Preritʹ 16
16
Pol ar Sil suliʹ Timothio
1Poldo Dorbi ar Lustra sohorre calone. Aṛe Timothio nutumte miṭiʹ cela tahensane. Âniren engat tahelene Khrisṭoaʹ cetanre pâtyuyuniʹ miṭiʹ Jihudi reja, kheʹ âniren botdo Grik jât tahalene. 2Lustra ar Iknio sohorren pâtyuyuniʹ boihako Timothioaʹ somporkote manja sakkho maʹsanako. 3Pol koikede jate nâi âdmi aiʹ suliʹ caʹe, ar ânite âni engeketeʹ Jihudiko laka sunnotkidie, karon sanamkhoiʹ baṛesanako je Timothioren botdo Grikkane.
4Ar angkodo sohor sohorkore âcuroʹsanako, ar angkotedo monḍoliko hukum makeʹkoako jate Jirusalemren preritko ar harmeko palon laʹte akako ṭhikledako ana palonako. 5Nengkagi monḍolikoren âdmiko Khrisṭo dhormo pâtyure suktisâliketeʹ rakaboʹlaʹ lagonako ar angkoaʹ songkha din din baṛhoʹlaʹ lagona.
Mesiḍoniâren âdmikoaʹ bisoite Polaʹ dorson
6Pol ar âni saoren gateko Forugiâ ar Galatiâ prodisâm tora calonako karon Esia disâmre Pobitro Attate angko katha bang procarsoleʹkoe. 7Angkodo Musiâ disâmnaʹ sorre pâhcuketeʹ Bithuniâre caloʹlaʹ kurumutukedako, kheʹ Jisuoaʹ Attate angkodo bang casoleʹkoe. 8Niâlaʹte angkodo Musiâ disâm bâgiketeʹ Troya sohorre calonako.
9Nindâ Pol miṭiʹ dorson lelkede, Mesiḍoniâ prodisâmren miṭiʹ âdmite tengoketeʹ âni nehorketeʹ metaikane, "Mesiḍoniâre hiʹketeʹ ale gorolem." 10Pol ana dorson lel sao saotigi aledo Mesiḍoniâ disâmre caloʹlaʹte sapronale, karon aledo bujhu namkedale angko talare manja khobor procar laʹte Issorte aledo ṭâhukaʹleye.
Ludiâ pâtyuoniʹ hone
11Ale Troya khoiʹ daʹ jahajte sorasori Samothraki dipre calonale, ar pora din Niâpoli sohorre hiʹnale. 12Aṛekhoiʹ ale Filipi sohorre calonale, niâ Filipigi Mesiḍoniâ ana elakanaʹ guruttopurno sohorkana. Aṛenkhoiʹ âdmiko Rom rajjoren proja tahalenako. Aledo thoṛa din ana sohorre tahenale.
13Jiruʹaʹ dinre ale sohornaʹ barhere ganganaʹ sorre calonale, monekedale aṛe Jihudikoaʹ koijongnaʹ jaga menaʹa. Aṛe eke rejako miʹṭheʹlenako aledo angkoṭheʹ duruʹketeʹ katha menlaʹ lagonale. 14Ekeko atensanako angko talare Thuâtirâ sohorren Ludiâ nutumte miṭiʹ reja tahalene. Ânido beguni rongnaʹ lugrinaʹ bebsesane. Jihudi bang hoketeʹho ânido Issoraʹ upâsonesane. Probhute Ludiâoaʹ ontor emonketeʹ jhiʹkeʹtaye jate ânido Polaʹ katha monte atenketeʹ pâtyuʹe. 15Niâte âni ar âniaʹ oraʹren sanamkhoiʹ bâptisma engekedako. Niâ tayom ânite aledo niâ menketeʹ nehorkeʹleye, "Judi ing apete Probhua cetanre pâtyuoniʹ menketeʹ monengape tahale ingâʹ oraʹre hiʹketeʹ tahanpe." Niâ katha menketeʹ ânite ale bujhuoʹleye ar saote idikeʹleye.
Pol ar Sildo jelkhanare
16Miʹdin jâkhni ale ana koijong jagare caloʹsanale tâkhni miṭiʹ juân dâsi suliʹ aleyaʹ napam hontaleya. Ânido miṭiʹ kharap attate namlidie inâte âni bhobisotnaʹ katha mendareʹsane. Inâte âniren mâlikkoaʹ aima lab hoʹsantakoa. 17Ânido Pol ar ale tayomte calo caloʹte garjoketeʹ menlaʹ lagone, "Nako âdmido sanamkhoiʹ marangutâriʹ Issorren daskanako. Kalkate pap khoiʹ baco namoʹa nakodo anagi apeṭheʹ mendako." 18Ânido aima din dhâbiʹ niâ lakagi rikite tahene. Kheʹ Poldo âṛisne âcurketeʹ âni kharap atta metakidie, "Jisu Khrisṭoaʹ nutumte ingte am hukum mamkâning, nâiaʹ talakhoiʹ oṛoʹngen." Ar tâkhnigi âni attado oṛoʹne.
