Preritʹ 26
26
1Tâkhni Agrippote Pol metakidie, "Amaʹ nijeoaʹ pokkhe katha menlaʹte am onumoti ma hona." Tâkhni Pol ti lahaketeʹ nijeoaʹ pokkhe niâ katha menkede, 2"He raja Agrippo, Jihudikote ing jeko dos makâdingâko âniaʹ biruddhore amaʹ samnere tihin ingâʹ nijeoaʹ pokkhe katha menaʹ sujuk namkâding mente ingdo ingi dhonno moneʹkâning, 3bisesketeʹ jâkhni Jihudikoaʹ niom ar torko bisoite amaʹ manjate baṛe menaʹtama. Niâ laʹte dhirjâ dohoketeʹ ingâʹ katha atenlaʹte ingte am bisesketeʹ nehormikâning.
4"Gidrâkhoiʹgi, orthat ingâʹ jiuinaʹ ehop khoiʹ ingren nijeren jât ar tayomte Jirusalemren âdmiko talare ing kalka jiui kaṭokâding Jihudiko sanamkhoiʹgi anado baṛeyako. 5Angkote aima din khoiʹgi ing cinhungako ar icche lekheʹ niâ sakkho ma dareʹako je, aleyaʹ dhormore Forisi nutumte je goṛa dol menaʹkoa ing angko Forisiaʹ jiui laka kaṭokâding. 6Issorte ingren laharen âdmikoṭheʹ akaṭaʹ rikitlede anare ing asa dohoding mente nitoʹ ingâʹ bicâr hoʹkantingâ. 7Aleren baro gusṭiren âdmikote sing nindâ mon prante Issor seoayako ana rikit puron lellaʹte asare menaʹkoaʹ. Raja, ana asa laʹtigi Jihudikote ing dosdingâko. 8Issorte je goiʹonkhoiʹ jiuitʹkoe niâ kathado pâtyuʹ lakanaʹ bangkana mente ape ceklaʹ monedape?
9"Ing nijegi pâtyukoʹing, Nasarotren Jisuoaʹ nutumnaʹ biruddhe akaṭaʹ rikâ jutuʹa ananaʹ sanamgi ingâʹ rikiaʹ ucit, 10ar ṭhik anagi ing Jirusalemre rikisânig. Marang purohitkoṭheʹ khoiʹ khomota namketeʹ ingdo Khrisṭo cetanre pâtiyuonkhoiʹ aima pobitro horgi jelre makosâning ar angko goiʹgiriko somai angkoaʹ biruddhore sakkho maʹsâning. 11Angko sâsti makolaʹte ingdo praigi miʹ somaj oraʹ khoiʹ eṭaʹ somaj oraʹre caʹsâning ar Issor nindâilaʹte ingdo angko cetanre jor khaṭesâning. Angko cetanre ingâʹ nâniʹ edre tahalena je, angko cetanre ottacarlaʹte ingdo bidesnaʹ sohorkore caʹsâning.
12"Niâlaka miʹjhikâ marang purohitkoṭheʹ khoiʹ khomota ar hukum engeketeʹ ing Dameskore caloʹsâning. 13Raja, tâkhni bela prai dupahar. Ḍahar talare sing cando khoiʹho ḍher jhak jhak miṭiʹ marsal sorgo khoiʹ ingâʹ ar ingren gatekoaʹ câriyunakhare joloʹlaʹ lagona. 14Ale sanamkhoiʹgi hasre ujuʹngenale ar ing miṭiʹ gala atenkiding Ibrio bhasate ekete je ing metangkane, 'Sol, Sol, ceklaʹ am ing cetanre ottacardam? Ingâʹ birudhitaketeʹ amdo nijeyaʹgi khutidam.'
15"Tâkhni ing menkiding, 'Probhu, amdo ekekanam?'
