ລູກາ 14
14
ພຣະເຢຊູເຈົ້າປິນປົ່ວກຸ້ຍເກີດພະຍາດນິ້ປາງໂຢນອໍ
1ເຕິວັນຊະບາໂຕມູຕະງາຍ ພຣະເຢຊູເຈົ້າບອນປໍ້້ຮ່ວມພາໂດ້ຍ ບ້ອນດຸງຂອງຜູ້ນຳກຸ້ຍຟາຣີຊາຍກຸ້ຍມະນະ ຈຸມປີດໍຕ່າງກໍຈຳ້ແນ້ພຣະເຢຊູເຈົ້າຢ່າງຕະໝັ້ນ ເພື່ອຈະແນ້ຣ້ວຍ ພຣະອົງຈະຕະສິ່ງມໍ້ບາງຢ່າງຕໍ່ສູ້ນັງກົດບັນຍັດຂອງຈຸມປີດໍ ຫຼື ເລິ້ຍ. 2ເຕິບຣານພຣະອົງເວິຍໂກນກຸ້ຍມະນະ ທີ່ເກີດພະຍາດນິ້ປາງ ບອນອັດເຕິກຼີນຸງດຸງຂອງກຸ້ຍຟາຣີຊາຍນູ້ກຼີ. 3ອັນກຼີ ພຣະເຢຊູເຈົ້າຈຶ່ງຕະມໍ໋ທໍາມະຈານ (ຜູ້ສອນກົດບັນຍັດ) ແລະຈຸມຟາຣີຊາຍຣ້ວຍ,“ກົດບັນຍັດຂອງຈຸມແຮ ອະນຸຍາດຕະໂຢນອໍເຕິຕະງາຍວັນຊະບາໂຕຫລືເລິ້ຍ?” 4ຈຸມປີດໍກໍມິດຫະອຽດ ພຣະອົງຈຶ່ງຊົງຣຳ້ອິດກຸ້ຍກຼີ ແລະປິນປົ່ວໂຢນອໍພະຍາດເຢີກໍປ່ອຍປໍ້້. 5ຢຼ້າຍພຣະອົງກໍກ່າວເຢີຈຸມປີດໍຣ້ວຍ,“ຄັນກຸ້ຍມໍ້ກຸ້ຍມະນະ ເຕິຈຸມແປຼເວິຍໄກ້ ຫລືຕະແກ້ງຫະໂຕ໋ເດີ໋ພຼຸງເຕິຕະງາຍວັນຊະບາໂຕ ດໍຈະເລິ້ຍຊັລກະຕຼັອງຊໍ້ລະ?” 6ແຕ່ຈຸມປີດໍເລິ້ຍສາມາດທະອອຍພຣະອົງບອນກ່ຽວນັງເລື່ອງນໍ.
ຄວາມຖ່ອມໃຈ ແລະ ການຕ້ອນຣຳ້ແຂກ
7ເຢີພຣະເຢຊູເຈົ້າສັງເກດຫອມບັນດາຜູ້ທີ່ຄຣາຍເຊີນເຕິ ເລືອກຕະກູເຕິບ້ອນທີ່ເວິຍກຽດ ພຣະອົງຈຶ່ງກ່າວຄໍາອຸປະມາໂຢນຈຸມປີດໍຫະແງ້ຣ້ວຍ, 8“ເຢີເວິຍບາງນະເຊີນແປຼປໍ້້ງານຈ້າລຽ້ງເຕິພິທີແຕງດອງ ຊິນສູ່ເລືອກຕະກູບ້ອນທີ່ເວິຍກຽດ ເພາະກຸ້ຍທີ່ເວິຍກຽດປູດກວາ່ແປຼອາດຈະບອນຄຣາຍເຊີນເຕິ. 