Johon 13

Jisute celaoaʹ janga âruptakoe

1Bacoaʹ porobnaʹ thoṛa lahare, Jisudo bujhu darelede je niâ dhârti bâgiketeʹ Botṭheʹ caʹaʹ somai hongekantaia, niâ dhârtire ekeko Aiʹren âdmiko tahelenako, Ânitedo angko dulârkosane, Ar mucitʹ dhâbiʹho dulârkeʹkoe.

2Nindânaʹ jom somai diabolte Simonren hopontetʹ Iskariot Jihudaoaʹ monre Jisu dusmânkoaʹ tire sabsoiaʹ icchâ jagoleʹtaye. 3Jisudo baṛekede je, Botte sanamaʹgi Aiʹ makâdie ar Ânido Issorṭheʹkhoiʹ hiʹkane, ar Issorṭheʹgi âcur caʹkane, 4Inâlaʹte Ânido jom bâgiketeʹ beretʹne, ar cetannaʹ gamcha boiʹketeʹ dohokede, ar miṭiʹ gamcha engeketeʹ ḍaṛare tolkede. 5Niâ tayomdo gamlare daʹ engekede ar celakoaʹ janga ârubtakolaʹ lagone. Ar ḍaṛanaʹ gamcha laraketeʹ angkoaʹ janga jottakolaʹ lagone.

6Nengkaketeʹ Ânido Simon Pitorṭheʹ hiʹne. Pitorte Âni metakidie, "Probhu, Amte ki ingâʹ janga ârubtingmahaʹ?"

7Jisute âni metakidie, "Ing itâʹ cikâding anado am nitdo bang bujhu dareʹkanam, kheʹ tayomte bujhimahaʹ."

8Pitorte Âni metakidie, "Amte tisho ingâʹ janga alo ârubtingâm."

Uttorre Jisute âni metakidie, "Judi amaʹ janga bang ârubâming, tahale am salaʹ Ingâʹ jahan somporko bânuʹtingâ."

9Simon Pitor menkede, "Probhu, khâli ingâʹ jangado bang, ingâʹ ti ar bohoʹho ârubgiriting."

10Jisute âni metakidie, "Eke umkane âniaʹdo janga bâgiketeʹ eṭaʹonaʹdo ârubtaiaʹ dorkar bânuʹa, karon ânito goṭa hormogi sâfâgie, Ar celako apedo sâfâgiâpe, kheʹ sanamkhoiʹdo bang." 11Cekelaʹbang ekete Âni sabsoiheʹ, Ânite âni cinhuisane. Niâlaʹte Âni menkede, "Apedo sanamkhoiʹdo bang sâfâoape."

12Ânite angkoaʹ janga ârup tayom, Ânido aiaʹ cetannaʹ lugri soroʹketeʹ arho duruʹne, tâkhni angkodo metakeʹkoe, "Ingdo apelaʹte itâʹ cikâkiding apedo ki ana baṛeyape? 13Apetedo Ingdo Guru ar Probhu metangape. Ar apete akaṭaʹ metangape anado ṭhikgi metangape, cekelaʹbang Ingdo Inigiying. 14Kheʹ Ingdo aperen Probhu ar Guru hoketeʹho apeyaʹ janga arupkeʹtapeing analaʹte apeyaʹho ucit miʹhorte ar miʹhoraʹ janga ârupaʹ. 15Ingdo apeṭheʹ niâ rikâketeʹ uduʹkâding, jate Ing Alka rikâkâding apeho engkagi rikipe. 16Ingte ape sârigi metapekâning, kâmi âdmido aiʹren mâlik khoiʹdo bang marange. Ekete kolkâdie Âni khoiʹdo eke kol hokana ânido bang marange. 17Niâko sanam bujhuketeʹ judi palonape tahale apedo dhonnogiâpe.

18"Ingdo apeyaʹ sanamkhoiaʹ kathado bang mending. Ingte ekeko bachokaʹkoing angkoto cinhukoing. Kheʹ Pobitro Sastronaʹ na katha purunoʹlaʹ hoʹhaʹ, 'eke Ing salaʹ jom nuie, âniho Ingâʹ biruddhe kâmie.'#Siringko 41:9 19Na ghoṭoʹ laharigi Ingtedo ape metapekâning jate, jâkhni ghoṭoʹhaʹ tâkhni apedo pâtyuʹape je, Inggiying Ânido. 20Ingte ape sârigi metapekâning, Ingte eke koleinghâʹ, ekete âni atangiheʹ ânitedo Inggi atangingheʹ, ar ekete Ing atangingheʹ, ânitedo ekete Ing kolkâdinge Ânigi atangiheʹ."