'Probhu menkede, 'Ingdo Jisukâning, ekeyaʹ cetanre am ottacardam. 16Nitoʹ beretop, ar amaʹ jangare bhor maketeʹ tengon. Kormocâri ar sâkkhi hisâbte am bacho engemlaʹte ingte am lelsokeʹmiying. Amte ing alka lelkidingâm ar ingte am akako uduʹominghâʹ ana am eṭaʹonkhoiʹṭheʹ lâimahaʹ. 17Ingte am angkoṭheʹ kolmikâning. Ingte am amren nijeren âdmiko ar Ojihudikoaʹ ti khoiʹ bacominghâʹ. 18Angkoaʹ metʹ jhiʹgiritako laʹte ar nut khoiʹ marsalre, ar Soitanaʹ khomotanaʹ ti khoiʹ Issorṭheʹ âcur âgukolaʹte ingte am angkoṭhe kolmikâning. Jate Ing cetanre pâtyuketeʹ angko papnaʹ map namako ar Issoraʹ uddessore ekeko bachoketeʹ doho hokana angko pobitro âdmiko talare angko odhikar namko.
19"Raja Agrippo, niâ laʹte sorgo khoiʹ niâ napam talate ing ja men hokana ananaʹ obaddho ing bang hokâning.
20Ekeko Dameskore menaʹkoa palhere angkoṭheʹ, inâ tayom ekeko Jirusalemre ar sanam Jihudiâ prodisâmre menaʹkoa angkoṭheʹ ar ing Ojihudikoṭheʹho procarkâding je, pap khoi mon âcurketeʹ Issor hate angkoaʹ âcuroʹaʹ ucit, ar emon kâmi rikiaʹ ucit akaṭaʹte proman namoʹa je, angkodo mon âcurkaʹtenako.
21Niâ laʹtigi Jihudiko ing Mundirre sabketeʹ goiʹgiringlaʹ kurumuṭuledako. 22Kheʹ Issorte tihin dhâbiʹ ing gorokudinge ar ana laʹtigi ingdo naṛe tengoketeʹ huṛing marang sanamkhoiʹṭheʹ sakkho maʹkâning. Mosi ar nâbiko akako ghoṭoʹaʹ katha menketeʹ cakanako ananaʹ baherre ingdo itâʹgi bang mending. 23Ana katha hoʹkana niâ je, Khrisṭodo kosṭo namlaʹ hoʹtaihaʹ ar Ânigi palhere goiʹ khoiʹ jiuitʹketeʹ aiʹren nijeren jâtren âdmiko ar Ojihudikoṭheʹ marsal rajjonaʹ bisoite procarlaʹ hoʹtaihaʹ."
24Pol niâlaka jâkhni nijeyaʹ pokkhe katha mensane tâkhni Fisṭ âni badha maketeʹ garjoketeʹ metakidie, "Pol, amdo paglangekanam. Amdo aima paṛhokanam ar ana paṛhotigi amdo paglakaʹmie."
25Tâkhni Pol menkede, "Mamonio Fisṭ, ingdo paglado bangkâning. Ing ja mending anado sârigiâ ar juktigiâ. 26Raja to niâko bisoite baṛeye ar ing âni suliʹ sâhusketeʹ katha mending. Ar niâ katha ing baṛeing je, niânaʹ sanamaʹgi âni lelname, karon niâko ghoṭonato baite bang ghoṭokana. 27Raja Agrippo, am ki nâbikoaʹ katha pâtyuʹam? Ing baṛeing am pâtyuʹam."
28Tâkhni Agrippote Pol metakidie, "Am ki nâniʹ thoṛa somai talarigi ing Khrisṭninglaʹ kurumuṭudam?"
29Pol menkede, "Somaido thoṛa hoʹman se ḍher hoʹman, ingdo Issorṭheʹ niâ koijonging je, kebol amdo bang, kheʹ jeko tihin ingâʹ katha atendako angko sanam jate ing laka hoʹako khâli niâ sikri bâgiketeʹ."
30Tâkhni raja beretʹne ar âni sao saote marang sasoniʹ Fisṭ ar Borniki ar jeko angko suliʹ duruʹlenako sanamkhoiʹ beretʹketeʹ tengonako. 31Inâ tayom angkodo ana oraʹ bâgiketeʹ calonako ar miʹhorte ar miʹhor metakolaʹ lagonako, "Ni âdmi goiʹnaʹ sâsti namaʹ se jel khaṭoʹ laka itâgi bang rikâkade." 32Agrippote Fisṭ metakidie, "Ni âdmi judi Romio rajaṭheʹ bang âpillekheʹ tahale âni bâgigiri jutuʹa hoteʹ."
Currently Selected:
Preritʹ 26: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