9ຄັນເກີດອີກຼີ,ເຈົ້າພາບນູ້ທີ່ເຊີນແປຼເອີ້ຍບາລ ກໍຈະໂຊລເຕິນັງແປຼຣ້ວຍ, ຈົ່ງໂຢນບ້ອນທີ່ແປຼຕະກູອັດເຢີກຼີ. ເຢີແປຼກໍຕ້ອງຍ້າຍປໍ້້ຕະກູບ້ອນຫະຣອບທີ່ສຸດດ້ວຍຄວາມກະດ້າ. 10ແຕ່ເຢີເວິຍກຸ້ຍເຊີນແປຼປໍ້້ເຕິງານ ຈົ່ງປໍ້້ຕະກູບ້ອນຫະຣອບທີ່ສຸດ ເພື່ອຣ້ວຍເຢີເຈົ້າພາບເຕິເຢີ ດໍຈະໂຊລນັງແປຼຣ້ວຍ, ສະຫາຍເອີຍ ເຊີນປໍ້້ຕະກູບ້ອນຫະຢົ້ງກວາ່. ເຢີແປຼກໍຈະບອນຣຳ້ກຽດ ຕໍ່ບຣານບັນດາແຂກຄູນະ ທີ່ບອນຄຣາຍເຊີນເຕິກຼີ. 11ເພາະຣ້ວຍ, ຄູນະທີ່ຍົກຈະຊໍ້ ຈະຕ້ອງຄຣາຍແຊ້ງ ແລະນູ້ທີ່ຖ່ອມຈະແຊ້ງຈະບອນຣຳ້ການຕະຢົ້ງຊໍ້.” 12ເຢີພຣະເຢຊູເຈົ້າກໍຈະກ່າວເຢີນູ້ທີ່ເຊີນພຣະອົງຣ້ວຍ, “ເຢີແປຼຈັດງານຈ້າລ້ຽງຊໍ້ ເລິ້ຍຣ້ວຍແກັດ ຫລື ເຄິ້ລຍກໍຢຼ້າຍ ຊິນເຊີນສະເພາະແຕ່ບັນດາມິດສະຫາຍ ຫລືຈ້າຍມໍ້ແອ້ມ ຫລືຍາດຕິພີ່ນ້ອງ ຫລືມູນູ້ທີ່ຮັງມີ ເພາະນູ້ຈະເຊີນມາຍລ້າເກີດການຕອບແທນ. 13ເເຕ່ເຢີມາຍຈັດງານຈ້າລຽ້ງຊໍ້ ຈົ່ງເຊີນກຸ້ຍທຸກຍາກ ກຸ້ຍພິການ ກຸ້ຍພະລາວເປະແລະກຸ້ຍກະໝັ້ນໂສດ, 14ເຢີມາຍກໍຈະເກີດສຸກ ເພາະຈຸມປີດໍເລິ້ຍບອນອະໄມ້ຈະຕອບແທນມາຍ, ແຕ່ພຣະເຈົ້າຈະຕອບແທນ ເຢີກຸ້ຍຊອບທຳລ້າມົ໋ງເກີດກະເຈດ.”
ຄຳອຸປະມາເລື່ອງການຈ້າລ້ຽງເຄິ້ຍ
(ມທ 22:1-10)
15ເຢີມະນະ ເຕິບັນດາກຸ້ຍກຳລັງຕະກູຮ່ວມພາໂດ້ຍນັງພຣະເຢຊູເຈົ້າ ບອນຊັງອີກຼີ ດໍຈຶ່ງໂຊລນັງພຣະອົງຣ້ວຍ,“ນູ້ທີ່ຈະຕະກູຮ່ວມຣຳ້ຈ້າໂດ້ຍ ບ້ອນງານຈ້າລຽ້ງເຕິອານາຈັກຂອງພຣະເຈົ້າອີກຸ້ຍອັນກຼີ ນູ້ທີພຣະເຈົ້າປົກຄອງເປັນຫ່ວງກໍເກີດສຸກແທ້ໜໍ.” 