Ekete Probhu Jisu sabgirisoiheʹ

(Mothi 26:20-25; Mark 14:17-21; Luk 22:21-23)

21Niâko katha men tayom Jisudo attare kosṭo namkede, Ânido sakkho makede, "Sâri, sârigi Ingte ape metapekâning je ape bhitâr khoiʹ miʹhorte Ingdo sabsongheʹ."

22Jisudo ekeoaʹ katha mende ana bang bujhu dareketeʹ celakodo miʹhor ar miʹhor hate koyoglaʹ lagonako. 23Angko bhitârre Jisute eke cela dulârisane ânido Jisuoaʹ koramrigi hilânketeʹ tahelene. 24Simon Pitordo isâraketeʹ menkede, "Ânido ekeoaʹ katha mende kuliyipe."

25Âni celado tâkhni Jisu hate tumutʹnoʹketeʹ menkede, "Probhu, ânido ekekane?"

26Jisu uttorre menkede, "Niâ piṭhâ kecaʹ bâṭire ḍubuketeʹ eke mainghâʹ inigie âni âdmido." Ar Ânite piṭhâ kecaʹ bâṭire ḍubuketeʹ Simon Iskariotren hopontetʹ Jihuda makidie. 27Piṭhâ kecaʹ enge tayomgi Soitando Jihuda bhitârre bolone.

Jisute âni metakidie, "Ja rikimahaʹ saṭlaka rikim." 28Ekeko Jisu saote jomsanako angkodo ekegi bang bujhu dareledako cekelaʹ Jisute Jihuda niâ katha metakidie. 29Ekekodo monekedako, poroblaʹte akako dorkar Jisute anako kiringlaʹ Jihuda metakidie ar bangkheʹ rangeʹoreʹ âdmi jahanaʹ makolaʹ metakidie, karon angkoaʹ ṭhepnaʹ bakso Jihudaṭheʹgi tahensana.

30Piṭhâ kecaʹ enge sao saotigi Jihuda baherre cagene. Tâkhnido nindângekana.

Naoa hukum

31Jihuda baherre ca tayom Jisu menkede, "Âdmi Hoponaʹ mohima sodoroʹaʹ somai hiʹngekana ar ana talare Issoraʹ mohima sodoroʹhaʹ. 32Issoraʹ mohima jâkhni Jisuoaʹ talate sodoroʹhaʹ tâkhni Issorho Âdmi Hoponaʹ mohima Aiʹ talate sodorheʹ ar anado Issor saṭlakagi rikiheʹ.

33"Gidrâko, ar thoṛa somai Ingdo ape saote miningâ. Apetedo Ing sendrangpehaʹ, kheʹ Ingte Jihudi netako alka metaleʹkoing, 'Ing akare caʹkâning apedo aṛe bang hiʹ darenape,' engkagi nitoʹ ape metapekâning.

34Miṭiʹ naoa hukum Ingte ape mapekâning, Ingte ape alka dulârkaʹpeing engkagi apeteho miʹhorte ar miʹhor dulârkope. 35Judi apeteʹ miʹhorte ar miʹhor dulârkoape tahale sanamkhoiʹ bujhu dareʹkohaʹ apedo Ingren celakanape."

Pitoraʹ rikit

(Mothi 26:31-35; Mark 14:27-31; Luk 22:31-34)

36Simon Pitorte Jisu metakidie, "Probhu, amdo akate caʹkanam?"

Jisu uttorre menkede, "Ing akare caʹkâning apedo Ing saote aṛe bang ca darenape, kheʹ apedo tayomte hijuʹpehaʹ"

37Pitorte Âni metakidie, "Probhu, cekelaʹ nitdo Am salaʹ bang ca darenale. Amlaʹte ing ingâʹ jiuiho maʹinghâʹ."

38Tâkhni Jisu menkede, "Sârigi ki am inglaʹte amaʹ jiui maʹmahaʹ? Ingte am sârigi metamikâning, sim kukru laharigi am pe jhikâ menmahaʹ je, amte ing bang cinhungam.

Currently Selected:

Johon 13: EKL

Highlight

Copy

Compare