Preritʹ 19
19
Ifis sohorre Pol
1Apollo jâkhni Korinthre tahalene ana somai Pol Esia prodisâmnaʹ talate Ifisre hiʹne. Aṛe ânite koekṭeʹ cela lel namketeʹ kulikeʹkoe, 2"Ape jâkhni Probhu Jisu cetanre pâtyulenape tâkhni ki Pobitro Atta namlidiape?"
Angkote âni metakidiako, "Pobitro Atta je miniâ ana katha ale banggi atenkadale."
3Tâkhni Pol menkede, "Tahale apedo akaṭaʹ bâptisma namledape?" Angkodo menkedako, "Johonaʹ bâptisma."
4Pol menkede, "Johonte mon âcurnaʹ bâptisma makosane, ar âdmiko metakosane, eke aiaʹ tainomte hijuʹheʹ Âni cetanre, manedo Jisu cetanre pâtyulaʹ hoʹaʹ."
5Niâ katha atenketeʹ angko celako Probhu Jisuoaʹ nutumte bâptisma engekedako. 6Tâkhni Poldo angko cetanre ti dohoketeʹ koijongkede ar Pobitro Atta angko cetanre hiʹne, ar angko eṭaʹ eṭaʹ bhasate katha lor ar nâbi hisâbte bhobisotnaʹ katha lorlaʹ lagonako. 7Angko celako moṭ baroṭeʹ tahalenako.
8Natayom Poldo somaj oraʹre cane ar pe mas dhâbiʹ aima sâhus suliʹ katha menkede. Issoraʹ Sorgo Rajjonaʹ bisoite jukti torko talate angkodo bujhuoʹkoe. 9Kheʹ angko talaren koekṭeʹ âdmiaʹ mon keṭeʹgi holentakoa anate angkodo bang pâtyulenako ar sanamkhoiʹaʹ lahare Jisuoaʹ ḍahar bisoite aima nindilaʹ lagonako. Tâkhni Poldo angko bâgiketeʹ cane. Celako suliʹ âni Turannoaʹ iskulre caketeʹ dinam hiluʹ jukti torko suliʹ aloconelaʹ lagone. 10Bar bochor nenkaketeʹgi cana. Anate Esiare basoyonkhoiʹ Jihudi ar Grik sanamkhoiʹ Probhuoaʹ katha aten namkedako.
Eskibarren hoponko
11Issor Pol talate aima asarjo kâmilaʹ lagone. 12Emonki Polaʹ hormo khoiʹ aiʹ rumâl ar gamcha ruâ âdmikoṭheʹ agulekheʹ angkoaʹ ruâho manjangentakoa ar kharap attaho oṛoʹketeʹ caʹsanako. 13Ar koekṭeʹ Jihudikote kharap atta coṭaʹberakosanako. Probhu Jisuoaʹ nutumte angkote kharap attate namonkhoiʹ âdmiko manjakolaʹ kurumuṭilaʹ lagonako. Angkodo mensanako, "Pol ekeyaʹ bisoite procarsane Âni Jisuoaʹ nutumte ingte ape oṛoʹ caʹaʹ hukum mapekâning." 14Angko talare Eskiba nutumte miṭiʹ Jihudi marang purohitren satʹṭeʹ hopontetʹ angka rikâsanako.
15Kheʹ miʹdin jâkhni angko angka rikisanako tâkhni kharap attate angko metakeʹkoe, "Ingte Jisuho cinhuing, Polho cinhuing, kheʹ apedo ekekanape?"
16Eke âdmi kharap attate namlidie ânite angko aghatkolaʹ lagone ar angko sanamkhoiʹ nangka aghatʹkeʹkoe je, angko khoto bikkhotoketeʹ ulonggoketeʹgi ana oraʹ khoiʹ nirnako. 17Niâ khobor jâkhni Ifis sohorre basoʹonkhoiʹ Jihudi ar Grik âdmiko baṛe darekedako tâkhni angkodo sanamkhoiʹ aima botornako, ar Probhu Jisuoaʹ nutumnaʹ aima gouroblaʹ lagonako. 18Ar aima pâtyu âdmiko hiʹlenako ar angkoaʹ nije nijeyaʹ kharap kâminaʹ bisoi sikârkedako. 19Ar ekeko jâdu uduksanako angko talare aimahorgi angkoaʹ jâdunaʹ boi miʹṭheʹ jaoraketeʹ sanamkhoiʹaʹ laharigi anako jeretʹkedako. Boinaʹ dam hisâbketeʹ lelnamna poncas hajar dinâr. 20Probhuoaʹ katha nengkaketeʹ pasnongena ar Âniaʹ sukti âdmikoaʹ monre arho ḍherketeʹ kâmilaʹ lagona.
21Nako sanam ghoṭo tayom Poldo pobitro attaoaʹ âyurte thikkede je ânido Mesiḍoniâ ar Akhaya tora Jirusalem caʹheʹ. Âni menkede, "Jirusalemre caʹ tayom ingdo Rom sohorreho caʹlaʹ hoʹtinghâʹ." 22Ânitedo Timothi ar Irasto nutumte aiʹren barya seoaiʹ Mesiḍoniâre kolkeʹkine, ar aiʹdo thoṛa din Esia prodisâmre tahane.
