Preritʹ 28
28
Malṭa dip
1Ale baco tayom baṛe namkedale je, ana dipnaʹ nutum Malṭa. 2Ana dipren âdmiko ale suliʹ aima manja beboharkedako. Ar angkodo sengel jolketeʹ ale joroʹ laʹte ṭâhukeʹleyako karon aṛedo dagsane ar leyarsana. 3Pol miʹ bojha lohor kaṭh jaoraketeʹ sengelre maʹ somai miṭiʹ jojom bing sengelnaʹ tapte ana bojha khoiʹ oṛoʹketeʹ Pol tire hâmurkidie. 4Bing Polaʹ tire jhuluʹte lelketeʹ ana dipren âdmiko menlaʹ lagonako, "Ni âdmido niscoi khunikane, karon ganganaʹ ti khoiʹ baco namketeʹho nei debotate âni bang bacosolidie."
5Kheʹ Pol jâkhni ti jhiṭkâketeʹ bing sengelre giṛikidie tâkhni âniaʹ aka khutigi bang holentaya. 6Âdmiko bhaboʹsanako âniaʹ hormo fuluketeʹ rakaboʹhaʹ se saṭlaka âni gojoʹheʹ. Kheʹ aima ghâṛiʹ ḍaharbentetʹketeʹho âniaʹ itâgi bang holentaya lelketeʹ angko mot palṭoketeʹ menlaʹlagonako, "Ânido debotakane."
7Ana jaga sorrigi Publio nutumte ana dipren marang âdmiren miṭiʹ jomidar tahalene. Publiote aiaʹ oṛaʹre ale ṭâhukeʹleye ar pedin dhâbiʹ aima ador salaʹ ale seoa jotonkeʹleye. 8Ana somai Publioren bot ruâ ar amosate bichnâre ujuʹ tahalene. Pol bhitrire âniṭheʹ caloketeʹ koijongkede ar âniaʹ hormore ti maketeʹ âni manjakidie. 9Niâ ghoṭona tayom ana dipren bâki sanam rugiko hiʹketeʹ manjanako.
10Angkote aima lakaketeʹ ale somman uduʹkeʹleyako ar tayomte jahaj bâgi somai aleyaʹ dorkari sanam jinispotro jahajre pereʹkedako.
Pol Romre
11Pe mas tayom ale miṭiʹ jahajte calonale. Jahajdo ana diprigi leyardin kaṭolede. Ana tahalena Alekjandrio sohornaʹ jahaj ar ananaʹ bohoʹre jama debotaren murti tahalenakin. 12Ale Surakusre jahaj tolketeʹ aṛe pedin tahenale. 13Aṛe khoiʹ caloketeʹ ale Rigiore pâhcunale. Tayom din dâkhin khoiʹ hoi rakapna ar ana tayom din ale Putiolire pâhcunale. 14Aṛe alete pâtyuonkhoiʹ koyekṭeʹ boiha lel namkeʹkoale. Angko suliʹ miʹ sopta kaṭe laʹte angkote ale nehorkeʹleyako. Nengkaketeʹgi ale Romre hiʹnale. 15Aṛenkhoiʹ pâtyuonkhoiʹ boihako aleyaʹ hijuʹaʹ khobor atenledako. Ḍaharre aleren gate hoʹlaʹte angkoren ekekodo Appionaʹ hâṭiâre, ekekodo Peya Ḍera dhâbiʹ hiʹlenako. Nako âdmiko lelketeʹ Polte Issor dhonnobad makidie ar âni aiʹho hub namkede.
16Ale Romre pâhcu tayom Pol eṭaʹ oraʹre tahanlaʹte onumoti namkede. Miṭiʹ sonnote âni horoisane.
