ລູກາ 5
5
ພຣະເຢຊູເຈົ້າກາວອິດສາວົກຈຸມທຳອິດ
(ມທ 4:18-22; ມຣກ 1:16-20)
1ມູຕະງາຍຂະນະທີ່ພຣະເຢຊູເຈົ້າຕະເຢິ່ງອັດເຕິແຄມທະເລສາບຄາລີເລປະຊາຊົນກໍຈ້ຽນໂມດເຕິເຢີພຣະອົງ ເພື່ອຫະແງ້ພຣະທຳຂອງພຣະເຈົ້າ. 2ພຣະອົງຕະເປິ້ງທຣຸ້ມຕວົະບາລລຳຈອດດໍ້ເຕິແຄມປຶ໋ທະເລສາບຄາລີເລ ກຸ້ຍຫລັ້ງເປ້ບອນລໍ້ປໍ້້ເກີດຕົວະກຼີເຢີຈຸມປີດໍກຳລັງອັດຣ້າວມອງ. 3ພຣະເຢຊູເຈົ້າຈຶ່ງໂມດປໍ້້ກະລຸງຕົວະມູລຳ ຊຶ່ງເກີດຂອງຊີໂມນ (ເປໂຕ) ແລະອ້າໂຢນຊີໂມນ (ເປໂຕ) ຄະໂລນຕົວະລໍ້ເຢີຼງເກີດປື້ມະສິ້ດ ເຢີພຣະເຢຊູເຈົ້າກໍຕະກູແຊ້ງເຕິຕົວະສັ່ງສອນປະຊາຊົນ. 4ເຢີພຣະເຢຊູເຈົ້າສັ່ງສອນຢຼ້າຍເຢີ ຈຶ່ງກ່າວເຢີຊີໂມນຣ້ວຍ,“ຈຶ່ງຄະໂລນຕົວະລໍ້ປໍ້້ເຢີບ້ອນເດີ໋ຢຼະຣູ ແລະຫະໂຕ້ມອງຂອງຈຸມຊີໂມນແຊ້ງກ້ອມເປ້.” 5ຊີໂມນ (ເປໂຕ) ທະອອຍຣ້ວຍ,“ພຣະອາຈານເອີຍຈຸມຮີບອນຫັ້ລງເປ້ເອີ້ຍຫະດາ່ວຈົນໄອ້ແຫຼ້ ແລະເລິ້ຍບອນອະໄມ້ເລີຍ,ແຕ່ເພື່ອຫອມເຢີພຣະເຢຊູອ້າ ກືກໍຈະຫະໂຕ້ຼມອງແຊ້ງຕາມຄຳສັ່ງຂອງນາຍ.” 6ອີກຼີ ຈຸມຊີໂມນ (ເປໂຕ) ຈຶ່ງບອນຫະໂຕຼ້ມອງແຊ້ງ ແລະຄຣາຍເປ້ຈຳນວນປູດຈົນມອງຈຸມປີດໍກຳລັງຈະໄອໄຕ້. 7ຈຸມປີດໍກະຢຼ້ອຍຕີອິດນູ້ ທີ່ອັດເຕິຕົວະລຳກະນໍ້ໂຢນເຕິຈ່ອຍ ຈຸມປີດໍຈຶ່ງເຕິຈ່ອຍ ແລະປີດໍບອນເປ້ເປິ້ນຕົວະເອິ້ຍບາລລຳ ຈົນຕົວະແຊມເກືອບຫະໂລບ. 8ເຢີຊີໂມນ (ເປໂຕ) ຫອມເຫດການທີ່ເກີດຊໍ້ເຢີ ດໍກໍນົບແຊ້ງບອນຢືງຂອງພຣະເຢຊູເຈົ້າ ແລະກ່າວຣ້ວຍ ຂ້າເດອົງພຣະຜູ້ເກີດເຈົ້າກືຢຼະຮອຍເຢີ ພຣະອົງບໍຣິສຸດກືຢຼະເລິ້ຍສົມຄວນທີ່ຈະອັດຕະໝັ້ນນັງພຣະອົງເຕິບ້ອນສະຖິດຂອງພຣະອົງ,“ພຣະເຢຊູເຈົ້າເອີຍ,ແສ້ປໍ້້ໂຢນເຢີ່ງເກີດກືຊ້ະເພາະກືເກີດກຸ້ຍບາບ.” 9ເປໂຕນັງໝູ່ນູ້ກຸ້ຍກະນໍ້ຂອງດໍ ທີ່ອັດມະຕຼຸ້ບອນງຶດກະລັກພະໄຫ້ງ ທີ່ຈຸມປີດໍກ້ອມເປ້ບອນຢ່າງກະເລິ່ງປູດອີນໍ. 10ຢາໂກໂບ ແລະ ໂຢຮັນໄກ້ໂກນຂອງເຊເບດາຍ ນູ້ຮ່ວມງານຂອງຊີໂມນ ກໍປະຫລາດພະໄຫ້ງທຣະເລິຍ ເຢີພຣະເຢຊູເຈົ້າກໍກ່າວເຢີຊີໂມນຣ້ວຍ,“ຊິນກຼໍ້ຕັ້ງແຕ່ນໍປໍ້້ ກືຈະໂຢນແປຼເກີດຜູ້ຫລັ້ງກຸ້ຍ.” 11ຢຼ້າຍຊີໂມນເປໂຕແລະຈຸມປີດໍ ອິດຕົວະເຕິກະເລີ້ຍເກງປຶ້ເຢີ ຈຸມປີດໍກໍບອນສະຫລະຕ້າຄູສິ່ງ ແລະຫະເອີ້ຍອາຊີບຫລັ້ງເປ້ແລະຕິດຕາມພຣະເຢຊູເຈົ້າປໍ້້.
