Preritʹ 7

Bâisi talare Isṭifan

1Tâkhni marang purohitte Isṭifan kulikidie, "Nako katha ki sârigiâ?" 2Uttorre Isṭifan menkede, "He ingren boihako ar babako, ingâʹ katha atenpe. Aboren laharen âdmi Abraham Haron sohorre basoʹ lahare jâkhni Mesopoṭemiâ disâmre tahelene, inre gourobmoi Issor sodorketeʹ metalidie, 3'Am amaʹ disâm ar pânhâko bâgiketeʹ Ingte aka disâm am uduʹominghâʹ ana disâmre cab.'

4"Tâkhni âni Kolodikoaʹ disâm bâgiketeʹ Haron sohorre caketeʹ basoʹlaʹ lagone. Ar Abrahamren bot goiʹ tayom Issorte ânido aṛe khoiʹ niâ disâmre âgulidie aka disâmredo nitoʹ apepe basoʹkan. 5Ana somai Issorte Abraham naṛe jahan hasgi bang malidie, miṭiʹ janga doheyaʹ jagaho bang. Kheʹ Issordo âniṭheʹ rikitlede je, âni ar âniren tayomren bongsodhorko odhikar hisâbte Ânite ana disâm makoheʹ. Ana somaire Abrahamren jahe gidrâ bang tahelenako.

6Issorte âni metakidie, 'Amren bongsodhorkodo bidâsre basoʹkohaʹ. Âdmikote akoren das banoketeʹ dohokokohaʹ ar ponso bochor angko ottacarkokoha.' 7Issordo arho menkede, 'Je jâtte angko das banokokohaʹ angko jâtdo ingte sâsti makoinghâʹ. Tayomte angkodo ana disâm khoiʹ oṛoʹ hiʹketeʹ niâ jagare ingâʹ seoekohaʹ.'

8Inâtayom Issorte niâ cuktinaʹ cinhâ hisâbte Abraham sunnot rikiaʹ niom makidie. Niâtayom Abrahamren hopontetʹ Isahak janamne ar janamnaʹ aṭ din tayom Abrahamte Isahakaʹ sunnot rikâkeʹtaye. Tayomte Isahakte Jakobaʹ sunnot rikâkeʹtaye ar Jakobte angko baroṭeʹ gusṭi botmoroaʹ sunnot rikâkeʹtakoe.

9"Jakobren hopontetʹkodo akoren boiha Josef cetanre hingsâketeʹ ânido kâmi âdmi hisâbte Misor disâmre âkringlidiako. Taoho Issordo âni saote tahelene, 10ar Ânido âniaʹ sanam kosṭo ar bipod khoiʹ âni bacokidie. Niâ bâgiketeʹho Issorte Josef gen makidie ar Misorren raja Furonaʹ metʹre manja uduʹkidie. Analaʹte Furonte Josef Misorren sasoniʹ ar aiaʹ oraʹniʹ mâlik banokidie. 11"Ana tayom goṭa Misor ar Konan disâmre akal lel namna. Anate aima âdmi aima kosṭo namkedako. Inre aboren sederen âdmiko jomaʹ bang namledako.

12Kheʹ Misorre jomaʹ menaʹa atenketeʹ Jakobte aboren sederen âdmiko palhe jhikâ aṛe kolkeʹkoe. 13Jâkhni aboren sederen âdmiko dosar jhikâ Misor disâmre canako, inredo Josefte aiʹren boihako lâioʹkoe je, 'Inggiying aperen boiha Josef.' Ana somai Furondo Josefaʹ poribar bisoite baṛe darekede. 14Niâ tayom Josefte aiʹren bot Jakob ar poribarren sanamkhoiʹ hijuʹlaʹ lâikolkede. Angkodo moṭ pocattorṭeʹ tahalenako. 15Jakobdo Misor cane, tayomte aṛegi âni ar aboren sederen âdmikodo goiʹnako. 16Angkoaʹ goiʹ hormo Sikhimre âguketeʹ has ma hona. Niâ topa jaga Abraham Sikhim sohorren Homorren hopontetʹkoṭheʹ khoiʹ rupâte kiringlede.

17"Abrahamṭheʹ Issor akaṭaʹ rikitlede ana puronoʹaʹ somai jâkhni sorre hiʹna, tâkhni lelna Misorre aboren âdmi aima ḍherngekanako. 18Niâ tayom Misorre Furon nutumte miʹhor raja hone. Ânido Josefaʹ bisoite itâʹgi bang baṛesane. 19Âni rajatedo aboren âdmiko ṭhakokeʹkoe ar aboren sederen âdmiko aima ottacarkeʹkoe. Emonki, angkoren ekeko gidrâ janamnako angko jate gojoʹako analaʹte angko gidrâdo baherre giṛi dohokolaʹte baddhokeʹkoako.