Romre procar
17Pe din tayom Pol aṛenkhoiʹ Jihudi netako ṭâhuketeʹ miʹ saote jaorakeʹkoe. Angko jaora tayom Polte angko metakeʹkoe, "Ingren boihako, judiho ing aleren jâtkoaʹ biruddhore se laharen âdmikoaʹ caloʹaʹ niom biruddhore itâgi bang rikikâding, taoreho Jirusalemre ingdo sab hokana ar Romiokoaʹ tire ma hokana. 18Romiokote ing kuliketeʹ bâgigiringlaʹ namsanako, karon goiʹ lakanaʹ jahan dosho ing bang rikâkâding. 19Kheʹ Jihudiko niâte badha mate baddhoketeʹ ingdo Romio rajaṭheʹ âpilkâding. Ingdo ingren nijeren jâtkoaʹ aka dos malaʹtedo bang hiʹkâning. 20Niâlaʹtigi ing ape suliʹ napamoʹ laʹte ar katha menlaʹ nehorkeʹpeying. Karon Israyel jâtaʹ aka asa menaʹa ana asa laʹtigi ing niâ sikrite tol hokana."
21Tâkhni Jihudi netako menkedako, "Amaʹ somondhe Jihudiâ khoiʹ ale aka ciṭhiho bang namkadale. Je boihako aṛe khoiʹ hiʹkanako angko ekeho amaʹ somondhe bang baṛesokaʹleyako se aka kharap kathaho bang menkadako. 22Kheʹ ale amaʹ motamot baṛelaʹ namdale, karon ale baṛeyale sanam jagarigi âdmiko ana dolnaʹ biruddhorigi katha menako."
23Pol saote salagoʹ laʹte angko miṭiʹ din ṭhikkedako. Pol akare tahansane aṛe angko bâgiketeʹho arho eṭaʹonkhoiʹ hiʹnako. Tâkhni Pol setaʹ khoiʹ âyub dhâbiʹ Issoraʹ rajjonaʹ bisoite angko sakkho makeʹkoe ar bujhukeʹkoe. Mosiaʹ ân ar nâbikoaʹ boinaʹ tala khoiʹ Jisuoaʹ bisoite lelsoketeʹ angko bujhukolaʹ kurumuṭukede. 24Âni akako menlede anate ekeko pâtyunako, abar ekekodo pâtyu bang pâtyulenako. 25Polaʹ kathate angko talare motnaʹ omil hontakoa ar angko aṛe khoiʹ calongenako. Angko caloʹ lahare Pol menkede, "Pobitro Atta Jisaio nâbioaʹ talate aperen laharen âdmikoṭheʹ sâri kathagi menlede je,
26Nako âdmiṭheʹ caloketeʹ menme,
'Apedo atentigi tahanpehaʹ,
kheʹ alkateho oho bujhu dareʹape,
leltigi tahanpehaʹ
kheʹ kalkateho oho baṛe dareʹape.'
27Karon neko âdmikoaʹ ontor obosgitakoa
ar luturdo tepetʹngekantakoa,
ar angko akoaʹ metʹ jâpitʹngekadako,
jate angko metʹte bang lelako,
luturte bang atenako
ar ontorte bang bujhiako.
Ar manja hoʹlaʹte ingṭheʹ bang âcur hijuʹako.'#Jisaio 6:9-10
28"Niâlaʹte ape baṛe dohepe, Issorte âdmiko pap khoiʹ kalkate bacokaʹkoe ana katha Ojihudikoṭheʹ baṛeso hokana, ar angkogi ana katha atenako." 29#28:29 Pol niâ katha mentayom Jihudiko nijeko talare torkatorkiketeʹ calongenako.
30Pol bar bochor dhâbiʹ aiʹ nijeyaʹ bhaṛa oraʹre tahalene ar ekeko âni suliʹ napamoʹlaʹ hijuʹsanako ânite angko sanamkhoiʹ atangkosane. 31Âni sâhus salaʹ binbadhate Issoraʹ rajjonaʹ bisoite procarsane ar Probhu Jisu Khrisṭoaʹ bisoite cetʹokosane.
Currently Selected:
Preritʹ 28: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