ພຣະເຢຊູຊົົງໂຜດກຸ້ຍໂກນມະນະໂຢນອໍພະຍາດ
(ມທ 1-4; ມຣກ 1:40-45)
12ເຢີພຣະເຢຊູເຈົ້າອັດເຕິເມືອງມະໄຫລ້ເຕິຂົງເຂດແຂວງຄາລີເລ ກໍເວິຍກຸ້ຍໂກນມະນະເກີດພະຍາດຂີ້ທູດເປິ້ນຈະ ເຢີຫອມພຣະເຢຊູເຈົ້າ ດໍຈຶ່ງຫະຫຸກນົບແຊ້ງເຢີບຣານພຣະເຢຊູເຈົ້າ ແລະອອນວອນແສ້ຣ້ວຍ,“ພຣະອົງເຈົ້າເອີຍ ຄັນມາຍພໍໃຈ ກໍສາມາດຕະໂຢນກືອໍສະອາດບອນ.” 13ພຣະເຢຊູເຈົ້າເຢິ້ງຕີ້ລໍ້ແຕະຕອ້ງກຸ້ຍໂກນກຼີ ແລະກ່າວຣ້ວຍ. “ກືພໍໃຈເຢີ ທີ່ຈະປິນປົວຮັກສາມາຍ ຈົ່ງອໍສະອາດສາ” ເຕິທັນມໍ້ກຼີ ພະຍາດຂີ້ທູດກໍເປິ້ດປໍ້້ເກີດກຸ້ຍໂກນກຼີ. 14ເຢີພຣະເຢຊູເຈົ້າ ກໍສັ່ງດໍຣ້ວຍ. “ຊິ້ນຣ້ວຍເລື່ອງນໍໂຢນນູ້ມໍ້ຫະແງ້ ແຕ່ຈົ່ງປໍ້້ສະແດງຈະມາຍຢຼະເຢີປະໂຣຫິດ (ນູ້ຖວາຍປຼອງບູຊາໂຢນພຣະເຈົ້າ) ໂຢນດໍກວດແນ້ມາຍ ແລະຈົ່ງຖວາຍເຄື່ອງບູຊາຕາມທີ່ໂມເຊບອນສັ່ງດໍ້ ເພື່ອພິສູດໂຢນກຸ້ຍຄູນະຫອມຣ້ວຍ ມາຍອໍສະອາດເຢີ.” 15ແຕ່ຊື່ສຽງໂດງດັງຂອງພຣະເຢຊູເຈົ້າ ກໍບອນຊ່າລືປໍ້້ແອັ້ນທົ່ວຄູບ້ອນແລະປະຊາຊົນກໍເຕົ້າໂຮມມະຕຸ້ຼ ເພື່ອຫະແງ້ຄຳສອນຂອງພຣະອົງ ແລະເພື່ອຣຳ້ການຊົງໂຜດຮັກສາພະຍາດໂລຄາຕ່າງໆຂອງບອມຢຼະໂຢນເປິ້ດອໍ. 16ແຕ່ພຣະອົງບອນຫະລຸ້ປໍ້້ບອ້ນທີ່ເຄຣະ (ມິດງຽບສະຫງົບ) ແລະພາວັນນາອະທິຖານນັງພຣະເຈົ້າ.
