akaa inọ uwa nkene nte ibed Abasi atiŋde ete, «iwaa ebomo-nkuku ibaa, mme nyaŋ nde iyen ibiom ibaa.»

Simiọn Okud Ediyaŋa Abasi

25K'ini ikoro akua owom keen ama odu ke obio Yedusedem emi ekekerede Simiọn, enye ekede etiti owom, anyaŋ enyine mbaak Abasi. Enye ama enyine ọkpọsọŋ uduŋ itie mbed anyaŋa owom#2:25 Emi Abasi ekewuŋede idọŋ yak edi yak edi edidọŋ mman Isued ekid. Edisana Sibidib amaadu ma eme 26Edisana Sibidib ama ayara ọnọ eme ete ke enye ibuhi ikpa tutu enye okud anyaŋa owom emi Abasi ekewuŋede. 27Usen ikoro, Edisana Sibidib ada Simiọn usuŋ ọduk ekwere itie-uwa Abasi; k'ini Mmedi ma Yosef ebende nsek eyen eken Yisọs edi man mmọ ayak eme ọnọ Abasi nte ibed Abasi awukde yak mmọ anam. 28Simiọn okud eyen odo Yisọs anyaŋ eben eme akama ke ubọk. Anyaŋ ọkọm Abasi ete,

29O ọbọọŋ, idaha iken emekeme iyak min,

eyen-ufọk fo mkpa ke emem sia emenam se ekewuŋede ọnọ min ọwọrọ osu.

30Anyin mi okud anyaŋa owom emi ofo ọdọŋde man anyaŋa mfifien owom.

31Mfifien mman obio emikukud emi ofo ọdọŋde.

32Enye emina nte uwana man eben Abasi ọwuri mman Yentais#2:32 Yentais ọwọŋọ owom eken idehe owom yuu. ,

Enye emidada ukpono isọk mman Isued, emi enyinede fin.»

33Idem akpa Yosef ma Mmedi ke mme mkpọ Simiọn atiŋde abaaŋa Yisọs. 34Ke ntoro, Simiọn ọdiọŋ mme eta ese, anyaŋ ete Mmedi, eka Yisọs, «Abasi emek eyen eken ndinam uwak owom mbiara nyaŋ nnam uwak mman efen mbọhọ ke Isued. Enye edinaa nte mkpọ idiọŋọ emi otode Abasi, ede ekese owom eminwawana ma eme. 35Ke ntak nken, enye emiyayara ekikere ekid uwak owom. Ofo Mmedi omu nnenehede useeme.

Anna Atiŋ Ikọ Abaaŋa Nsek eyen Yisọs

36Ukem usen ikoro, brọfetes Anna, ekedudo sọ ke itie-uwa. Enye ekede eyen Fanue emi otode ubon Asha. Enye ama enehede ọchọŋ. Enye amaadu ma ebe ese ke ndọ ke isua itiaba ndien ebe ese akpa. 37Ndien enye akabade ebekpa, idaha ikoro enye ekede isua anaaŋ-ma-inaaŋ. Enye ekese awak idu ke itie-uwa, okpono Abasi usen-ubọk ma ubroyo ke ndibọŋ akam, usuk usen ma utude ndia. 38K'ini Simiọn asuŋ atiŋde ikọ ma Mmedi ma Yosef, Anna ọduk edi editooŋo otoro Abasi, anyaŋ atiŋ ikọ abaaŋa eyen okoro Yisọs ọnọ mfifien owom eketiede ma idorenyin ebed yak Abasi ọdọŋ anyaŋa owom man edifak mman Yedusedem.

Mman ubon Yisọs Esed Nasaded

39K'ini Yosef ma Mmedi ekweŋede inam mfifien mkpọ se ibed Muses ọdọhọde yak mmọ anam, mmọ afiak onyuŋ obio mmọ ke Nasaded, emi ekesinede ke ikpehe ukara Kadidii. 40Nsek Eyen eken Yisọs, ọkọri ke ndaha anyaŋ nchọŋidem ke sibidib. Enye ọyọhọ ma ifiọk, Abasi ọdiọŋ eme.

Yisọs Atiŋ ikọ Ma Mme Ekpeb Ibed

41Efri isua, Eta Yisọs ma nne nse akaa obio Yedusedem ndidara usọrọ Mbei nduk ma uwak mman Yuu. 42K'ini Yisọs esimde eyen isua duobeba, mmọ akaa usọrọ ikoro ke obio Yedusedem nte mmọ ese adakde akaa. 43K'ini usọrọ asuanade, Mmedi ma Yosef ọkpọŋ Yedusedem ndinyuŋ obio mmọ. Mmọ ikidiọŋọke ke Yisọs akuaŋade etie ke obio Yedusedem. 44Mmọ eta ese ekekere ke enye asaŋa ma mman efen esed sọ. Ke ntoro, mmọ asaŋa k'usen keen. K'ini oyo okudde usen ikoro mmọ otooŋo eyem eme ke otu mman ubon mmọ ma mme ufan. 45K'ini mmọ ikwe eme, mmọ amaana akaa obio Yedusedem ndiyem eme do. 46Ke ọyọk usen ita, mmọ okud eme ke esien itie-uwa. Enye eketie ke otu usuk mme ekpeb ibed Muses. Enye ekesuŋ akpaŋ utọŋ ke se mmọ ekekpebde anyaŋ ebib mmọ mbime. 47Idem ama akpa mfifien mman se kekopde Yisọs ke ifiọk ise ma ibọrọ ise ke mbime mmọ. 48K'ini eta ese okudde eme do. Idem akpa mmọ, nne-nse ete eme «Eyen, nsode ofo anamde nnyin mkpọ nken? Ami ma eta fo iyem fin ma ọkpọsọŋ ekikere.»

49Ede Yisọs ọbọọrọ mmọ eta ese ete, ntak mfo iyemde min? Mfo ikidiọŋọke ke anaa nte ami ndu ke ufọk eta mi?» 50Ede ikiwaŋake mmọ se enye eketiŋde ọnọ mmọ ọwọrọde.

Yisọs okpon ke ifiọk ma mfọn

51Ke edo ebeide, Yisọs ekene mmọ eta ese onyuŋ akaa obio Nasaded anyaŋ akaiso ọsuuk ibuod ọnọ mmọ. Ede nne-nse Mmedi onum efri mkpọ nken ke ekid anyaŋ akaiso ekere abaaŋa efri mkpọ nken eketibede. 52Nte Yisọs ọkọride ke idaha, enye enyine ifiọk, anyaŋ enyine mfọn ma Abasi ma owom.

Currently Selected:

Luk 2: ITM

Highlight

Copy