19Kheʹ âniren mâlikko lelkedako je, angkoaʹ ṭhep inkamnaʹ asa bondongentakoa anate Pol ar Sil sabketeʹ bajarre netakoṭheʹ ṭano idikeʹkinâko. 20Ar sasoniʹkoṭheʹ angkin idiketeʹ menkedako, "Nâkin âdmido Jihudikanakin, nâkin âdmido aboaʹ sohorre golmal badhodâking. 21Nâkin emon sanam riniti bisoite cetʹokokanakin akaṭaʹdo Romio hisâbte aboaʹdo atang se palondo ân birodhi kâmikana."
22Eṭaʹ âdmikoho Pol ar Silaʹ biruddhore angko suliʹ salaʹnako ar sasoniʹkote ângkinaʹ lugri citriʹko oreʹkeʹtâkinako ar hapate dalkinlaʹte hukum makeʹkoyako. 23Ângkin aima dal tayom angkote jelre bharokeʹkinâko ar koṛate jogokinlaʹte jel horeonkhoiʹ hukum makeʹkoako. 24Niâ lakanaʹ hukum namketeʹ jel horeko jel bhitrinaʹ oraʹre idikeʹkinâko ar raṭare ângkinaʹ janga aṭkokeʹtâkinako.
25Tâkhni prai tala nindâ, Pol ar Sil koijongsanakin ar Issoraʹ uddessore prosongsa siringsanakin. Eṭaʹ koidikodo ana atensanako. 26Tâkhni saṭlaka marang bhumikompo hona, anate jelkhananaʹ roda dhâbiʹ thartharo rakapna. Tâkhnigi jelkhanarenaʹ sanam duârko ar sanam koidikoaʹ sikri larangentakoa. 27Jel horeiʹ jâpitkhoiʹ ebhenne ar jelnaʹ duârko jhiʹgiâ lelketeʹ aiaʹ chora oṛoʹketeʹ aiʹgi gojoʹlaʹ namkede. Âni monekede sanam koidigi dârngekadako. 28Tâkhni Poldo garjoketeʹ menkede, "Hapoi, nijeyaʹ jiuido alo nosṭeyam, aledo sanamkhoiʹgi naṛe menaʹleya."
29Tâkhni ânido ḍibiâ âgu mente bhitrire nircane ar botorte hiluʹ hiluʹte Pol ar Silaʹ jangare ujuʹne. 30Inâtayom ânite ângkindo baherre oṛoʹketeʹ metakeʹkine, "Probhu, pap khoiʹ bacoʹlaʹte ing itâʹ rikilaʹ hoʹtingâ?"
31Ângkin menkedakin, "Am ar amaʹ poribar Probhu Jisuoaʹ cetanre pâtyuʹpe, tahale pap khoiʹ bacoʹpehaʹ." 32Tayomte ângkinte âni ar âniaʹ oraʹren sanamkhoiʹ Probhuaʹ katha lâioʹkoakin. 33Jel horeiʹte ana nindâgi Pol ar Sil idiketeʹ ângkinaʹ aghatnaʹ ghao jagako ârup sâfâkeʹtâkine, inâtayom aiʹ ar aiaʹ poribarren sanamkhoiʹ tâkhnigi bâptisma engekedako. 34Ana tayom ânite ângkin aiaʹ oraʹre idiketeʹ jomlaʹ makeʹkine. Âniaʹ poribarren sanamkhoiʹ Issor cetanre pâtyukanako mente angkodo aima kusinako.
35Pora din setaʹbera sasoniʹkote angkoren kormocâriko kolketeʹ âni jel horeiʹdo metakidiako, "Ângkin âdmido bâgigirikin."
36Tâkhni jel horeiʹtedo Pol metakidie, "Am ar Sil bâgigiribanlaʹ sasoniʹkote lâikolkâdingâko. Abando nitoʹ oṛoʹ hijuʹban ar sântite caʹban."
37Kheʹ Polte angko kormocâriko metakeʹkoe, "Angkote âling begor bicârtigi sanamkhoiʹ samnere dalketeʹ jelkhananaʹ bhitrire bharoleʹlingâko, âlingho to Romio âdmikanaling. Nitoʹ ki bai baite âlingdo oṛoʹgirilingkanam? Anado bang hoʹa, Angko nijegi hiʹketeʹ âling baherre idilingmanako."
38Angko kormocârikote tâkhni niâ katha sasoniʹko baṛesokeʹkoako. Sasoniʹko jâkhni atenkedako Pol ar Sil Romiokanakin tâkhni angkodo botornako. 39Angkodo Pol ar Silṭheʹ caloketeʹ map koikedako, ar ângkindio jelnaʹ barhere âguketeʹ sohor bâgiketeʹ caloʹlaʹ aima nehorkeʹkinâko. 40Pol ar Sil jelkhoiʹ baherre oṛoʹketeʹ Ludiâoaʹ oraʹre calonâkin. Aṛe pâtyuonkhoiʹ boihako suliʹ ângkinaʹ napam honâtâkinâ. Boihako hub ma tayom ângkindo aṛekhoiʹ calonâkin.
Currently Selected:
Preritʹ 16: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