ພຣະເຢຊູເຈົ້າຊົງໂຜດກຸ້ຍເປ້ຍລອຍມະນະໂຢນເປິ້ດອໍພະຍາດ
(ມທ 9:1-8; ມຣກ 2:1-12)
17ມູຕະງາຍພຣະເຢຊູກຳລັງສັ່ງສອນກຼີ ຈຸມຟາຣີຊາຍແລະຈຸມທໍາມະຈານ (ອາຈານສອນກົດບັນຍັດ) ບາງນະ ກໍຕະກູອັດເຕິບ້ອນກຼີດ້ວຍ ຈຸມປີດໍເຕິແຕ່ຄູເວລເກີດແຂວງຄາລີເລ,ເກີດແຂວງຢູດາຍແລະເກີດນະຄອນເຢຣູຊາເລັມ.ຣິດອໍານາດຂອງອົງພຣະຜູ້ເກີດເຈົ້າ ກໍສະຖິດອັດເຕິພຣະອົງ ເພື່ອໂຜດກຸ້ຍໄອ້ຈະບອນໂຊໂຢນເປິ້ດອໍພະຍາດ. 18ເຕິຂະນະທີ່ພຣະເຢຊູກາໍລັງສັ່ງສອນ ກໍເວິຍບາງນະຕະກຣ້າງກຸ້ຍເປ້ຍລອຍ (ອາໍມະພາດ) ມະນະ ບິດເຕິບ້ອນບິດ ແລະຈຸມປີດໍພະຍາຍາມຫັ້ລງຄະນ້າອິດນູ້ຜູ້ໄອຫະໂມດປໍ້້ກະລຸງດຸງ ເພື່ອດໍ້ດໍເຢີ ບຣານພຣະເຢຊູເຈົ້າເພື່ອຈະປິ່ນປົວຮັກສາດໍ. 19ເຢີຫລັ້ງຄະນ້າໂມດເລິ້ຍຮອຍບອນເພາະເວິຍກຸ້ຍກະເລິ່ງປູດ ຈຸມປີດໍຈຶ່ງຊໍ້ ປໍ້້ບ້ອນຫະຢົ້ງມະຕຼຸ້ລດຸງປະລໍ້ແຜ່ນກະເບື້ອງລໍ້ ແລະປະແຊ້ງກຸ້ຍເປ້ຍນັງບ່ອນບິດ ແຊ້ງຕາມປ່ອງບິ້ແສ້ຕໍ່ບຣານພຣະເຢຊູເຈົ້າ ເຄິ່ງທຣະດີປະຊາຊົນ. 20ເຢີພຣະເຢຊູເຈົ້າບອນເຂົ້າໃຈຣ້ວຍ ຈຸມປີດໍເວິຍຄວາມເຊື່ອເຕິ ພຣະອົງອ້າເຢີກຸ້ຍເປ້ຍກຼີຣ້ວຍ,“ສະຫາຍເອີຍ ກືອະໄພຄວາມຜິດບາບກໍາຂອງມາຍເອີ້ຍມະກຼີເຢີ.” 21ຈຸມທໍາມະຈານ (ອາຈານສອນກົດບັນຍັດ) ນັງຈຸມຟາຣີຊາຍ ຈຶ່ງເລີ່ມຄິດຣ້ວຍ“ງ້າຍກຸ້ຍນໍ ທີ່ກຳລັງຈະຣ້ວຍໝິ່ນປະໝາດພຣະເຈົ້າ?ເວິຍແຕ່ພຣະເຈົ້າມະນະກຼີທີ່ອາໄພຍົກໂທດຄວາມຜິດບາບກໍາບອນ.” 22ພຣະເຢຊູເຈົ້າຮອຍຄວາມຄຶດຂອງປີດໍ ຈຶ່ງກ່າວເຢີປີດໍຣ້ວຍ. “ເກີດອະໄມ້ຄຶດຣ້ວຍສິ່ງນໍເກີດການໝິ່ນປະມາດຕໍ່ສູ້ພຣະເຈົ້າ? 23ອັນມໍ້ງ່າຍກວ່າ ທີ່ຈະໂຊຣຣ້ວຍ, ບາບກໍາຂອງມາຍບອນຣຳ້ຍົກໂທດເຢີ'ຫລືຈະໂຊລຣ້ວຍ, ຈົ່ງໂຢຼລຊໍ້ ແລະຫະດ້າວປໍ້້ 24ແຕ່ກືໄອ້ໂຢນຈຸມແປຼຫອມຣ້ວຍ ບຸດມະນຸດເວິຍສິດອຳນາດເຕິຫະຢົ໋ງແຜ່ນບິ້ໂລກ ໂຢນຍົກໂທດບາບກໍາຂອງກຸ້ຍ (ມະນຸດ) ບອນ.” ອີກຼີ ພຣະເຢຊູເຈົ້າຈຶ່ງກາ່ວເຢີກຸ້ຍເປ້ຍຣ້ວຍ “ກືສັ່ງມາຍໂຢນໂຢຼລຕະເຢິ່ງ ຕະຢຼົ້ງເຣິ້ບອນບິດຂອງມາຍ ແລະໂຈດຸງສາ.” 25ເຕິທັນໃດກຼີ ກຸ້ຍເປ້ຍກໍໂຢລຊໍ້ຕໍ່ບຣານຈຸມປີດໍຄູ່ນະ ຕະຢຼົ໋ງເຣິບອນບິດຂອງມາຍເຄີຍບິດ ແລະລ້າໂຈ້ດຸງພ້ອມທັງສັນລະເສີນພຣະເຈົ້າ. 26ຈຸມປີດໍຄູນະຕາ່ງກໍງຶດກະລັກພະໄຫ້ງປູດທີ່ສຸດ ແລະກ່າວສັນລະເສີນພຣະເຈົ້າ.ຈຸມປີດໍກຼໍ້ຣິດອຳນາດຂອງພຣະເຈົ້າແລະຈຸມປີດໍບອນສະແດງຄວາມເຄົາລົບນັບຖືທີ່ເຄິ້ຣຍສຸດໂຢນເຢີພຣະເຢຊູເຈົ້າຢ່າງເຕັມທີ່ອັດກຼີ ຈຸມປີດໍກໍໂຊລຣ້ວຍ,“ຕະງາຍດໍ ຈຸມແຮບອນຫອມສິ່ງທີ່ເຫືລອເຊື່ອ.”
ພຣະເຢຊູເຈົ້າກາວອິດເລວີ
(ມທ 9:9-13; ມຣກ 2:13-17)
27ຢຼ້າຍເກີດເຫດການນໍເຢີ,ພຣະເຢຊູກໍລໍ້ປໍ້້ ແລະ ຫອມກຸ້ຍເກັບພາສີມະນະພະນຶ້ຣ້ວຍ ເລວີ(ມັດທາຍ),ຕະກູອັດເຕິດານພາສີ ພຣະເຢຊູເຈົ້າກ່າວເຢີດໍຣ້ວຍ,“ຈົ່ງປໍ້ປິນກືເຕິ.” 28ເຢີເລວີຊັງດໍກໍໂຢຼລຕະເຢິ່ງຊໍ້ໄວ້,ດໍກໍສະຫລະເອີ້ຍຄູສິ່ງຕ້າວຽກງານເກັບພາສີ ແລະປິນພຣະອົງປໍ້້. 29ຢ້າຍເລວີກໍບອນຈັດງານຈ້າລ້ຽງສະຫຼອງອັນເຄິ້ລຍຊໍ້ ເຕິດຸງບອມຢຼະເພື່ອຖະຫວາຍກຽດເຢີພຣະເຢຊູເຈົ້າ ແລະເວິຍກຸ້ຍເກັບພາສີນັງກຸ້ຍກະນໍ້ແອັ້ນ ຈຳນວນກະເລິ່ງນະເຕິຮ່ວມມະຕ້ຼຸໂຢຼ. 30ຈຸມຟາຣີຊາຍນັງຈຸມທໍາມະຈານ (ອາສອນກົດບັນຍັດ) ນູ້ທີ່ເກີດຫະຣ້າຂອງຈຸມປີດໍ ບອນຈົມຕຳໜິຕິຕຽນເຢີຈຸມສາວົກຂອງພຣະເຢຊູເຈົ້າ,ຈຸມປີດໍຕະມໍ໋ຣ້ວຍ. “ເກີດອະໄມ້ຈຸມແປຼຈຶ່ງຈ້າແລະຫງ້ອຍນັງກຸ້ຍເກັບພາສີ ແລະກຸ້ຍເລິ້ຍບອນສິນທຳ.” (ກຸ້ຍຕະບາບ) 31ພຣະເຢຊູເຈົ້າທະອອຍປີດໍຣ້ວຍ,“ກຸ້ຍທີ່ເວິຍສຸຂະພາບອໍເລິ້ຍຕ້ອງການໝໍ ເວິຍແຕ່ກຸ້ຍໄອໂຊອັນກຼີຕອ້ງການໝໍ. 32ກືເລິ້ຍບອນເຕິເພື່ອກາວອິດກຸ້ຍສິນທຳ,ແຕ່ເຕິກາວອິດກຸ້ຍເລິ້ຍບອນສິນທຳໂຢນຕູ໋ພະໄຫງ້ຕີ້ອິດພະໄຫ້ງຕະແມ້.”
