Preritʹ 20
20
Mesiḍoniâ ar Grisnaʹ talate
1Golmal caba tayom Poltedo celako ṭâhu kolkeʹkoe. Angko hub makeʹkoe ar Mesiḍoniâ caʹlaʹte angkoṭheʹ khoiʹ bidâi engeketeʹ oṛoʹne. 2Mesiḍoniâ talate caʹ somai ânite aima katha metaketeʹ celako hub makeʹkoe. Ar nengkaketeʹgi ânido Gris disâmre aṭone. 3Ana jagare pe mâhinâ kaṭo tayom,
Jâkhni âni daʹ ḍaharte Siriâ disâm caʹ laʹte saprone tâkhni Jihudikodo âniaʹ biruddhore sorojontresanako. Ana baṛeketeʹ ânido ṭhikkede je Mesiḍoniâ tora âcur caʹheʹ. 4Birya khoiʹ Purherren hopontetʹ Sopatro, Thisoloniki khoiʹ Arisṭarkho ar Sikundo, Dorbi khoiʹ Gaio, Timothio ar Esia khoiʹ Tukhik ar Trofim Pol saote canako. 5Nengko âdmiko lahate caketeʹ Troya sohorre ale laʹte ḍaharbengetʹsanako. 6Baco porobnaʹ tayom aledo daʹ ḍaharte Filipi khoiʹ caʹlaʹ lagonale ar more din tayom Troyare eṭaʹonkhoiʹ saote salaʹnale. Aṛe aledo sat din tahalenale.
Utukh goiʹ khoiʹ jiuitʹkidie
7Soptanaʹ palhe din Probhuoaʹ bhoj laʹte aledo miʹṭheʹnale. Tâkhni Poldo âdmikoṭheʹ procarlaʹ lagone. Pora din âniaʹ cangenaʹ katha tahalena mente âni tala nindâ dhâbiʹ katha mentigi tahane. 8Aledo cetantalanaʹ oraʹre miʹṭheʹlenale aṛedo aima ḍibiâ tahalena. 9Utukh nutumte miṭiʹ kora ana oraʹnaʹ jalna cetanre duruʹ tahalene. Poldo aimakhâniʹ katha mensane anate ânido jâpitʹte mottongelene. Âni aima jâpit laʹte pe tala khoiʹ latarre ujuʹngene ar anate âdmite goiʹ obosthatigi ânido rakap idikidiako.
10Tâkhni Pol latarre agro cane ar âni koraoaʹ hormo cetanre ujuʹketeʹ âni hâmutketeʹ menkede, "Apedo alo botoroʹape, ânido nitho bacogi miniâ." 11Niâ tayom Pol arho cetantalare caketeʹ Probhuoaʹ bhoj jomkede ar setaʹ dhâbiʹ katha men tayom ânido cangene. 12Ar âdmikote âni kora gidrâ jiuitʹgi oraʹ idikidiako ar aima santona namkedako.
Ifis khoiʹ Polaʹ bidâi
13Aledo lahate caketeʹ jahajre rakapketeʹ Asonaʹ bondor hate caʹlaʹ lagonako. Aṛe khoiʹ Pol rakap engeyaʹ katha tahalena. Âni rakap engeyaʹ katha Ânitigi aledo lâioleʹleye, karon ânido dara ḍaharte aṛe caʹlaʹ namlede. 14Asore ale saote âniaʹ napam hona, tayomte aletedo âni jahajre rakapngekidiale ar Mitulinire hiʹnale. 15Pora din aledo aṛe khoiʹ Khio dipṭheʹ aṭonale. Ana pora dindo ale marang ganga paromketeʹ Samo dipre canale. Niâ pora din aledo Militre caketeʹ aṭonale. 16Esia prodisâmre Polaʹ jate bang dirumoʹtaya anate ânido ṭhik lede je, ânido Ifisre bang tengoketeʹ ananaʹ sorte cagenheʹ. Jirusalemre aṭoʹlaʹte ânido hakabakoʹsane jate ânido poncosoptomi porobnaʹ dinre aṛe taha darene.
17Polte Milit khoiʹ âdmi Ifisre kolkeʹkoe monḍoliren harme netako ṭâhukolaʹte.
18Angko sanam âniṭheʹ aṭolenkheʹ ânite angko metakeʹkoe, "Esia prodisâmre hiʹ tayom palhe din khoiʹ sanam somai ing ape saote kalkate kaṭokâding anato ape baṛeyape. 19Jihudikoaʹ aima soṛojontro laʹte ingdo kâṭhin purikkhare paṛoʹlaʹ holentingâ, kheʹ ing aima nomroketeʹ metʹnaʹ daʹ laite Probhuren das hoʹketeʹ seoakâding. 20Monggol lakanaʹ jahanaʹ kathagi bang baiketeʹ borong ape sanam baṛesokaʹpeing ar apeyaʹ oraʹ oraʹ cetʹkaʹpeing ar procarkâding. 21Issor hate mon âcur ar aboren Probhu Jisu Krisṭoaʹ cetanre pâtyunaʹ bisoite Jihudi ar Grikkoṭheʹ sakkho maketeʹ hijuʹkâning.