Ifisre golmal
23Ar ana somai khoiʹ Jisuoaʹ ḍahar bisoite aima golmal ehopna. 24Dimitʹtrio nutumte miṭiʹ sonanaʹ bidi Artemisaʹ mundir lakanaʹ kâṭiʹ kâṭiʹ rupânaʹ mundir teyarsane. Niâte mistrikoaʹdo aima lab hoʹsantakoa.
25Âni âdmitedo angko mistriko ar angko lakaniʹ eṭaʹ kârigorko miʹ jagare ṭâhuketeʹ menkede, "Boihako, apeto baṛeyape je, niâ bebsaketeʹ aboaʹ aido manjagi hoʹa. 26Kheʹ ape lelnamdape ar aten namdape je, Pol nutumte âni âdmi aboaʹ niâ Ifisre ar sanam Esia prodisâmnaʹ aima âdmiaʹ pâtyu janamketeʹ angkodo bhul ḍaharte idikeʹkoe. Ânido mene je, tite teyar deb dibikodo ekegi bangkanako. 27Niâte kebol je aboaʹ bebsanaʹ sunam caʹhaʹ anado bang, kheʹ marang dibi Artemisaʹ mundirho âuṛigi hoʹhaʹ. Ar Esia prodisâmren sanam âdmiko, emon ki, dhârtiren sanamkhoiʹ eke dibiaʹ upâsoneyako âni aiʹho marang oho tahane."
28Niâ katha atenketeʹ angko âdmi aima edrenako ar garjoketeʹ menlaʹ lagonako, "Ifisiokoren Artemis dibigi marange." 29Ar anate goṭa sohorre gonḍogol surukana. Gaius ar Arisṭarkho nutumte Mesiḍoniâren barya âdmi ekedo tâkhni Pol suliʹ caʹsanakin âdmikote ângkin sabkeʹkinâko ar sanamkhoiʹ miʹ saote sobha durupaʹ jagare nir canako. 30Poldo âdmikoṭheʹ caʹlaʹ namlede kheʹ celakote âni bang calosolidiako. 31Ana prodisâmren koekṭeʹ rajkormocâri Polren gate tahalenako. Angkodo Polṭheʹ khobor kolkedako ar nehorkidiako jate âni bipodnaʹ jhuki engeketeʹ ana sobha durupnaʹ jagare bang caʹe.
32Niâ talarigi sobhare golmal hoʹtigi tahana. Thoṛa âdmi miʹ katha menketeʹ garjoʹsanako, arho thoṛa âdmido eṭaʹ katha menketeʹ garjoʹsanako. Aima âdmigi bang baṛesanako cekelaʹ angkodo ana sobhare hiʹkanako. 33Jihudikote Aleksandar laha hate ṭheloilekheʹ tayomte koekṭeʹ âdmite âni metakidiako itâʹ menlaʹ hoʹtaihaʹ. Tâkhni Aleksandardo âdmiko samangre nijeoaʹ pokkhe katha menlaʹ tinaʹ isârate âdmiko thircolaʹ kurumuṭukede. 34Kheʹ jâkhni âdmiko baṛe darekedako je, Aleksandardo Jihudikane tâkhni sanamkhoiʹ miʹsaote prai bar ghonṭa laka niâ menketeʹ garjonako, "Ifisiokoren Artemis dibigi marange."
35Mucitʹre sohorren miṭiʹ sorkâri kormocâri âdmiko thirketeʹ menkede, "Ifisioren âdmiko, niâ katha sanamkhoiʹ baṛeyako je, marang Artemis dibiaʹ mundirnaʹ ar serma khoiʹ âniaʹ akaṭaʹ murti ujuʹkana ananaʹ bacoiʹ hoʹkane Ifis sohor. 36Niâ sâri katha jâkhni osikâr bang jutuʹa tâkhni bemaʹ laka bang kâmiketeʹ apeyaʹdo thirketeʹ tahenaʹgi ucitʹ.
37Nako âdmido aboaʹ mundir khoiʹ bang komrokadako ar aboren dibiaʹ bang nindâkadako, taoreho nako âdmi apete naṛe âgukaʹkoape. 38Judiho Dimitʹtrio ar aiʹren gate mistriko jaheyaʹ biruddhore jahan katha menlaʹ namako tahale koṭ to jhiʹgi menaʹa ar sasoniʹkoho aṛegi menaʹkoa. Angko aṛe mamla dareʹako.
39Kheʹ ape judi arho ḍher menlaʹ namape tahale sadharon sobhanaʹ talare ananaʹ mimangsa dareʹape. 40Karon niâ botor menaʹa je, aleyaʹ biruddhe lâlis hiʹ darena je niâ gonḍogolnaʹ karondo alegiâle, niâ sobha ṭâhiaʹ juktite pereʹ jahan karondo alete oho uduʹ darekoale." 41Niâ menketeʹ ânido sobha mucitʹkede.
Currently Selected:
Preritʹ 19: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