16ພຣະເຢຊູເຈົ້າຊົງທະອອຍນູ້ກຼີຣ້ວຍ,“ນັງເວິຍກຸ້ຍມະນະ ທີ່ຈັດງານລ້ຽງຊໍ້ ແລະເຊີນກະເລິ່ງນະເຕິຮ່ວມ. 17ເຢີກະເລິ້ຍເວລາຈ້າລຽ້ງເຢີ ດໍບອນແຕງກຸ້ຍຣຳ້ໃຊ້ຂອງບອມຢຼະ ປໍ້້ອ້າຈຸມທີ່ຄຣາຍເຊີນກຼີຣ້ວຍ, ເຊີນເຕິ ຄູໆສິ່ງກໍຕຽມພ້ອມເຢີ. 18ແຕ່ຄູນະບອນເລີມແກ້ຕົວ (ອ້າເຫດຜົນ) ນູ້ທຳອິດໂຊລນັງກຸ້ຍຣຳ້ໃຊ້ກຼີຣ້ວຍ, ກືບອນຈອງປຼໍ້ມະໄຫລ້ດໍ້ ແລະກືຈຳເປັນຕ້ອງປໍ້້ແນ້ປຼໍ້ກຼີ ກືຕ້ອງຂໍໂທດນຳປູດໆ. 19ກຸ້ຍກະນໍ້ໂຊລຣ້ວຍ. ກືບອນຈອງຕະແກ້ງດໍ້ຫ້າຄູ່ ແລະກືກຳລັງຈະປໍ້້ລອງແນ້ຕະແກ້ງກຼີກືຈະຂໍໂທດນຳປູດໆ. 20ກຸ້ຍກະນໍ້ແອັ້ນໂຊລຣ້ວຍ, ກືຫາກໍຈ້າດອງ ເພາະເຫດກຼີກືຈຶ່ງປໍ້້ເລິ້ຍຫອຍບອນ. 21ອັນກຼີ ກຸ້ຍຣຳ້ໃຊ້ຈຶ່ງຣ້າເຕິເລົ່າເລື່ອງເອີ້ຍມະກຼີເຢີນາຍຂອງບອມຢຼະຫະແງ້ ເຢີເຈົ້າຂອງດຸງກໍພະໄຫ້ງໄອ້ຢັອງປູດ ແລະກາ່ວເຢີກຸ້ຍຣຳ້ໃຊ້ຣ້ວຍ, ຈົ່ງຊັລລໍ້ປໍ້້ຕາມທະໜົນເຄຣິ້ຍ ແລະຄະນ້າແກັດເຕິຕົວເມື່ອງ ແລະພາກຸ້ຍທຸກຍາກ ກຸ້ຍພິການ ກຸ້ຍກະລອງໝັ້ນໂສດ ແລະກຸ້ຍພະລາວລອຍໂມດເຕິບອນນໍ. 22ຢຼ້າຍເກີດກຼີເລິ້ຍບອນດິນ ກຸ້ຍຣຳ້ໃຊ້ກໍເຕິອ້າຣ້ວຍ, ທ່ານເອີຍ, ກືຢຼະບອນປະຕິບັດຕາມທີ່ທ່ານສັ່ງເຢີ ແຕ່ນັງເວິຍບ້ອນຫວ່າງອັດ. 23ອັນກີຼ ນາຍບອມຢຼະຈຶ່ງອ້າຣ້ວຍ, ຈົ່ງລໍ້ປໍ້້ຕາມຄະນ້າເຄຣິ້ຍແລະແກັດທີ່ເຄົ້ຣາຕົວເມືອງເພື່ອອິດຈະຈຸມປີດໍໂຢນໂມດເຕິ ເພື່ອໂຢນເຕັມດຸງຂອງແຮ. 24ກືອ້າແປຼເອີ້ຍຄູນະຣ້ວຍ, ເຕິບັນດາກຸ້ຍທີ່ບອນຄຣາຍເຊີນກຼີ ຈະເລິ້ຍບອນນູ້ມໍ້ ບອນຊີມແນວຈ້າເຕິງານຈ້າລຽ້ງແຮເລິ້ຍບອນພໍມະນະເຢີກືເກີດກະສັດ.”
