Romio 15
15
Eṭaʹoni kusikope ape nijedo bang
1Judi Aboaʹ pâtyu keṭeʹgoʹtaboa, tahale aboaʹ ucit Probhuren âdmiko ar ekekoaʹ pâtyu durbolgitakoa angko laʹte dhirjâ sabaʹ, abo nijeoaʹ badalte angko kusikoaʹ kurumuṭiaʹ ucit. 2Abo sanamkhoiʹaʹ ucit ekeko durbolgiâko angko laʹte manja cintiaʹ ar gorokoaʹ, akaṭaʹtedo angko pâtyure keṭeʹketeʹ rakap darenako. 3Khrisṭo Aiʹdo kusilaʹ bang kurumuṭukade. Pobitro sastrore ol menaʹa, "Issor, ekekote Am opomanmiâko angkoaʹ sanam opoman Ing cetanrigi hiʹkana."#Siringko 69:9 4Pobitro sastrore akako katha lahare ol holena anakodo abo cetʹobo laʹtigi ol holena, jate ana sastro khoiʹ abo saho ar sâhus namabo ar analaʹte abo asa namabo. 5Saho ar sâhus emoʹiʹ Issorte ape sanamkhoiʹaʹ mon mitʹtapemane jate ape miʹsaote Khrisṭo Jisu saote ca darenape. 6Tahale ape mon ar mocate mitʹketeʹ aboren Probhu Jisu Khrisṭoren Issor ar Botaʹ gourob dareʹpehaʹ.
Manja khobordo sanam âdmiko laʹtigi
7Issoraʹ gourob jate sodoroʹa, analaʹte Khrisṭote akalka ape atangkaʹpeye engkagi apeteho miʹhorte ar miʹhor atangkope. 8Disâ dohepe, Issor Jihudikoren sederen âdmiṭheʹ akaṭaʹ rikitlede ana purun laʹtigi Khrisṭodo Jihudiren seoaiʹ holene. Jate Issor je pâtyuiʹkane ana promanoʹa. 9Ânido Ojihudiko laʹteho hiʹlene jate Ânioaʹ mayate Ojihudiko Issoraʹ gourobako. Pobitro sastrore ol menaʹa,
"Niâlaʹtigi Ojihudikoaʹ talare Ing Amaʹ gourobinghâʹ,
Amaʹ nutumte prosongsanaʹ siringinghâʹ."#Siringko 18:49
10Abar menhokana,
"He Ojihudiko, apedo Issorren âdmiko saote Âniaʹ prosongsepe."#Dosarbiboron 32:43
11Sastro arho mene,
"He Ojihudiko, Probhuoaʹ gourobpe,
Sanam disâm Âniaʹ prosongsepe."#Siringko 117:1
12Arho Jisaio menkade,
"Eke Jisoyren miṭiʹ asoliʹ gusṭi hijuʹheʹ,
ekedo Ojihudi sasonko laʹte Âni tengonheʹ.
Âni cetanrigi Ojihudiko asoʹkoheʹ."#Jisaio 11:10
13Eke asa emoʹe Âni Issortedo apeyaʹ pâtyu talate sanam hub ar sântite ape pereʹpemane. Tahale Pobitro Attaoaʹ suktite apeyaʹ ontorre asa umṛu ujugoʹhaʹ.
Pol aiʹa kâmi somporke menkede
14Ingren boiha ar mesrako, ingdo ape somporke niâ katha pâtyuʹing je, apeyaʹ ontordo manja icchâte pereʹgitapeya, apeyaʹ sanam lakanaʹ gen menaʹtapeya, ar ape miʹhorte armiʹhor cetʹokope. 15Taoreho koekṭeʹ bisoi ape disâpe laʹte ing sâhusketeʹ apeṭheʹ niâ kathako olkiding, karon Issorte ing niâ daya makâdinge je, 16jate ing Ojihudikoṭheʹ Khrisṭo Jisuren miʹhor purohit hoketeʹ Issoraʹ manja khobor procaring, jate Ojihudiko Pobitro attaoaʹ utsorgo hisâbte atang lakaniʹ hoʹako.