ຄຳຖາມເລື່ອງການຖືສິນອົດແນວຈ້າ
(ມທ 9:14-17; ມຣກ 2:18-22)
33ຢ້ຼາຍບາງກຸ້ຍກໍໂຊລເຢີພຣະເຢຊູເຈົ້າຣ້ວຍ, “ຈຸມສິດຂອງໂຢຮັນຖືສິນອົດແນວຈ້າຕະຫຼອດເລີຍ ແລະຕະພິທີພາວັນນາອະທິຖານ ແລະສິດຂອງຈຸມຟາຣີຊາຍກໍຕະທຣະເລີຍ ສ່ວນ ສາວົກຂອງທ່ານເຢີພັດຈ້າແລະຫ້ງອຍ.” 34ພຣະເຢຊູເຈົ້າທຣະອອຍຈຸມປີດໍໂດຍອິດຕົວຢ່າງຣ້ວຍ, “ມາຍຄິດຣ້ວຍ ຈະໂຢນບັນດານູ້ຂອງຫະໂກນຕ້ອງບອນຣຳ້ຄວາມໂສກເສົ້າຍ້ອນອົດແນວຈ້າລືເລິ້ຍ?ເຢີຫະໂກນນັງໃດອັດນັງປີດໍ? 35ແຕ່ຈະເວິຍມູຕະງ້າຍເຕິກະເລິ໋ຍ ເຢີຫະໂກນຈະຕ້ອງຕ້າເກີດຈຸມປີດໍປໍ້້ ໂດຍສັດຕູຂອງດໍ ຢຼ້າຍເຕິເວລາກຼີມູນູ້ ຈຸມປີດໍຈະຖືສິນອົດແນວຈ້າແລະໂສກເສົ້າ.” 36ເຢີພຣະອົງນັງບອນກ່າວຄໍາອຸປະມາ ນໍເຢີຈຸມປີດໍຫະແງ້ຣ້ວຍ. “ເລິ້ຍບອນນູ້ມໍ້ດອກ ທີ່ຈະແຢ້ຼຈະແຮແພຣຕະແມ້ ເພື່ອໃຊ້ຕະຕາບຈະແຮແພຣຕີ້ ຄັນຕະອີກຼີ ກໍຈະຕະຈະແຮແພຣຕະແມ້ຫະໄຕ້ເປິດປໍ້້ ແລະແພຣໂຕຕະແມ້ກໍຈະເລິ້ຍສົມນັງຈະແຮຕີ້. 37ເລິ້ຍບອນນູ້ມໍ້ດອກ ທີ່ອິດເດີ໋ອະງຸ່ນ ຕະແມ້ຫະຍະຖົງກຼັ້ລຕີ້,ເພາະເດີ໋ອະງຸ່ນຕະແມ້ຕະໂຢນຖົງກຼັ້ລຫະໄຕ້,ເດີ໋ອະງຸ່ນຈະຫະໂຕ້ລໍ້ ແລະຖົງກຼັ້ລກໍຈະເປິ້ດປໍ້້ມະຕຼຸ. 38ແຕ່ເດີ໋ອະງຸ່ນຕະແມ້ຕ້ອງຫະຍະເຕິຖົງກຼັລຕະແມ້. 39ແລະເລິ້ຍບອນນູ້ມໍ້ດອກ ທີ່ຈະໄອ້ບອນເດີ໋ອະງຸ່ນຕະແມ້ຢຼ້າຍເກີດຫງ້ອຍເດິ໋ອະງຸ່ນຕີ້ຢຼ້າຍ ດໍຍ່ອມໂຊລຣ້ວຍ, ອັນຕີ້ກຼີເຫິ້ຍ ອໍກວ່າ.”
Currently Selected:
ລູກາ 5: IRR
Highlight
Copy
Compare
Share
Want to have your highlights saved across all your devices? Sign up or sign in
Inh/In Bible by Beyond Translation is licensed under Creative Commons Attribution-ShareAlike 4.0 License.
