Preritʹ 25
25
Marang sasoniʹ samnere Polaʹ bicâr
1Fisṭ ana prodisâmre pâhcu pe din tayom Koisoriâ khoiʹ Jirusalemre cane. 2Anate marang purohitko ar Jihudikoren marang marang âdmiko âniṭheʹ Polaʹ biruddhore nâliskedako ar âni nehorketeʹ metakidiako, 3ar âniaʹ biruddhore niâ koilaʹ lagonako, jate Pol Jirusalemre ṭâhuie. Angkote âni ḍaharrigi gojeilaʹte ghâṭi bâisilaʹ namkedako. 4Kheʹ Fisṭ menkede, Pol Koisoriâre bundi miniâ, Ingho aṛe saṭlakagi caʹinghâʹ. 5Inâ laʹte ape bhitârre ekekoaʹ khomota menaʹtakoa, angkodo ing saote aṛe caʹmanako, ar âni âdmioaʹ jahanaʹ dos judi tahentaya, tahale âni doseimanako.
6Ar angko saote aṭ dos din taheketeʹ âni Koisoriâre cangene, ar poradingi bicârre duruʹketeʹ Pol âguilaʹ hukum makeʹkoe. 7Pol pâhcuilenkheʹ Jirusalem khoiʹ hiʹ Jihudiko âniaʹ câryunakha tengoketeʹ âniaʹ bipokkhore aima marang marang dosnaʹ katha lâilaʹ lagonako, kheʹ ananaʹ proman bang ma dareledako. 8Nate Pol aiaʹ pokkho khoiʹ menlaʹ lagone, Jihudikoaʹ ânnaʹ biruddhe, mundirnaʹ biruddhe ar Romio rajaoaʹ biruddheho ingdo jahanaʹ bang oporadhkâding.
9Kheʹ Fisṭte Jihudiko khusikolaʹte Pol metakidie, "Am ki Jirusalemre caketeʹ ingâʹ samnere niâko bisoite bicârlaʹte râji menaʹmiâ?"
10Pol menkede, ingdo Romio rajaoaʹ bicâr asonnaʹ samnere duruʹ miningâ, naṛe ingâʹ bicâr hoʹaʹ ucit. Ing Jihudiko cetanre jahanaʹ bang onnaikâding, amho manjatigi baṛeyam. 11Jagihoʹman, judi ing gojeing lakanaʹ jahanaʹ onnaiketeʹ tahening tahale gojoʹlaʹ ingdo râjigiying. Kheʹ nako Jihudiko ingâʹ biruddhe akaṭa dos maʹkanako ana judi sâri bang hoʹa tahale ing nakoaʹ tire bâgingaʹ ekeoaʹgi odhikar bânuʹtakoa. Ingdo Romio rajaṭheʹ âpilding.
12Tâkhni Fisṭ muntri sobha salaʹ poramorsoketeʹ menkede, am Romio rajaṭheʹ âpilkadam, ar amdo âniṭheʹgi caʹmahaʹ.
Fisṭ ar raja Aggrippo
13Koekdin tayom Agrippo raja ar Borniki naoa sasoniʹ Fisṭ subheccha mailaʹte Koisoriâre hiʹnâkin. 14Ângkin aimadin aṛegi tahelenakin mente Fisṭte Polaʹ bisoite raja lâiodie. Fisṭ menkede "Filikste naṛe miṭiʹ âdmi bundiketeʹ dohoṭhokâdie. 15Jâkhni ing Jirusalemre tahelining, tâkhni Jihudikoren marang purohitko ar harme netako âni âdmioaʹ biruddhore aima nâlisledako ar dusi hisâbte âni sâsti mailaʹ menledako. 16"Ingte angko niâ uttor maleʹkoing, 'jahe âdmioaʹ biruddhore judi nâlis ma hoʹa, tahale ekeko nâliskadako angko samnere nije nirdos pormanoʹaʹ sujog bang namdhâbiʹ âni sâsti maiaʹ katha Romiokoaʹ câlti niomre bânuʹa.'
17Tayomte angko miʹsaote niâ jagare hiʹlenkheʹ ing bang diriketeʹ pora hiluʹ bicârre duruʹketeʹ âni âdmi âguilaʹ hukum makeʹkoing. 18Eke âdmikote âni doseisanako angko jâkhni katha menlaʹ beretʹnako tâkhni ing alka bhabolining angkanaʹ jahanaʹ bang nâlisledako. 19Kheʹ ânioaʹ biruddhore akoaʹ nijeoaʹ dhormonaʹ bisoite ar Jisu nutumte goiʹ âdmi ekedo Polte jiuitʹ miniâ mensane, ana bisoite koekṭeʹ torkonaʹ katha menkedako. 20Tâkhni niâ sanam bisoi alkaketeʹ khojliʹ ing ana bujhu bang dareketeʹ menkiding, am ki Jirusalemre caketeʹ aṛe amaʹ bicâr hoʹman ana bisoite râji menaʹmiâ? Uttorre Pol menkede, bang, ingdo Jirusalem bang caʹing. 21Tâkhni Pol âpilketeʹ somraṭaʹ bicârnaʹ ḍahar bengetaʹ katha ing lâiodinge, ingte tin khâniʹ âni Romio rajaṭheʹ bang kol dareikâning, in dhâbiʹ bundiketeʹ dohoilaʹ hukum makeʹkoing.
22Tâkhni Agrippote Fisṭ metakidie, ingho Polṭheʹ katha atenlaʹ namliding. Fisṭ menkede, gapa aten nammahaʹ.
23Anate Agrippo ar Borniki jakjomok saote hiʹnâkin ar sotopotiko ar sohorren marang âdmiko salaʹ sobhanaʹ marang oraʹre bolonâkin ar Fisṭaʹ hukumte Pol âguhona.
24Tâkhni Fisṭ menkede, he raja Agrippo ar na sobhare menaʹpeya ape sanamkhoiʹte nâi leldiâpe, nâiaʹ bisoite sanam Jihudi Jirusalemre ar niâ jagare ingṭheʹ jorte menledako, âni jiuitʹ tahedo ucitdo bangkana. 25Kheʹ ing lel namkiding, nâi goje laka jahanaʹ bang kâmikade ar nâi âdmi aiʹgi somraṭṭheʹ âpilkade analaʹte ingte âni Romre koleyaʹ ṭhikkâding. 26Ing Probhuṭheʹ itâʹ bisoite olhuʹ ana bang baṛeing, Anajâtte bisesketeʹ he raja Agrippo, amṭheʹ nâi âgukidiying. Jate alete âni kuli tayom ing jahanaʹ ol dareʹing. 27Cekelaʹ bang ingâʹ montedo, jahe bundi calan mako somai ânioaʹ doskoho baṛesokoaʹ ucit.
Currently Selected:
Preritʹ 25: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
