Preritʹ 17
17
Pol ar Sildo Thisoloniki sohorre
1Pol ar Sil Amfipoli ar Aploniâ sohornaʹ talatora Thisoloniki sohorre calonâkin. Aṛe Jihudikoaʹ miṭiʹ somaj oraʹ tahalena. 2Ar Poldo aiaʹ niom lakagi ana somaj oraʹre calone ar por por peya jiruʹaʹ dingi âdmiko suliʹ Pobitro Sastronaʹ katha laite aloconakede. 3Ânite âdmiko bujhuoʹkoe ar promankede je, Khrisṭoaʹ kosṭobhoglaʹ ar goiʹ khoi jiuitʹ beredoʹaʹ dorkar tahalena. Âni menkede, "Naʹe je Jisuoaʹ bisoite ingdo apeṭheʹ procarding Ânigi âni Khrisṭokane." 4Niâ katha atenketeʹ koyekṭeʹ Jihudi pâtyuketeʹ Pol ar Sil suliʹ salaʹnako. Niâ bâgiketeʹ Issorbhokto aima Grik ar aima geni guni rejakoho ângkin suliʹ salaʹnako.
5Kheʹ thoṛa Jihudikodo monre hingsâ aṭkarkedako. Anate angkortedo bajarren koekṭeʹ kharap âdmiko lie miṭiʹ dol banokedako ar angkodo sohorre golmal badhokedako. Inâ tayom Pol ar Sildo baherren âdmikoṭheʹ âgukin laʹte angkote Jasonaʹ oraʹre sendrakinlaʹ lagonako. 6Kheʹ aṛeho angkote ângkin bang namleʹkinâko, tâkhni angkote Jason ar koekṭeʹ pâtyuonkhoiʹ boihako ṭanoketeʹ sohorren sasoniʹkoṭheʹ idikeʹkoako, ar garjoketeʹ menkedako, "Eke âdmiko goṭa dhârti golmal beradako angkodo nitoʹ naṛeho hiʹkanako. 7Jasonte aiaʹ nijeyaʹ oraʹre angkodo jaga makaʹkoe. Angkodo sanamkhoiʹgi Romio rajaoaʹ hukum bang manoketeʹ mendako je, âni bâgiketeʹ Jisu nutumte arho miṭiʹ raja miniâ."
8Niâko katha menketeʹ angkotedo Jihudiko kormokortako ar âdmiko osthirketeʹ rakapkeʹkoako. 9Tâkhni angkote Jason ar eṭaʹ sanamkhoiʹaʹ jâmin engeketeʹ angkodo bâgikeʹkoaʹko.
Biryâ sohorre procar
10Nindâ tayom pâtyuonkhoiʹ boihako Pol ar Sildo Biryâre kolkeʹkinâko. Aṛe aṭoketeʹ ângkindo Jihudikoaʹ somaj oraʹre calonâkin. 11Thisolonikiren Jihudiko khoiʹ Biryâ sohorren Jihudikodo ḍhergi bhodro tahalenako. Angko aima agroho suliʹ Issoraʹ katha atenketeʹ ana atangkedako. Pol akaṭaʹ menlede ana sârigiâ se bang ana lellaʹte dinâm hiluʹ angkodo Sastro talare sendresanako. 12Aima Jihudi Jisuoaʹ cetanre pâtyunako, niâbâgiketeʹ aima geni guni Grik rejako ar korahoponkoho pâtyunako.
13Kheʹ Thisolonikiren Jihudiko jâkhni aten namkedako je, Pol Biryâre Issoraʹ katha procarde tâkhni angko aṛeho calonako ar âdmiko uttejitoketeʹ golmal badhokedako. 14Pâtyuonkhoiʹ boihakote tâkhnigi Pol ganganaʹ kandhare kolkidiako, kheʹ Sil ar Timothio Biryârigi tahenâkin. 15Eke âdmikote Pol saote engeketeʹ idiyisanako angkote âni Ethens sohorre âgukidiako. Inâ tayom angko âdmi Sil ar Timothi laʹte niâ hukum liye Biryâre âcur calonako je, Sil ar Timothioaʹ tinâʹ taṛatâṛi sombhob caloketeʹ jate Pol suliʹ salagoʹakin.
Ethens sohorre
16Pol Ethens sohorre Sil ar Timothi laʹte ḍahar benget somai ana sohor murtite pereʹ lelkede. Anate âniaʹ atta aima bekulketeʹ rakapentaya. 17Ânido somaj oraʹ talare Jihudiko ar Issorbhokto Grikko suliʹ aloconelaʹ lagone. Niâ bâgiketeʹ ekeko bajarre hijuʹsanako angko suliʹho ânido dinâm din aloconetigi tahansane. 18Tâkhni Ipikurio ar Stoyikio dolren koyekṭeʹ masṭar Pol suliʹ torkoʹlaʹ lagonako.