20"Ana somaido Mosi janamne. Ânido Issoraʹ metʹre aima sundri tahalene. Pe mâhinâ dhâbiʹ ânido botaʹ oraʹrigi bai baite âsulne. 21Tayomte jâkhni ânido baherre giṛi dohokidiako tâkhni Furonren hoporatte ânido idikidie ar âiʹren hopontetʹ lakagi âdmi rakabkidie. 22Mosido Misornaʹ sanam gen cetʹkede, ar ânido kathate ar kâmite suktisâliketeʹ rakabne.

23"Mosiaʹ boyos jâkhni cullis bochor hontaya tâkhni ânido Israyelren nijeren pânhâko suliʹ napamoʹlaʹ sanakidiâ. 24Tâkhni miʹhor Misoriodo miʹhor Israyelio suliʹ onnai beboharte lelketeʹ ânite âni Israyeliodo goroilaʹ cane ar ânido Misorio goiʹketeʹ ananaʹ badal sodkede. 25Mosi monelede, âniren boihako bujhu dareʹkohaʹ Issortedo âni talatigi angko bacokoheʹ, kheʹ angkodo ana bang bujhu dareledako.

26Porahiluʹ Mosite barhor Israyelio nepetʹte lelkeʹkine. Tâkhni ânitedo ângkin milukinlaʹte metakeʹkine, 'Aho, abando boihakanaban, Tahale cekelaʹ abando miʹhor armiʹhor saote onnaidaban?'

27"Kheʹ je âdmi onnai beboharsane ânitedo Mosi ṭheloketeʹ metakidie, 'Âling cetanre ekete am sasoniʹ ar bicâriʹdo banokaʹmie? 28Hola alka âni Misorio goiʹkâdiâm, ingho ki angka gojenglaʹ namdam?' 29Niâ katha atenketeʹ Mosi nirketeʹ Midion disâmre bidesiko laka basone. Aṛegi âniren barya hopontetʹ janamnâkin.

30"Inâtayom cullis bochor paromngena. Sinâi buru ṭheʹ akaṭaʹ sansun jaga menaʹa aṛedo miṭiʹ jhâilâre jol sengel bhitârre miṭiʹ sorgodut Mosiṭheʹ sodorne. 31Na lelketeʹ Mosi asarjone#7:31 Mosi arho obaklene je jhopre sengel joloʹsana kheʹ bang jeretʹoʹsana.. Manjate leleilaʹte sorre calenkheʹ ânido Probhuoaʹ niâ katha aten namkede, 32'Ingdo amren sederen âdmikoren Issorkâning. Abraham, Isahak ar Jakobren Issorkâning.' Tâkhni Mosido botorte hiluʹlaʹ lagone, Bengetʹketeʹ leleiaʹ sâhus dhâbiʹ âniaʹdo bang holentaya.

33"Tâkhni Probhute âni metakidie, 'Amaʹ janganaʹ jutâ boiʹgirim, karon aka jagare am tengogirikanam anado Pobitrogiâ. 34Misor disâmre Ingren âdmiko cetanre je ottacar hoʹkana Ingdo ana lelkâding. Ingte angkoaʹ raʹ atenkaʹtakoing ar angkodo bacokolaʹte agro hiʹkâning. Nitoʹ amdo hijup Ingte am Misor disâm âcur kolminghâʹ.

35"Nigie âni Mosi ekedo Israyeliokote niâ menketeʹ badgirilidiako, 'Ekete amdo sasoniʹ ar bicâriʹ banokaʹmiâko?' Ekeṭaʹ sorgodut ana jhâilâ talare Mosiṭheʹ sodorlene âni sorgodutaʹ talate Issortigi nâi Mosi Israyeliokoren sasoniʹ ar bacoiʹ hisâbte Misorre kollidie. 36Ni Mositigi Misor disâm khoiʹ Israyelioko oṛoʹketeʹ âguleʹkoe ar Misor disâmre, Araʹ Marang Gangare ar sansun jagare cullis bochor dhâbiʹ aima asarjo kâmilede ar cinhâ uduʹlede.

37Nâigie âni Mosi eketedo Israyelioko metaleʹkoe, 'Aperen Issorte aperen Israyelio boihako tala khoiʹgi ape laʹte ing laka miʹhor nâbi koleiheʹ.' 38Ni Mosigi sansun jagare Israyeliokoaʹ ana dol talare aboren sederen âdmiko salaʹ tahelene. Ekeṭaʹ sorgodutdo Sinâi ḍâṛire katha menlede nâi Mosigi âni sorgodut salaʹ aṛe tahelene. Abo mabo laʹte jiuitʹ kathado nâi Mosigi aṛe namlede.

39"Aboren sederen âdmiko âniaʹ katha atenlaʹ bang namledako ‍ar âniho bang atanglidiako, ar mon monte arho Misor hate âcurnako, 40ar Haron metakidiako, 'Alelaʹte debota banokom, angko debotakogi aboaʹ laha lahate caʹkohaʹ, cekelaʹbang nâi Mosite Misor disâmkhoiʹ ale oṛoʹ âgukeʹleye, ânido cikâne, aledo bang baṛeyale.' 41Niâ somaigi angkote bâchur lakaketeʹ miṭiʹ murti banolidiako. Angkodo âni murtiṭheʹ janoyar utsorgoledako ar nijeoaʹ tite ja banoleʹkoako ana laite angkodo hubnako. 42Kheʹ Issorte angko bang atangleʹkoe ar sermaren singcando, nindâcando ar ipilkoaʹ puji laʹte jimâkeʹkoe. Niâ kathagi nâbikoaʹ boire ol menaʹa,

'He Israyelren âdmiko, sansun jagare cullis bochor dhâbiʹ apeto ing laʹte Jahe janoar se eṭaʹ jinis bang utsorgokadape?