22"Nitoʹ ingdo Pobitro attaoaʹ baddhote Jirusalem caʹkâning. Aṛe ing cetanre itâʹ ghoṭoʹhaʹ anado ing bang baṛeing. 23Ingdo eken niâ katha baṛeing, Pobitro attate sanam sohorre ing niâ katha baṛesongkane je, ingdo jel khaṭoʹlaʹ ar kosṭo namlaʹ hoʹtinghâ. 24Kheʹ ingṭheʹdo ingâʹ jiuinaʹ aka damgi bânuʹa. Ingâʹdo miṭiʹgi icchâ jate mucitʹ dhâriʹ Issoraʹ maonaʹ ḍaharre dâr dareʹing, orthat Probhu Jisute je kâminaʹ bhar ing makâdinge ana jate caba dareʹing. Ana kâmido hona Issoraʹ dayanaʹ manja khobornaʹ bisoite sakkho ma.
25"Nitoʹ ingdo niâ katha baṛeing je, ekekoaʹ talare caketeʹ ing Issoraʹ rajjonaʹ bisoite procarkâding apetedo eketigi ing ado oho lelnamengape. 26Anate tihin ingte ape metapekâning, ekeyaʹho meyomnaʹ dai ingdo bangkâning, 27karon Issoraʹ itâʹ uddesso menaʹa ana ape baṛesopelaʹte tinreho Ingdo bang tainomkâning. 28Ape nijeoaʹ somporke sotorko tahanpe, ar Pobitro atta je pâtyuniʹ dolnaʹ bhar pasṭor hisâbte ape cetanre makade angkoaʹ somporkoteho sotorko tahanpe. Dhorete akalka âniren bhiṛi pâl lelkoe ṭhik engkaketeʹ apeho pasṭor hisâbte Issoraʹ monḍoli lelpe. Issor ana monḍoli nijeyaʹ meyomte kiringkade. 29Ing baṛeing je, ing ca tayom âdmiko botoruniʹ ghenga târup lakaketeʹ ape talare hijuʹkohaʹ, ar bhiṛioaʹ pâlaʹ khutikohaʹ. 30Emon ki, ape nijeyaʹ tala khoiʹ thoṛa âdmi Issoraʹ sârido âuṛi banelaʹ kurumuṭikohaʹ jate pâtyuniʹ ar celako nejeyaʹ dolre ṭano darekoako. 31Niâlaʹte ape sabdhan tahanpe. Mone dohepehaʹ, pe bochor dhâriʹ ingdo ape saote tahalining, metʹnaʹ daʹ laite ingte ape sanamkhoiʹ sabdhanleʹpeing, tinreho thirketeʹ bang tahakâning.
32"Issor ar Âniaʹ Kathanaʹ tire nito inte ape rakappekâning. Issoraʹ Katha âniaʹ dayanaʹ bisoite mene, ar ape gatho rakappeyaʹ ar pobitropeyaʹ khomota ana Kathanaʹ menaʹa. Niâbâgiketeʹ Issor aiʹren âdmiko laʹte jagi dohokade ana Kathate ape anaho madarepeheʹ. 33Jaheyaʹ sona, rupâ se lugri citriʹ cetanre ing bang lobhkâning. 34Ape nijehoʹ baṛeyape je, ing nejeoa ar ing saoriniʹaʹ sanam obhab cabe laʹte niâ baran tite seoakaʹkoing. 35Ing ja rikâkâding anado sanamgi ape uduʹkaʹpeing je, nengkanaʹ kâṭhin kâmi laʹte rangeʹ âdmiko gorokolaʹ hoʹhaʹ, ar Probhu Jisuoaʹ niâ katha aboaʹ disâ doheyaʹ ucit je, 'Namonaʹ khoiʹ maonaʹre arho ḍher âsirbad menaʹa.'"
36Niâ katha men tayom Pol sanamkhoiʹ saote ukrumketeʹ koijongkede. 37Tayomte monḍoliren netakote Pol hâmutʹketeʹ cumâkidiako ar raglaʹ lagonako. 38Polaʹ moca ar angko bang lelnamako, niâ katha laʹte angko arho aima duk namkedako. Niâ tayom angkodo âni sao saote jahaj dhâriʹ canako.
Currently Selected:
Preritʹ 20: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