Angko talaren koyekhor menkedako, "Nâi bacaldo itâʹ menlaʹ namde?" Arho eṭaʹonkhoiʹdo menkedako, "Mone hoʹkana ânido eṭaʹuniʹ issoraʹ katha procarde." Angko niâ katha menkedako karon Poldo Jisuoaʹ bisoite ar goiʹ khoiʹ jiuitʹ beretʹ bisoite manja khobor procarsane.
19Tâkhni angko masṭarkote Pol Areopag sobhanaʹ samangre idikidiako. Aṛe angkotedo Pol kulikidiako, "Aka naoa cetʹaʹ amte makokanam anado itâʹkana, anaki ale baṛe dareʹale? 20Karon am emon tinâ katha mendam ja aleyaʹ luturre odbhutgi atenoʹkana. Analaʹte niâ sanam kathanaʹ mane itâʹkana anado ale baṛelaʹ namdale." 21Angko niâ katha menkedako karon Ethensren sanam âdmiko ar ana sohorre je bidesiko tahansanako angkodo naoa naoa bisoite katha mente ar atente somai kaṭesanako.
22Tâkhni Pol Areopagnaʹ sobha talare beret tengoketeʹ menkede, "Ethens sohorren âdmiko, atenpe. Ingdo lelnamding je, apedo sanam bisoirigi marang debotakoren bhoktokanape. 23Karon ing âcur beroʹ somai apeyaʹ pujânaʹ jinisko jâkhni lelsâning tâkhni emon miṭiʹ sirâ lelnamkiding akaṭaʹnaʹ cetanredo ol menaʹa, 'Bangbaṛe debotaoaʹ bisoite.' Ape bang baṛeketeʹ ekeyaʹ upâsonadape Âniaʹ somporke ingdo apeṭheʹ procarding.
24"Issor, ekedo niâ dhârti ar niâ talare akako menaʹa sanamgi banokade, Ânigi sorgo ar dhârtiren Probhukane. Ânido tite banoyonaʹ jahan Mundirreho bang basoʹe. 25Âniaʹdo akaṭaʹnaʹ obhabgi bânuʹtaya, analaʹte âdmiaʹ ti khoiʹ pujâ engeyaʹho âniaʹ dorkar bânuʹa, karon ânitigi sanam âdmiko jiui, sahetʹ ar eṭaʹonaʹ sanamaʹgi danakoe. 26Ânitedo miṭiʹ âdmi khoiʹ sanam jâtren âdmi banokaʹkoe jate angko sanam dhârtire basoʹako. Angko tinsomai akare basoʹako anaho ânido ṭhikkade.
27Jate angkodo Issoraʹ khojako, judi jahanlakate sendra sendrate âni lelnameyako, othoco Ânido abo ekeṭheʹ khoiʹho sâhingre bânuiâ. 28Karon Âniaʹ suktitigi abodo jiui kaṭeyabo ar caloberoʹabo ar baco menaʹboa. Aperen koyekṭeʹ kobiho menkadako, "Aboho Âniren bongsodhorkanabo."
29Tahale abo jâkhni Issorren gidrâkanabo tâkhni Issorte âdmiaʹ ti ar cintâ suktite bano sona, rupâ se diriren murti moneyaʹdo aboaʹ ucit bangkana. 30Lahanaʹ dinre âdmiko bang baṛesanako mente Issor niâko lelketeʹho bang lelkade. Kheʹ nitoʹ Ânite sanam jagare sanam âdmiko pap khoiʹ mon âcurtako laʹte hukum makokane, 31karon Ânido emon miṭiʹ din ṭhikkade akaṭaʹ dinredo Âniren bachouniʹ âdmite dhârtiren âdmiko bicârkoheʹ. Ar niâ sanamkorenaʹ pâtyujoggo proman makade, analaʹte goiʹkoyonkhoiʹ tala khoiʹ Ânido beretʹkâdie.
32Goiʹonkhoiʹ arho goiʹ khoiʹ jiuitʹketeʹ beretʹnaʹ katha atenketeʹ âdmiko talaren koekhorte ṭhaṭṭailaʹ lagonako, kheʹ eṭaʹonkhoiʹ menkedako, "Niâ bisoite amaʹ katha ale arho atenlehaʹ." 33Tâkhni Poldo ana sobha bâgiketeʹ calongene. 34Koekṭeʹ âdmi Pol suliʹ saonako ar pâtyunako. Angko pâtyuonkhoiʹ talare Dionusio nutumte Areopagnaʹ sobharen miṭiʹ sobbho, Damari nutumte miṭiʹ reja ar ângkin suliʹ arho koekṭeʹ âdmi tahalenako.
Currently Selected:
Preritʹ 17: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