43Bang, borong pujilaʹte eke murti banolidiape âni Molok debaʹ tâmbu

ar aperen Rifon debren ipillakaniʹ murti apete gemer idileʹkoape.

Pujâko laʹtigi apetedo angko debotaren murti teyarleʹkoape.

Anate Ingte ape Bâbil disâmnaʹ hanakhatre Bundi hisâbte kolgiripeyinghâʹ.'#Amos 5:25-27

44"Sakkho tâmbu sansun jagare aboren sederen âdmiko salaʹ tahelena. Issorte Mosi alka metalidie ar Mosi je nomuna lellede engkagi na tâmbudo teyar holena. 45Aboren sederen âdmikodo ana tâmbu namketeʹ angkoren neta Jihusuiṭheʹ dohoketeʹ ana ako saote aboaʹ niâ disâmre âguledako. Issor ana somai angkoaʹ samne khoiʹ eṭaʹ jâtko tâṛyugirileʹkoe ar angko niâ disâm dokholledako. Dâudaʹ somai dhâbiʹ ana tâmbu niâ disâmrigi tahelena. 46Dâuddo Issoraʹ daya namketeʹ Jakobren Issor tahen laʹte oraʹ banelaʹ onumoti koilede, 47Kheʹ Solomongi Issorlaʹte ana oraʹ banolede.

48"Kheʹ sanamkhoiʹ marangutâriʹ Issor âdmioaʹ teyar oraʹ duârre bang tahene. Nâbi menkade je,

'Probhu mene,

49Probhu menkede, sorgodo Ingâʹ singhâsonkana,

Dhârtido Ingâʹ janga doheyaʹ jagakantingâ,

Ing laʹte amdo alkanaʹ oraʹ banemahaʹ?

Ingâʹ jiruʹaʹ jaga akare hoʹtinghâʹ?

50Nako sanam jiniski Ingdo Ingâʹ nijeoaʹ tite bang banokâding?'#Jisaio 66:1-2

51"He reṭha jât! Ojihudiko lakagi apeyaʹ lutur ar ontordo, ar apeho ṭhik aperen sederen âdmiko lakanape. Apetedo sanam somai Pobitro Atta badha mayape. 52Emon jahe nâbi menaʹkoa ki? Ekedo aperen sederen âdmikote bang ottacarkaʹkoako? Emonki, ekekotedo Âni dhârmik âdmi, mane Jisuoaʹ hijuʹaʹ katha laharigi menkadako angkoho angkote goiʹkaʹkoako. Ar nitoʹ apete Jisugi dusmânṭheʹ sabsoketeʹ Âni goiʹsokâdiape. 53Sorgodutaʹ talate apeṭheʹgi Mosiaʹ ân ma holena, kheʹ apedo ana bang palonkadape."

Isṭifanaʹ goiʹ

54Nako sanam katha atenketeʹ ana marang sobharen âdmiko sengel laka edrenako ar Isṭifanaʹ biruddhore ḍaṭa keṭmeṭkeʹtenako. 55Kheʹ Isṭifan Pobitro Attate pereʹketeʹ Sorgo hate koyoʹkede ar Issoraʹ Mohima lelnamkede. Ânite Jisu lelkidie Issoraʹ jojma hate tengo miniâ. 56Ar ânite menkede, "Lelpe, ing lelnamding Sorgo jhiʹ menaʹa ar Issoraʹ jojma hate Âdmi Hopon tengogirikane."

57Niâ katha atenketeʹ angkodo sanamkhoiʹ luturre kâṭub makeʹtenako ar aima jore garjoketeʹ miʹsaote Isṭifanṭheʹ dâr canako. 58Niâ tayomte angkotedo âni dirite capatʹketeʹ gojeilaʹte ṭanohore sohornaʹ baherre idikidiako, ar ekekote âni doseisanako angko sâkkhikodo akoaʹ cetannaʹ lugri boiʹketeʹ Sol nutumte miṭiʹ koraoaʹ jangaṭheʹ dohokedako. 59Jâkhni angkote Isṭifan dirite capadisanako tâkhni ânido Âniaʹ nutum ṭâhuketeʹ koijongketeʹ menkede, "Probhu Jisu, ingâʹ atta atangting." 60Tayomte ânido ukrumne ar garjoketeʹ menkede, "Probhu, nekoaʹ niâ papdo alo sabtakoam." Niâ katha menketeʹ ânido goiʹne.

Currently Selected:

Preritʹ 7: EKL

Highlight

Copy

Compare