Romio 16
16
Polaʹ johar katha
1Niâjhikâ ingdo aboren mesra Febioaʹ manjaonaʹ bisoite ape metapekâning. Ânido Kingkriâ sohornaʹ monḍoliren seoaiʹkane. 2Issorren pobitro âdmiko akalaka apnakoaʹ ucitʹ âniho apete Probhuoaʹ nutumte atangipe. Jahan beparte âni judi apeṭheʹ gorosoʹe tahale ânido goroipe, ânite aima âdmi, emonki ingho gorokâdinge.
3Priskilla ar Âkila ingâʹ johar makinâm. Ângkin Khrisṭo Jisuoaʹ kâmire ing saote khaṭokanakin. 4Kheʹ ângkindo ing bipod khoiʹ bacong laʹte âkinaʹ jiuire jhuki engekadakin. Kebol ingte ângkin dhonnobad makining anado bang kheʹ sanam Ojihudi monḍolikoteho ângkin dhonnobad makinkanako.
5Ângkinaʹ oraʹre ekeko monḍoli hisâbte miʹṭheʹ jaoroʹako angkoho johar makoape.
Esia prodisâmre palhe ekete Khrisṭo atanglidie ingren âni dulârniʹ gate Ipenitʹho johar maiape.
6Moriom, ekedo ape laʹte aima khaṭokane, âniho johar maiape.
7Andronik ar Juniâho johar makinâpe. Jihudikoho ekekin ing saote jelre bundi tahelenakin. Ângkindo Preritkoteho aima sonmankinsanako. Ângkindo ing laharigi Khrisṭo cetanre pâtyulenakin.
8Probhu saote salaʹ ingren dulârren gate Ampliatho Issor suliʹ salaʹ miniâ. 9Urbân, ekedo abo saote Khrisṭo laʹte kâmie,
âni ar ingren dulârniʹ gate Istakhisho johar makinâpe. 10Apellisho johar maiape. Ekedo Khrisṭoren miṭiʹ khâṭi pâtyuiʹ das tahalene.
Arisṭobulren oraʹren âdmiko johar makoape. 11Herodiân, ekedo ing lakagi Jihudikane, âniho johar maiape.
Narkisaʹ oraʹren âdmiko ekeko Probhuren âdmikanako angko johar makoape. 12Trufena ar Trufosaho johar makinâpe. Nâkin rejado Probhu laʹte khaṭoʹakin.
Dulârniʹ Porsisho johar maiape. Ni rejaho Probhu laʹte aima kâmikade.
13Rufho johar maipehaʹ. Âni Probhuren miṭiʹ bises âdmikane, âniren engatho johar maipehaʹ âniren engatho ing âniren gidrâ laka dulâringe.
14Osungkrit, Fligon, Hermes, Patrobas, Hermas ar angko saote Khrisṭore pâtyuiʹ eṭaʹ boiha ar mesrakoho johar makoape.
15Fillog, Juliâ, Nirio ar âniren mesra, Ulumpo ar angko saote Issorren ekeko pobitro âdmi menaʹkoa angko sanamkhoiʹ johar makoape.
16Pobitro cumâ maketeʹ apetedo miʹhorte ar miʹhor subheccha makoape.
Khrisṭoren sanam monḍolikote ape johar mapekanako.
Mucitʹ upodes
17Boiha ar mesrako, ingte ape nehorpekâning ape akaṭaʹ cetʹaʹ namkadape, anana badalte ekeko doladoli ar badha sirjiako, apedo angkoṭheʹ khoiʹ sâhingre tahenpe, 18karon neko âdmiko aboren Probhu Jisu Khrisṭoaʹ bang seoaketeʹ borong nijegi kusiʹlaʹ kurumuṭiako. Herem herem katha menketeʹ nirdos âdmiko ṭhakoʹkoako. 19Akalkate abote Issor manoiabo ana kathado sanamkhoiʹgi atenkadako, ar analaʹte ingdo ape cetanre kusikâning. Ingdo khojoʹing ape sanamkhoiʹ akaṭaʹ manjaoa ana cinhuketeʹ atangpe ar kharap khoiʹ sâhingre tahenpe.
20Issor, Ekedo sânti emoʹe Ânite saṭlakagi Soitando apeyaʹ janga latarre giṛiketeʹ gejeriheʹ.
Aboren Probhu Jisuoaʹ daya ape cetanre tahenman.
21Timothiote, ekedo ing suliʹ kâmie ânite ape johar mapekane, Lukio, Jason ar Sosipatroteho ape johar mapekanako. Angkoho ing lakagi Jihudi jâtren âdmikanako.
22Ingdo Tortiokâning, Polren hoketeʹ niâ ciṭhi olding. Ingdo Probhuren miṭiʹ pâtyuiʹkâning.
23-24Ing ekeyaʹ oraʹre tahening ar monḍoliren âdmiko ekeyaʹ oraʹre miʹṭheʹ jaoroʹako âni Gâyuste ape johar mapekane. Niâ sohornaʹ ṭhepnaʹ hisâb doheyaʹ bhar ekeyaʹ cetanre menaʹa âni Irasto ar aboren boiha Kartote ape johar mapekanakin.
Polaʹ mucitʹ koijong
25Hijuʹpe abote Issor gourob maiabo. Jisu Khrisṭoaʹ bisoite akaṭaʹ manja khobor ing procaring ana manja khobornaʹ talate ape suktisâliketeʹ dohopeyaʹ khomota Issoraʹdo menaʹtaia. Aima bochor dhâbiʹ Issor Aiaʹ baionaʹ uddessonaʹ bisoite ekeho bang metakaʹkoe, 26Kheʹ nitoʹ mucitʹ dhâbiʹ men hokana. Ononto Issoraʹ hukum laka nâbikoaʹ olaʹ talate sanam jâtren âdmikoṭheʹ ana baṛeso hokana, jate angko Khrisṭoaʹ cetanre pâtyuketeʹ Issoraʹ baddho darenako. 27Eken Âni eskargie Issor, Ânigie sâriyiʹ geni. Jisu Khrisṭoaʹ talate cirokal Âniaʹgi gourob hoʹmantai. Amen.
Currently Selected:
Romio 16: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