17Ingdo Issor laʹte akaṭaʹ kâmiding ana bisoite Khrisṭo Jisuoaʹ talate ingâʹ gourobaʹ odhikar menaʹtingâ. 18Khrisṭo ing laʹte akaṭaʹ rikâkade ananaʹ barheredo jahanaʹ katha menaʹ ingdo bang sâhusing, jate Ojihudikote Issor manoiako 19Obosso ing mening je Khrisṭo alkate ingâʹ katha ar kâmi talatigi ana rikâkade. Âni arho asarjo kâmi ar cinhât kâminaʹ talate ar Pobitro Attaoaʹ suktite Ojihudiko Issorraʹ baddhokaʹkoe. Anate ing Jirusalem khoiʹ ehobketeʹ Illurika dhâbiʹ ananaʹ câryunakhare Khrisṭoaʹ bisoite manja khobor purâte procarkâding. 20Akaredo tinreho Khrisṭoaʹ nutum men bang hokâniʹ aṛe manja khobor procargi hona ingâʹ jiuinaʹ lokkho, jate eṭaʹuniʹaʹ gatho roda cetanre ing jate teyarlaʹ bang hoʹtingâ. 21Pobitro sastrore ol menaʹa,
"Ekekoṭheʹ Âniaʹ bisoite bang men hokâniʹ angkodo ana aten namkohaʹ,
ar ekekodo tinreho bang atenkadako angkodo bujhu dareʹkohaʹ."#Jisaio 52:15
Polaʹ Romre caʹaʹ icchâ
22Ing ingâʹ kâmi laʹte apeṭheʹ bang hiʹdarekâning.
23Kheʹ ing niâko jagare ingâʹ kâmi cabakâding. Aima bochor dhâriʹ apeṭheʹ caʹloʹaʹ icchâ ingâʹ tahelentingâ, 24anate nitoʹ Ispen disâm caloʹaʹ ḍaharre ing apeṭheʹ caʹlaʹ namding. Ing asoʹkâning je, ana ḍaharte caʹ somai apeṭheʹ ca dareninghâʹ, ar ape saote thoṛa somai hubte kaṭo tayom apetigi ing Ispen disâm caʹ laʹte gorongpehaʹ.
25Kheʹ nitoʹ ing Issorren pobitro âdmiko goroko laʹte Jirusalem caʹkâning, 26karon Jirusalemre Issorren pobitro âdmiko talare ekeko rangeʹoreʹ âdmi menaʹkoa angko laʹte Mesiḍoniâ ar Akhayaren Khrisṭore pâtyu âdmiko thoṛa canda rakapkadako. 27Niâ candado angko khusiketeʹ rakapkadako. Ana bâgiketeʹ niâ monḍoliko Jihudikoṭheʹ rinigiâko, karon Jihudiko jâkhni angkoaʹ âttik âsirbadrenaʹ bhag Ojihudiko makaʹkoako tâkhni Ojihudikoaʹho ucitʹ akako âdmikoaʹ dorkaraʹ bisoite Jihudiko gorokoaʹ. 28Ing manjate niâ ṭhepko ma tayom, ing ape saote napamoʹhuʹ ar niâ tayom Ispen caʹhuʹ. 29Ing baṛeing jâkhni ing apeṭheʹ caʹinghâʹ tâkhni Khrisṭoaʹ pereʹ âsirbad laitigi caʹinghâʹ.
30Boiha ar mesrako, aboren Probhu Jisu Khrisṭoaʹ talate ar Pobitro Attaoaʹ maonaʹ dulâr talate ingte ape bisesketeʹ nehorpekâning, apedo Issorṭheʹ ing laʹte ing saote ontorte koijongpe. 31Ape koijongpe, jate ing Jihudiâren binpâtyuiʹṭheʹ khoiʹ bacoʹing, ar Jirusalemren Issorren pobitro âdmiko jate ingâʹ niâ goro atangako. 32Judi Issoraʹ icchâ hoʹa tahale ingdo khusi monte apeṭheʹ ca dareninghâʹ ar ape saote tahaketeʹ jiruʹinghâʹ. 33Sânti emoʹiʹ Issor ape sanamkhoiʹaʹ sao saote tahanmane. Amen.
Currently Selected:
Romio 15: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