ຄຸນຄ່າຂອງການເກີດສາວົກ
(ມທ 10:37-38)
25ມູຕະງາຍ ເຢີປະຊາຊົນຈຳນວນກະເລິ່ງປູດ ບອນປໍ້້ນັງພຣະເຢຊູເຈົ້າພຣະອົງຈຶ່ງບອນຫະງອຍ ເຕິກ່າວເຢີຈຸມປີດໍຣ້ວຍ, 26“ຄັນນູ້ມໍ້ເຕິເຢີແຮແລະເລິ້ຍເອິ້ຍອຳອຸຍ,ໄກ້ກະປຼາຍ, ຈາ້ຍແອ້ມກັນ ໂກນ ເອີ້ຍທຼະງຶ້ຂອງບອມຢຼະ ນູ້ກຼີຈະເກີດສາວົກຂອງກືເລິ້ຍຮອຍບອນ. 27ນູ້ມໍ້ເລິ້ຍບອນດັ້ວລ້ອງກາງແຂນຂອງບອມຢຼະປິນກືເຕິ ນູ້ກຼີຈະເກີດສາວົກຂອງກືເລິ້ຍຮອຍບອນ.” 28“ເພາະຣ້ວຍ ເຕິຈຸມແປຼເວິຍນູ້ມໍ້ເຢີຈະຕະຫໍຄອຍແຫ່ງມະໄຫລ້ ດໍຈະເລິ້ຍບອນຕະກູແຊ້ງຄິດໄລ່ລາຄາຢາ່ງລະອຽດຍຸງຣ້ວຍ ບອມຢະເວິຍພຽງພໍສາ້ງໂຢນເອີ້ຍຢຼ້າຍຫລືເລິ້ຍ. 29ກຼໍ້ຼຣ້ວຍຢຼ້າຍເກີດວາງຮາກຖານແຊ້ງເຢີ ເລິ້ຍສາມາດຕະໂຢນຢ້ຼາຍບອນ ກຸ້ຍທີ່ຮອມກໍຈະກາ່ວເຢາະເຢີ້ຍຫະກຣາຍດໍຣ້ວຍ, 30'ກຸ້ຍນໍເລີ່ມຕົ້ນກໍ່ບອນເຢີ ແຕ່ຕະໂຢນຢຼ້າຍເລິ້ຍຮອຍເລີຍ.” 31“ຫລືເວິຍກະສັດນູ້ມໍ້ ເຢີຈະຍົກທັບລໍ້ປໍ້້ສູ້ຮົບ ໂດຍເວິຍພົນທະຫານໜຶ່ງໝື່ນ ເພື່ອສູ້ຮົບນັງກະສັດນູ້ກະນໍ້ ທີ່ເຕິໂຈມຕີໂດຍເວິຍພົນທະຫານສອງໝື່ນ ດໍຈະເລິ້ຍຕະກູຄຶດແນ້ຍຸງຣ້ວຍ ກຳລັງຂອງບອມຢຼະແຂງແຮງພໍທີ່ຈະປະເຊີນບຣານນັງຄູ່ຕໍ່ສູ້ບອນລືເລິ້ຍ. 32ຄັນຕໍ່ສູ້ເລິ້ຍຮອຍບອນ ເຕິຂະນະອັດເຢີງ ດໍກໍຈະແຕງທູດປໍ້້ພົບກະສັດນູ້ກຼີ ເພື່ອຕະມໍ໋ເງື່ອນໄຂ່ຂອງການສະຫງົບເສິກ. 33ເຕິທຳນອງມະໄຫລ້ ຈຸມແປຼຈະເກີດສາວົກຂອງກືເລິ້ຍບອນ ຄົນເລິ້ຍຍອມສະຫລະຄູໆສິ່ງທີ່ບອມຢຼະເວິຍກຼີ.”
ເລື່ອງບ້ອຍທີ່ເອີ້ຍຄວາມຫຕັ້ງ
(ມທ 5:13; ມຣກ 9:50)
34“ບ້ອຍເກີດຂອງອໍ ແຕ່ຄັນບ້ອຍເອີ້ຍຄວາມຕັ້ງເຢີ ກໍເລິ້ຍບອນຄະນ້າທີ່ຈະຕະໂຢນລາ້ຕັ້ງບອນແອັ້ນ. 35ຈະໃຊ້ດໍເກີດຝຸ່ນຫະຍະບິ້ກໍເລິ້ຍຮອຍບອນ ຫລືຈະໃຊ້ປະສົມນັງກອງອໍ້ສັດ ເພື່ອຕະຝຸ່ນກໍເລິ້ຍຮອຍບອນ ມີແຕ່ເຣິໂຍນຕູ໋ປໍ້ສາ ອັນກຼີ ນູ້ມໍ້ເວິຍກະໂຕລຫະແ້ງ ຈົ່ງຫະແງ້ສາ.”
Currently Selected:
ລູກາ 14: IRR
Highlight
Copy
Compare
Share
Want to have your highlights saved across all your devices? Sign up or sign in
Inh/In Bible by Beyond Translation is licensed under Creative Commons Attribution-ShareAlike 4.0 License.
